ভারতকী প্রধানমন্ত্রী
ঐখোয়গী লৈবাক ভারতকী চৎনবীদা থবক তৌবা হায়বসি মথৌ ফজনা পাঙথোকপনি – থবক তৌবনা অথোইবা ধর্ম্মনি। চহী অমগী মমাঙদা নহাক্না ঐঙোন্দা লৈবাক অসিগী প্রধান সেবক অমা ওইনা থবক তৌনবা থৌ অদূ শিন্নখি। ঐহাক্না থৱায় হকচাং য়াওনা থম্মোয় শেংনা ঐনা নোংমগী মিকুপ খুদিং কৎথোকতুনা মীয়ামগী অপাম্বা ফংনবা হোৎনখি। ভারতকী ৱারিদা থাজবা লৈরকত্রবা মতমদা ঐখোয়না লৈবাক ঙাকপা হৌখি।
শেঞ্জা-থুমজা অমসুং ৱারেপ লৌবা ঙমদবনা লৈঙাক অসি শিথরম্মী। পোৎচৈগী মমল হেনগৎপা অমসুং শেঞ্জা-থুমজাগী লৈতাদবনা মীয়াম উপায় লৈতবা ফিভম অমদা হুন্দোক্লমখি। য়াম্না থুনা থবক লৌখৎপা দরকার ওইখি। অসিগুম্বা শিংনবা অসি ঐখোয়না মওং তানা থেংনখি। পোৎচৈগী মমল খুদক্ত হন্থহনখি। মরা চেৎপা, থৌশিলদা য়ুমফম ওইবা সরকার অসিনা শোৎথরবা শেল-থুমগী ফিভম ফগৎহনখি। মমল য়াম্লবা মহৌশাগী লনশিং অখন্নবা মীওই খরদা পীথোক্লম্বা অদুগী মহুৎ নিয়ম চুম্না ওক্সন তৌরে।
এস আই তি লিংখৎতুনা অমসুং অকনবা ব্লেক মনি লো শেমদুনা অমদি মালেমগী লৈবাকশিংগা পাউ ফাওনদুনা ব্লেক মনিগী ময়োক্তা অকনবা থবক লৌখৎলে। অচুম্বদা য়ুমফম ওইদুনা শেনজা-থুমজা লৈতবা লৈঙাক অমা লৈহল্লে। হৈশিংবা অমসুং মীগী অৱাবা খঙবা পুনশিনদুনা থবক শুবগী মওংদা অচৌবা অহোংবা লৈরে। তিম ইন্দিয়াগী ৱাখল্লোন শাখৎতুনা জাতিগী চাওখৎ-থৌরাংগী থবক্তা রাজ্য সরকারশিং শরুক য়াহল্লে। য়াম্না মরুওইনা ঐখোয়না সরকারদা লৈরম্বা থাজবা অদু হনজিনহল্লে। অন্ত্যোদয়াদা য়ুমফম ওইদুনা ঐখোয়গী সরকার অসি লায়রবশিংদা কৎথোক্লে। লায়রবগী মায়োক্তা লান থেংনবা ঐখোয়গী লান্মী ওইনবা ঐখোয়না লায়রবশিংদা শক্তি পীরে।
স্কুলশিংদা তোইলেৎ শানবা, আই আই তিশিং, আই আই এমশিং, এ আই আই এম এসশিং লিংখৎপা, অঙাংশিং তিকা থাবা, মীয়াম স্বচ্ছ ভারত মিসনদা শরুক য়াহনবা, শিন্মীশিংদা পেন্সন পীবা, মহৌশাগী অমাং-অতা নংলবা লৌমীশিং মতেং পাংবা, মীয়ামদা সবসিদি হকথেংননা পীবা, অপীকপা ললোনবশিংদা বেঙ্ককী খুদোংচাবা ফংহনবা, লৌবুক্তা ঈশিং ফংহনবা, গঙ্গা শেংদোকপা, ২৪x ৭ মৈ ফংহনবা, লৈবাক শিনবা থুংনা লম্বী-থোঙ শেমগৎপা, য়ুম লৈত্রবশিংগী য়ুম শাবা, স্মার্ত সিতিশিং লিংখৎপা, অৱাং-নোংপোক শম্নহনবা অমসুং নোংপোক ভারত শেমগৎপা য়াওনা অতৈ স্কিম কয়া সরকার অসিনা পায়খৎলি।
মরূপশিং, মসি হৌবদা ঙাইরি। ঐখোয়গী পান্দমদি, পুন্সি মহিং ফগৎহনবা, শেমগৎ শাগৎপা অমসুং থবক ফজনা তৌবনি। নহাক্না মঙলান্দা খল্লিবা অমসুং নিংতম লান্মীশিংনা পামজরম্বা ভারত অদু ঐখোয়না শেমগৎকনি। মসিগীদমক ঐনা অদোমগী বর নিজরি ।
মতম চুপ্পদা অদোমগীদমক লৈজরি।
জয় হিন্দ।
