প্রধান মন্ত্রীবু খঙউ

শ্রী নরেন্দ্র মোদীনা 2024 পার্লিয়ামেন্তরী মীখলদা চাউনা মায় পাক্তুনা জুন 9, 2024দা অহুম্লকশুবা ওইনা ভারতকী প্রধান মন্ত্রী ওইনা ৱাশক লৌখি। মায় পাকপা অসিনা শ্রী মোদীগী লুচিংবু হেন্না মপাঙ্গল লৈহনলদুনা থংন-থংননা অহুম্লকশুবা তার্মগী মরাইবক লেপখি।

2024গী মীখল অসিদা মশীং য়াম্লবা ভোত থাদবা য়ারবশিংনা শ্রী মোদীগী লুচিং অমসুং লৈবাক অসিগী মঙলান্দা মখা তানা থাজবা উৎলদুনা ভোতর মশীং য়াম্না থোকখি। মহাক্কী কেম্পেন্দা শেন্মিৎলোন চাউখৎপা, জাতি অসিগী শান্তি রক্সা, অমসুং খুন্নাই চাউখৎনবগী থৌরাং কয়াদা মীৎয়েং থমখি, মসিনা মীয়ামদা পাক শন্না নিলহনখি।

শ্রী মোদীগী অহুমশুবা তার্ম অসিদা মহাক্কী মমাংগী লোইশঙ পায়রিঙৈ মতমদা শেমখিবা য়ুম্ফমদা অনৌবা তেক্নোলোজীগী শক্তি, ইনফ্রাস্ত্রকচর চাউখৎপা, অমসুং অন্তর্জাতিগী থাক্তা লৈবা য়ানবশিং হান্নদগী হেন্না মীৎয়েং চঙদুনা ভারতপু অন্তর্জাতিগী থাক্তা লৈরিবা শক্তিগী ফিভম হেন্না ফগৎহন্নবা হোৎনগনি। মমাংদা উখিদ্রিবা অহুশুবা তার্ম অসিদা লৈবাক অসিবু হেন্না চাউখৎপা অমসুং তংদু লৈতাবা ফিভমদা পুরক্নবা শ্রী মোদীনা হনবা লৈতনা পুক্নিং চিংশিল্লিবা অমসুং ভারত মচা মিলিয়ন কয়ানা মহাক্কী মফমদা থম্লিবা থাজবা য়াওরি।

নীংখা তম্লবা মতুংদা পোকপা ইহান হানবা প্রধান মন্ত্রী ওইরিবা শ্রী মোদীনা 2014দগী 2019 ফাওবা অমসুং 2019দগী 2024 ফাওবা ভারতকী প্রধান মন্ত্রী ওইখি। ওক্তোবর 2001 দগী মে 2014 ফাওবা গুজরাতকী খ্বাইদগী শাংবা মুখ্য মন্ত্রী ওইনা মহাকপু হেন্না মশক খঙনৈ।

2014 অমসুং 2019 গী পার্লিয়ামেন্তরী মীখলদা, শ্রী মোদীনা ভারতিয়া জনাতা পার্তীবু তাংকক অনিমক্তা চাউনা মায় পাকহন্দুনা মপুং ফাবা মেজোরিতী ফংখি। রাজনিতীগী পার্তী অমনা অসিগুম্বা মপুং ফানা মেজোরিতী ফংখিবা ইকোন কোনবসি 1984গী মীখলদনি।

‘সবকা সাথ, সবকা বিকাস, সবকা বিশ্বাস’ হায়বা খোলাও অসিগা লোইননা, শ্রী মোদীনা পুম্নমকপু কোনশিনবা, চাউখৎপদা মায় ওনশিনবা অমসুং শেঞ্জা থুমজা লৈতবা লৈঙাক অমা পুরক্তুনা লৈঙাক্লোন্দা চাউনা অহোংবা পুরকখি। প্রধান মন্ত্রী অসিনা অন্ত্যদয়া, নৎত্রগা থৌশিল অমসুং থৌরাংশিংবু খ্বাইদগী অরোইবা মাইল ফাওবা শোইদনা য়ৌহনবগী পান্দম মায় পাক্নবা খোঙজেল য়াঙনা অমসুং চাউনা হোৎনরক্লি।

মকোক থোংবা অন্তর্জাতিগী এজেন্সী কয়ানসু খঙলে মদুদি প্রধান মন্ত্রী নরেন্দ্র মোদীগী লুচিং মখাদা ভারতনা লৈত-লাইরববু খোঙজেল য়াঙনা মুত্থৎলি। নিতি আয়োগকী খ্বাইদগী নৌবা রিপোর্ত ‘মলতিদাইমেন্সনেল পোভর্তী ইন ইন্দিয়া সিন্স 2005-2006’ না ফংবগী মতুং ইন্না, মীওই করোর 25 হেনবনা হৌখিবা চহি মাপনলোম অসিদা নাকন কয়াদগী লাকপা লাইরবদগী নান্থোকপা ঙম্লে। অসিগুম্বা মশক থোকপা মায় পাকপা অসিগী হোৎনজমলদি লৈত-লাইরগী মওং পুম্নমক কোকহন্নবা হোৎনরিবা লৈঙাক্কী অচৌবা থৌশিল-থৌরাংশিংগী মহৈননি।

ঙসিদি ভারত অসি মালেমগী খ্বাইদগী চাউবা হেল্থকেয়র থৌরাং, আয়ুশ্মান ভারতকী য়ুম্বু ওইরি। ভারত মচা করোর 50 হেন্না কোনশিল্লদুনা, আয়ুশ্মান ভারতনা খ্বাইদগী মগুন লৈবা অমসুং মমল হোংবা হেল্থকেয়রশিং লাইরবা অমসুং নিও-মিদল ক্লাসকী ইমুংশিংদা ফংহল্লি।

মালেমদা খ্বাইদগী মকোক থোংবা হকশেলগী জর্নেলনি হায়না খন্নরিবা লান্সেতনা আয়ুশ্মান ভারতপু ৱাংনা থাংগৎলদুনা হায়খি মদুদি থৌশিল অসিনা ভারত্তা লৈবা হকশেলগী সেক্তরদা লৈরিবা পেন্দবশিংবু কোকহল্লি। জর্নেল অসিনা প্রধান মন্ত্রীগী য়ুনিভর্সেল হেল্থ কভরেজ পীবদা হেন্না মরুওইবা থম্লিবা থৌরাং অসিবু খঙবীরি।

ফাইনান্সিএল এক্সক্লুজন হায়বসি লাইরবশিংগী অকিবা অমনি হায়বসি খঙলদুনা প্রধান মন্ত্রীনা প্রধান মন্ত্রী জন ধন য়োজনা হৌদোকখি, মসিনা ভারত মচা খুদিংমক্কী বেঙ্ক একাউন্ত হাংদোকহন্নবা পান্দম থমখি। হৌজিক্তি জন ধন একাউন্ত করোর 51 হাংখ্রে। হায়রিবা একাউন্তশিং অসিনা শেল তুংশিল্লমদবশিংবু শেল তুংশিলহনবদা নত্তনা অতোপ্পা শক্তি লৈহন্নবগী মচাকশিংদা থোং লাউনা হাংদোকহল্লে।

জন ধনদগী খোঙকাপ অমা হেনগৎলগা খুন্নাই অসিগী খাইদগী শোত্থরবা কাংলুপশিংদা ইন্সুরেন্স অমসুং পেন্সনগী খুদোংচাবা পীদুনা শ্রী মোদীনা জন সুরক্ষাদা অমুক মায় ওনশিল্লি। জাম ত্রিনিতী (জন ধন – আধার – মোবাইল)না দলালি চাবা মুত্থৎলে অমসুং তেক্নোলোজীনা শক্তি পীদুনা মনুং মপান ফাওনা উবা অমসুং খোঙজেল য়াঙহল্লে।

2016 দা হৌদোকখিবা প্রধান মন্ত্রী উজ্বালা য়োজনানা লাইরবশিংদা লেম্না চাকথোং গ্যাসকী কন্নেক্সন পীরি। মসিনা খুদোংচাবা ফংগদবা অয়াম্বনা নুপীনা ওইবা করোর 10দা মৈখু চেন্দ্রবা চাকখুম পীনবা হোৎনবদা অচৌবা থৌদাং অমা লৌরি।

নীংখা তম্লবা মতুং শাংলবা চহি 70 অসি ফাওবা ইলেক্ত্রিসিতী ফংলমদবা খুঙ্গং 18,000 বু মৈ ফংহনখ্রে।

শ্রী মোদীনা থাজৈ মদুদি ভারত মচা অমত্তনা য়ুম কৈ লৈতনা লৈহল্লোই অমসুং মসিগী মঙলান অসিবু মঙফাওনহন্নবা য়ুম করোর 4.2 হেন্না পি.এম. আৱাস য়োজনাগী মখাদা 2014 অমসুং 2024 গী মরক্তা কাইথখ্রে। জুন 2024 দা, অহুম্লকশুবা তার্ম পায়নবা লোইশঙ পায়রবা মতুংদা খ্বাইদগী ইহান হানবা কেবিনেতকী ৱারেপ অসি খুঙ্গং অমসুং অর্বানগী অহেনবা ইমুং করোর 3 দা য়ুম শানবা মতেং পীবা অসিনি, মসিনা শ্রী নরেন্দ্র মোদীগী লৈবাক অসিদা য়ুম শাবীবা অমসুং মীপুম খুদিংমক্তা ইকাইখুম্নবা পীবা অমসুং মগুন লৈবা পুন্সি মহিং ফংহন্নবা হোৎনরিবা অসিবু ময়েক শেংনা তাক্লে।

লৌউশিংউ হায়বসি শ্রী নরেন্দ্র মোদীগা য়াম্না নক্নবা সেক্তর অমনি। 2019গী ইন্তরিম বজেত্তা, লৈঙাক অসিনা লৌমীশিংগীদমক পি.এম. কিসান সম্মান নিধি হায়বা শেলগী তেংবাংগী থৌশিল অমা হৌদোকখি। চয়োল অনিরোম খক্তদা, ফেব্রুৱারী 24, 2019দা, থৌশিল অসি হৌদোকখি অমসুং মদুগী মতুং তারকপদা ইন্সতোলমেন্তশিং অদু চাং নাইনা পীরি। প্রধান মন্ত্রী মোদীগী অনিশুবা তার্মগী ইহান হানবা কেবিনেত মীফমদা, হান্না লৈরম্বা একর 5গী লিমিত লৌথোক্তুনা লৌমী খুদিংমক্তা পি.এম. কিসানগী কান্নবা ফংহন্নবা ৱারেপ লৌখি। জুন 2024 ফাওবদা শ্রী মোদীনা পি.এম. কিসান থৌশিলগী 17 শুবা ইন্সতোলমেন্ত বারানসীদা পীখি, মসিদা লৌমী করোর 9.2 না লুপা করোর 20,000 হেনগদবা কান্নবা ফংখি।

শ্রী মোদীনা লৌউশিংউগী য়াম্না চাউবা থৌরাংশিং হায়বদি, সোইল হেল্থ কার্দ, হেন্না ফবা কৈথেলগীদমক ই-নাম অমসুং ঈথৈ লৌখোংদা অনৌবা মীৎয়েং চংদুনা অনৌবা থৌশিলশিং পায়খৎনবা মীৎয়েং থম্লি। মে 30, 2019দা, প্রধান মন্ত্রীনা ঈশিংগা মরী লৈনবা হীরম খুদিংমক পায়খৎনবা অনৌবা জল শক্তি মন্ত্রালয় অমা শেমদুনা মরুওইবা ৱাশক অমা পাঙথোকখি।

ওক্তোবর 2, 2014দা, মহাত্মা গান্ধীগী মপোক কুম্মোন্দা, প্রধান মন্ত্রীনা ‘স্বছ ভারত মিসন’ হায়বা লৈবাক শীনবা থুংনা লু নানবগী মীয়ামগী ঈহৌ অমা হৌদোকখি। ঈহৌ অসিগী চাউবগী চাং অমসুং শাফু অসি পুৱারীদা লৈহৌরগদবা অমনি। ঙসিদি সেনিতেসনগী চাংসু 2014দা 38% লৈরম্বদগী 2019দা 100% য়ৌনা ৱাংলে। রাজ্য অমসুং য়ুনিয়ন তেরিতোরী খুদিংমকপু ওপন দেফিকেসন ফ্রী (ও.দি.এফ.) হায়না লাউথোকখ্রে। গঙ্গা লু নান্না থম্নবগীদমক্তসু মতীক চাবা থৈঊরাং লৌখৎলে।

ৱার্ল্দ হেল্থ ওর্গানাইজেসন্না স্বছ ভারত মিসনবু শিংথাখি অমসুং পুন্সি লাখ অহুম হেন্না কনবা ঙমগনি হায়না মোত ফোংদোকখি।

শ্রী মোদীনা থাজৈ মদুদি অহোংবা পুরক্নবগীদমক্তা চত্থোক চৎশিনগী পাম্বৈ হায়বসি য়াম্না মরুওইবা অমনি। মসিগী মরম অসিনা ভারত সরকারনা হায়ৱে, রেলৱে, আই-ৱে অমসুং ঈশিংগী লম্বী হেন্না শেমগৎতুনা মথংগী জেনরেসনগী ইনফ্রাস্ত্রকচর শেম্নবা হোৎনরি। উরান (উরে দেশকা আম নাগরিক) থৌশিল অসিনা এভিএসন সেক্তরবু হেন্না মীয়ামগা চান্নবা হেনগৎহল্লে অমসুং শম্নবগী চাং ৱাংখৎলে।

প্রধান মন্ত্রী মোদীনা ভারতপু অন্তর্জাতিগী ওইবা মেন্যুফেকচরিংগী পাৱরহাউজ অমা ওইহন্নবা ‘মেক ইন ইন্দিয়া’ থৌরাং হৌদোকখি। থৌরাং অসিনা অহোংবা কয়া পুরকপা ঙমখ্রে। ভারতনা ‘ইজ ওব দুইং বিজিনেস’তা খোংকাপ লাউনা থাংদুনা 2014দা 142 দা লৈরম্বা রেঙ্কিংদু 2019দা 63দা লৈহনখি। ভারত সরকারনা 2017গী পার্লিয়ামেন্তকী পুৱারীদা লৈহৌরগদবা সেসন অমদা জি.এস.তি. লিংখৎখি, মসিনা ‘লৈবাক অমা, তেক্স অমা’গী মঙলান মঙফাওনহনখি।

মহাক্কী মতমদা, ভারতকী ইনাক খুল্লবা পুৱারী অমসুং নাৎকী ওইবা মশক্তা অখন্নবা মীৎয়েং চঙখি। ভারত অসি মালেমদা খ্বাইদগী চাউবা মীতম, সরদার পতেলগী মফমদা মতীক চাবা ইকাইখুম্নবা উৎলিবা দি স্তেচ্যু ওব য়ুনিতী লৈবা লৈবাক অমনি। মীতম অসি অখন্নবা মীয়ামগী ঈহৌ অমগা লোইননা শাখি, মসিদা লৌমীশিংগী খুৎচু খুৎলাই অমসুং ভারতকী রাজ্য অমসুং য়ুনিয়ন তেরিতোরী খুদিংমক্তগী লৈবাক লৈহাও শীজিন্নদুনা ‘এক ভারত, শ্রেস্থা ভারত’কী ইনোৎ তাক্তুনা শাখি।

প্রধান মন্ত্রী মোদী অকোইবগী খল কায়দনবা লুম্না খঞ্জবা মীশক অমনি। মহাক্কী মফমদা মতম লৈ অমসুং হন্না রেঙ্কশিং লোইশিন্দুনা হেন্না লু নানবা অমসুং অশঙবা গ্রহ অমা ওইহন্নবা হোৎনরি। গুজরাতকী মুখ্য মন্ত্রী ওইনা, শ্রী মোদীনা তোখাইবা ক্লাইমেত চেঞ্জ দিপার্ত্মেন্ত অমা শেমদুনা অইং অশা হোংলকপগী সম্যা কোক্নবা হোৎনখি। অসিগুম্বা ইনোৎ অসি 2015দা পেরিসকী সি.ও.পি.21 সম্মিৎতা প্রধান মন্ত্রী মোদীনা অৱাংবা থাক্কী ৱারী শানবদা মরুইওইবা থৌদাং লৌদুনা উবা ফংখি।

অইং অশা হোংলকপদগী চঙশিল্লগা প্রধান মন্ত্রী মোদীনা ক্লাইমেত জস্তিসকী মতাংদা ঙাংখি। 2018দা রাজ্যশিংগী মকোকশিং অমসুং লৈবাক কয়াদগী লৈঙাক কয়ানা ভারত্তা হেন্না ফবা প্লানেত অমা ওইনবা নুমিৎকী শক্তি লোক্নবা থৌরাং অমা ওইরিবা ইন্তর্নেসনেল সোলার এলিএন্স হৌদোক্নবা লাকখি।

অকোইবগী খল কায়দনা থম্নবা থৌরাংশিংবু শকখঙবা ওইনা প্রধান মন্ত্রীবু য়ুনাইতেদ নেসন্স ‘চেম্পিয়ন ওব দি আর্থ এৱার্দ’ পীদুনা ইকাইখুম্না উৎখি।

অইং অশা হোংলকপনা ঐখোয়গী গ্রহ অসিদা মহৌশাগী ওইবা অমাং অতা কয়া থোকপগী চাং হেনগৎলক্লিবা অসিবু খঙলদুনা শ্রী মোদীনা দিজাস্তর মেনেজমেন্তকী মায়কৈদা অনৌবা খোংথাং অমা ওইনা তেক্নোলোজীগী শক্তি অমসুং হ্যুমেন রিসোর্সকী পাঙ্গল শীজিন্ননবা হোৎনরি। মুখ্য মন্ত্রীএ ওইনা, মহাক্না জনুৱারী 26, 2001দা থোকপা শাথিরবা জ্বার হাবনা মাঙহন তাকহল্লবা গুজরাতপু অহোংবা পুরকখি। মসিগুম্না, অন্তর্জাতিগী থাক্তা শিংথানখিবা মওংদা মহাক্না গুজরাত্তা ঈচাউ অমসুং ঈকং থেংননবা অনৌবা সিস্তেমশিং হৌদোকখি।

এদমিনিস্ত্রেতিবকী রিফোর্ম কয়াগা লোইননা, শ্রী মোদীনা মতম চুপ্পদা মীয়ামগীদমক অচুম্বা পুরক্নবা হোৎনবদা মরুওইবা থমদুনা লাকখি। গুজরাত্তা, মহাক্না মীয়ামগী সমশ্যাশিং লোইশিন্নবগীদমক নুমিদাং ৱাইরমগী কোর্ত হৌদোকপদা মাংজিল থানা হোৎনখি। কেন্দ্রগী থাক্তা, চাউখৎ থৌরাংদা থিন্থহল্লিবা পন্দুনা লৈরিবা প্রোজেক্তশিং লোইশিন্নবগীদমক মহাক্না প্রগতি (প্রো-এক্তিব গবর্নান্স এন্দ তাইম্লী ইমপ্লিমেন্তেসন) হৌদোকখি।

শ্রী মোদীগী ফোরেন পোলিসীগী থৌরাংশিং অসিনা মালেমগী খ্বাইদগী চাউবা গনতন্ত্রগী থৌদাং অমসুং অশেংবা শক্তি অদু খঙহনখ্রে। মহাক্না মহাক্কী অহানবা লোইশঙ পায়বগী তার্ম অদু সার্ক লৈবাকশিংগী লৈবাক্কী মকোক থোংবশিং য়াওনা হৌখি অমসুং বিমস্তেককী লুচিংবশিংবু অনিশুবা তার্ম হৌবদা কৌখি। য়ুনাইতেদ নেসন্সকী জেনরেল এসেম্বলীদা পীখিবা ৱারোল অদুবু মালেম শীনবা থুংনা শিংথানখি। শ্রী মোদীনা চহি 17কী মতুংদা নেপালদা চৎখিবা, চহি 28গী মতুংদা ওস্ত্রেলিয়াদা, চহি 31 গী মতুংদা ফিজিদা অমসুং চহি 34 গী মতুংদা য়ু.এ.ই. অমসুং সিসিলিস্তা চৎখিবা ভারতকী অহানবা প্রধান মন্ত্রী ওইখি। লোইশঙ পায়রবা মতুংদা, শ্রী মোদীনা য়ু.এন., ব্রিক্স, সার্ক অমসুং জি-20 সম্মিত্তা শরুক য়াখি, মসিদা মালেমগী একনোমিক অমসুং রাজনিতীগী সমশ্যাশিংদা লৌবা থৌদাং অমসুং মীৎয়েংশিংবু পাক শন্না শিংথানখি।

প্রধান মন্ত্রী মোদীবু সৌদি আরাবিয়াগী খ্বাইদগী ৱাংবা সিভিলিয়ন ওনর সাশ ওব কিং অবদুলজিজ য়াওনা অতৈ ইকাইখুম্নবা কয়া অমা পীখি। শ্রী মোদীদা রসিয়াগী (দি ওর্দর ওব হোলি এপোস্তল এন্দ্র্যু দি ফর্স্ত), পেলেস্তিন (গ্রান্দ কোলার ওব দি স্তেত ওব পেলেস্তিন), অফগানিস্তান (অমির অমনুলা খান এৱার্দ), য়ু.এ.ই. (ওর্দর ওব জয়েদ এৱার্দ), মালদিবস (রুল ওব নিশান ইজুদ্দীন), বাহরেন (কিং হমাদ ওর্দর ওব দি রিনাসা), ভুতান (ওর্দর ওব দি দ্রুক গ্যাল্পো), পপুৱা ন্যু ইনিয়া (গ্রান্দ কম্পেনিয়ন ওব দি ওর্দর ওব লোগোহু), ফিজি (কম্পেনিয়ন ওব দি ওর্দর ওব ফিজি), ইজিপ্ত (ওর্দর ওব নাইল), ফ্রান্স (গ্রান্দ ক্রোস ওব দি লেজন ওব ওনর), অমসুং গ্রীস (দি গ্রান্দ ক্রোস ওব দি ওর্দর ওব ওনর) অসিগুম্বা খ্বাইদগী ৱাংবা মনাশিং পীখি। 2018দা, প্রধান মন্ত্রীনা তাংলবা সিওল পিস প্রাইজ, মহাক্না শান্তি অমসুং চাউখৎপদা পীখিবা থৌদাংশিংগীদমক ফংখি মহাক্না গ্লোবেল গোলকীপর মনাসু বিল এন্দ মেলিন্দা গেতস ফাউন্দেসন অমসুং গ্লোবেল এনর্জী এন্দ এনভাইরোন্মেন্ত লিদর্শিপ এৱার্দ, কেম্ব্রিদজ এনর্জী রিসর্স এসোসিএসন্দগী ফংখি।

নরেন্দ্র মোদীগী ‘অন্তর্জাতিগী য়োগাগী নুমিৎ’ হায়না নুমিৎ অমা লাউথোকখিবদা য়ু.এন.দা য়ানিংবা ফোংদোকনখি। অহানবদা, অপুনবা ওইনা মালেমদগী লৈবাক 177 না পুনশিন্নদুনা জুন 21বু ‘ইন্তর্নেসনেল দে ওব য়োগা’ হায়না য়ু.এন.দা লাউথোকখি।

শ্রী মোদী সেপ্তেম্বর 17, 1950দা, গুজরাতকী অপীকপা শহর অমদা পোকখি। মহাক্কী ইমুং ‘অদর বেকৱার্দ ক্লাস’ হায়রিয়া খুনাই অসিগী শোত্থরবা খুনাইগী মরক্তা অমা ওইরিবা কাংলুপ অসিগী মনুং চল্লি। মহাক লৈজদবা অদুবু ‘অহেনবা লুপা অমফাওবা লৈজদবা’ নুংশি চাননা হিংমিন্নবা ইমুং অমদা চাউরকখি। পুন্সিগী হৌরকপদা থেংনরকপা অকনবা চৈথেংশিংনা কন্না হোৎনবগী মগুন তাকপদা নত্তনা মহাকপু মীচম মীয়ামগী নাথৈবা য়াদ্রবা অৱাবা কয়া খঙহনখি। মসিনা মহাকপু য়াম্না নহা ওইরিঙৈদগী হৌদুনা মীয়াম অমসুং লৈবাক্কী সেবা তৌনবা ইনোৎ পীদুনা লাকখি। মহাক্কী অহৌবা চহিশিংদা, মহাক্না লৈবাক শেম্বদা কত্থোক্লবা নেস্নেলিস্ত ওর্গানাইজেসন অমা ওইরিব রাস্ত্রিয়া স্বায়মসেবক সঙ্ঘ (আর.এস.এস.)দা য়াওদুনা থবক তৌরম্মি অমসুং অকোনবদা মহাক্না ভারতিয়া জনাতা পার্তীদা য়াওদুনা জাতি অমসুং রাজ্যগী থাক্তা রাজনিতি তৌবদা পুক্নিং চঙখি। শ্রী মোদীনা পোলিতিকেল সাইন্সতা গুজরাত য়ুনিভর্সিতীদগী এম.এ. লোইশিনখি।

নরেন্দ্র মোদী ‘মীয়ামগী লুচিংবা’ অমনি, মহাক্না মখোয়গী সমশ্যাশিং কোকহন্দুনা নুংঙাই য়াইফবা পুন্সি মহিং ফংহন্নবা কত্থোক্লি। মীয়াম মরক্তা লৈদুনা মখোয়গী অৱা নুংঙাই তান্নবা অমসুং মখোয়গী অৱাবা কোকহন্নবা হোৎনবদগী হেনবা নুংঙাইবা অমা মহাক্কী মফমদা লৈতে। মহাক্কী মীয়ামগা লৈনরিবা ‘থম্মোইগী ওইবা মরী’ অসি ওনলাইন্দা লৈবগী চাং অসিনা তাকই। মহাকপু মীয়ামগা শম্ননবা অমসুং মখোয়গী অৱাবা কোকহন্নবা হোৎনবদা ৱেব শীজিন্নবা ভারতকী খ্বাইদগী অনৌবা তেক্নোলোজী নীংথিনা খঙবা লুচিংবা অমনি হায়না খঙনৈ। মহাক সোসিএল মীদিয়াগী ফম্বাক য়ুত্যুব, ফেসবুক, ত্বীত্তর, ইন্সতাগ্রাম, সাউন্দ ক্লাউদ, লিঙ্কইন, অমসুং অতৈ ফোরমশিংদা য়াম্না এক্তিব ওই।

রাজনিতীগী ৱাংমদা, নরেন্দ্র মোদীনা ইবগী থবকসু তৌই। মহাক্না শৈরেং য়াওনা তোঙান-তোঙানবা লাইরিকশিং ইখ্রে। মহাক্না মহাক্কী নোংমগী থবকশিং অসি য়োগাগা লোইননা হৌই, মসিনা মহাক্কী হকচাং, ৱাখল পাঙ্গল কলহল্লি অমসুং য়াঙনা চৎলিবা মহাক্কী মথৌশিংদা ঈংনা পাঙথোকপা ঙম্বগী শক্তি পীবিরি।

http://www.narendramodi.in/categories/timeline
http://www.narendramodi.in/humble-beginnings-the-early-years
http://www.narendramodi.in/the-activist
http://www.narendramodi.in/organiser-par-excellence-man-with-the-midas-touch