പിഎം ഇന്ത്യ

  ആഫ്രിക്കയിലെ എന്റെ എല്ലാ സുഹൃത്തുക്കൾക്കും ഇടയിൽ ഇവിടെ ഉണ്ടായിരിക്കുന്നതിൽ ഞാൻ സന്തുഷ്ടനാണ്.

 ബ്രിക്‌സ് ഔട്ട്‌റീച്ച് ഉച്ചകോടിയിൽ ആഫ്രിക്ക, ഏഷ്യ, ലാറ്റിൻ അമേരിക്ക എന്നീ രാജ്യങ്ങളുമായി ചിന്തകൾ പങ്കുവയ്ക്കാൻ അവസരം നൽകിയതിന് പ്രസിഡന്റ് റമാഫോസയെ ഞാൻ അഭിനന്ദിക്കുന്നു.

 കഴിഞ്ഞ രണ്ട് ദിവസങ്ങളിലായി, ബ്രിക്‌സിന്റെ എല്ലാ ചർച്ചകളിലും, ഗ്ലോബൽ സൗത്ത്  രാജ്യങ്ങളുടെ മുൻഗണനകളിലും ആശങ്കകളിലും നാം  ശ്രദ്ധ കേന്ദ്രീകരിച്ചു.

 ബ്രിക്‌സ് ഈ വിഷയങ്ങൾക്ക് പ്രത്യേക പ്രാധാന്യം നൽകുന്നത് ഇന്നത്തെ കാലത്ത് നിർണായകമാണെന്ന് ഞങ്ങൾ വിശ്വസിക്കുന്നു.

 ബ്രിക്സ് ഫോറം വിപുലീകരിക്കാനുള്ള തീരുമാനവും നാം  എടുത്തിട്ടുണ്ട്. എല്ലാ പങ്കാളി രാജ്യങ്ങളെയും ഞങ്ങൾ സ്വാഗതം ചെയ്യുന്നു.

 ആഗോള സ്ഥാപനങ്ങളെയും ഫോറങ്ങളെയും പ്രതിനിധികളും ഉൾക്കൊള്ളുന്നവരുമാക്കുന്നതിനുള്ള ഞങ്ങളുടെ ശ്രമങ്ങൾക്കായുള്ള ഒരു സംരംഭമാണിത്.

ശ്രേഷ്ഠരേ,

 നമ്മൾ “ഗ്ലോബൽ സൗത്ത്” എന്ന പദം ഉപയോഗിക്കുമ്പോൾ, അത് ഒരു നയതന്ത്ര പദമല്ല.

 നമ്മുടെ  പൊതുവായ  ചരിത്രത്തിൽ, കൊളോണിയലിസത്തെയും വർണ്ണവിവേചനത്തെയും നാം ഒറ്റക്കെട്ടായി എതിർത്തിട്ടുണ്ട്.

 അഹിംസ, സമാധാനപരമായ ചെറുത്തുനിൽപ്പ് തുടങ്ങിയ ശക്തമായ ആശയങ്ങൾ മഹാത്മാഗാന്ധി വികസിപ്പിച്ചതും പരീക്ഷിച്ചതും ഇന്ത്യയുടെ സ്വാതന്ത്ര്യ സമരത്തിൽ ഉപയോഗിച്ചതും ആഫ്രിക്കയുടെ മണ്ണിലാണ്.

 അദ്ദേഹത്തിന്റെ ചിന്തകളും ആശയങ്ങളും നെൽസൺ മണ്ടേലയെപ്പോലുള്ള മഹാനായ നേതാക്കളെ പ്രചോദിപ്പിച്ചു.

 ഈ ശക്തമായ ചരിത്ര അടിത്തറയെ അടിസ്ഥാനമാക്കി, നമ്മുടെ ആധുനിക ബന്ധങ്ങൾക്ക് നാം  ഒരു പുതിയ രൂപം നൽകുന്നു.

ശ്രേഷ്ഠരേ,

 ആഫ്രിക്കയുമായുള്ള ബന്ധത്തിന് ഇന്ത്യ ഉയർന്ന മുൻഗണന നൽകുന്നു.

 ഉന്നതതല യോഗങ്ങൾക്കൊപ്പം, നാം  ആഫ്രിക്കയിൽ 16 പുതിയ എംബസികളും തുറന്നിട്ടുണ്ട്.

 നിലവിൽ, ആഫ്രിക്കയുടെ നാലാമത്തെ വലിയ വ്യാപാര പങ്കാളിയും അഞ്ചാമത്തെ വലിയ നിക്ഷേപകരുമാണ് ഇന്ത്യ.

 അത് സുഡാൻ, ബുറുണ്ടി, റുവാണ്ട എന്നിവിടങ്ങളിലെ ഊർജ്ജ  പദ്ധതികളായാലും എത്യോപ്യയിലെയും മലാവിയിലെയും പഞ്ചസാര പ്ലാന്റുകളായാലും.

 അത് മൊസാംബിക്, ഐവറി കോസ്റ്റ്, ഈശ്വതിനി എന്നിവിടങ്ങളിലെ ടെക്‌നോളജി പാർക്കുകളായാലും ടാൻസാനിയയിലെയും ഉഗാണ്ടയിലെയും ഇന്ത്യൻ സർവകലാശാലകൾ സ്ഥാപിച്ച കാമ്പസുകളായാലും.

 ആഫ്രിക്കൻ രാജ്യങ്ങളിൽ കപ്പാസിറ്റി ബിൽഡിംഗിനും അടിസ്ഥാന സൗകര്യ വികസനത്തിനും  ഇന്ത്യ എപ്പോഴും മുൻഗണന നൽകിയിട്ടുണ്ട്.

 അജണ്ട 2063 പ്രകാരം, ഭാവിയുടെ ആഗോള ശക്തികേന്ദ്രമാകാനുള്ള ആഫ്രിക്കയുടെ യാത്രയിൽ ഇന്ത്യ ഉറ്റ  വിശ്വസ്ത   പങ്കാളിയുമാണ്.

 ആഫ്രിക്കയിലെ ഡിജിറ്റൽ വിഭജനം നികത്താൻ, നാം  ടെലി-വിദ്യാഭ്യാസത്തിലും ടെലി-മെഡിസിനിലും പതിനയ്യായിരത്തിലധികം സ്കോളർഷിപ്പുകൾ നൽകിയിട്ടുണ്ട്.

 നൈജീരിയ, എത്യോപ്യ, ടാൻസാനിയ എന്നിവിടങ്ങളിൽ ഞങ്ങൾ പ്രതിരോധ അക്കാദമികളും കോളേജുകളും സ്ഥാപിച്ചിട്ടുണ്ട്.

 ബോട്സ്വാന, നമീബിയ, ഉഗാണ്ട, ലെസോത്തോ, സാംബിയ, മൗറീഷ്യസ്, സീഷെൽസ്, ടാൻസാനിയ എന്നിവിടങ്ങളിൽ പരിശീലനത്തിനായി ഞങ്ങൾ ടീമുകളെ വിന്യസിച്ചിട്ടുണ്ട്.

 സ്ത്രീകളുൾപ്പെടെ ഏകദേശം 4400 ഇന്ത്യൻ സമാധാന സേനാംഗങ്ങൾ ആഫ്രിക്കയിൽ സമാധാനത്തിനും സ്ഥിരതയ്ക്കും സംഭാവന നൽകുന്നു.

 തീവ്രവാദത്തിനും കടൽക്കൊള്ളയ്ക്കുമെതിരായ പോരാട്ടത്തിൽ ഞങ്ങൾ ആഫ്രിക്കൻ രാജ്യങ്ങളുമായി സഹകരിച്ച് പ്രവർത്തിക്കുന്നു.

 കോവിഡ് മഹാമാരിയുടെ  വെല്ലുവിളി നിറഞ്ഞ സമയങ്ങളിൽ, ഞങ്ങൾ പല രാജ്യങ്ങളിലേക്ക് ഭക്ഷ്യവസ്തുക്കളും വാക്സിനുകളും വിതരണം ചെയ്തു.

 ഇപ്പോൾ, ആഫ്രിക്കൻ രാജ്യങ്ങളുമായി ചേർന്ന് കൊവിഡിന്റെയും മറ്റ് വാക്‌സിനുകളുടെയും സംയുക്ത നിർമ്മാണത്തിനായി ഞങ്ങൾ പ്രവർത്തിക്കുന്നു.

 മൊസാംബിക്കിലെയും മലാവിയിലെയും ചുഴലിക്കാറ്റുകളോ മഡഗാസ്‌കറിലെ വെള്ളപ്പൊക്കമോ ആകട്ടെ, ഇന്ത്യ എല്ലായ്‌പ്പോഴും ആഫ്രിക്കയ്‌ക്കൊപ്പം തോളോട് തോൾ ചേർന്ന് നിൽക്കുന്നു.

ശ്രേഷ്ഠരേ,

 ലാറ്റിൻ അമേരിക്ക മുതൽ മധ്യേഷ്യ വരെ;

 പടിഞ്ഞാറൻ ഏഷ്യ മുതൽ തെക്ക്-കിഴക്കൻ ഏഷ്യ വരെ;

 ഇന്തോ-പസഫിക് മുതൽ ഇന്തോ-അറ്റ്ലാന്റിക് വരെ;

 ഇന്ത്യ എല്ലാ രാജ്യങ്ങളെയും ഒരു ആഗോള കുടുംബത്തിന്റെ ഭാഗമായി കാണുന്നു.

 “വസുധൈവ കുടുംബകം” എന്ന ആശയം – അതായത്. ലോകം മുഴുവൻ ഒരു കുടുംബമാണ് – ആയിരക്കണക്കിന് വർഷങ്ങളായി നമ്മുടെ ജീവിതരീതിയുടെ അടിത്തറയാണ്.

 നമ്മുടെ ജി-20 പ്രസിഡൻസിയുടെ മുദ്രാവാക്യം കൂടിയാണിത്.

 ഗ്ലോബൽ സൗത്തിന്റെ ആശങ്കകൾ മുഖ്യധാരയിൽ എത്തിക്കുന്നതിന്, ഞങ്ങൾ മൂന്ന് ആഫ്രിക്കൻ രാജ്യങ്ങളെയും നിരവധി വികസ്വര രാഷ്ട്രങ്ങളെയും അതിഥി രാജ്യങ്ങളായി ക്ഷണിച്ചു.

 ജി-20യിൽ ആഫ്രിക്കൻ യൂണിയന് സ്ഥിരാംഗത്വവും ഇന്ത്യ നിർദ്ദേശിച്ചിട്ടുണ്ട്.

ശ്രേഷ്ഠരേ,

 ഒരു ബഹുധ്രുവ ലോകത്തെ ശക്തിപ്പെടുത്താൻ ബ്രിക്‌സിനും നിലവിലെ എല്ലാ സൗഹൃദ രാജ്യങ്ങൾക്കും സഹകരിക്കാൻ കഴിയുമെന്ന് ഞാൻ വിശ്വസിക്കുന്നു.

 ആഗോള സ്ഥാപനങ്ങളെ പ്രാതിനിധ്യവും പ്രസക്തവുമാക്കുന്നതിന് നവീകരിക്കുന്നതിൽ നമുക്ക് പുരോഗതി കൈവരിക്കാനാകും.

 ഭീകരതയെ പ്രതിരോധിക്കുക, പരിസ്ഥിതി സുരക്ഷ, കാലാവസ്ഥാ പ്രവർത്തനം, സൈബർ സുരക്ഷ, ഭക്ഷ്യ ആരോഗ്യ സുരക്ഷ, ഊർജ്ജ സുരക്ഷ, പ്രതിരോധശേഷിയുള്ള വിതരണ ശൃംഖലകൾ കെട്ടിപ്പടുക്കുക എന്നിവയാണ് ഞങ്ങളുടെ പൊതു താൽപ്പര്യങ്ങൾ. സഹകരണത്തിന് വലിയ സാധ്യതകളുണ്ട്.

 ഇന്റർനാഷണൽ സോളാർ അലയൻസ് പോലുള്ള ഞങ്ങളുടെ അന്താരാഷ്ട്ര സംരംഭങ്ങളിൽ പങ്കെടുക്കാൻ ഞാൻ നിങ്ങളെ എല്ലാവരെയും ക്ഷണിക്കുന്നു; ഒരു സൂര്യൻ, ഒരു ലോകം, ഒരു ഗ്രിഡ്; ഡിസാസ്റ്റർ റസിലന്റ് ഇൻഫ്രാസ്ട്രക്ചറിനായുള്ള സഖ്യം; ഒരു ഭൂമി ഒരു ആരോഗ്യം; ബിഗ് ക്യാറ്റ് അലയൻസ്; കൂടാതെ ഗ്ലോബൽ സെന്റർ ഫോർ ട്രഡീഷണൽ മെഡിസിനും.

 ഇന്ത്യയുടെ ഡിജിറ്റൽ പബ്ലിക് ഇൻഫ്രാസ്ട്രക്ചർ സ്റ്റാക്കുമായി ബന്ധപ്പെടാനും നിങ്ങളുടെ വികസനത്തിനായി അത് പ്രയോജനപ്പെടുത്താനും ഞാൻ നിങ്ങളെ ക്ഷണിക്കുന്നു.

 ഞങ്ങളുടെ അനുഭവവും കഴിവുകളും നിങ്ങളുമായി പങ്കിടുന്നതിൽ ഞങ്ങൾക്ക് സന്തോഷമുണ്ട്.

 ഞങ്ങളുടെ സംയുക്ത പ്രയത്‌നങ്ങൾ എല്ലാ വെല്ലുവിളികളെയും ഒരുമിച്ച് നേരിടാനുള്ള ഒരു പുതിയ ആത്മവിശ്വാസം നൽകുമെന്ന് എനിക്ക് ഉറപ്പുണ്ട്.

 ഒരിക്കൽ കൂടി, ഈ അവസരത്തിന് നിങ്ങൾക്കെല്ലാവർക്കും, പ്രത്യേകിച്ച് പ്രസിഡന്റ് റമാഫോസയോട് ഞാൻ എന്റെ നന്ദി അറിയിക്കുന്നു.

നന്ദി.

–ND–