ভারতকী প্রধানমন্ত্রী
শ্রী পি. রঙ্গা রাওগী মজা ইবুংঙো শ্রী পি.ভি. নরসিংহ রাও জুন ২৮, ১৯২১দা করীমনগরদা পোকখি। মহাক্না হাইদ্রাবাদকী উস্মানিয়া য়ুনিবর্সিতী, মুম্বৈ য়ুনিবর্সিতী অমসুং নাগপুর য়ুনিবর্সিতীদগী মহৈ-মশিং তমখি। পাখ্রা ওইহৌরবা শ্রী পি.ভি. নরসিংহ রাও মচা নুপা অহুম অমসুং মচানুপী মঙাগী মপানি।
লৌমী অমসুং উকিল ওইনা হৌরকখিবা শ্রী রাওনা রাজনীতিদা খোংদাখি অমসুং মরু ওইবা বিভাগ খরগী ফম পাইখি। মহাক আন্ধ্র প্রদেশ সরকারদা ১৯৬২দগী ৬৪ ফাওবা লো অমসুং ইনফোর্মেসন মন্ত্রী, ১৯৬৪দগী ৬৭ ফাওবা লো অমসুং ইন্দোমেন্তস মন্ত্রী, ১৯৬৭দা হকশেল অমসুং অনা-লায়েংগী মন্ত্রী অমসুং ১৯৬৮দগী ১৯৭১ ফাওবা মহৈ-মশিংগী মন্ত্রী ওইখি। মহাক ১৯৭১দগী ৭৩ ফাওবা আন্ধ্র প্রদেশকী মুখ্যমন্ত্রী ওইখি, ১৯৭৫দগী ৭৬ ফাওবা ওল ইন্দিয়া কোংগ্রেস কমিতীগী জেনরেল সেক্রেতরী ওইরখি, ১৯৬৮দগী ৭৪ ফাওবা আন্ধ্র প্রদেশকী তেলুগু একাদমীগী চিয়রমেন অমসুং ১৯৭২দগী মদ্রাজগী দক্ষিন ভারত হিন্দী প্রচার সভাগী ভাইস প্রসিদেন্ত ওইরখি। মহাক ১৯৫৭তগী ১৯৭৭ ফাওবা আন্ধ্র প্রদেশ বিধান সভাগী মীহুৎ, ১৯৭৭দগী ৮৪ ফাওবা লোকসভাগী মীহুৎ ওইখি অমসুং দিসেম্বর ১৯৮৪দা রামতেক্তগী নিপালশুবা লোক সভাগীদমক খনখি। পাব্লিক একাউন্তস কমিতীগী চিয়রমেন ওইনা ১৯৭৮-৭৯দা মহাক্না লন্দন য়ুনিবর্সিতীগী এশিয়ান অমসুং অফ্রিকান স্তদিজ স্কুলনা শিল-লাংবা খা এশিয়াগী মতাংদা তৌবা কনফ্রেন্স অমদা শরুক য়াখি। শ্রী রাও ভারতীয় বিদ্যা ভবনগী আন্ধ্র সেন্তরগী চিয়রমেনসু ওইরম্মি। মহাক জনুৱারী ১৪, ১৯৮০দগী জুলাই ১৮, ১৯৮৪ ফাওবা মপান থৌরম পুবা মন্ত্রী, জুলাই ১৯, ১৯৮৪দগী দিসেম্বর ৩১, ১৯৮৪ ফাওবা য়ুমলৈ-কৈরৈগী মন্ত্রী অমসুং দিসেম্বর ৩১, ১৯৮৪দগী সেপ্তেম্বর ২৫, ১৯৮৫ ফাওবা ঙাক-শেল মন্ত্রী ওইখি। সেপ্তেম্বর ২৫, ১৯৮৫দগী মহাক্না হ্যুমেন রিসোস দিব্লপমেন্ত মন্ত্রীগী অহেনবা ফমসু পুরম্মি।
শ্রী রাও ঈশৈ, সিনেমা অমসুং থিয়েতরদা পুক্নীং চংলম্মি। ভারতকী ফিলোসোফী অমসুং কলচর, লোইননা ফিক্সন অমসুং পোলিতিকেল কমেন্তরী ইবা, লোনশিং তম্বা, তেলুগু অমসুং হিন্দীদা শৈরেং ইবা লোইননা সাহিত্যদা থোইদোক হেন্দোক্না মহাক্কী পুক্নীং চংলম্মি। মহাক্না লাইওইখ্রবা শ্রী বিশ্বনাথ সত্যনারায়ণগী অফাওবা তেলুগু উপন্যাস ‘বৈই পদাগালু’গী হিন্দীদা হন্দোকপা ‘সহস্রফন’ অমসুং কেন্দ্রীয় সাহিত্য একাদমীনা ফোংবা লাইওইখ্রবা শ্রী হরি নরায়ণ আপ্তেগী অফাওবা মরাথী উপন্যাস ‘পান লক্ষত কোন ঘেতো’গী তেলুগুদা হন্দোকপা ‘অম্বালা জীবিতম’ মাই পাক্না ফোংদোকখি। মহাক্না অথোইবা লাইরিক কয়ামরুম মরাথীদগী তেলুগু অমসুং তেলুগুদগী হিন্দীদা হন্দোকখি অমসুং তোঙান তোঙানবা চেফোংশিংদা খুৎই কয়া উপন্যাস অমগী মনুংদা ফোংদোকখি। মহাক্না রাজনীতিগী ওইবা মতাংশিং অমসুং মরি লৈনবা হিরমশিংদা য়ুনাইতেদ স্তেৎ অমেরিকা অমসুং নোংচুপ জর্মনীগী য়ুনিবর্সিতীশিংদা ৱা ঙাংখি। মপান থৌরম পুবা মন্ত্রী ওইনা মহাক্না ১৯৭৪দা ব্রিতেন, নোংচুপ জর্মনী, স্বিৎজর্লেন্দ, ইতলী অমসুং ইজিপ্তনচিংবা লৈবাকশিংদা চৎখি।
মপান থৌরম পুবা মন্ত্রী ওইনা মহাক্কী মতমদা শ্রী রাওনা ইন্তর্নেস্নেল দিপ্লোমেসীগী লমদা মহাক্কী মহৈ অমসুং রাজনীতি অমসুং লৈঙাকলোনগী হৈ-শিংবা অদু মাই পাক্না শিজিন্নখি। ফম পাইবা নুমিৎ খরনিগী মতুংদা মহাক্না জনুৱারী ১৯৮০দা নই দিল্লীদা য়ুএনআইদিওগী অহুমশুবা কনফ্রেন্স লুচীংখি। মহাক্না মার্চ ১৯৮০দা ন্যুয়োর্ক্তা জি-৭৭গী মীফমসু লুচীংখি। ফেব্রুৱারী ১৯৮১দা নন-এলাইন লৈবাকশিংগী মপান থৌরম পুবা মন্ত্রীশিংগী মীফমদা মহাক্না লৌখিবা থৌদাংগীদমক শ্রী রাওবু অদুক্কী মতিক শিংথানখি। শ্রী রাওনা মালেমগী ওইবা শেনমিৎলোনগী হিরমশিংদা মরন্নাই ওইনা পুক্নীং চংবা উৎখি। মরন্নাই ওইনা মে ১৯৮১দা করাকাসতা ইসিদিসিগী জি-৭৭গী মীফমদা ভারতকী মীহুৎ কাংবু লুচীংখি।
১৯৮২ অমসুং ১৯৮৩ অসি ভারত অমসুং মসিগা মপান থৌরমগী পোলিসীগীদমক্তা য়াম্না মরু ওইখি। গল্ফ লান মনুংদা নন-এলাইন মুবমেন্তকী তরেৎশুবা মীফম ভারত্তা পাংথোকখিবা অদু শ্রীমতী ইন্দিরা গান্ধীনা লুচীংখি। ১৯৮২দা ভারত্তা মসিগী য়ুম্বু ওইনবা হায়রকখি অমসুং মসিগী মথংগী চহিদা তোঙান তোঙানবা লৈবাকশিংগী রাজ্য অমসুং লৈঙাক মকোকশিংগী মরক্তা খোংজংগা মরি লৈনবা ইনফোর্মেল ওইবা ৱাখল্লোনগীদমক্তা ন্যুয়োর্ক্তা মীফম পাংথোকখি, মতম অদুদা পি.ভি. নরসিংহ রাওনা নন-এলাইন লৈবাকশিংগী মপান থৌরম পুবা মন্ত্রীশিংগা লোইননা নই দিল্লী অমসুং য়ুনাইতেদ নেসন্শতা পাংথোকপা মীফমশিং লুচীংখি।
শ্রী রাও অখন্নবা নন-এলাইন মিসনগীসু লুচীংবা ওইখি মদুনা পেলেস্তিয়ান লিবরেসন ওগনাইজেসনগী ৱারোইশিন পুরক্নবগীদমক নবেম্বর ১৯৮৩দা নোংচুপ এশিয়া লৈবাকশিংদা চৎখি। শ্রী রাও নই দিল্লীগী সরকারগী কমনৱেল্থ মকোকশিং অমসুং সাইপ্রসকা মরি লৈনবা হিরমশিংদা পাংথোকপা মীফমদা শেমখিবা এক্সন গ্রুপকা লোইননা অচেৎপা মওংদা মরি লৈনখি।
মপান থৌরম পুবা মন্ত্রী ওইনা শ্রী রাওনা য়ু.এস.এ., য়ু.এস.এস.আর., পাকিস্তান, বাঙ্গলাদেশ, ইরান, ভিয়েৎনাম, তেঞ্জানীয়া অমসুং গুয়েনানচিংবা লৈবাকশিংগা লোইননা তোঙান তোঙানবা জোইন্ত কমিসনগী ভারতকী মাইকৈগী লুচীংবা ওইখি।
শ্রী রাওনা জুলাই ১৯, ১৯৮৪দা য়ুমলৈ-কৈরৈ মন্ত্রীগী ফম পুখি। মহাক ফম অসিগীদমক অমুক হন্না খনখি লোইননা নবেম্বর ৫, ১৯৮৪দা প্লানীং মন্ত্রীগী অহেনবা ফমসু পুখি। মহাক দিসেম্বর ৩১, ১৯৮৪দগী সেপ্তেম্বর ২৫, ১৯৮৫ ফাওবা ঙাকশেল মন্ত্রী ওইনা খনখি। সেপ্তেম্বর ২৫, ১৯৮৫দা মহাক হ্যুমেন রিসোর্স দিব্লপমেন্ত মন্ত্রী ওইখি।
