ಪಿಎಂಇಂಡಿಯಾ

ಗೌರವಾನ್ವಿತ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಯವರ ಆಹ್ವಾನದ ಮೇರೆಗೆ ಮತ್ತು ಎರಡು ಪವಿತ್ರ ಮಸೀದಿಗಳ ಮಾರ್ಗದರ್ಶನದಂತೆ ಘನತೆವೆತ್ತ ರಾಜಕುಮಾರ ಮೊಹಮ್ಮದ್ ಬಿನ್ ಸಲ್ಮಾನ್ ಬಿನ್ ಅಬ್ದುಲ್ ಅಜೀಜ್ ಅಲ್ ಸೌದ್, ಸೌದಿ ಅರೇಬಿಯಾದ ಉಪ ಪ್ರಧಾನಿ ಮತ್ತು ರಕ್ಷಣಾ ಸಚಿವರು ಫೆಬ್ರವರಿ 19-20, 2019 ರಂದು ಭಾರತಕ್ಕೆ ತಮ್ಮ ಮೊದಲ ಭೇಟಿ ನೀಡಿದರು. ಗೌರವಾನ್ವಿತ ಪ್ರಧಾನಮಂತ್ರಿಯವರು ವಿಮಾನ ನಿಲ್ದಾಣದಲ್ಲಿ ಅವರನ್ನು ಬರಮಾಡಿಕೊಂಡರು. ಎರಡು ಪವಿತ್ರ ಮಸೀದಿಗಳ ಪಾಲಕರಾದ ಘನತೆವೆತ್ತ ದೊರೆ ಸಲ್ಮಾನ್ ಬಿನ್ ಅಬ್ದುಲ್ ಅಜೀಜ್ ಅಲ್ ಸೌದ್ ಅವರ ಆಹ್ವಾನದ ಮೇರೆಗೆ ಪ್ರಧಾನಿ ಶ್ರೀ ನರೇಂದ್ರ ಮೋದಿಯವರು 2016ರ ಏಪ್ರಿಲ್ ನಲ್ಲಿ ಸೌದಿ ಅರೇಬಿಯಾಕ್ಕೆ ನೀಡಿದ ಭೇಟಿಯ ನಂತರ ಈ ಭಾರತ ಭೇಟಿ ನಡೆಯುತ್ತಿದೆ.

2.    ಘನತೆವೆತ್ತ ರಾಜಕುಮಾರರಿಗೆ ಫೆಬ್ರವರಿ 20, 2019 ರಂದು ನವದೆಹಲಿಯ ರಾಷ್ಟ್ರಪತಿ ಭವನದ ಅಂಗಳದಲ್ಲಿ ಭವ್ಯ ಸ್ವಾಗತ ಕೋರಲಾಯಿತು. ಘನತೆವೆತ್ತ ರಾಜಕುಮಾರರ ಗೌರವಾರ್ಥ ರಾಷ್ಟ್ರಪತಿ ಶ್ರೀ ರಾಮ್ ನಾಥ್ ಕೋವಿಂದ್ ಅವರು ಔತಣಕೂಟ ಏರ್ಪಡಿಸಿದ್ದರು.

3.    ಪ್ರಧಾನಂತ್ರಿ ಶ್ರೀ ನರೇಂದ್ರ ಮೋದಿ ಮತ್ತು ಘನತೆವೆತ್ತ ರಾಜಕುಮಾರ ಮೊಹಮ್ಮದ್ ಬಿನ್ ಸಲ್ಮಾನ್ ಬಿನ್ ಅಬ್ದುಲ್ ಅಜೀಜ್ ಅವರು ಫೆಬ್ರವರಿ 20, 2019 ರಂದು ಹೈದರಾಬಾದ್ ಹೌಸ್ ನಲ್ಲಿ ನಿಯೋಗ ಮಟ್ಟದ ಮಾತುಕತೆ ನಡೆಸಿದರು. ವಿದೇಶಾಂಗ ಸಚಿವೆ ಶ್ರೀಮತಿ ಸುಷ್ಮಾ ಸ್ವರಾಜ್ ಅವರು ರಾಜಕುಮಾರರನ್ನು ಭೇಟಿ ಮಾಡಿದರು.

4.   ಭಾರತ ಮತ್ತು ಸೌದಿ ಅರೇಬಿಯಾ ಶತಮಾನಗಳಿಂದ ಆರ್ಥಿಕ ಮತ್ತು ಸಾಮಾಜಿಕ- ಸಾಂಸ್ಕೃತಿಕ ಸಂಬಂಧಗಳ ಪ್ರತಿಬಿಂಬವಾಗಿ ಸೌಹಾರ್ದ ಮತ್ತು ಸ್ನೇಹ ಸಂಬಂಧಗಳನ್ನು ಹೊಂದಿವೆ. ಭೌಗೋಳಿಕ ಸಾಮೀಪ್ಯ, ನಾಗರೀಕತೆಯ ಸಂಪರ್ಕಗಳು, ಸಾಂಸ್ಕೃತಿಕ ಸಾದೃಶ್ಯ, ನೈಸರ್ಗಿಕ ಒಡನಾಟಗಳು, ಜನರ ನಡುವಿನ ಸಂಪರ್ಕಗಳು, ಸಾಮಾನ್ಯ ಸವಾಲುಗಳು ಮತ್ತು ಅವಕಾಶಗಳು ಈ ಸಂಬಂಧಕ್ಕೆ ಸಂವೇಗವನ್ನು ಸೇರಿಸಿವೆ.

5.    ಎರಡೂ ದೇಶಗಳು ಮತ್ತು ಅವುಗಳ ನಾಯಕರನ್ನು ಜೋಡಿಸಿರುವ ಬಲವಾದ ಸ್ನೇಹದ ನೆಲೆಯಲ್ಲಿ ದ್ವಿಪಕ್ಷೀಯ ಮಾತುಕತೆಗಳು ನಡೆದವು. ವಿಶ್ವಾಸ, ಪರಸ್ಪರ ತಿಳುವಳಿಕೆ, ಸೌಹಾರ್ದತೆ ಮತ್ತು ಪರಸ್ಪರರ ಹಿತಾಸಕ್ತಿಗಳಿಗೆ ಗೌರವ ನೀಡುವ ಸ್ನೇಹ ಮತ್ತು ಸಹಕಾರಗಳ ದ್ವಿಪಕ್ಷೀಯ ಸಂಬಂಧಗಳ ಬಗ್ಗೆ ಅವರು ತೃಪ್ತಿ ವ್ಯಕ್ತಪಡಿಸಿದರು. ನಮ್ಮ ಸಂಬಂಧಗಳನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ದ 2016ರ ಏಪ್ರಿಲ್ ನಲ್ಲಿ ಪ್ರಧಾನಮಂತ್ರಿಯವರು ರಿಯಾದ್ ಗೆ ನೀಡಿದ ಮಹತ್ವದ ಭೇಟಿ ನಂತರ, ವ್ಯಾಪಾರ, ಇಂಧನ, ಭದ್ರತೆ ಮತ್ತು ಸಾಂಸ್ಕೃತಿಕ ಕ್ಷೇತ್ರಗಳನ್ನು ಒಳಗೊಂಡಂತೆ ವಿವಿಧ ಕ್ಷೇತ್ರಗಳಲ್ಲಿ ಆಗಿರುವ ಬೆಳವಣಿಗೆಗಳ ಬಗ್ಗೆ ಎರಡೂ ಕಡೆಯವರು ತೃಪ್ತಿ ವ್ಯಕ್ತಪಡಿಸಿದರು.

6.    ಘನತೆವೆತ್ತ ರಾಜಕುಮಾರರು ಆರಂಭಿಸಿದ ಬದಲಾವಣೆಗಳಿಂದಾಗಿ ಸೌದಿ ಅರೇಬಿಯಾದಲ್ಲಿ ಬಂದಿರುವ ಸಂಯಮ ಮತ್ತು ಮುಕ್ತತೆಯನ್ನು ಪ್ರಧಾನಿ ಶ್ರೀ ಮೋದಿ ಯವರು ಸ್ವಾಗತಿಸಿದರೆ, ಸಮುದಾಯಗಳ ಒಳಗೊಳ್ಳುವಿಕೆ, ಬಹುತ್ವ ಮತ್ತು ಸಹಿಷ್ಣುತೆಗಳ ಭಾರತೀಯ ಮಾದರಿಯನ್ನು ಘನತೆವೆತ್ತ ರಾಜಕುಮಾರರು ಶ್ಲಾಘಿಸಿದರು.

7.    2010 ರ ಫೆಬ್ರವರಿಯ ‘ರಿಯಾದ್ ಘೋಷಣೆ’ ಯಲ್ಲಿ ರೂಪಿಸಲಾದ ಮತ್ತು ಎರಡು ಪವಿತ್ರ ಮಸೀದಿಗಳ ಪಾಲಕರಾದ ಘನತೆವೆತ್ತ ದೊರೆ ಸಲ್ಮಾನ್ ಬಿನ್ ಅಬ್ದುಲ್ ಅಜೀಜ್ ಅಲ್ ಸೌದ್ ಅವರು 2014ರ ಫೆಬ್ರವರಿಯಲ್ಲಿ ನೀಡಿದ ಭೇಟಿ ಮತ್ತು 2016ರ ಏಪ್ರಿಲ್ ನಲ್ಲಿ ಪ್ರಧಾನಿ ಶ್ರೀ ನರೇಂದ್ರ ಮೋದಿಯವರು ಸೌದಿ ಅರೇಬಿಯಾಕ್ಕೆ ನೀಡಿದ ಭೇಟಿಯ ಸಂದರ್ಭದಲ್ಲಿ ಪುನರುಚ್ಚರಿಸಲಾದ ‘’ಕಾರ್ಯತಂತ್ರದ ಪಾಲುದಾರಿಕೆ’ಯನ್ನು ಬಲಪಡಿಸುವ ಬದ್ಧತೆಯನ್ನು ಎರಡೂ ಕಡೆಯಿಂದ ಪುನಃದೃಢಪಡಿಸಲಾಯಿತು.

8.    ಅಸ್ತಿತ್ವದಲ್ಲಿರುವ ‘ಕಾರ್ಯತಂತ್ರದ ಪಾಲುದಾರಿಕೆ’ ಯನ್ನು ಬಲಪಡಿಸಲು ‘ಉನ್ನತ ಮಟ್ಟದ ಮೇಲ್ವಚಾರಣಾ ವ್ಯವಸ್ಥೆ’ಯ ಕಾರ್ಯತಂತ್ರ ಪಾಲುದಾರಿಕೆ ಮಂಡಳಿಯನ್ನು ಸಚಿವರುಗಳ ಪ್ರಾತಿನಿಧ್ಯದೊಂದಿಗೆ ಗೌರವಾನ್ವಿತ ಪ್ರಧಾನಮಂತ್ರಿ ಮತ್ತು ಘನತೆವೆತ್ತ ರಾಜಕುಮಾರರ ನೇತೃತ್ವದಲ್ಲಿ ರಚಿಸಲು ಎರಡೂ ಕಡೆಯವರು ಒಪ್ಪಿದರು.

9.    ಇತ್ತೀಚೆಗೆ ರಿಯಾದ್ ನಲ್ಲಿ ನೀತಿ ಆಯೋಗ ಮತ್ತು ಸೌದಿಯ ಅಂತಾರಾಷ್ಟ್ರೀಯ ಕಾರ್ಯತಂತ್ರ ಪಾಲುದಾರಿಕೆಯ ಕೇಂದ್ರದ ನಡುವೆ ನಡೆದ ಕಾರ್ಯಾಗಾರದ ಫಲಿತಾಂಶಗಳನ್ನು ಎರಡೂ ಎರಡೂ ಕಡೆಯಿಂದ ಸ್ವಾಗತಿಸಲಾಯಿತು. ಈ ಕಾರ್ಯಾಗಾರವು ವಿವಿಧ ಕ್ಷೆತ್ರಗಳಲ್ಲಿ 40 ಕ್ಕೂ ಹೆಚ್ಚು ಜಂಟಿ ಸಹಯೋಗ ಮತ್ತು ಹೂಡಿಕೆಗಳ ಅವಕಾಶಗಳನ್ನು ಗುರುತಿಸಿದೆ.

10.  ಭೇಟಿಯ ಸಂದರ್ಭದಲ್ಲಿ ಈ ಕೆಳಗಿನ ಪರಸ್ಪರ ತಿಳುವಳಿಕೆ ಒಪ್ಪಂದ ಸಹಿ ಹಾಕಲಾಯಿತು.

1.     ಭಾರತದ ರಾಷ್ಟ್ರೀಯ ಹೂಡಿಕೆ ಮತ್ತು ಮೂಲಸೌಕರ್ಯ ನಿಧಿಯಲ್ಲಿ ಬಂಡವಾಳ ಹೂಡಿಕೆಯ ತಿಳುವಳಿಕೆ ಒಪ್ಪಂದ.

2.    ಪ್ರವಾಸೋದ್ಯಮ ಕ್ಷೇತ್ರದಲ್ಲಿ ಸಹಕಾರಕ್ಕಾಗಿ ತಿಳುವಳಿಕೆ ಒಪ್ಪಂದ.

3.    ವಸತಿ ಕ್ಷೇತ್ರದಲ್ಲಿ ಸಹಕಾರಕ್ಕಾಗಿ ತಿಳುವಳಿಕೆ ಒಪ್ಪಂದ.

4.   ಇನ್ವೆಸ್ಟ್ ಇಂಡಿಯಾ ಮತ್ತು ಸೌದಿ ಅರೇಬಿಯಾ ಜನರಲ್ ಇನ್ವೆಸ್ಟ್ ಮೆಂಟ್ ಅಥಾರಿಟಿ (SAGIA) ನಡುವೆ ಸಹಕಾರ ಕಾರ್ಯಕ್ರಮ.

5.    ಧ್ವನಿ-ದೃಶ್ಯ ಕಾರ್ಯಕ್ರಮಗಳಲ್ಲಿ ವಿನಿಮಯಕ್ಕಾಗಿ ಪ್ರಸಾರದಲ್ಲಿ ಸಹಕಾರಕ್ಕಾಗಿ ತಿಳುವಳಿಕೆ ಒಪ್ಪಂದ.

6.    ಗೌರವಾನ್ವಿತ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಯವರು ಆರಂಭಿಸಿದ ಅಂತಾರಾಷ್ಟ್ರೀಯ ಸೋಲಾರ್ ಒಕ್ಕೂಟ (ISA) ಕ್ಕೆ ಸೌದಿ ಅರೇಬಿಯಾವನ್ನು ಸೇರಿಸಿಕೊಳ್ಳಲು ಒಪ್ಪಂದ.

11.   ಇತ್ತೀಚಿನ ದಿನಗಳಲ್ಲಿ ದ್ವಿಪಕ್ಷೀಯ ವ್ಯಾಪಾರದಲ್ಲಿ ಕಾಣಿಸುತ್ತಿರುವ ಧನಾತ್ಮಕ ಪ್ರವೃತ್ತಿಯನ್ನು ಗಮನಿಸಿ, ಸರಕು ವಹಿವಾಟಿನಲ್ಲಿ ವಿಶೇಷವಾಗಿ ತೈಲವಲ್ಲದ ವಹಿವಾಟಿನಲ್ಲಿ ಇರುವ ಬೃಹತ್ ಅವಕಾಶಗಳನ್ನು ಎರಡೂ ಕಡೆಯಿಂದ ಒಪ್ಪಿಕೊಳ್ಳಲಾಯಿತು. ಆರ್ಥಿಕ, ವಾಣಿಜ್ಯ, ಹೂಡಿಕೆ, ಸಾಂಸ್ಕೃತಿಕ ಮತ್ತು ತಂತ್ರಜ್ಞಾನ ಕ್ಷೇತ್ರಗಳಲ್ಲಿ ಸಹಕಾರವನ್ನು ವೃದ್ದಿಸಲು 2018ರ ಫೆಬ್ರವರಿಯಲ್ಲಿ ರಿಯಾದ್ ನಲ್ಲಿ ನಡೆದ ಭಾರತ-ಸೌದಿ ಜಂಟಿ ಆಯೋಗ ಸಭೆಯ ಧನಾತ್ಮಕ ಆಲೋಚನೆಗಳನ್ನು ಎರಡೂ ಕಡೆಯಿಂದ ಶ್ಲಾಘಿಸಲಾಯಿತು.

12.  ಎರಡು ದೇಶಗಳ ನಡುವಿನ ವಹಿವಾಟು ಪ್ರಮಾಣ ಹೆಚ್ಚಳ ಹಾಗೂ ರಫ್ತು ನಿರ್ಬಂಧಗಳ ನಿವಾರಣೆಯ ಮಹತ್ವದ ಬಗ್ಗೆ ಎರಡೂ ಕಡೆಯಿಂದ ಒತ್ತಿ ಹೇಳಲಾಯಿತು.

13.  ಭಾರತದ ‘ಮೇಕ್ ಇನ್ ಇಂಡಿಯಾ’, ‘ಸ್ಟಾರ್ಟ್ ಅಪ್ ಇಂಡಿಯಾ’, ‘ ಸ್ಮಾರ್ಟ್ ಸೀಟೀಸ್’, ‘ಕ್ಲೀನ್ ಇಂಡಿಯಾ’, ಮತ್ತು ‘ಡಿಜಿಟಲ್ ಇಂಡಿಯಾ’ ದಂತಹ ಉಪಕ್ರಮಗಳನ್ನು ಕಿಂಗ್ ಡಮ್ಸ್ ವಿಷನ್ 2030 ಮತ್ತು 13 ದೂರದೃಷ್ಟಿಯ ಕಾರ್ಯಕ್ರಮಗಳೊಂದಿಗೆ ಒಟ್ಟುಗೂಡಿಸುವ ಮೂಲಕ ಎರಡೂ ದೇಶಗಳ ವ್ಯಾಪಾರ ಮತ್ತು ಹೂಡಿಕೆ ಸಹಕಾರವನ್ನು ಮತ್ತಷ್ಟು ಹೆಚ್ಚಿಸಿಕೊಳ್ಳಲು ಎರಡೂ ದೇಶಗಳು ಒಪ್ಪಿಕೊಂಡವು. ಸೌದಿ ಅರೇಬಿಯಾದಲ್ಲಿ ಮುಂಬರುವ ಬೃಹತ್ ಯೋಜನೆಗಳಿಗೆ ಭಾರತೀಯ ಖಾಸಗಿ / ಸಾರ್ವಜನಿಕ ಕ್ಷೇತ್ರಗಳ ಹೂಡಿಕೆಗಳನ್ನು ಆಕರ್ಷಿಸಲು ತಾನು ಸಿದ್ಧವಿರುವುದಾಗಿ ಸೌದಿ ಅರೇಬಿಯಾ ತಿಳಿಸಿತು. ಭಾರತ ಮತ್ತು ಸೌದಿ ಅರೇಬಿಯಾಗಳ ಆರ್ಥಿಕತೆಯ ಸಕಾರಾತ್ಮಕ ರೂಪಾಂತರವನ್ನು ಎರಡೂ ದೇಶಗಳು ಒಪ್ಪಿಕೊಂಡವು.

14.  ವ್ಯವಹಾರದ ಸರಳೀಕರಣ, ಅಸ್ತಿತ್ವದಲ್ಲಿರುವ ನಿಯಮಗಳ ಸರಳೀಕರಣ ಮತ್ತು ಪ್ರಮುಖ ಕ್ಷೇತ್ರಗಳಲ್ಲಿ ವಿದೇಶೀ ನೇರ ಹೂಡಿಕೆಯ ನಿಯಮಗಳನ್ನು ಸುಲಭಗೊಳಿಸುವುದರ ಕುರಿತು ಎರಡೂ ಸರ್ಕಾರಗಳು ಕೈಗೊಂಡ ಕ್ರಮಗಳನ್ನು ಎರಡೂ ಕಡೆಯವರು ಸ್ವಾಗತಿಸಿದರು.

15.  2016 ರಲ್ಲಿ ಪ್ರಧಾನಮಂತ್ರಿಯವರು ರಿಯಾದ್ ಗೆ ಭೇಟಿ ನೀಡಿದ ಸಂದರ್ಭದಲ್ಲಿ ಇನ್ವೆಸ್ಟ್ ಇಂಡಿಯಾ ಮತ್ತು ಸೌದಿ ಅರೇಬಿಯಾ ಜನರಲ್ ಇನ್ವೆಸ್ಟ್ ಮೆಂಟ್ ಅಥಾರಿಟಿ (SAGIA) ನಡುವೆ ಆದ ಸಹಕಾರ ಒಪ್ಪಂದದ ಪರಿಣಾಮವಾಗಿ ಆಗಿರುವ ಹೂಡಿಕೆ ವಾತಾವರಣದ ಧನಾತ್ಮಕ ಬದಲಾವಣೆಯನ್ನು ಎರಡೂ ದೇಶಗಳು ಸ್ವಾಗತಿಸಿದವು. ಎರಡೂ ದೇಶಗಳಲ್ಲಿರುವ ವ್ಯವಹಾರದ ಅವಕಾಶಗಳನ್ನು ವಿಶೇಷವಾಗಿ ಮೂಲಸೌಕರ್ಯ, ಗಣಿ, ನವೀಕರಿಸಬಹುದಾದದ್ದು ಸೇರಿದಂತೆ ಇಂಧನ, ಆಹಾರ ಭದ್ರತೆ ಮತ್ತು ತಂತ್ರಜ್ಞಾನ ವರ್ಗಾವಣೆ ಹಾಗೂ ಮಾಹಿತಿ ತಂತ್ರಜ್ಞಾನ, ಎಲೆಕ್ಟ್ರಾನಿಕ್ಸ್ ಮತ್ತು ದೂರ ಸಂಪರ್ಕ ಕ್ಷೇತ್ರಗಳಲ್ಲಿ ಕೌಶಲ್ಯ ಭರಿತ ಮಾನವ ಸಂಪನ್ಮೂಲಗಳ ಅವಕಾಶಗಳನ್ನು ಉಪಯೋಗಿಸಿಕೊಳ್ಳುವಂತೆ ಉದ್ಯಮ ಸಮುದಾಯಕ್ಕೆ ಎರಡೂ ದೇಶಗಳು ಒತ್ತಾಯಿಸಿದವು.

16.  ಸೌದಿ ಅರೇಬಿಯಾದ ಕೈಗಾರಿಕಾ ನಗರಗಳು ಮತ್ತು ಬಂದರುಗಳಲ್ಲಿ ಭಾರತೀಯ ಕಂಪನಿಗಳ ಹೂಡಿಕೆಯನ್ನು ಘನತೆವೆತ್ತ ರಾಜಕುಮಾರರು ಸ್ವಾಗತಿಸಿದರು.

17.   ಇಂಧನ, ಸಂಸ್ಕರಣೆ, ಪೆಟ್ರೋಕೆಮಿಕಲ್ಸ್, ಮೂಲಸೌಕರ್ಯ, ಕೃಷಿ, ಖನಿಜ ಮತ್ತು ಗಣಿಗಾರಿಕೆ, ತಯಾರಿಕೆ, ಶಿಕ್ಷಣ ಮತ್ತು ಆರೋಗ್ಯ ಕ್ಷೇತ್ರಗಳಲ್ಲಿ 100 ಬಿಲಿಯನ್ ಡಾಲರ್ ಗೂ ಹೆಚ್ಚಿನ ಬಂಡವಾಳ ಹೂಡುವ ಘನತೆವೆತ್ತ ರಾಜಕುಮಾರರ ಘೋಷಣೆಯನ್ನು ಪ್ರಧಾನಿಯವರು ಸ್ವಾಗತಿಸಿದರು.

18.  ಜಂಟಿ ಸಹಭಾಗಿತ್ವದ ಮೊದಲ 44 ಬಿಲಿಯನ್ ಡಾಲರ್ ವೆಚ್ಚದ ವೆಸ್ಟ್ ಕೋಸ್ಟ್ ರಿಫೈನರಿ ಮತ್ತು ಪೆಟ್ರೋಕೆಮಿಕಲ್ಸ್ ಯೋಜನೆಯ ಬಗ್ಗೆ ಎರಡೂ ದೇಶಗಳು ತೃಪ್ತಿ ವ್ಯಕ್ತಪಡಿಸಿದ್ದು, ಯೋಜನೆಯ ಅನುಷ್ಠಾನವನ್ನು ತ್ವರಿತಗೊಳಿಸಲು ಒಪ್ಪಿದವು. ಇದು ದೇಶದ ಅತಿ ದೊಡ್ಡ ಹಸಿರು ವಲಯದ ರಿಫೈನರಿಯಾಗಲಿದ್ದು, ಒಂದೇ ಹಂತದಲ್ಲಿ ಅನುಷ್ಠಾನಗೊಳಿಸಲಾಗುವುದು. ಇದರೊಂದಿಗೆ, ಸಾರ್ವಜನಿಕ ಹೂಡಿಕೆ ನಿಧಿ ಮತ್ತು ಇದರ ತಂತ್ರಜ್ಞಾನ ಪಾಲುದಾರರ ಮೂಲಕ 10 ಬಿಲಿಯನ್ ಡಾಲರ್ ಹಾಗೂ ಇತರ ಹೂಡಿಕೆ ಅವಕಾಶಗಳಿಂದ 26 ಬಿಲಿಯನ್ ಡಾಲರ್ ಗಳನ್ನು ಸಂಗ್ರಹಿಸಲಾಗುವುದು.

19.  ಭಾರತದಲ್ಲಿ ರಾಷ್ಟ್ರೀಯ ಹೂಡಿಕೆ ಮತ್ತು ಮೂಲಸೌಕರ್ಯ ನಿಧಿ (NIIF) ಮತ್ತು ಇತರ ಮಹತ್ವದ ವಲಯಗಳಲ್ಲಿ ಸೌದಿ ಅರೇಬಿಯಾ ಹೂಡಿಕೆಯನ್ನು ಭಾರತದ ಪ್ರಧಾನಿಯವರು ಸ್ವಾಗತಿಸಿದರು. ಇದರ ಹಿನ್ನೆಲೆಯಲ್ಲಿ ರಾಷ್ಟ್ರೀಯ ಹೂಡಿಕೆ ಮತ್ತು ಮೂಲಸೌಕರ್ಯ ನಿಧಿ (NIIF)ಯಲ್ಲಿ ಬಂಡವಾಳ ಹೂಡಿಕೆಗಾಗಿ ತಿಳುವಳಿಕೆ ಒಪ್ಪಂದಕ್ಕೆ ಸಹಿಯನ್ನು ಎರಡೂ ದೇಶಗಳು ಶ್ಲಾಘಿಸಿದವು. ಇದು ದ್ವಿಪಕ್ಷೀಯ ಆರ್ಥಿಕ ಸಹಕಾರ ವಿಸ್ತರಣೆಗೆ ದಾರಿ ಮಾಡಿಕೊಡಲಿದೆ.

20.ಭಾರತದಲ್ಲಿ ಇಂಧನ, ರಿಫೈನಿಂಗ್, ಪೆಟ್ರೋಕೆಮಿಕಲ್ಸ್, ಮೂಲಸೌಕರ್ಯ, ಕೃಷಿ, ಖನಿಜ ಮತ್ತು ಗಣಿಗಾರಿಕೆ, ತಯಾರಿಕೆ, ಶಿಕ್ಷಣ ಮತ್ತು ಆರೋಗ್ಯ ಕ್ಷೇತ್ರದಲ್ಲಿ ಹೂಡಿಕೆಯ ಬಗ್ಗೆ ಸೌದಿ ಅರೇಬಿಯಾದ ಆಸಕ್ತಿಯನ್ನು ಪ್ರಧಾನಿ ಮೋದಿಯವರು ಸ್ವಾಗತಿಸಿದರು.

21.  ವಸತಿ ಕ್ಷೇತ್ರದಲ್ಲಿ ಸಹಕಾರ ಮತ್ತು ಸೌದಿ ಅರೇಬಿಯಾದ ವಸತಿ ಯೋಜನೆಗಳಲ್ಲಿ ಭಾರತೀಯ ಕಂಪನಿಗಳು ಭಾಗವಹಿಸಲು ಉತ್ತೇಜಿಸುವ ತಿಳುವಳಿಕೆ ಒಪ್ಪಂದವನ್ನು ಎರಡೂ ಕಡೆಯವರು ಸ್ವಾಗತಿಸಿದರು.

22. ವಿಪತ್ತು ನಿರೋಧಕ ಮೂಲಸೌಕರ್ಯ ಕುರಿತ ಪ್ರಧಾನಮಂತ್ರಿಯವರ ಮೈತ್ರಿಯ ಉಪಕ್ರಮವನ್ನು  ಘನತೆವೆತ್ತ ರಾಜಕುಮಾರ ಸ್ವಾಗತಿಸಿ, ಇದು ವಿಪತ್ತು ನಿರ್ವಹಣೆಯಲ್ಲಿ ಮಹತ್ವದ ಹೆಜ್ಜೆ ಎಂದು ಶ್ಲಾಘಿಸಿದರು.

23. ಕಾರ್ಯತಂತ್ರದ ಪಾಲುದಾರಿಕೆಯಲ್ಲಿ ಇಂಧನ ಸುರಕ್ಷತೆಯ ಮಹತ್ವವನ್ನು ಗುರುತಿಸಿ, ಇಂಧನ ವಲಯದಲ್ಲಿ ದ್ವಿಪಕ್ಷೀಯ ವಹಿವಾಟು ವೃದ್ಧಿಗೆ ಎರಡೂ ಕಡೆಯವರು ಆಸಕ್ತಿ ವ್ಯಕ್ತಪಡಿಸಿದರು. ವಿಶ್ವದ ಅತಿ ವಿಶ್ವಾಸಾರ್ಹ ತೈಲ ಮತ್ತು ಅನಿಲ ಪೂರೈಕೆದಾರ ಮತ್ತು ಭಾರತದ ಪ್ರಮುಖ ಸರಬರಾಜುದಾರ ಎಂದು ಒಪ್ಪಿಕೊಳ್ಳಲಾಯಿತು. ಭಾರತ-ಸೌದಿ ಅರೇಬಿಯಾ ಇಂಧನ ಸಮಾಲೋಚನೆಗಳ ಮುಂದುವರಿಕೆಯನ್ನು ಎರಡೂ ಕಡೆಯವರು ಒತ್ತಿ ಹೇಳಿದರು. ಇಂಧನ ವಲಯದಲ್ಲಿ ಖರೀದಿದಾರ-ಮಾರಾಟಗಾರರ ಸಂಬಂಧವನ್ನು ಸುಧಾರಿಸಲು ಎರಡೂ ಕಡೆಯವರು ಒಪ್ಪಿಕೊಂಡರು.

24.ಕಚ್ಚಾ ತೈಲ ಮತ್ತು ಪೆಟ್ರೋಲಿಯಂ ಉತ್ಪನ್ನಗಳಿಗೆ ಭಾರತದ ಬೆಳೆಯುತ್ತಿರುವ ಅಗತ್ಯಗಳನ್ನು ಪೂರೈಸುವ ಸೌದಿ ಅರೇಬಿಯಾದ ಬದ್ಧತೆಯನ್ನು ಪುನರುಚ್ಚರಿಸಿದ ಘನತೆವೆತ್ತ ರಾಜಕುಮಾರ, ಯಾವುದೇ ಅಡೆತಡೆಗಳ ಪರಿಣಾಮವಾಗಿ ಉಂಟಾಗಬಹುದಾದ ಯಾವುದೇ ಕೊರತೆಗಳಿಗೆ ಇತರ ಮೂಲಗಳಿಂದ ಪರ್ಯಾಯವಾಗಿ.ಪೂರೈಸಲಾಗುವುದು ಎಂದರು.

25.  ಭಾರತದ ಕಾರ್ಯತಂತ್ರ ಪೆಟ್ರೋಲಿಯಂ ಸಂಗ್ರಹಗಳಲ್ಲಿ (SPRs) ಸೌದಿ ಅರೇಬಿಯಾದ ಭಾಗವಹಿಸುವಿಕೆಯನ್ನು ಪ್ರಧಾನಮಂತ್ರಿಯವರು ಸ್ವಾಗತಿಸಿದರು.

26. ಅಂತಾರಾಷ್ಟ್ರೀಯ ಸೋಲಾರ್ ಒಕ್ಕೂಟವನ್ನು ಸೇರಬಯಸುವ ಸೌದಿ ಅರೇಬಿಯಾದ ನಿರ್ಧಾರವನ್ನು ಭಾರತದ ಪ್ರಧಾನಮಂತ್ರಿಯವರು ಸ್ವಾಗತಿಸಿದರು. ನವೀಕರಿಸಬಹುದಾದ ಇಂಧನ ವಲಯದಲ್ಲಿ ಹೂಡಿಕೆ ಮಾತ್ರವಲ್ಲದೇ ಸಂಶೋಧನೆ ಮತ್ತು ಅಭಿವೃದ್ಧಿಯಲ್ಲ್ಲೂ ಸಂಭಾವ್ಯ ಸಹಕಾರದ ಬಗ್ಗೆ ಎರಡೂ ಕಡೆಯವರು ಗಮನಿಸಿದರು.

27. ದೂರ ಸಂವೇದಿ, ಉಪಗ್ರಹ ಸಂಪರ್ಕ ಹಾಗೂ ಉಪಗ್ರಹ ಆಧಾರಿತ ನ್ಯಾಶವಿಗೇಷನ್ ಸೇರಿದಂತೆ ಬಾಹ್ಯಾಕಾಶ, ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರಗಳಲ್ಲಿ ಸಹಕಾರಕ್ಕೆ ಎರಡೂ ದೇಶಗಳು ಒಪ್ಪಿಕೊಂಡವು.

28.  ತಯಾರಿಕೆ, ಮಾಹಿತಿ ತಂತ್ರಜ್ಞಾನ. ಸಂಪರ್ಕ ಮತ್ತು ಪ್ರೋಗ್ರಾಮಿಂಗ್ ನಂತಹ ಕ್ಷೇತ್ರಗಳಲ್ಲಿ ಪರಸ್ಪರರ ಪ್ರಮುಖ ಸಾಮರ್ಥ್ಯದಿಂದ ಪ್ರಯೋಜನ ಪಡೆಯಲು ಸಹಭಾಗಿತ್ವದ ವಲಯಗಳನ್ನು ಗುರುತಿಸಲು ಕೌಶಲ್ಯಾಭಿವೃದ್ಧಿಯ ಜಂಟಿ ಕಾರ್ಯತಂಡ ರಚನೆಗೆ ಎರಡೂ ಕಡೆಯವರು ಒಪ್ಪಿಕೊಂಡರು.

29.  2014ರ ಫೆಬ್ರವರಿಯಲ್ಲಿ ಘನತೆವೆತ್ತ ದೊರೆ ಸಲ್ಮಾನ್ ಬಿನ್ ಅಬ್ದುಲ್ ಅಜೀಜ್ ಅಲ್ ಸೌದ್ ಅವರ ಭಾರತ ಭೇಟಿಯ ವೇಳೆ ಸಹಿ ಹಾಕಲಾದ ರಕ್ಷಣಾ ಸಹಕಾರ ಕುರಿತ ತಿಳುವಳಿಕೆ ಒಪ್ಪಂದದ ನಂತರ, ರಕ್ಷಣಾ ವಲಯದಲ್ಲಿನ ಅದರಲ್ಲೂ ವಿಶೇಷವಾಗಿ ಪರಿಣತಿ ಹಾಗೂ ತರಬೇತಿಯಲ್ಲಿ ಭಾರತ-ಸೌದಿ ಸಹಭಾಗಿತ್ವದಲ್ಲಿ ಇತ್ತೀಚಿನ ಬೆಳವಣಿಗೆಗಳನ್ನು ಎರಡೂ ಪಕ್ಷಗಳು ಸ್ವಾಗತಿಸಿವೆ. ಈ ಹಿನ್ನೆಲೆಯಲ್ಲಿ 2019ರ ಜನವರಿ 2-3 ರಂದು ರಿಯಾದ್ ನಲ್ಲಿ ನಡೆದ  ರಕ್ಷಣಾ ಸಹಕಾರ ಕುರಿತ 4ನೇ ಜಂಟಿ ಸಮಿತಿಯ ಫಲಿತಾಂಶಗಳನ್ನು ಅವರು ಸ್ವಾಗತಿಸಿದರು.

30. ಮೊದಲ ಜಂಟಿ ನೌಕಾ ಸಮರಾಭ್ಯಾಸವನ್ನು ಆದಷ್ಟು ಶೀಘ್ರದಲ್ಲಿ ನಡೆಸಲು ಮತ್ತು ಇತರ ಆಯಾಮಗಳಲ್ಲೂ ದ್ವಿಪಕ್ಷೀಯ ಅಭ್ಯಾಸಗಳ ವಿಸ್ತರಣೆಗೆ ಎರಡೂ ದೇಶಗಳು ಸಮ್ಮತಿಸಿವೆ.

31.  ‘ಮೇಕ್ ಇನ್ ಇಂಡಿಯಾ’ ಮತ್ತು ‘ವಿಷನ್ 2030’ ಕ್ಕೆ ಅನುಗುಣವಾಗಿ ಸಂಭಾವ್ಯ ಹಾಗೂ ಪರಸ್ಪರ ಪ್ರಯೋಜನವನ್ನು ಗಮನಿಸಿ, ನೌಕೆ ಹಾಗೂ ಭೂ ವ್ಯವಸ್ಥೆಗಳಿಗೆ ಜಂಟಿ ರಕ್ಷಣಾ ಬಿಡಿಭಾಗಗಳ ಉತ್ಪಾದನೆಯಲ್ಲಿ ಸಹಕಾರ ಮತ್ತು ಸಹಯೋಗಕ್ಕೆ ಎರಡೂ ದೇಶಗಳು ಸಮ್ಮತಿಸಿವೆ.

32.  ಎರಡೂ ದೇಶಗಳಿಗೆ ಭದ್ರತೆ ಹಾಗೂ ಅಭಿವೃದ್ಧಿಯಲ್ಲಿ ಮುಖ್ಯವಾದ ಮತ್ತು ಅಂತಾರಾಷ್ಟ್ರೀಯ ವ್ಯಾಪಾರಕ್ಕೆ ಸುರಕ್ಷಿತ ಹಾದಿ ಮಾಡಿಕೊಡುವ ಸಲುವಾಗಿ ಕಡಲ ಭದ್ರತೆಯನ್ನು ಹೆಚ್ಚಿಸಲು ಹಿಂದೂ ಮಹಾಸಾಗರದ ಇತರ ರಿಮ್ ರಾಷ್ಟ್ರಗಳೊಂದಿಗೆ ಕೆಲಸ ಮಾಡಲು ಎರಡೂ ಕಡೆಯವರು ಒಪ್ಪಿದರು.

33.  ಪ್ರಾದೇಶಿಕ ಸಂಪರ್ಕ ಯೋಜನೆಗಳಿಗೆ ಸಂಬಂಧಿಸಿದಂತೆ, ಸಾರ್ವಭೌಮತೆ ಹಾಗೂ ದೇಶಗಳ ಐಕ್ಯತೆಯೂ ಸೇರಿದಂತೆ ಅಂತಾರಾಷ್ಟ್ರೀಯ ಕಾನೂನುಗಳ ಆಧಾರದಲ್ಲಿರಬೇಕು ಎಂಬುದನ್ನು ಎರಡೂ ಕಡೆಯವರು ಒಪ್ಪಿದರು.

34. ಪ್ರಾದೇಶಿಕ ಸ್ಥಿರತೆ ಮತ್ತು ನೆರೆ ರಾಷ್ಟ್ರಗಳೊಂದಿಗಿನ ಉತ್ತಮ ಸಂಬಂಧಗಳ ಮಹತ್ವದ ಬಗ್ಗೆ ಎರಡೂ ದೇಶಗಳು ಒತ್ತಿ ಹೇಳಿದವು. ಪಾಕಿಸ್ತಾನದೊಂದಿಗೆ  ಸ್ನೇಹ ಸಂಬಂಧ ಹೊಂದಲು ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಯವರು 2014 ರಿಂದ ಮಾಡುತ್ತಿರುವ ನಿರಂತರ ಪ್ರಯತ್ನಗಳ ಬಗ್ಗೆ ಘನತೆವೆತ್ತ ರಾಜಕುಮಾರ ಶ್ಲಾಘಿಸಿದರು. ಈ ಹಿನ್ನೆಲೆಯಲ್ಲಿ ಭಾರತ ಮತ್ತು ಪಾಕಿಸ್ತಾನ ನಡುವೆ ಸಮಗ್ರ ಮಾತುಕತೆ ಪುನಾರಂಭಕ್ಕೆ ಪೂರಕ ವಾತಾವರಣ ನಿರ್ಮಾಣದ ಅಗತ್ಯತೆಯ ಬಗ್ಗೆ ಎರಡೂ ದೇಶಗಳು ಸಮ್ಮತಿ ಸೂಚಿಸಿದವು.

35.  ಉಗ್ರವಾದ ಮತ್ತು ಭಯೋತ್ಪಾದನೆಯ ಹಾವಳಿ ಎಲ್ಲ ದೇಶಗಳು ಹಾಗೂ ಸಮಾಜಗಳಿಗೆ ಬೆದರಿಕೆಯಾಗಿದೆ ಎಂಬುದನ್ನು ಒಪ್ಪಿಕೊಂಡು, ಈ ಜಾಗತಿಕ ಪೀಡೆಯನ್ನು ಯಾವುದೇ ಜನಾಂಗ, ಧರ್ಮ ಅಥವಾ ಸಂಸ್ಕೃತಿಯೊಂದಿಗೆ ಸಂಬಂಧ ಕಲ್ಪಿಸುವುದನ್ನು ಎರಡೂ ದೇಶಗಳು ತಿರಸ್ಕರಿಸಿದವು. ಇತರ ದೇಶಗಳ ವಿರುದ್ಧ ಭಯೋತ್ಪಾದನೆಯನ್ನು ಬಳಸುವುದನ್ನು ಎಲ್ಲ ರಾಷ್ಟ್ರಗಳೂ ತಿರಸ್ಕರಿಸಬೇಕು: ಎಲ್ಲಿ ಭಯೋತ್ಪಾದನೆಯಿದೆಯೋ ಅಲ್ಲಿ ಭಯೋತ್ಪಾದಕ ಮೂಲಸೌಕರ್ಯಗಳನ್ನು ನಾಶಪಡಿಸಿ ಮತ್ತು ಭಯೋತ್ಪಾದಕರಿಗೆ ಎಲ್ಲ ರೀತಿಯ ನೆರವು ಹಾಗೂ ಹಣಕಾಸು ಕಡಿತವಾಗಬೇಕು: ಭಯೋತ್ಪಾದಕ ಕೃತ್ಯಗಳನ್ನೆಸಗಿದವರನ್ನು ನ್ಯಾಯದ ಕಟಕಟೆಗೆ ತರಬೇಕು ಎಂದು ಎರಡೂ ರಾಷ್ಟ್ರಗಳು ಕರೆಕೊಟ್ಟವು. ಭಯೋತ್ಪಾದನೆಯ ವಿರುದ್ಧ ಅಂತಾರಾಷ್ಟ್ರೀಯ ಸಮುದಾಯದ ಕಠಿಣ ಕ್ರಮದ ಅಗತ್ಯವಿದೆ ಎಂದು ಹೇಳಿದ ಎರಡೂ ದೇಶಗಳು, ಅಂತಾರಾಷ್ಟ್ರೀಯ ಭಯೋತ್ಪಾದನೆ ಕುರಿತ ವಿಶ್ವಸಂಸ್ಥೆಯ ಸಮಗ್ರ ಸಮಾವೇಶದ ನಿರ್ಣಯಗಳ ಅಂಗೀಕಾರ ಮತ್ತು ವಿಶ್ವಸಂಸ್ಥೆಯಿಂದ ಭಯೋತ್ಪಾದಕರು ಹಾಗೂ ಅವರ ಸಂಘಟನೆಗಳ ವಿರುದ್ಧ ಸಮಗ್ರ ನಿರ್ಬಂಧಗಳ ಮಹತ್ವವನ್ನು ಸಾರಿ ಹೇಳಿದವು.

36.  ಭಯೋತ್ಪಾದನೆಯನ್ನು ರಾಷ್ಟ್ರನೀತಿಯ ಸಾಧನವಾಗಿ ಬಳಸಬಾರದು ಎಂದು ಎರಡೂ ದೇಶಗಳು ಎಲ್ಲ ರಾಷ್ಟ್ರಗಳಿಗೆ ಕರೆಕೊಟ್ಟವು. ಇತರ ದೇಶಗಳ ವಿರುದ್ಧ ಭಯೋತ್ಪಾದಕ ಕೃತ್ಯ ಎಸಗಲು ಬಳಸುವ ಕ್ಷಿಪಣಿಗಳು ಮತ್ತು ಡ್ರೋಣ್ ಗಳು ಸೇರಿದಂತೆ ಇತರ ಶಸ್ತ್ರಾಸ್ತ್ರಗಳನ್ನು ಹೊಂದಲು ಎಲ್ಲ ದೇಶಗಳು ನಿರಾಕರಿಸಬೇಕು ಎಂದು ಅವರು ಕರೆಕೊಟ್ಟರು.

37.  2019ರ ಫೆಬ್ರವರಿ 14 ರಂದು ಜಮ್ಮು ಮತ್ತು ಕಾಶ್ಮೀರದ ಪುಲ್ವಾಮಾದಲ್ಲಿ ಭಾರತೀಯ ಭದ್ರತಾ ಪಡೆಗಳ ಮೇಲೆ ನಡೆದ ಭಯೋತ್ಪಾದನಾ ದಾಳಿಯನ್ನು ಪ್ರಧಾನಮಂತ್ರಿ ಹಾಗೂ ಘನತೆವೆತ್ತ ರಾಜಕುಮಾರ ಕಠಿಣವಾಗಿ ಖಂಡಿಸಿದರು.

38.  ಪ್ರಾದೇಶಿಕ ಮತ್ತು ಜಾಗತಿಕ ಶಾಂತಿ, ಭದ್ರತೆ ಮತ್ತು ಸ್ಥಿರತೆಗೆ ಸಂಬಂಧಿಸಿ ಪಶ್ಚಿಮ ಏಷ್ಯಾ ಮತ್ತು ಮಧ್ಯಪ್ರಾಚ್ಯದಲ್ಲಿನ ಭದ್ರತಾ ಪರಿಸ್ಥಿತಿ ಸೇರಿದಂತೆ ಪರಸ್ಪರರ ಹಿತಾಸಕ್ತಿಯ ಅಂತಾರಾಷ್ಟ್ರೀಯ ಹಾಗೂ ಪ್ರಾದೇಶಿಕ ವಿಷಯಗಳ ಬಗ್ಗೆ ಎರಡೂ ದೇಶಗಳು ಚರ್ಚಿಸಿದವು. ಸಿರಿಯಾದಲ್ಲಿನ ಸಮಸ್ಯೆ ಪರಿಹಾರ ಸಂಬಂಧ ಭದ್ರತಾ ಮಂಡಳಿಯ ನಿರ್ಣಯ (2254),ಮತ್ತು ಭದ್ರತಾ ಮಂಡಳಿ ನಿರ್ಣಯ (2216), GCC ಉಪಕ್ರಮ ಮತ್ತು ಯೆಮೆನ್ ನಲ್ಲಿನ ಪರಿಹಾರಕ್ಕಾಗಿ ನಡೆದ ಯೆಮೆನಿ ರಾಷ್ಟ್ರೀಯ ಮಾತುಕತೆಗಳ ಫಲಿತಾಂಶಕ್ಕಾಗಿ ಎರಡೂ ಕಡೆಯವರು ಒತ್ತಾಯಿಸಿದರು.

39. ಪ್ಯಾಲೇಸ್ಟಿನಿಯನ್ ಜನರ ಕಾನೂನುಬದ್ಧ ಹಕ್ಕುಗಳನ್ನು ಖಾತರಿಪಡಿಸಿಕೊಳ್ಳಲು ಅರಬ್ ಶಾಂತಿ ಉಪಕ್ರಮ ಮತ್ತು ಸಂಬಂಧಿತ ವಿಶ್ವಸಂಸ್ಥೆಯ ನಿರ್ಣಯಗಳ ಆಧಾರದ ಮೇಲೆ ಮಧ್ಯಪ್ರಾಚ್ಯದಲ್ಲಿ ಸಮಗ್ರ ಮತ್ತು ಶಾಶ್ವತವಾದ ಶಾಂತಿ ಸಾಧಿಸಲು ಎರಡೂ ದೇಶಗಳು ತಮ್ಮ ಭರವಸೆಯನ್ನು ವ್ಯಕ್ತಪಡಿಸಿದವು.

40.                ಭಯೋತ್ಪಾದನೆ ನಿಗ್ರಹ ಪ್ರಯತ್ನಗಳಲ್ಲಿ ಸಹಕಾರ ಹೆಚ್ಚಿಸಲು ಹಾಗೂ ನಿಜಾವಧಿಯ ಗುಪ್ತಚರ ಹಂಚಿಕೆಯಿಂದ ಪರಸ್ಪರ ಪ್ರಯೋಜನೆ ಪಡೆಯಲು ರಾಷ್ಟ್ರೀಯ ಭದ್ರತಾ ಸಲಹೆಗಾರರ ಮಟ್ಟದಲ್ಲಿ ‘ಸಮಗ್ರ ಭದ್ರತಾ ಮಾತುಕತೆ’ ಸ್ಥಾಪಿಸಲು ಹಾಗೂ ಭಯೋತ್ಪಾದನೆ ನಿಗ್ರಹಕ್ಕಾಗಿ ಜಂಟಿ ಕಾರ್ಯತಂಡ ರಚಿಸಲು ಎರಡೂ ದೇಶಗಳು ಸಮ್ಮತಿಸಿದವು.

41.  ಭದ್ರತಾ ಸಮಸ್ಯೆಗಳಿಗೆ ಸಂಬಂಧಿಸಿದಂತೆ ನಿರ್ದಿಷ್ಟವಾಗಿ ಕಡಲ ಭದ್ರತೆ, ಕಾನೂನು ಜಾರಿ, ಅಕ್ರಮ ಹಣ ಸಾಗಣೆ, ಮಾದಕವಸ್ತು ಕಳ್ಳಸಾಗಣೆ, ಮಾನವ ಕಳ್ಳಸಾಗಣೆ, ಕಾನೂನುಬಾಹಿರ ವಲಸೆಗಳು ಮತ್ತು ಇತರ ಸಂಘಟಿತ ಅಪರಾಧಗಳ ಮೇಲೆ ನಿರಂತರವಾದ ಸಹಕಾರವನ್ನು ಮುಂದುವರಿಸಲು ಪ್ರಧಾನ ಮಂತ್ರಿ ಮತ್ತು ಘನತೆವೆತ್ತ ರಾಜಕುಮಾರ ಪುನರುಚ್ಚರಿಸಿದರು.

42. ವಿಧ್ವಂಸಕ ಹಾಗೂ ಭಯೋತ್ಪಾದಕ ಸಿದ್ಧಾಂತಗಳನ್ನು ಉತ್ತೇಜಿಸಲು ಸೈಬರ್ ಜಾಗ ದುರ್ಬಳಕೆ ಬಗ್ಗೆ ತೀವ್ರ ಕಳವಳ ವ್ಯಕ್ತಪಡಿಸಿದ ಎರಡೂ ದೇಶಗಳು, ಸೈಬರ್ ಸ್ಪೇಸ್ ಮತ್ತು ಸೈಬರ್ ಅಪರಾಧ ನಿಗ್ರಹ ಕುರಿತ ತಿಳುವಳಿಕೆ ಒಪ್ಪಂದವನ್ನು ಸ್ವಾಗತಿಸಿದವು. ಭಯೋತ್ಪಾದನೆ, ತೀವ್ರಗಾಮಿತನ ಮತ್ತು ಸಮಾಜದ ಸ್ವಾಸ್ಥ್ಯ ಹಾಳುಗೆಡವುವದಕ್ಕಾಗಿ ಸೈಬರ್ ಬಳಕೆಯನ್ನು ತಡೆಗಟ್ಟುವುದಕ್ಕೆ ಸಹಕಾರವನ್ನು ಉತ್ತೇಜಿಸಲು ಎರಡೂ ಕಡೆಯವರು ಒಪ್ಪಿದರು.

43. ಬೃಹತ್ ಭಾರತೀಯ ಸಮುದಾಯಕ್ಕೆ ಆತಿಥ್ಯ ನೀಡಿರುವ ಹಾಗೂ ಅವರ ಕಲ್ಯಾಣ ಹಾಗೂ ಯೋಗಕ್ಷೇಮವನ್ನು ಖಾತ್ರಿಪಡಿಸಿರುವ ಸೌದಿ ನಾಯಕತ್ವಕ್ಕೆ ಭಾರತ ವಂದನೆ ಸಲ್ಲಿಸಿತು.

44.                ಪರಂಪರೆ ಮತ್ತು ಸಂಸ್ಕೃತಿಯ 32ನೇ ಸೌದಿ ರಾಷ್ಟ್ರೀಯ ಉತ್ಸವ ಜನಾದ್ರಿಯಾ -2018 ರಲ್ಲಿ ಭಾರತವನ್ನು ‘ಗೌರವ ಅತಿಥಿ’ ಎಂದು ನೇಮಿಸಿದ್ದಕ್ಕೆ ಸೌದಿ ನಾಯಕತ್ವಕ್ಕೆ ಪ್ರಧಾನಮಂತ್ರಿಯವರು ವಂದನೆ ಸಲ್ಲಿಸಿದರು. ಜನರು ಜನರ ನಡುವಿನ ಸಂಪರ್ಕಗಳು ಮತ್ತು ‘ಸೌದಿ ಅರೇಬಿಯಾದಲ್ಲಿ ಭಾರತದ ವಾರ’  ಮತ್ತು ‘ಭಾರತದಲ್ಲಿ ಸೌದಿ ಅರೇಬಿಯಾ ವಾರ’ ದಂತಹ ಸಾಂಸ್ಕೃತಿಕ ವಾರಗಳನ್ನು ನಿಯಮಿತವಾಗಿ ನಡೆಸುವ ಮೂಲಕ ಸಾಂಸ್ಕೃತಿಕ ಸಹಕಾರವನ್ನು  ಮತ್ತಷ್ಟು ಬಲಪಡಿಸಲು ಎರಡೂ ಕಡೆಯವರು ಒತ್ತಾಯಿಸಿದರು.

45.  ಭಾರತದ ಹಜ್ ಯಾತ್ರಾರ್ಥಿಗಳ ಸಂಖ್ಯೆಯನ್ನು 200,000 ದಿಂದ ಇತ್ತೀಚಿನ ಜನಗಣತಿಯ ಆಧಾರದಂತೆ ಹೆಚ್ಚಿಸಿದ ಎರಡು ಪವಿತ್ರ ಮಸೀದಿಗಳ ಪಾಲಕ ಮತ್ತು ಘನತೆವೆತ್ತ ದೊರೆಗೆ ಪ್ರಧಾನಮಂತ್ರಿ ತಮ್ಮ ಅಭಿವಂದನೆ ತಿಳಿಸಿದರು.

46. ಸೌದಿ ಕಾರಾಗೃಹಗಳಲ್ಲಿದ್ದ 850 ಭಾರತೀಯ ಕೈದಿಗಳನ್ನು ಬಿಡುಗಡೆ ಮಾಡಿದ್ದಕ್ಕೆ ಎರಡು ಪವಿತ್ರ ಮಸೀದಿಗಳ ಪಾಲಕ ಮತ್ತು ಘನತೆವೆತ್ತ ದೊರೆಗೆ ಪ್ರಧಾನಮಂತ್ರಿ ತಮ್ಮ ಅಭಿವಂದನೆ ತಿಳಿಸಿದರು.

47.  ಜನರ ನಡುವೆ ಪರಸ್ಪರ ಸಂವಾದಗಳನ್ನು ವಿಸ್ತರಿಸಲು ಮತ್ತು ಕಾನ್ಸುಲರ್ ಮತ್ತು ವಲಸೆ ಸಂಬಂಧಿತ ಸಮಸ್ಯೆಗಳಿಗೆ ಸಂಬಂಧಿಸಿದಂತೆ ಸವಾಲುಗಳನ್ನು ಎದುರಿಸುವುದರ ಮೂಲಕ ದ್ವಿಮುಖ ಪ್ರವಾಸೋದ್ಯಮವನ್ನು ಹೆಚ್ಚಿಸುವ ಆಸಕ್ತಿಯನ್ನು ಎರಡೂ ದೇಶಗಳು ವ್ಯಕ್ತಪಡಿಸಿದವು.

48.ಸೌದಿ ಅರೇಬಿಯಾ ಏರ್ ಲೈನ್ ಗಳ ಆಸನಗಳನ್ನು ತಿಂಗಳಿಗೆ 80,000 ಆಸನಗಳಿಂದ, 112,000 ಆಸನಗಳಿಗೆ ಹೆಚ್ಚಿಸಲು ಭಾರತ ಸರ್ಕಾರ ಸಮ್ಮತಿಸಿತು ಮತ್ತು ಈ ಆಸನಗಳನ್ನು ಮತ್ತಷ್ಟು ಹೆಚ್ಚಿಸುವ ಕುರಿತು ಅಧ್ಯಯನಗಳು ನಡೆಯುತ್ತಿವೆ.

49.e-ವಲಸೆ ಮತ್ತು e-ತಾತೀಖ್ ಗಳಂತಹ ವಲಸೆ ಪ್ಲಾಟ್ ಫಾರ್ಮ್ಗಳ ಗಳನ್ನು ಒಗ್ಗೂಡಿಸಿ ಸದೃಢ ವಲಸೆ ವಾತಾವರಣ ನಿರ್ಮಾಣಕ್ಕೆ ಎರಡೂ ದೇಶಗಳು ಎದುರು ನೋಡುತ್ತಿವೆ.

50. ಭಾರತೀಯ ಸಮುದಾಯಕ್ಕೆ ಮುಖ್ಯವಾಗಿ ಹಜ್/ಉಮ್ರಾ ಯಾತ್ರಿಗಳ ಅನುಕೂಲಕ್ಕಾಗಿ RuPAY ಸೆರಿದಂತೆ ಪಾವತಿ ವ್ಯವಸ್ಥೆ ಕ್ಷೇತ್ರದಲ್ಲಿ ಸಹಕಾರದ ಅವಕಾಶಗಳನ್ನು ಅನ್ವೇಷಿಸಲು ಎರಡೂ ದೇಶಗಳು ಸಮ್ಮತಿಸಿವೆ. ಸೌದಿ ಅರೇಬಿಯಾದಲ್ಲಿ ತನ್ನದಲ್ಲದ ತಪ್ಪಿಗೆ ಇಕ್ಕಟ್ಟಿಗೆ ಸಿಲುಕುವ ಭಾರತೀಯ ಕಾರ್ಮಿಕರಿಗೆ ಸಂಬಂಧಿಸಿದ “ಇಕಾಮಾಹ್” ನ್ನು ಪರಿಹರಿಸಿದ್ದಕ್ಕಾಗಿ ಪ್ರಧಾನಿಯವರು ಘನತೆವೆತ್ತ ರಾಜಕುಮಾರರಿಗೆ ವಂದನೆ ಸಲ್ಲಿಸಿದರು.

51.  ವಿಶ್ವಸಂಸ್ಥೆ, G-20, WTO ಸೇರಿದಂತೆ ಇನ್ನಿತರ ಅಂತಾರಾಷ್ಟ್ರೀಯ ಸಂಸ್ಥೆಗಳಲ್ಲಿ ಸುಧಾರಿತ ಬಹುಪಕ್ಷೀಯತೆಯನ್ನು ಉತ್ತೇಜಿಸಲು ಎರಡೂ ಕಡೆಯವರು ಬದ್ಧವಾಗಿವೆ. ಈ ಹಿನ್ನೆಲೆಯಲ್ಲಿ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿ, WTO, ಅಂತಾರಾಷ್ಟ್ರೀಯ ಹಣಕಾಸು ವ್ಯವಸ್ಥೆಗಳು ಇತ್ಯಾದಿಯಲ್ಲಿ ಆಡಳಿತ ರಚನೆಯ ಸುಧಾರಣೆಗೆ ಒತ್ತಾಯಿಸಿವೆ.

52. ವಿಶ್ವಸಂಸ್ಥೆಯನ್ನು ಕೇಂದ್ರೀಕರಿಸಿದ ಸಮಕಾಲೀನ ವಾಸ್ತವತೆಗಳ ಪರಿಣಾಮಕಾರಿ ಸುಧಾರಣೆಗೆ ಬಹುಪಕ್ಷೀಯ ವ್ಯವಸ್ಥೆಯ ಪ್ರಾಮುಖ್ಯತೆಯನ್ನು ಎರಡೂ ದೇಶಗಳು ಒತ್ತಿಹೇಳಿದವು. ಭದ್ರತಾ ಮಂಡಳಿಯನ್ನೂ ಒಳಗೊಂಡಂತೆ ವಿಶ್ವಸಂಸ್ಥೆಯ ಸುಧಾರಣೆಗಳ ತುರ್ತು ಅವಶ್ಯಕತೆಯನ್ನು ಅವರು ಒತ್ತಿ ಹೇಳಿದರು.

53. ಅಂತಾರಾಷ್ಟ್ರೀಯ ಸಂಘಟನೆಗಳು ಹಾಗೂ ಸಂಸ್ಥೆಗಳ ಮೂಲಕ ದೇಶಭ್ರಷ್ಟ ಆರ್ಥಿಕ ಅಪರಾಧಿಗಳನ್ನು ಎದುರಿಸಲು ಜೊತೆಯಾಗಿ ಕೆಲಸ ಮಾಡುವ ಬದ್ಧತೆಯನ್ನು ಎರಡೂ ದೇಶಗಳು ಪುನರುಚ್ಚರಿಸಿದವು.

54. ತಮಗೆ ಹಾಗೂ ತಮ್ಮ ನಿಯೋಗಕ್ಕೆ ನೀಡಿದ ಆದರಾತಿಥ್ಯಕ್ಕಾಗಿ ಸರ್ಕಾರ ಹಾಗೂ ಭಾರತದ ಜನೆತೆಗೆ ಘನತೆವೆತ್ತ ರಾಜಕುಮಾರ ಮೊಹಮ್ಮದ್ ಬಿನ್ ಸಲ್ಮಾನ್ ಬಿನ್ ಅಬ್ದುಲ್ ಅಜೀಜ್, ಉಪ ಪ್ರಧಾನಿ ಮತ್ತು ರಕ್ಷಣಾ ಸಚಿವರು ಕೃತಜ್ಞತೆ ಸಲ್ಲಿಸಿದರು.