ಪಿಎಂಇಂಡಿಯಾ

ಹರಿಯಾಣದ ಜನಪ್ರಿಯ ಮುಖ್ಯಮಂತ್ರಿ ಶ್ರೀ ನಯಾಬ್ ಸಿಂಗ್ ಸೈನಿ ಜೀ, ಕೇಂದ್ರ ಸಚಿವ ಸಂಪುಟದಲ್ಲಿ ನನ್ನ ಸಹೋದ್ಯೋಗಿಗಳಾದ ಮನೋಹರ್ ಲಾಲ್ ಜೀ, ರಾವ್ ಇಂದರ್ಜಿತ್ ಸಿಂಗ್ ಜೀ ಮತ್ತು ಕ್ರಿಶನ್ ಪಾಲ್ ಜೀ, ಹರಿಯಾಣ ಸರ್ಕಾರದ ಸಚಿವರು, ಸಂಸತ್ತು ಮತ್ತು ವಿಧಾನಸಭೆಯ ಸದಸ್ಯರು, ಮತ್ತು ನನ್ನ ಪ್ರೀತಿಯ ಸಹೋದರ ಸಹೋದರಿಯರೇ. ಹರಿಯಾಣದ ನನ್ನ ಸಹೋದರ ಸಹೋದರಿಯರಿಗೆ ಮೋದಿಯ ನಮಸ್ಕಾರಗಳು.

ಸ್ನೇಹಿತರೇ,

ಇಂದು, ಮಾತೆ ಸರಸ್ವತಿಯು ಉಗಮಿಸಿದ ಈ ಪುಣ್ಯ ಭೂಮಿಗೆ ನಾನು ವಂದಿಸುತ್ತೇನೆ. ಮಂತ್ರ ಶಕ್ತಿಯು ನೆಲೆಸಿರುವ, ಪಂಚಮುಖಿ ಹನುಮಂತನು ವಿರಾಜಮಾನನಾಗಿರುವ, ಕಪಲ್ಮೋಚನ್ ಸಾಹಿಬ್ ಅವರ ಆಶೀರ್ವಾದವು ದೊರೆಯುವ, ಮತ್ತು ಸಂಸ್ಕೃತಿ, ಶ್ರದ್ಧೆ ಹಾಗೂ ಭಕ್ತಿಯ ತ್ರಿವೇಣಿ ಸಂಗಮವಾಗಿರುವ ಈ ನೆಲಕ್ಕೆ ನನ್ನ ನಮನಗಳು. ಇಂದು ಬಾಬಾಸಾಹೇಬ್ ಅಂಬೇಡ್ಕರ್ ಜೀ ಅವರ 135ನೇ ಜನ್ಮ ವರ್ಷಾಚರಣೆಯೂ ಆಗಿದೆ. ಅಂಬೇಡ್ಕರ್ ಜಯಂತಿಯ ಈ ಶುಭ ಸಂದರ್ಭದಲ್ಲಿ ದೇಶದ ಸಮಸ್ತ ನಾಗರಿಕರಿಗೂ ನನ್ನ ಹಾರ್ದಿಕ ಶುಭಾಶಯಗಳು. ಬಾಬಾಸಾಹೇಬರ ದೂರದೃಷ್ಟಿ ಮತ್ತು ಪ್ರೇರಣೆಯು ‘ವಿಕಸಿತ ಭಾರತ’ (ಅಭಿವೃದ್ಧಿ ಹೊಂದಿದ ಭಾರತ)ದ ನಮ್ಮ ಪಯಣದಲ್ಲಿ ಸದಾ ನಮಗೆ ಮಾರ್ಗದರ್ಶನ ನೀಡುತ್ತಿರಲಿ.

ಸ್ನೇಹಿತರೇ,

ಯಮುನಾನಗರ ಕೇವಲ ಒಂದು ನಗರವಲ್ಲ—ಇದು ಭಾರತದ ಕೈಗಾರಿಕಾ ಭೂಪಟದಲ್ಲಿ ಒಂದು ಮಹತ್ವದ ಸ್ಥಾನವನ್ನು ಪಡೆದಿದೆ. ಪ್ಲೈವುಡ್ನಿಂದ ಹಿಡಿದು ಹಿತ್ತಾಳೆ ಮತ್ತು ಉಕ್ಕಿನವರೆಗೆ, ಈ ಇಡೀ ಪ್ರದೇಶವು ಭಾರತದ ಆರ್ಥಿಕತೆಗೆ ಬಲವನ್ನು ನೀಡುತ್ತದೆ. ಅಷ್ಟೇ ಅಲ್ಲ, ಇದು ಕಪಲ್ ಮೋಚನ್ ಜಾತ್ರೆ, ಋಷಿ ವೇದವ್ಯಾಸರ ತಪೋಭೂಮಿ, ಮತ್ತು ಒಂದು ರೀತಿಯಲ್ಲಿ ಗುರು ಗೋಬಿಂದ್ ಸಿಂಗ್ ಜೀ ಅವರ ಶಸ್ತ್ರಾಸ್ತ್ರಗಳ ನೆಲವೆಂದೇ ಪ್ರಸಿದ್ಧವಾಗಿದೆ.

ಸ್ನೇಹಿತರೇ,

ಇದು ನಿಜಕ್ಕೂ ಹೆಮ್ಮೆಯ ವಿಷಯ. ಮತ್ತು ಮನೋಹರ್ ಲಾಲ್ ಜೀ ಹಾಗೂ ಸೈನಿ ಜೀ ಇದೀಗ ಹೇಳುತ್ತಿದ್ದಂತೆ, ಯಮುನಾನಗರದೊಂದಿಗೆ ನನಗೆ ಅನೇಕ ಹಳೆಯ ನೆನಪುಗಳಿವೆ. ನಾನು ಹರಿಯಾಣದ ಉಸ್ತುವಾರಿ ಹೊತ್ತಿದ್ದ ಸಂದರ್ಭದಲ್ಲಿ, ಪಂಚಕುಲ ಮತ್ತು ಇಲ್ಲಿಗೆ ನಾನು ಆಗಾಗ್ಗೆ ಭೇಟಿ ನೀಡುತ್ತಿದ್ದೆ. ಇಲ್ಲಿನ ಅನೇಕ ಹಳೆಯ ಮತ್ತು ಸಮರ್ಪಿತ ಪಕ್ಷದ ಕಾರ್ಯಕರ್ತರೊಂದಿಗೆ ಕೆಲಸ ಮಾಡುವ ಅವಕಾಶ ನನಗೆ ದೊರಕಿತ್ತು. ಆ ಶ್ರಮಜೀವಿ ಕಾರ್ಯಕರ್ತರ ಪರಂಪರೆ ಇಂದಿಗೂ ಮುಂದುವರೆದಿದೆ.

ಸ್ನೇಹಿತರೇ,

ಸತತ ಮೂರನೇ ಬಾರಿಗೆ, ಹರಿಯಾಣವು ಡಬಲ್-ಇಂಜಿನ್ ಸರ್ಕಾರದ ಆಡಳಿತದಲ್ಲಿ ಅಭಿವೃದ್ಧಿಯ ದುಪ್ಪಟ್ಟು ವೇಗವನ್ನು ಕಾಣುತ್ತಿದೆ. ಮತ್ತು ಈಗ, ಸೈನಿ ಜೀ ಹೇಳಿದಂತೆ, ಇದು ತ್ರಿವಳಿ ಸರ್ಕಾರದಂತೆ ಕಾರ್ಯನಿರ್ವಹಿಸುತ್ತಿದೆ. ‘ವಿಕಸಿತ ಭಾರತ’ಗಾಗಿ ‘ವಿಕಸಿತ ಹರಿಯಾಣ’—ಇದೇ ನಮ್ಮ ದೃಢ ಸಂಕಲ್ಪ. ಈ ಸಂಕಲ್ಪವನ್ನು ಸಾಕಾರಗೊಳಿಸಲು, ಹರಿಯಾಣದ ಜನತೆಗೆ ಸೇವೆ ಸಲ್ಲಿಸಲು ಮತ್ತು ಯುವಜನತೆಯ ಕನಸುಗಳನ್ನು ನನಸಾಗಿಸಲು ನಾವು ಅತ್ಯಂತ ಹೆಚ್ಚಿನ ವೇಗದಲ್ಲಿ ಮತ್ತು ಬೃಹತ್ ಪ್ರಮಾಣದಲ್ಲಿ ಕಾರ್ಯನಿರ್ವಹಿಸುತ್ತಿದ್ದೇವೆ. ಇಂದು ಇಲ್ಲಿ ಉದ್ಘಾಟನೆಗೊಂಡಿರುವ ಅಭಿವೃದ್ಧಿ ಯೋಜನೆಗಳೇ ಇದಕ್ಕೆ ಸಾಕ್ಷಿ. ಈ ಅಭಿವೃದ್ಧಿ ಕಾರ್ಯಕ್ರಮಗಳಿಗಾಗಿ ಹರಿಯಾಣದ ಜನತೆಗೆ ನನ್ನ ಹೃತ್ಪೂರ್ವಕ ಅಭಿನಂದನೆಗಳು.

ಸ್ನೇಹಿತರೇ,

ಬಾಬಾಸಾಹೇಬರ ಚಿಂತನೆಗಳನ್ನು ಮುಂದುವರಿಸಿಕೊಂಡು ನಮ್ಮ ಸರ್ಕಾರವು ಸಾಗುತ್ತಿರುವುದು ನನಗೆ ಅತೀವ ಹೆಮ್ಮೆಯ ವಿಷಯ. ಬಾಬಾಸಾಹೇಬ್ ಅಂಬೇಡ್ಕರ್ ಅವರು ಕೈಗಾರಿಕಾ ಅಭಿವೃದ್ಧಿಯನ್ನು ಸಾಮಾಜಿಕ ನ್ಯಾಯವನ್ನು ಸಾಧಿಸುವ ಮಾರ್ಗವೆಂದು ಪರಿಗಣಿಸಿದ್ದರು. ಭಾರತದಲ್ಲಿನ ಸಣ್ಣ ಹಿಡುವಳಿದಾರರ ಸಮಸ್ಯೆಯನ್ನು ಬಾಬಾಸಾಹೇಬರು ಮನಗಂಡಿದ್ದರು. ದಲಿತರಿಗೆ ಕೃಷಿಗಾಗಿ ಸಾಕಷ್ಟು ಭೂಮಿ ಇಲ್ಲದ ಕಾರಣ ಕೈಗಾರಿಕೆಗಳು ಅವರಿಗೇ ಅತ್ಯಂತ ಹೆಚ್ಚು ಪ್ರಯೋಜನವನ್ನು ನೀಡುತ್ತವೆ ಎಂದು ಬಾಬಾಸಾಹೇಬರು ಪ್ರತಿಪಾದಿಸಿದ್ದರು. ಕೈಗಾರಿಕೆಗಳು ದಲಿತರಿಗೆ ಹೆಚ್ಚಿನ ಉದ್ಯೋಗಾವಕಾಶಗಳನ್ನು ಸೃಷ್ಟಿಸುತ್ತವೆ ಮತ್ತು ಅವರ ಜೀವನಮಟ್ಟವನ್ನು ಸುಧಾರಿಸುತ್ತವೆ ಎಂಬುದು ಬಾಬಾಸಾಹೇಬರ ದೂರದೃಷ್ಟಿಯಾಗಿತ್ತು. ಬಾಬಾಸಾಹೇಬರು ದೇಶದ ಪ್ರಥಮ ಕೈಗಾರಿಕಾ ಸಚಿವರಾದ ಡಾ. ಶ್ಯಾಮಾ ಪ್ರಸಾದ್ ಮುಖರ್ಜಿ ಅವರೊಂದಿಗೆ ಭಾರತದ ಕೈಗಾರಿಕೀಕರಣದ ಗುರಿಯನ್ನು ಸಾಧಿಸಲು ಶ್ರಮಿಸಿದರು.

ಸ್ನೇಹಿತರೇ,

ಕೈಗಾರೀಕರಣ ಮತ್ತು ಉತ್ಪಾದನೆಯ ನಡುವಿನ ಸಾಮರಸ್ಯವೇ ಗ್ರಾಮೀಣ ಸಮೃದ್ಧಿಯ ಬುನಾದಿ ಎಂದು ದೀನಬಂಧು ಚೌಧರಿ ಛೋಟು ರಾಮ್ ಜೀ ಅವರು ಭಾವಿಸಿದ್ದರು. ರೈತರು ಕೇವಲ ಕೃಷಿಯಿಂದಲ್ಲದೆ, ಸಣ್ಣ ಕೈಗಾರಿಕೆಗಳ ಮೂಲಕವೂ ತಮ್ಮ ಆದಾಯವನ್ನು ಹೆಚ್ಚಿಸಿದಾಗ ಗ್ರಾಮಗಳಿಗೆ ನಿಜವಾದ ಸಮೃದ್ಧಿ ಲಭಿಸುತ್ತದೆ ಎಂದು ಅವರು ಪ್ರತಿಪಾದಿಸುತ್ತಿದ್ದರು. ಗ್ರಾಮ ಮತ್ತು ರೈತರ ಅಭ್ಯುದಯಕ್ಕಾಗಿ ತಮ್ಮ ಜೀವನವನ್ನೇ ಮುಡುಪಾಗಿಟ್ಟಿದ್ದ ಚೌಧರಿ ಚರಣ್ ಸಿಂಗ್ ಜೀ ಅವರ ಆಶಯವೂ ಇದಕ್ಕಿಂತ ಭಿನ್ನವಾಗಿರಲಿಲ್ಲ. ಕೈಗಾರಿಕಾ ಪ್ರಗತಿಯು ಕೃಷಿಗೆ ಪೂರಕವಾಗಿರಬೇಕು—ಈ ಎರಡೂ ನಮ್ಮ ಆರ್ಥಿಕತೆಯ ಬೆನ್ನೆಲುಬುಗಳು ಎಂದು ಚೌಧರಿ ಸಾಹೇಬರು ನುಡಿದಿದ್ದರು.

ಸ್ನೇಹಿತರೇ,

ಇದೇ ಭಾವನೆ, ಇದೇ ಆಲೋಚನೆ, ಇದೇ ಸ್ಫೂರ್ತಿ ‘ಮೇಕ್ ಇನ್ ಇಂಡಿಯಾ’ ಮತ್ತು ‘ಆತ್ಮನಿರ್ಭರ ಭಾರತ’ (ಸ್ವಾವಲಂಬಿ ಭಾರತ)ದ ಮೂಲಾಧಾರವಾಗಿದೆ. ಅದಕ್ಕಾಗಿಯೇ ನಮ್ಮ ಸರ್ಕಾರವು ಭಾರತದಲ್ಲಿ ಉತ್ಪಾದನೆಗೆ ಅಷ್ಟೊಂದು ಬಲವಾದ ಒತ್ತು ನೀಡುತ್ತಿದೆ. ಈ ವರ್ಷದ ಬಜೆಟ್ ನಲ್ಲಿ ನಾವು ಮಿಷನ್ ಮ್ಯಾನುಫ್ಯಾಕ್ಚರಿಂಗ್ ಘೋಷಿಸಿದ್ದೇವೆ. ಇದರ ಪ್ರಮುಖ ಗುರಿಯೆಂದರೆ ದಲಿತ, ಹಿಂದುಳಿದ, ದಮನಿತ ಮತ್ತು ವಂಚಿತ ಸಮುದಾಯಗಳ ಯುವಕರಿಗೆ ಗರಿಷ್ಠ ಉದ್ಯೋಗಾವಕಾಶಗಳನ್ನು ಕಲ್ಪಿಸುವುದು; ಯುವಕರಿಗೆ ಅಗತ್ಯವಾದ ತರಬೇತಿಯನ್ನು ನೀಡುವುದು; ವ್ಯಾಪಾರ ವೆಚ್ಚಗಳನ್ನು ಕಡಿಮೆ ಮಾಡುವುದು; MSME ವಲಯವನ್ನು ಬಲಪಡಿಸುವುದು; ಕೈಗಾರಿಕೆಗಳು ತಂತ್ರಜ್ಞಾನದ ಲಾಭವನ್ನು ಪಡೆಯುವುದನ್ನು ಖಚಿತಪಡಿಸಿಕೊಳ್ಳುವುದು; ಮತ್ತು ನಮ್ಮ ಉತ್ಪನ್ನಗಳನ್ನು ವಿಶ್ವದಲ್ಲೇ ಅತ್ಯುತ್ತಮವಾಗಿಸುವುದು. ಈ ಎಲ್ಲಾ ಗುರಿಗಳನ್ನು ಸಾಧಿಸಲು, ದೇಶವು ವಿದ್ಯುತ್ ಅಭಾವವನ್ನು ಎದುರಿಸಬಾರದು ಎಂಬುದು ಅತ್ಯಂತ ಮಹತ್ವದ್ದು. ನಾವು ಶಕ್ತಿಯಲ್ಲಿಯೂ ಸ್ವಾವಲಂಬಿಗಳಾಗಬೇಕು. ಅದಕ್ಕಾಗಿಯೇ ಇಂದಿನ ಈ ಕಾರ್ಯಕ್ರಮವು ಬಹಳ ಮಹತ್ವದ್ದಾಗಿದೆ. ಇಂದು, ದೀನಬಂಧು ಚೌಧರಿ ಛೋಟು ರಾಮ್ ಉಷ್ಣ ವಿದ್ಯುತ್ ಸ್ಥಾವರದ ಮೂರನೇ ಘಟಕದ ಕಾಮಗಾರಿ ಪ್ರಾರಂಭವಾಗಿದೆ. ಇದು ಯಮುನಾನಗರ ಮತ್ತು ಅದರ ಕೈಗಾರಿಕೆಗಳಿಗೆ ಪ್ರಯೋಜನವನ್ನು ನೀಡುತ್ತದೆ. ಭಾರತದ ಸುಮಾರು ಅರ್ಧದಷ್ಟು ಪ್ಲೈವುಡ್ ಉತ್ಪಾದನೆಯು ಯಮುನಾನಗರದಲ್ಲೇ ನಡೆಯುತ್ತದೆ. ಅಲ್ಯೂಮಿನಿಯಂ, ತಾಮ್ರ ಮತ್ತು ಹಿತ್ತಾಳೆಯ ಪಾತ್ರೆಗಳ ದೊಡ್ಡ ಪ್ರಮಾಣದ ಉತ್ಪಾದನೆಯು ಇಲ್ಲಿ ನಡೆಯುತ್ತದೆ. ಇಲ್ಲಿ ತಯಾರಿಸಿದ ಪೆಟ್ರೋಕೆಮಿಕಲ್ ಸ್ಥಾವರಗಳಿಗಾಗಿನ ಉಪಕರಣಗಳನ್ನು ವಿಶ್ವದ ಅನೇಕ ದೇಶಗಳಿಗೆ ರಫ್ತು ಮಾಡಲಾಗುತ್ತದೆ. ಹೆಚ್ಚುತ್ತಿರುವ ವಿದ್ಯುತ್ ಉತ್ಪಾದನೆಯಿಂದಾಗಿ ಈ ಎಲ್ಲಾ ಕ್ಷೇತ್ರಗಳಿಗೂ ಅನುಕೂಲವಾಗಲಿದ್ದು, ಇದು ಇಲ್ಲಿನ ಮಿಷನ್ ಮ್ಯಾನುಫ್ಯಾಕ್ಚರಿಂಗ್ಗೆ ಮತ್ತಷ್ಟು ಬಲ ನೀಡಲಿದೆ.

ಸ್ನೇಹಿತರೇ, 

‘ವಿಕಸಿತ ಭಾರತ’ವನ್ನು ಕಟ್ಟುವಲ್ಲಿ ವಿದ್ಯುತ್ ಮಹತ್ವದ ಪಾತ್ರ ವಹಿಸಲಿದೆ. ವಿದ್ಯುತ್ ಲಭ್ಯತೆಯನ್ನು ಹೆಚ್ಚಿಸಲು ನಮ್ಮ ಸರ್ಕಾರವು ಎಲ್ಲಾ ರಂಗಗಳಲ್ಲಿಯೂ ಶ್ರಮಿಸುತ್ತಿದೆ. ಅದು ಒಂದು ರಾಷ್ಟ್ರ-ಒಂದು ಗ್ರಿಡ್ ಉಪಕ್ರಮವಾಗಲಿ, ಹೊಸ ಕಲ್ಲಿದ್ದಲು ವಿದ್ಯುತ್ ಸ್ಥಾವರಗಳಾಗಲಿ, ಸೌರ ಶಕ್ತಿಯಾಗಲಿ ಅಥವಾ ಪರಮಾಣು ವಲಯದ ವಿಸ್ತರಣೆಯಾಗಲಿ—ವಿದ್ಯುತ್ ಉತ್ಪಾದನೆಯನ್ನು ಹೆಚ್ಚಿಸುವುದು ನಮ್ಮ ಪ್ರಯತ್ನ. ವಿದ್ಯುತ್ ಕೊರತೆಯು ರಾಷ್ಟ್ರ ನಿರ್ಮಾಣಕ್ಕೆ ಅಡ್ಡಿಯಾಗಬಾರದು ಎಂಬುದು ನಮ್ಮ ಗುರಿ. 

ಆದರೆ ಸ್ನೇಹಿತರೇ, 

ಕಾಂಗ್ರೆಸ್ ಆಡಳಿತದ ದಿನಗಳನ್ನು ನಾವು ಮರೆಯಬಾರದು. 2014ರ ಮೊದಲು, ಕಾಂಗ್ರೆಸ್ ಅಧಿಕಾರದಲ್ಲಿದ್ದಾಗ, ದೇಶಾದ್ಯಂತ ವಿದ್ಯುತ್ ಕಡಿತ ಉಂಟಾಗುತ್ತಿದ್ದ ದಿನಗಳನ್ನು ನಾವು ನೋಡಿದ್ದೇವೆ—ಇಡೀ ಪ್ರದೇಶಗಳು ವಿದ್ಯುತ್ ಇಲ್ಲದೆ ಕಷ್ಟಪಡುತ್ತಿದ್ದವು. ಕಾಂಗ್ರೆಸ್ ಸರ್ಕಾರವೇ ಮುಂದುವರೆದಿದ್ದರೆ, ದೇಶವು ಇಂದಿಗೂ ಅಂತಹ ವಿದ್ಯುತ್ ಕಡಿತಗಳನ್ನು ಎದುರಿಸುತ್ತಿತ್ತು. ಕಾರ್ಖಾನೆಗಳು ನಡೆಯುತ್ತಿರಲಿಲ್ಲ, ರೈಲುಗಳು ಸಂಚರಿಸುತ್ತಿರಲಿಲ್ಲ ಮತ್ತು ಹೊಲಗಳಿಗೆ ನೀರು ಸಿಗುತ್ತಿರಲಿಲ್ಲ. ಬೇರೆ ರೀತಿಯಲ್ಲಿ ಹೇಳುವುದಾದರೆ, ಕಾಂಗ್ರೆಸ್ ಇನ್ನೂ ಅಧಿಕಾರದಲ್ಲಿದ್ದರೆ, ಇಂತಹ ಬಿಕ್ಕಟ್ಟುಗಳು ಮುಂದುವರಿಯುತ್ತಿದ್ದವು ಮತ್ತು ದೇಶವು ಒಡೆದುಹೋಗಿ ಅಭಿವೃದ್ಧಿ ಕುಂಠಿತಗೊಳ್ಳುತ್ತಿತ್ತು. ಆದರೆ ವರ್ಷಗಳ ಪ್ರಯತ್ನದ ನಂತರ, ಇಂದು ಪರಿಸ್ಥಿತಿ ಬದಲಾಗಿದೆ. ಕಳೆದ ದಶಕದಲ್ಲಿ, ಭಾರತವು ತನ್ನ ವಿದ್ಯುತ್ ಉತ್ಪಾದನಾ ಸಾಮರ್ಥ್ಯವನ್ನು ಸುಮಾರು ಎರಡು ಪಟ್ಟು ಹೆಚ್ಚಿಸಿಕೊಂಡಿದೆ. ಇಂದು, ಭಾರತವು ತನ್ನ ಸ್ವಂತ ಅಗತ್ಯಗಳನ್ನು ಪೂರೈಸುವುದಲ್ಲದೆ, ನೆರೆಯ ದೇಶಗಳಿಗೂ ವಿದ್ಯುತ್ ಅನ್ನು ರಫ್ತು ಮಾಡುತ್ತಿದೆ. ಬಿಜೆಪಿ ಸರ್ಕಾರದ ವಿದ್ಯುತ್ ಉತ್ಪಾದನೆಯ ಮೇಲಿನ ಈ ಗಮನವು ಹರಿಯಾಣಕ್ಕೂ ಲಾಭ ತಂದಿದೆ. ಇಂದು, ಹರಿಯಾಣವು 16,000 ಮೆಗಾವ್ಯಾಟ್ ವಿದ್ಯುತ್ ಉತ್ಪಾದಿಸುತ್ತದೆ. ಈ ಸಾಮರ್ಥ್ಯವನ್ನು ಶೀಘ್ರದಲ್ಲೇ 24,000 ಮೆಗಾವ್ಯಾಟ್ಗಳಿಗೆ ಹೆಚ್ಚಿಸುವ ಗುರಿಯೊಂದಿಗೆ ನಾವು ಕೆಲಸ ಮಾಡುತ್ತಿದ್ದೇವೆ.

ಸ್ನೇಹಿತರೇ, 

ಒಂದೆಡೆ ನಾವು ಉಷ್ಣ ವಿದ್ಯುತ್ ಸ್ಥಾವರಗಳಲ್ಲಿ ಹೂಡಿಕೆ ಮಾಡುತ್ತಿದ್ದರೆ, ಮತ್ತೊಂದೆಡೆ ದೇಶದ ಜನರನ್ನು ಸ್ವತಃ ವಿದ್ಯುತ್ ಉತ್ಪಾದಕರನ್ನಾಗಿ ಮಾಡುತ್ತಿದ್ದೇವೆ. ನಾವು ಪಿಎಂ ಸೂರ್ಯಘರ್ ಮುಫತ್ ಬಿಜಲಿ ಎಂಬ ಯೋಜನೆಯನ್ನು ಪ್ರಾರಂಭಿಸಿದ್ದೇವೆ. ತಮ್ಮ ಮನೆಗಳ ಮೇಲ್ಛಾವಣಿಯಲ್ಲಿ ಸೌರ ಫಲಕಗಳನ್ನು ಅಳವಡಿಸಿಕೊಳ್ಳುವ ಮೂಲಕ ಜನರು ತಮ್ಮ ವಿದ್ಯುತ್ ಬಿಲ್ಗಳನ್ನು ಶೂನ್ಯಕ್ಕೆ ಇಳಿಸಬಹುದು. ಅಷ್ಟೇ ಅಲ್ಲ, ಉತ್ಪಾದನೆಯಾಗುವ ಯಾವುದೇ ಹೆಚ್ಚುವರಿ ವಿದ್ಯುತ್ ಅನ್ನು ಮಾರಾಟ ಮಾಡಿ ಹೆಚ್ಚಿನ ಆದಾಯವನ್ನು ಗಳಿಸಬಹುದು. ಈವರೆಗೆ ದೇಶಾದ್ಯಂತ 1.25 ಕೋಟಿಗೂ ಹೆಚ್ಚು ಜನರು ಈ ಯೋಜನೆಯ ಅಡಿಯಲ್ಲಿ ನೋಂದಾಯಿಸಿಕೊಂಡಿದ್ದಾರೆ. ಹರಿಯಾಣದಿಂದಲೂ ಲಕ್ಷಾಂತರ ಜನರು ಈ ಉಪಕ್ರಮದಲ್ಲಿ ಪಾಲ್ಗೊಳ್ಳಲು ಅರ್ಜಿ ಸಲ್ಲಿಸಿದ್ದಾರೆ ಎಂದು ಹಂಚಿಕೊಳ್ಳಲು ನನಗೆ ಸಂತೋಷವೆನಿಸುತ್ತದೆ. ಮತ್ತು ಈ ಯೋಜನೆ ಮತ್ತಷ್ಟು ವಿಸ್ತಾರಗೊಳ್ಳುತ್ತಿದ್ದಂತೆ, ಇದರ ಸುತ್ತಲಿನ ಸೇವಾ ಪರಿಸರವೂ ಬೆಳೆಯುತ್ತಿದೆ. ಸೌರ ವಲಯದಲ್ಲಿ ಹೊಸ ಕೌಶಲ್ಯಗಳು ಅಭಿವೃದ್ಧಿ ಹೊಂದುತ್ತಿವೆ. ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳಿಗೆ ಹೊಸ ಅವಕಾಶಗಳು ತೆರೆದುಕೊಳ್ಳುತ್ತಿವೆ ಮತ್ತು ಯುವಕರಿಗೆ ಹಲವಾರು ಸಾಧ್ಯತೆಗಳು ಸೃಷ್ಟಿಯಾಗುತ್ತಿವೆ.

ಸ್ನೇಹಿತರೇ, 

ನಮ್ಮ ಸಣ್ಣ ಪಟ್ಟಣಗಳ ಸಣ್ಣ ಕೈಗಾರಿಕೆಗಳಿಗೆ ಸಾಕಷ್ಟು ವಿದ್ಯುತ್ ಒದಗಿಸುವುದರ ಜೊತೆಗೆ, ಅವುಗಳಿಗೆ ಸಾಕಷ್ಟು ಹಣಕಾಸಿನ ಸಂಪನ್ಮೂಲಗಳನ್ನೂ ಒದಗಿಸಲು ಸರ್ಕಾರ ಗಮನಹರಿಸಿದೆ. ಕೋವಿಡ್ ಸಮಯದಲ್ಲಿ, MSMEಗಳನ್ನು ಉಳಿಸಲು ಸರ್ಕಾರವು ಲಕ್ಷಾಂತರ ಕೋಟಿ ರೂಪಾಯಿಗಳ ಹಣಕಾಸಿನ ನೆರವು ನೀಡಿತು. ಸಣ್ಣ ಉದ್ಯಮಗಳು ಯಾವುದೇ ಭಯವಿಲ್ಲದೆ ಬೆಳೆಯಲು ಅನುಕೂಲವಾಗುವಂತೆ ನಾವು MSMEಗಳ ವ್ಯಾಖ್ಯಾನವನ್ನೂ ಬದಲಾಯಿಸಿದ್ದೇವೆ. ಈಗ ಸಣ್ಣ ಕೈಗಾರಿಕೆಗಳು ಬೆಳೆದ ತಕ್ಷಣ ಸರ್ಕಾರಿ ಬೆಂಬಲವನ್ನು ಕಳೆದುಕೊಳ್ಳುತ್ತೇವೆ ಎಂಬ ಆತಂಕವಿಲ್ಲ. ಈಗ ಸರ್ಕಾರವು ಸಣ್ಣ ಕೈಗಾರಿಕೆಗಳಿಗಾಗಿ ವಿಶೇಷ ಕ್ರೆಡಿಟ್ ಕಾರ್ಡ್ಗಳನ್ನು ಪರಿಚಯಿಸುತ್ತಿದೆ. ಕ್ರೆಡಿಟ್ ಗ್ಯಾರಂಟಿ ವ್ಯಾಪ್ತಿಯನ್ನೂ ವಿಸ್ತರಿಸಲಾಗುತ್ತಿದೆ. ಕೆಲವೇ ದಿನಗಳ ಹಿಂದೆ, ಮುದ್ರಾ ಯೋಜನೆ 10 ವರ್ಷಗಳನ್ನು ಪೂರೈಸಿತು. ಕಳೆದ 10 ವರ್ಷಗಳಲ್ಲಿ, ಮೊದಲ ಬಾರಿಗೆ ವ್ಯಾಪಾರ ಮತ್ತು ಕೈಗಾರಿಕಾ ಕ್ಷೇತ್ರಕ್ಕೆ ಕಾಲಿಡುತ್ತಿರುವ ಸಾಮಾನ್ಯ ನಾಗರಿಕರಿಗೆ ಈ ಯೋಜನೆಯ ಅಡಿಯಲ್ಲಿ ಯಾವುದೇ ಭದ್ರತೆ ಇಲ್ಲದೆ 33 ಲಕ್ಷ ಕೋಟಿ ರೂಪಾಯಿಗಳಿಗೂ ಹೆಚ್ಚು ಸಾಲ ವಿತರಿಸಲಾಗಿದೆ ಎಂದು ತಿಳಿಯಲು ನಿಮಗೆ ಸಂತೋಷವಾಗುತ್ತದೆ—ಮತ್ತು ಬಹುಶಃ ಆಶ್ಚರ್ಯವೂ ಆಗಬಹುದು. ಊಹಿಸಿ ನೋಡಿ—ಯಾವುದೇ ಗ್ಯಾರಂಟಿ ಇಲ್ಲದೆ 33 ಲಕ್ಷ ಕೋಟಿ ರೂಪಾಯಿಗಳು! ಈ ಯೋಜನೆಯ ಫಲಾನುಭವಿಗಳಲ್ಲಿ ಶೇಕಡಾ 50 ಕ್ಕಿಂತ ಹೆಚ್ಚು ಜನರು SC/ST/OBC ಸಮುದಾಯಗಳಿಗೆ ಸೇರಿದವರು. ನಮ್ಮ ಯುವಕರ ದೊಡ್ಡ ಕನಸುಗಳನ್ನು ನನಸಾಗಿಸಲು ಈ ಸಣ್ಣ ಉದ್ಯಮಗಳನ್ನು ಸಬಲೀಕರಣಗೊಳಿಸುವುದು ಇದರ ಉದ್ದೇಶವಾಗಿದೆ.

ಸ್ನೇಹಿತರೇ, 

ಹರಿಯಾಣದ ನಮ್ಮ ರೈತ ಸಹೋದರ ಸಹೋದರಿಯರ ಕಠಿಣ ಪರಿಶ್ರಮವು ಪ್ರತಿ ಭಾರತೀಯನ ತಟ್ಟೆಯಲ್ಲಿ ಕಾಣಿಸುತ್ತದೆ. ಬಿಜೆಪಿ ನೇತೃತ್ವದ ಡಬಲ್-ಇಂಜಿನ್ ಸರ್ಕಾರವು ನಮ್ಮ ರೈತರ ಸುಖ ದುಃಖಗಳಲ್ಲಿ ಅತಿದೊಡ್ಡ ಬೆಂಬಲವಾಗಿದೆ. ಹರಿಯಾಣದ ರೈತರ ಶಕ್ತಿ ಮತ್ತು ಸಾಮರ್ಥ್ಯವನ್ನು ಹೆಚ್ಚಿಸುವುದು ನಮ್ಮ ಪ್ರಯತ್ನ. ಇಂದು, ಹರಿಯಾಣದಲ್ಲಿ ಬಿಜೆಪಿ ಸರ್ಕಾರವು ಕನಿಷ್ಠ ಬೆಂಬಲ ಬೆಲೆಗೆ (MSP) 24 ಬೆಳೆಗಳನ್ನು ಖರೀದಿಸುತ್ತಿದೆ. ಹರಿಯಾಣದ ಲಕ್ಷಾಂತರ ರೈತರು ಪಿಎಂ ಫಸಲ್ ಬಿಮಾ ಯೋಜನೆಯಿಂದಲೂ ಲಾಭ ಪಡೆದಿದ್ದಾರೆ. ಈ ಯೋಜನೆಯ ಅಡಿಯಲ್ಲಿ 9,000 ಕೋಟಿ ರೂಪಾಯಿಗಳಿಗೂ ಹೆಚ್ಚು ಮೊತ್ತದ ಕ್ಲೈಮ್ಗಳನ್ನು ಪಾವತಿಸಲಾಗಿದೆ. ಅದೇ ರೀತಿ, ಪಿಎಂ-ಕಿಸಾನ್ ಸಮ್ಮಾನ್ ನಿಧಿಯ ಮೂಲಕ 6,500 ಕೋಟಿ ರೂಪಾಯಿಗಳು ನೇರವಾಗಿ ಹರಿಯಾಣದ ರೈತರ ಕೈ ಸೇರಿವೆ. 

ಸ್ನೇಹಿತರೇ, 

ಹರಿಯಾಣ ಸರ್ಕಾರವು ಬ್ರಿಟಿಷರ ಕಾಲದಿಂದಲೂ ಮುಂದುವರೆದಿದ್ದ ಆಬಿಯಾನ (ಕಾಲುವೆ ನೀರು ತೆರಿಗೆ) ಪದ್ಧತಿಯನ್ನು ರದ್ದು ಮಾಡಿದೆ. ಇನ್ನು ಮುಂದೆ ನೀವು ಕಾಲುವೆ ನೀರಿಗೆ ತೆರಿಗೆ ಕಟ್ಟಬೇಕಾಗಿಲ್ಲ, ಮತ್ತು ಆಬಿಯಾನದ ಅಡಿಯಲ್ಲಿ ಬಾಕಿ ಉಳಿದಿದ್ದ 130 ಕೋಟಿ ರೂಪಾಯಿಗಳಿಗೂ ಹೆಚ್ಚು ಮೊತ್ತದ ಸಾಲವನ್ನು ಮನ್ನಾ ಮಾಡಲಾಗಿದೆ. 

ಸ್ನೇಹಿತರೇ, 

ಡಬಲ್-ಇಂಜಿನ್ ಸರ್ಕಾರದ ಪ್ರಯತ್ನಗಳಿಗೆ ಧನ್ಯವಾದಗಳು, ರೈತರು ಮತ್ತು ಜಾನುವಾರು ಮಾಲೀಕರಿಗೆ ಹೊಸ ಆದಾಯದ ಮೂಲಗಳು ಸೃಷ್ಟಿಯಾಗುತ್ತಿವೆ. ಗೋಬರ್ಧನ್ ಯೋಜನೆಯು ರೈತರಿಗೆ ತ್ಯಾಜ್ಯ ನಿರ್ವಹಣೆಗೆ ಸಹಾಯ ಮಾಡುವುದರ ಜೊತೆಗೆ ಆದಾಯ ಗಳಿಕೆಯ ಅವಕಾಶಗಳನ್ನೂ ಒದಗಿಸುತ್ತಿದೆ. ಹಸುವಿನ ಸಗಣಿ, ಬೆಳೆಗಳ ತ್ಯಾಜ್ಯ ಮತ್ತು ಇತರ ಸಾವಯವ ತ್ಯಾಜ್ಯದಿಂದ ಜೈವಿಕ ಅನಿಲ ಉತ್ಪಾದಿಸಲಾಗುತ್ತಿದೆ. ಈ ವರ್ಷದ ಬಜೆಟ್ನಲ್ಲಿ ದೇಶಾದ್ಯಂತ 500 ಗೋಬರ್ಧನ್ (GOBARdhan) ಸ್ಥಾವರಗಳನ್ನು ಸ್ಥಾಪಿಸುವ ಯೋಜನೆಯನ್ನು ಘೋಷಿಸಲಾಯಿತು. ಇಂದು, ಯಮುನಾನಗರದಲ್ಲಿ ಹೊಸ ಗೋಬರ್ಧನ್ ಸ್ಥಾವರವನ್ನು ಸಹ ಉದ್ಘಾಟಿಸಲಾಗಿದೆ. ಇದು ಪ್ರತಿ ವರ್ಷ ಮುನ್ಸಿಪಲ್ ಕಾರ್ಪೊರೇಷನ್ಗೆ ಸುಮಾರು 3 ಕೋಟಿ ರೂಪಾಯಿಗಳನ್ನು ಉಳಿಸುತ್ತದೆ. ಗೋಬರ್ಧನ್ (GOBARdhan) ಯೋಜನೆಯು ಸ್ವಚ್ಛ ಭಾರತ್ ಮಿಷನ್ ಗೂ ತನ್ನ ಕೊಡುಗೆಯನ್ನು ನೀಡುತ್ತಿದೆ.

ಸ್ನೇಹಿತರೇ, 

ಹರಿಯಾಣ ಈಗ ಅಭಿವೃದ್ಧಿಯ ಪಥದಲ್ಲಿ ವೇಗವಾಗಿ ಮುನ್ನಡೆಯುತ್ತಿದೆ. ಇಲ್ಲಿಗೆ ಬರುವ ಮೊದಲು, ಹಿಸಾರ್ನಲ್ಲಿ ಜನರನ್ನು ಭೇಟಿ ಮಾಡುವ ಅವಕಾಶ ನನಗೆ ಸಿಕ್ಕಿತು. ಅಲ್ಲಿಂದ ಅಯೋಧ್ಯ ಧಾಮಕ್ಕೆ ನೇರ ವಿಮಾನ ಸೇವೆಯು ಈಗ ಪ್ರಾರಂಭವಾಗಿದೆ. ಇಂದು, ರೇವಾರಿ ಜನರಿಗೂ ಹೊಸ ಬೈಪಾಸ್ನ ಕೊಡುಗೆ ದೊರೆತಿದೆ. ಇದು ಮಾರುಕಟ್ಟೆಗಳು, ಛೇದಕಗಳು ಮತ್ತು ರೈಲ್ವೆ ಕ್ರಾಸಿಂಗ್ಗಳಲ್ಲಿನ ಟ್ರಾಫಿಕ್ ಜಾಮ್ನಿಂದ ಅವರನ್ನು ಮುಕ್ತಗೊಳಿಸುತ್ತದೆ. ಈ ನಾಲ್ಕು ಪಥದ ಬೈಪಾಸ್ ನಗರವನ್ನು ವಾಹನಗಳು ಸರಾಗವಾಗಿ ದಾಟಿ ಹೋಗಲು ಅನುವು ಮಾಡಿಕೊಡುತ್ತದೆ. ದೆಹಲಿಯಿಂದ ನಾರ್ನಾಲ್ಗೆ ಪ್ರಯಾಣದ ಸಮಯವು ಒಂದು ಗಂಟೆ ಕಡಿಮೆಯಾಗಲಿದೆ. ಈ ಅಭಿವೃದ್ಧಿಗಾಗಿ ನಿಮ್ಮೆಲ್ಲರಿಗೂ ನನ್ನ ಅಭಿನಂದನೆಗಳು. 

ಸ್ನೇಹಿತರೇ, 

ನಮಗೆ, ರಾಜಕೀಯವು ಅಧಿಕಾರವನ್ನು ಅನುಭವಿಸುವುದಲ್ಲ, ಬದಲಿಗೆ ಜನರ ಸೇವೆ ಮತ್ತು ರಾಷ್ಟ್ರದ ಸೇವೆಯ ಒಂದು ಮಾಧ್ಯಮವಾಗಿದೆ. ಅದಕ್ಕಾಗಿಯೇ ಬಿಜೆಪಿ ಹೇಳಿದ್ದನ್ನು ಧೈರ್ಯದಿಂದ ಮಾಡುತ್ತದೆ. ಹರಿಯಾಣದಲ್ಲಿ ಮೂರನೇ ಬಾರಿಗೆ ಸರ್ಕಾರ ರಚಿಸಿದ ನಂತರ, ನಾವು ನಿಮಗೆ ನೀಡಿದ ಭರವಸೆಗಳನ್ನು ಸ್ಥಿರವಾಗಿ ಈಡೇರಿಸುತ್ತಿದ್ದೇವೆ. ಆದರೆ ಕಾಂಗ್ರೆಸ್ ಆಡಳಿತವಿರುವ ರಾಜ್ಯಗಳಲ್ಲಿ ಏನು ನಡೆಯುತ್ತಿದೆ? ಇದು ಸಾರ್ವಜನಿಕ ವಿಶ್ವಾಸಕ್ಕೆ ಸಂಪೂರ್ಣ ದ್ರೋಹ. ನಮ್ಮ ನೆರೆಯ ರಾಜ್ಯವಾದ ಹಿಮಾಚಲವನ್ನೇ ನೋಡಿ—ಜನರು ತೀವ್ರ ಸಂಕಷ್ಟದಲ್ಲಿದ್ದಾರೆ. ಎಲ್ಲಾ ಅಭಿವೃದ್ಧಿ ಮತ್ತು ಕಲ್ಯಾಣ ಕಾರ್ಯಗಳು ಸ್ಥಗಿತಗೊಂಡಿವೆ. ಕರ್ನಾಟಕದಲ್ಲಿ, ವಿದ್ಯುತ್ ನಿಂದ ಹಿಡಿದು ಹಾಲಿನವರೆಗೆ, ಬಸ್ ದರದಿಂದ ಹಿಡಿದು ಬೀಜಗಳವರೆಗೆ—ಎಲ್ಲವೂ ದುಬಾರಿಯಾಗುತ್ತಿದೆ. ಕರ್ನಾಟಕದ ಕಾಂಗ್ರೆಸ್ ಸರ್ಕಾರವು ಹೇಗೆ ವಿವಿಧ ತೆರಿಗೆಗಳನ್ನು ವಿಧಿಸಿದೆ ಮತ್ತು ಎಲ್ಲದರ ಬೆಲೆಗಳನ್ನು ಹೆಚ್ಚಿಸಿದೆ ಎಂಬುದನ್ನು ಸಾಮಾಜಿಕ ಮಾಧ್ಯಮದಲ್ಲಿ ನಾನು ನೋಡಿದೆ. ಸಾಮಾಜಿಕ ಮಾಧ್ಯಮದಲ್ಲಿ ಜನರು ಇದನ್ನು ಎ ಟು ಝೆಡ್ ಪಟ್ಟಿಯ ಮೂಲಕ ಸೃಜನಾತ್ಮಕವಾಗಿ ಬಯಲು ಮಾಡಿದ್ದಾರೆ—ಅಕ್ಷರಶಃ ವರ್ಣಮಾಲೆಯ ಪ್ರತಿಯೊಂದು ಅಕ್ಷರಕ್ಕೂ ಒಂದೊಂದು ರೀತಿಯ ತೆರಿಗೆ ಏರಿಕೆಯನ್ನು ಸೇರಿಸಿ, ಕಾಂಗ್ರೆಸ್ ಸರ್ಕಾರದ ಕಾರ್ಯವೈಖರಿಯನ್ನು ತೋರಿಸಿದ್ದಾರೆ. ಮುಖ್ಯಮಂತ್ರಿಯ ಆಪ್ತರು ಸಹ ಕಾಂಗ್ರೆಸ್ ಕರ್ನಾಟಕವನ್ನು ಭ್ರಷ್ಟಾಚಾರದಲ್ಲಿ ನಂಬರ್ ಒನ್ ಮಾಡಿದೆ ಎಂದು ಒಪ್ಪಿಕೊಳ್ಳುತ್ತಾರೆ.

ಸ್ನೇಹಿತರೇ, 

ತೆಲಂಗಾಣದ ಕಾಂಗ್ರೆಸ್ ಸರ್ಕಾರವು ಜನರಿಗೆ ನೀಡಿದ ಭರವಸೆಗಳನ್ನು ಸಹ ನೆರವೇರಿಸಿಲ್ಲ. ಅಲ್ಲಿ, ಕಾಂಗ್ರೆಸ್ ಕಾಡುಗಳನ್ನು ಧ್ವಂಸಗೊಳಿಸುವಲ್ಲಿ ಮಗ್ನವಾಗಿದೆ. ಪ್ರಕೃತಿಗೆ ಹಾನಿ ಮಾಡುವುದು, ವನ್ಯಜೀವಿಗಳನ್ನು ಅಪಾಯಕ್ಕೆ ತಳ್ಳುವುದು—ಇದು ಕಾಂಗ್ರೆಸ್ನ ಕಾರ್ಯ ವೈಖರಿ! ನಾವು ಇಲ್ಲಿ ಗೋಬರ್ಧನ್ ಯೋಜನೆಯ ಮೂಲಕ ತ್ಯಾಜ್ಯವನ್ನು ಸಂಪತ್ತಾಗಿ ಪರಿವರ್ತಿಸಲು ಶ್ರಮಿಸುತ್ತಿದ್ದರೆ, ಅವರು ಈಗಾಗಲೇ ಇರುವ ಕಾಡುಗಳನ್ನು ನಾಶಪಡಿಸುತ್ತಿದ್ದಾರೆ. ಇದು ನಿಮ್ಮ ಮುಂದೆ ಎರಡು ಸ್ಪಷ್ಟವಾದ ಆಡಳಿತ ಮಾದರಿಗಳನ್ನು ಇಡುತ್ತದೆ. ಒಂದು ಕಡೆ ಸಂಪೂರ್ಣವಾಗಿ ವಿಫಲವೆಂದು ಸಾಬೀತಾಗಿರುವ, ಕೇವಲ ಅಧಿಕಾರ ಮತ್ತು ಸ್ಥಾನಗಳಿಗಾಗಿ ಮುಡಿಪಾಗಿಟ್ಟ ಕಾಂಗ್ರೆಸ್ ಮಾದರಿ ಇದೆ. ಮತ್ತೊಂದೆಡೆ ಸತ್ಯದ ಮೇಲೆ ಆಧಾರಿತವಾದ, ಬಾಬಾಸಾಹೇಬ್ ಅಂಬೇಡ್ಕರ್ ಅವರು ತೋರಿಸಿದ ಮಾರ್ಗದಿಂದ ಮಾರ್ಗದರ್ಶಿಸಲ್ಪಟ್ಟ ಮತ್ತು ಸಂವಿಧಾನವನ್ನು ಸಂಪೂರ್ಣವಾಗಿ ಗೌರವಿಸುವ ಬಿಜೆಪಿ ಮಾದರಿಯಿದೆ. ನಮ್ಮ ದೃಷ್ಟಿ ‘ವಿಕಸಿತ್ ಭಾರತ್’ ನಿರ್ಮಾಣ, ಮತ್ತು ಇಂದು ಯಮುನಾನಗರದಲ್ಲಿ, ಆ ಪ್ರಯತ್ನವು ಮುಂದು ಸಾಗುತ್ತಿರುವುದನ್ನು ನಾವು ಕಾಣುತ್ತಿದ್ದೇವೆ.

ಸ್ನೇಹಿತರೇ, 

ನಾನು ನಿಮ್ಮೊಂದಿಗೆ ಮತ್ತೊಂದು ಮಹತ್ವದ ವಿಷಯದ ಬಗ್ಗೆ ಮಾತನಾಡಲು ಬಯಸುತ್ತೇನೆ. ನಿನ್ನೆ ದೇಶವು ಬೈಸಾಖಿ ಹಬ್ಬವನ್ನು ಆಚರಿಸಿತು. ನಿನ್ನೆ ಜಲಿಯನ್ವಾಲಾ ಬಾಗ್ ಹತ್ಯಾಕಾಂಡ ನಡೆದು 106 ವರ್ಷಗಳು ಸಹ ಆಗಿವೆ. ಆ ಹತ್ಯಾಕಾಂಡದಲ್ಲಿ ಬಲಿಯಾದವರ ನೆನಪುಗಳು ಇಂದಿಗೂ ನಮ್ಮೊಂದಿಗೆ ಜೀವಂತವಾಗಿವೆ. ಜಲಿಯನ್ವಾಲಾ ಬಾಗ್ ಹತ್ಯಾಕಾಂಡದಲ್ಲಿ ಬ್ರಿಟಿಷರ ಕ್ರೌರ್ಯ ಮತ್ತು ಹುತಾತ್ಮರಾದ ದೇಶಭಕ್ತರ ಬಲಿದಾನದ ಹೊರತಾಗಿ, ದೀರ್ಘಕಾಲದವರೆಗೆ ಮರೆಮಾಚಲಾಗಿದ್ದ ಮತ್ತೊಂದು ಅಂಶವಿದೆ. ಈ ಅಂಶವು ಮಾನವೀಯತೆ ಮತ್ತು ರಾಷ್ಟ್ರದೊಂದಿಗೆ ನಿಲ್ಲುವ ಸ್ಫೂರ್ತಿಯನ್ನು ಪ್ರತಿಬಿಂಬಿಸುತ್ತದೆ. ಮತ್ತು ಈ ಸ್ಫೂರ್ತಿಗೆ ಸಂಬಂಧಿಸಿದ ಹೆಸರು ಶಂಕರನ್ ನಾಯರ್. ನಿಮ್ಮಲ್ಲಿ ಅನೇಕರು ಈ ಹೆಸರನ್ನು ಕೇಳಿರಲಿಕ್ಕಿಲ್ಲ, ಆದರೆ ಇತ್ತೀಚಿನ ದಿನಗಳಲ್ಲಿ, ಅವರ ಬಗ್ಗೆ ಬಹಳಷ್ಟು ಚರ್ಚೆ ನಡೆಯುತ್ತಿದೆ. ಶಂಕರನ್ ನಾಯರ್ ಜೀ ಅವರು ಖ್ಯಾತ ವಕೀಲರಾಗಿದ್ದರು, ಮತ್ತು ಸುಮಾರು 100 ವರ್ಷಗಳ ಹಿಂದೆ, ಅವರು ಬ್ರಿಟಿಷ್ ಸರ್ಕಾರದಲ್ಲಿ ಉನ್ನತ ಸ್ಥಾನವನ್ನು ಹೊಂದಿದ್ದರು. ಅಧಿಕಾರಕ್ಕೆ ಹತ್ತಿರವಾಗಿದ್ದು ಅವರು ಆರಾಮದಾಯಕ ಮತ್ತು ಐಷಾರಾಮಿ ಜೀವನವನ್ನು ನಡೆಸಬಹುದಿತ್ತು. ಆದರೆ ವಿದೇಶಿ ಆಡಳಿತದ ಕ್ರೌರ್ಯ ಮತ್ತು ಜಲಿಯನ್ವಾಲಾ ಬಾಗ್ನಲ್ಲಿ ನಡೆದ ಘಟನೆಯಿಂದ ತೀವ್ರವಾಗಿ ನೊಂದ ಅವರು ಬ್ರಿಟಿಷರ ವಿರುದ್ಧ ಧ್ವನಿ ಎತ್ತಲು ಮುಂದಾದರು. ಅವರು ತಮ್ಮ ಪ್ರತಿಷ್ಠಿತ ಹುದ್ದೆಗೆ ಧೈರ್ಯದಿಂದ ರಾಜೀನಾಮೆ ನೀಡಿದರು ಮತ್ತು ದೇಶದ ಪರವಾಗಿ ನಿಲ್ಲಲು ನಿರ್ಧರಿಸಿದರು. ಅವರು ಕೇರಳದವರಾಗಿದ್ದರೂ ಮತ್ತು ಘಟನೆ ಪಂಜಾಬ್ ನಲ್ಲಿ ನಡೆದಿದ್ದರೂ, ಅವರು ವೈಯಕ್ತಿಕವಾಗಿ ಜಲಿಯನ್ವಾಲಾ ಬಾಗ್ ಹತ್ಯಾಕಾಂಡದ ಪ್ರಕರಣವನ್ನು ಕೈಗೆತ್ತಿಕೊಳ್ಳಲು ನಿರ್ಧರಿಸಿದರು. ಅವರು ಸ್ವಂತವಾಗಿ ಹೋರಾಡಿ ಬ್ರಿಟಿಷ್ ಸಾಮ್ರಾಜ್ಯದ ಅಡಿಪಾಯವನ್ನೇ ಅಲ್ಲಾಡಿಸಿದರು. ‘ಸೂರ್ಯ ಮುಳುಗದ ಸಾಮ್ರಾಜ್ಯ’ ಎಂದು ಹೇಳಲಾಗುತ್ತಿದ್ದ ಬ್ರಿಟಿಷ್ ಸಾಮ್ರಾಜ್ಯವನ್ನು ಶಂಕರನ್ ನಾಯರ್ ಜೀ ಅವರು ಜಲಿಯನ್ವಾಲಾ ಬಾಗ್ ಹತ್ಯಾಕಾಂಡದ ವಿಚಾರಣೆಗಾಗಿ ನ್ಯಾಯಾಲಯಕ್ಕೆ ಕರೆತಂದು ಅವರನ್ನು ಜವಾಬ್ದಾರರನ್ನಾಗಿ ಮಾಡಿದರು.

ಸ್ನೇಹಿತರೇ, 

ಇದು ಕೇವಲ ಮಾನವೀಯತೆಯ ಪರವಾಗಿ ನಿಲ್ಲುವ ವಿಷಯವಾಗಿರಲಿಲ್ಲ. ಇದು ‘ಏಕ್ ಭಾರತ, ಶ್ರೇಷ್ಠ ಭಾರತ’ (ಒಂದು ಭಾರತ, ಶ್ರೇಷ್ಠ ಭಾರತ) ಕ್ಕೆ ಒಂದು ಪ್ರಜ್ವಲಿಸುವ ಉದಾಹರಣೆಯಾಗಿತ್ತು. ದೂರದ ಕೇರಳದ ಒಬ್ಬ ವ್ಯಕ್ತಿ ಪಂಜಾಬ್ನಲ್ಲಿ ನಡೆದ ಹತ್ಯಾಕಾಂಡಕ್ಕಾಗಿ ಬ್ರಿಟಿಷ್ ಆಳ್ವಿಕೆಯ ವಿರುದ್ಧ ಹೇಗೆ ಎದ್ದು ನಿಂತರು—ಇದೇ ನಿಜವಾದ ಸ್ಫೂರ್ತಿ ನಮ್ಮ ಸ್ವಾತಂತ್ರ್ಯ ಹೋರಾಟಕ್ಕೆ ಪ್ರೇರಣೆ ನೀಡಿತು. ಇಂದಿಗೂ, ಅದೇ ಸ್ಫೂರ್ತಿ ‘ವಿಕಸಿತ ಭಾರತ’ ಕಡೆಗಿನ ನಮ್ಮ ಪಯಣದಲ್ಲಿ ದೊಡ್ಡ ಬಲವಾಗಿದೆ. ಕೇರಳದ ಶಂಕರನ್ ನಾಯರ್ ಜೀ ಅವರ ಕೊಡುಗೆಯ ಬಗ್ಗೆ ನಾವು ಕಲಿಯಬೇಕು, ಮತ್ತು ಪಂಜಾಬ್, ಹರಿಯಾಣ ಮತ್ತು ಹಿಮಾಚಲದ ಪ್ರತಿಯೊಂದು ಮಗುವಿಗೂ ಅವರ ಪರಿಚಯವಿರಬೇಕು. 

ಸ್ನೇಹಿತರೇ, 

ಬಡವರು, ರೈತರು, ಯುವಕರು ಮತ್ತು ಮಹಿಳೆಯರು ಅನ್ನುವ ನಾಲ್ಕು ಪ್ರಮುಖ ಸ್ತಂಭಗಳನ್ನು ಸಬಲೀಕರಣಗೊಳಿಸಲು, ಡಬಲ್-ಇಂಜಿನ್ ಸರ್ಕಾರವು ಅವಿರತವಾಗಿ ಶ್ರಮಿಸುತ್ತಿದೆ. ನಮ್ಮೆಲ್ಲರ ಪ್ರಯತ್ನದಿಂದ, ಹರಿಯಾಣ ಖಂಡಿತವಾಗಿಯೂ ಅಭಿವೃದ್ಧಿ ಹೊಂದುತ್ತದೆ. ನಾನು ಅದನ್ನು ನನ್ನ ಕಣ್ಣಾರೆ ಕಾಣುತ್ತಿದ್ದೇನೆ—ಹರಿಯಾಣವು ಏಳಿಗೆ ಹೊಂದುತ್ತದೆ, ಸಮೃದ್ಧವಾಗುತ್ತದೆ ಮತ್ತು ರಾಷ್ಟ್ರಕ್ಕೆ ಕೀರ್ತಿಯನ್ನು ತರುತ್ತದೆ. ಈ ಹಲವಾರು ಅಭಿವೃದ್ಧಿ ಯೋಜನೆಗಳಿಗಾಗಿ ನಿಮ್ಮೆಲ್ಲರಿಗೂ ಹೃತ್ಪೂರ್ವಕ ಅಭಿನಂದನೆಗಳು. ನಿಮ್ಮ ಎರಡು ಕೈಗಳನ್ನು ಎತ್ತಿ ನನ್ನೊಂದಿಗೆ ಪೂರ್ಣ ಹುಮ್ಮಸ್ಸಿನಿಂದ ಹೇಳಿ: 

ಭಾರತ್ ಮಾತಾ ಕೀ ಜೈ! 

ಭಾರತ್ ಮಾತಾ ಕೀ ಜೈ! 

ಭಾರತ್ ಮಾತಾ ಕೀ ಜೈ! 

ಎಲ್ಲರಿಗೂ  ಧನ್ಯವಾದಗಳು!

ಸೂಚನೆ: ಇದು ಪ್ರಧಾನಮಂತ್ರಿಯವರ ಭಾಷಣದ ಅಂದಾಜು ಅನುವಾದವಾಗಿದೆ. ಮೂಲ ಭಾಷಣವನ್ನು ಹಿಂದಿಯಲ್ಲಿ ನೀಡಲಾಗಿದೆ.

*****