ভারতকী প্রধানমন্ত্রী

পন্দিৎ জৱাহরলাল নেহরু ১৮৮৯গী নবেম্বর ১৪দা এলাহাবাদতা পোকখি। মহাক্না মহাক্কী অহানবা মহৈ-মশিং মহাক্কী ময়ুমদা লনাই ওজাশিংদগী তম্বা হৌখি। চহি ১৫ শুরকপদা মহাক ইংলেন্দা চৎখি অমসুং হেরোদা চহি অনি লৈরবা মতুংদা মহাক্না কেম্ব্রিজ য়ুনিবর্সিতীদা মিং চনখি মফম অদুদগী মহাক্না নেচরেল সাইন্সতা গ্রেজুএসনগী দিগ্রী ফংখি। ১৯১২দা ভারত হল্লক্লবা মতুংদা রাজনীতিদা য়াওখি। মহৈরোই ওইরিঙৈ মতমদসু মহাক্না মীরম লৈঙাক্কী মখা পোনবা লৈবাকশিংগী নীং খা তম্বগী ইহৌদা পুক্নীং লুপলম্মি। মহাক আয়রলেন্দা হৌখিবা সিন ফেনগী খোংজংদা হেন্না পুক্নীং চংখি। মহাক্না ভারতকী নীং খা তম্বগী ইহৌদা মথৌ তাবা মওংদা শরুক য়াখি।

১৯১২দা মহাক্না মীহুৎ অমা ওইনা বাঙ্কীপোর কোংগ্রেসতা শরুক য়াখি অমসুং ১৯১৯দা এলাহাবাদকী হোম রুল লিগকী সেক্রেতরী ওইখি। ১৯১৬দা মহাক মহাত্মা গান্ধীগা অহানবা ওইনা উন্নখি অমসুং মঙোন্দা থোইদোক্না ইথিল পোকখি। মহাক্না ১৯২০দা উত্তর প্রদেশকী প্রতাপগর জিলাদা অহানবা কিসান মার্চ শিনখি। ১৯২০ – ২২গী নন-কোওপরেসন মুবমেন্তকা মরি লৈননা মহাক জেলদসু অনীরক চংখি।

পন্দিৎ নেহরু ১৯২৩গী সেপ্তেম্বরদা ওল ইন্দিয়া কোংগ্রেস কমিতীগী জেনরেল সেক্রেতরী ওইখি। মহাক্না ১৯২৬তা ইতলী, স্বিৎজরলেন্দ, ইংলেন্দ, বেল্জিয়ম, জর্মনী অমসুং রুসিয়াদা চৎখি। বেল্জিয়মদা মহাক্না ইন্দিয়ন নেস্‌নেল কোংগ্রেসকী ওফিসিয়েল মীহুৎ অমা ওইনা ব্রুসেলদা শোত্থবা লৈবাকশিংগী মীফম (কোংগ্রেস ওফ ওপ্পরেসদ নেস্নেলিতিজ)দা শরুক য়াখি। মহাক্না ১৯২৭তা মোস্কোদা ওক্তোবর সোসিএলিস্ত রিবোলুসনগী ১০ শুবা চহিগী থৌরমদা শরুক য়াখি। মসিগী মমাংদা ১৯২৬তা, মদ্রাজ কোংগ্রেসতা কোংগ্রেসপু নীং খা তম্বগী পান্দমগীদমক্তা কমিৎমেন্ত পীবদা নেহরুগী মরুওইবা থৌদাং য়াওখি। ১৯২৮দা লখনৌদা সাইমন কমিশনগী মায়োক্তা খোংচৎ অমা লুচিংলিঙৈদা লাথী চার্জ তৌরকখি। ১৯২৮গী ওগস্ত ২৯দা মহাক্না ওল পার্তী কোংগ্রেসতা শরুক য়াখি অমসুং মখোয় অদু ইন্দিয়ন কন্সতিত্যুস্নেল রিফোর্মগী নেহরু রিপোর্ত্তা মখোয়গী খুয়েক পীখিবশিং অদুগী মনুংদা অমা ওইখি। রিপোর্ত অদুগী মমিং মহাক্কী মপা শ্রী মোতিলাল নেহরুগী মিংদা থোনখি। চহি অদুমক্তদা মহাক্না ‘ইন্দিপেন্দেন্স ফোর ইন্দিয়া লিগ’ লিংখৎখি অমসুং মদুগী জেনরেল সেক্রেতরী ওইখি। লিগ অসিগী মরু ওইবা পান্দমদি ভারতপু ব্রিতিশ লৈঙাক্তগী মপুং ফানা তোখাইবনি।

১৯২৯দা পন্দিৎ নেহরু ইন্দিয়ন নেস্নেল কোংগ্রেসকী লাহোর সেসনগী প্রসিদেন্ত ওইনা খনখি মসিগী মরু ওইবা পান্দমদি লৈবাক অসিবু মপুং ফানা নীং খা তম্বা ফংহনবনি। মহাক ১৯৩০-৩৫গী মতমদা থুমগী সত্যগ্রহ অমসুং কোংগ্রেসকী অতৈ খোংজংশিংনা মরম ওইদুনা কয়ারক হন্না জেলদা চংখি। মহাক্না ১৯৩৫গী ফেব্রুৱারী ১৪দা অল্মোরা জেলদা ‘পুন্সি ৱারী’ ইবা লোইখি। থাদোক্লবা মতুংদা মহাক্না মাগী মশা ঙমদ্রবী লোইনবীবু উননবগীদমক স্বিৎজরলেন্দা চৎখি অমসুং মহাক্না ১৯৩৬কী ফেব্রুৱারী-মার্চতা লন্দন্দা চৎখি। মহাক্না ১৯৩৮গী জুলাইদা মফম অদুদা সিভিল ৱার চৎথরিঙৈ মতম অদুদা স্পেন্দসু চৎখি। অনিশুবা মালেমগী লাঞ্জাওগী কোর্ত-ব্রেক্কী হেক মমাংদা মহাক্না চিনাদসু চৎখি।

পন্দিৎ নেহরুনা ভারতপু লান্দা নমদুনা য়াওহনবগী মায়োক্তা লেপ্লদুনা মতোমতগী ওইবা সত্যগ্রহ পাংথোকখি, মসিনা মরম ওইদুনা ১৯৪০গী ওক্তোবর ৩১দা মহাকপু ফাজিনখি। মহাকপু ১৯৪১গী দিসেম্বরদা অতৈ লুচিংবশিংগা লোইননা জেলদগী থাদোকখি। ১৯৪২গী ওগস্ত ৭তা বোম্বেদা পাংথোকখিবা ওল ইন্দিয়া কোংগ্রেস কমিতীগী মীফমদা পন্দিৎ নেহরুনা পুৱারী ওইরবা ৱারেপ ‘ক্বিৎ ইন্দিয়া’বু থবক্তা ওন্থোক্নবা পান্দম লেপথোকখি। ১৯৪২গী ওগস্ত ৮দা মহাকপু অতৈ লুচিংবশিংগা লোইননা ফাদুনা অহমদনগর কিলাদা পুখিরম্মি। মসি মহাক্কী অরোইবা জেলদা চংবনি অমসুং মসিদা মহাক্না খ্বাইদগী মতম শাংনা জেলদা লেনখি। মপুন্সিদা মহাক ৯ লক জেলদা চংখি। ১৯৪৫গী জনুৱারীদা থাদোক্লবা মতুংদা মহাক্না নীংথৌ শেম্বগী মরাল মায়োক্নরবা আই এন এগী ওফিসরশিং অমসুং মীওইশিংগী লিগেল দিফেন্স তৌখি। ১৯৪৬কী মার্চতা পন্দিৎ নেহরুনা সাউথ-ইস্ত এশিয়াদা চৎখি। ১৯৪৬কী জুলাই ৬তা মহাক মরিরক শুবা ওইনা কোংগ্রেসকী প্রসিদেন্ত খনখি অমসুং ১৯৫১দগী ১৯৫৪ ফাওবা অহুম্লক অমগা অমুক মহাকপু ফম অসিগীদমক খনখি।