ভারতকী প্রধানমন্ত্রী

মীয়ামগী মরক্তা শক্নাইরবা অতল বিহারী বাজপেয়ী মহiক্কী পোলিতিকেল কমিৎমেন্তকীদমক্তা থোইদোক হেন্দোক্না খঙনৈ। ওক্তোবর ১৩, ১৯৯৯ দা মহাক্না অনীরকশুবা ওইনা থংন-থংননা নেস্নেল দেমোক্রেতিক এলাইন্সকী অনৌবা অপুনবা সরকারগী লুচিংবা ওইনা ভারতকী প্রধানমন্ত্রীগী ফম পাইখি। মহাক ১৯৯৬ তা য়াম্না তেনবা মতমগী প্রধানমন্ত্রী ওইখি। পন্দিৎ জৱহরলাল নেহরুগী মতুংদা মহাক লেপ্তনা অনিরক থংনা থংননা প্রধানমন্ত্রী ওইখিবা অহানবা প্রধানমন্ত্রীনি।

সেনিয়র এম পি শ্রী বাজপেয়ীজী রাজনীতিগী লমদা চহি ১০ গী খুজিং মরিরক মতিং লৈনা থবক তৌরম্মি। মহাক লোক সভা (হাউস ওফ দ পিপল)দা মাপল্লক অমুং রাজ্য সভা (হাউস ওফ দ স্তেৎ)তা অনীরক খনখি, মসিমক মশানা রেকোর্দ অমা ওইজরি।

ভারতকী প্রধানমন্ত্রী, মপানগী থৌরম পুবা মন্ত্রী, সংসদকী তোঙান তোঙানবা মরুওইবা স্তেন্দিং কমিতীশিংগী চিয়রপার্সন অমসুং ওপোজিসনগী লুচিংবা ওইনা মহাক্না নীং খা তম্লবা মতুংদা ভারতকী দোমেস্তিক অমসুং ফোরেন পোলিসীবু মশক থোক্ননবা হোৎনবদা অচৌবা থৌদাং য়ারম্মি।

শ্রী বাজপেয়ীজীনা মহাক্কী মহৈরোই ওইরিঙৈগী পুন্সিদা অহানবা ওইনা মহাক্না চহি কুমজা ১৯৪২দা ব্রিতিশকী কোলোনিয়েল রুলবু লোইশিনখিবা ভারত থাদোকউ হায়বা খোংজংদা য়াওখিবদগী নেস্নেলিস্ত পোলিতিক্সতা খোংদাবা হৌরকখি। মহাক পোলিতিকেল সাইন্স অমসুং লোগী মহৈরোই ওইরকখি অমসুং কোলেজগী মতমদা মহাক্কী পুক্নীং অসি মপান থৌরমগী মতাংদনা হেন্না চংখি। মহাক্কী হৈনবী অসি মতম শাংনা লৈখি অমসুং মখল কয়াগী লৈবাক ময়ামগী ওইবা অমসুং লৈবাক অনিগী ওইবা মীফম কয়াদা ভারতকী মহুৎ শিন্দুনা মহাক্কী হৈথোই শিংথোইবা অদুগী মশক তাকখি।

শ্রী বাজপেয়ীজীনা মহাক্কী কেরিয়র অসি পাউমী ওইনা হৌরকখি অমসুং ১৯৫১দা ভারতীয় জন সংঘদা য়াওরবা মতুংদা মহাক্না পাউমীগী থবক তোকখি। নেস্নেল দেমোক্রেতিক এলাইন্সকী মরু ওইবা অমা ওইরিবা ঙসিগী ভারতীয় জনতা পার্তী অসি হান্না ভারতীয় জন সংঘ হায়না খঙনরম্মি। মহাক্না শৈরেং কয়াসু ইখি অমসুং মদুবু নৈনরোই কয়ানা থাগৎনখি। হৌজিকসু মহাক মহাক্কী রাজনীতিগী ওইবা মতাংদগী মতম কাইথোক্তুনা ঈশৈ তাবা অমসুং থোংবা থাকপনচিংবা মহাক্কী হৈনবীশিং পাংথোক্লি।

শ্রী বাজপেয়ী ১৯২৪ গী দিসেম্বর ২৫ দা মধ্য প্রদেশকী গ্বালিয়রদা লৈবা ইং তপ্পা স্কুল ওজা অমগী ইমুংদা পোকখি। মহাক্কী লনাই পুন্সিদা ফংখিবা মাই পাকপশিং অসি মহাক্কী রাজনীতিগী হৈথোই শিংথোইবা অমসুং ভারতকী দেমোক্রেসীগী খুদোলনি। হৌখিবা চহি ১০ গী খুজিং কয়াদা মহাক মলেম অপুনবগী লিবরেল ওইবা ৱাখল্লোন অমসুং দেমোক্রেতিক আইদিয়লশিংগী কমিৎমেন্তা ইকাই খুম্নবা উৎপা লুচিংবা ওইনা শাফোংলকখি।

নুপীশিংগী শক্তি হেনগৎহনবা অমসুং মান্নবা খুন্নাইগী মীচং শ্রী বাজপেয়ীনা ভারতপু জাতি পুম্নমক্কী মরক্তা শান্না উবা ঙম্বা, চাওখৎলবা অমসুং মপুং ফাবা লৈবাক অমা ওইনা মাংদা চখৎপা অদু য়েংবা পামখি। মহাক্না অদুগুম্বা লৈবাক অদুগী সভ্যতা চহি ৫০০০ লিরবা অমসুং মথংগী চহি লিশিং অমদা লাক্কদৌরিবা শিংনবশিংবু মায়োক্ননবগীদমক শেম শারিবা ভারতকীদমক লেপখি।

মহাকপু ভারতকীদমক ওইজবা থিদনা কৎথোকপা অমসুং চহি ৫০ দগী হেন্না লৈবাক অমসুং খুন্নাইগী সেবা তৌবগীদমক ভারতকী অনিশুবা খ্বাইদগী হেনবা মীচমদা পীবা ইকাই খুম্নবা পদ্ম বিভুষণ পীখি। ১৯৯৪দা মহাকপু ভারতকী ‘বেস্ত পর্লিয়ামেন্তরিয়ান’ ওইনা খনখি। সাইতেসন্দা ইখিঃ “ মহাক্কী মিমিংগী মতৌগুম্না, অতলজী শক্নাইরবা জাতিগী লুচীংবা, খঙ হৈরবা পোলিতিসিয়ান, মশাগী খন্দবা সোসিয়েল ৱাকর, শক্তি লৈবা ৱাঙাংলোই, কবি, সাহিত্যকার, পাউমী অমসুং মাইথোং য়াম্বা মীশক অমনি। অতলজীনা মীয়ামগী অপাম্বশিং অসি লৈখাই তানা পুখোক্তুনা লাকখি..মহাক্না মতম পুম্নমক্তা নেস্নেলিজমগী মাইকৈদা ফোংদোক্তুনতা লাকখি।”