ಪಿಎಂಇಂಡಿಯಾ

ಮ್ಯಾನ್ಮಾರ್ ನಲ್ಲಿ ವಾಸಿಸುವ ನನ್ನ ಭಾರತೀಯರೆ ಮತ್ತು ಭಾರತೀಯ ಮೂಲದ ನನ್ನ ಸೋದರ ಮತ್ತು ಸೋದರಿಯರೆ, ಪ್ರಣಾಮಗಳು

ಈಗಷ್ಟೇ ನೀವೆಲ್ಲರೂ ಗಣೇಶ ಚತುರ್ಥಿಯ ಹಬ್ಬವನ್ನು ಆಚರಿಸಿದ್ದೀರಿ, ಈದ್ ಆಚರಿಸಿದ್ದೀರಿ, ನಿಮ್ಮೆಲ್ಲರಿಗೂ ಈ ಹಬ್ಬಗಳ ಪ್ರಯುಕ್ತ ನನ್ನ ಕಡೆಯಿಂದ ಬಹಳ ಬಹಳ ಶುಭಾಶಯಗಳು. ಈ ಹಬ್ಬಗಳು ನಿಮಗೆ ಬಹಳ ಸುಖಸಮೃದ್ಧಿ ಮತ್ತು ನೆಮ್ಮದಿಯನ್ನು ತರಲಿ ಎಂದು ಆಶಿಸುತ್ತೇನೆ.

ನಿಮ್ಮ ಜೊತೆ ಇರುವುದಕ್ಕೆ ನನಗೆ ಬಹಳ ಸಂತೋಷವಾಗುತ್ತಿದೆ. ಈ ಐತಿಹಾಸಿಕ ಮತ್ತು ಆಧ್ಯಾತ್ಮಿಕ ಪಟ್ಟಣಕ್ಕೆ ಬರಬೇಕೆಂದು ನನಗೆ ಬಹಳ ಆಸೆಯಿತ್ತು. ಯಾಂಗಾನ್ ತನ್ನ ಪರಂಪರೆಯಿಂದಾಗಿ ಇಡೀ ವಿಶ್ವದಲ್ಲಿ ಪ್ರಸಿದ್ಧಿಯಾಗಿದೆ. ಈ ಪಟ್ಟಣಕ್ಕೆ ಭಾರತದ ಜೊತೆ ಶತಮಾನಗಳಷ್ಟು ಪುರಾತನ ಸಂಬಂಧವಿದೆ. ಪೂರ್ವದ ಐತಿಹಾಸಿಕ ಮತ್ತು ಆಧ್ಯಾತ್ಮಿಕ ಹೆಬ್ಬಾಗಿಲಾಗಿರುವ ಈ ಪಟ್ಟಣದಲ್ಲಿ ನಿಮ್ಮನ್ನು ಭೇಟಿಯಾಗುತ್ತಿದ್ದೇನೆ, ನೀವು ಭಾರತ ಮತ್ತು ಮ್ಯಾನ್ಮಾರ್ ಎರಡೂ ದೇಶಗಳನ್ನು ನಿಮ್ಮ ಹೃದಯಗಳಲ್ಲಿ ಬಂಧಿಸಿದ್ದೀರಿ. ನಾನು ಇಲ್ಲಿ ನಿಮ್ಮನ್ನು ಒಂದು ಮಿನಿ ಭಾರತದ ರೂಪದಲ್ಲಿ ನೋಡುತ್ತಿದ್ದೇನೆ. ಭಾರತದ ಬೇರೆ ಬೇರೆ ಕ್ಷೇತ್ರಗಳಿಂದ ಬಂದಿರುವ ನೀವು ಒಂದು ಮಹಾನ್ ರಾಷ್ಟ್ರದ ಹೃದಯದಲ್ಲಿ, ಮತ್ತೊಂದು ಮಹಾನ್ ರಾಷ್ಟ್ರದ ಹೃದಯದ ಬಡಿತ ರೂಪದಲ್ಲಿ ಜೀವಿಸುತ್ತಿದ್ದೀರಿ. ನಿಮ್ಮನ್ನು ಭೇಟಿಯಾಗಿ ನನಗೆ ಇನ್ನೂ ಹೆಚ್ಚು ಸಂತೋಷವಾಗುತ್ತಿದೆ. ಏಕೆಂದರೆ ನಿಮ್ಮ ಮೂಲಕ ನಾನು ಒಂದೇ ಸ್ಥಳದಲ್ಲಿ ಗಂಗೆ, ಗೋದಾವರಿ, ಕೃಷ್ಣಾ, ಕಾವೇರಿ, ಬ್ರಹ್ಮಪುತ್ರ ಮತ್ತು ಇರಾವತಿಯಂತಹ ಉದಾರ ತಾಯಂದಿರು ನಿಮ್ಮನ್ನು ತಮ್ಮ ಮಡಿಲಿನಲ್ಲಿ ಪೋಷಿಸಿರುವ ಆ ಪರಂಪರೆಗಳು ಮತ್ತು ಸಾಂಸ್ಕೃತಿಕ ಪರಂಪರೆಗಳನ್ನು ನೋಡುತ್ತಿದ್ದೇನೆ.

ಸಾವಿರಾರು ವರ್ಷಗಳಿಂದ ಹಂಚಿಕೊಂಡು ಬಂದ ಸಂಸ್ಕೃತಿ ಮತ್ತು ನಾಗರಿಕತೆ, ಭೂಗೋಳ ಮತ್ತು ಇತಿಹಾಸ, ಭಾರತ ಹಾಗೂ ಮ್ಯಾನ್ಮಾರ್ ನ ಮಹಾನ್ ಪುತ್ರರು ಮತ್ತು ಪುತ್ರಿಯರ ಆಕಾಂಕ್ಷೆಗಳು ಮತ್ತು ಸಾಧನೆಗಳನ್ನು ನೀವು ಗೌರವಿಸುತ್ತಿದ್ದೀರಿ.

ಸಾವಿರಾರು ವರ್ಷಗಳಿಂದ ಭಾರತ ಮತ್ತು ಮ್ಯಾನ್ಮಾರ್ ದೇಶಗಳ ಗಡಿಗಳಷ್ಟೇ ಅಲ್ಲ, ಭಾವನೆಗಳು ಸಹ ಪರಸ್ಪರ ಸೇರಿಕೊಂಡಿವೆ. ಭಾರತದಲ್ಲಿ ಮ್ಯಾನ್ಮಾರ್ ಅನ್ನು ಬ್ರಹ್ಮದೇಶ ಅಥವಾ ಭಗವಾನ್ ಬ್ರಹ್ಮನ ನೆಲವೆಂದು ಹೇಳಲಾಗುತ್ತದೆ. ಜೊತೆಗಾರರೆ, ಈ ಮಣ್ಣು ಬುದ್ಧನನ್ನು ಒಪ್ಪಿಕೊಂಡಿದೆ, ಅವರ ಬೋಧನೆಗಳನ್ನು ಪಾಲಿಸುತ್ತಿದೆ. ಇಲ್ಲಿಯ ಬೌದ್ಧ ಗ್ರಂಥಗಳು ಮತ್ತು ಭಿಕ್ಷುಕರು ಭಾರತದ ಮೂಲೆಮೂಲೆಗಳಲ್ಲಿ, ಭಾರತದ ಎಲ್ಲ ರಾಜ್ಯಗಳ ಜೊತೆ ನೂರಾರು ವರ್ಷಗಳಿಗಿಂತಲೂ ಹೆಚ್ಚಾಗಿ ಒಂದು ಅವಿನಾಭಾವ ಸಂಬಂಧವನ್ನು ಕಾಪಾಡಿಕೊಂಡು ಬಂದಿದ್ದಾರೆ. ಈ ಸಂಬಂಧದಲ್ಲಿ ಕೇವಲ ಧರ್ಮವಷ್ಟೇ ಅಲ್ಲ, ಪಾಲೀ ಭಾಷೆ, ಸಾಹಿತ್ಯ ಮತ್ತು ಶಿಕ್ಷಣ ಸಹ ಸೇರಿವೆ. ಭಾರತ ಮತ್ತು ವಿಶ್ವಕ್ಕೆ ಮ್ಯಾನ್ಮಾರ್ ನ ಪುಣ್ಯಭೂಮಿಯಲ್ಲಿ ದಿವಂಗತ ಗೋಯಾಂಕಾ ಅವರ ಮೂಲಕ ವಿಪಾಸನದ (ಧ್ಯಾನ) ಕೊಡುಗೆ ನೀಡಿದೆ. ಅವರ ಸುಪುತ್ರರು ಈ ದಿನ ನಮ್ಮ ಮಧ್ಯೆ ಇರುವುದು ನನಗೆ ಸಂತಸ ತಂದಿದೆ.

ಮ್ಯಾನ್ಮಾರ್ ನಲ್ಲಿ ಸಹ ಇಂದಿಗೂ ರಾಮಾಯಣವನ್ನು ಯಾಮಾ ಎಂಬ ಹೆಸರಿನಿಂದ ಗುರುತಿಸುತ್ತಾರೆ. ವಿದ್ಯಾದೇವಿ ಸರಸ್ವತಿಯನ್ನು ನೀವು ಥರೂಥರಿ ಎಂಬ ಹೆಸರಿನಿಂದ ಪೂಜಿಸುತ್ತೀರಿ ಮತ್ತು ಶಿವನನ್ನು ಪರ್ ವಿಜವಾ, ವಿಷ್ಣುವನ್ನು ವಿಥಾನೊ ಎಂದು ಕರೆಯುತ್ತೀರಿ.

ಮ್ಯಾನ್ಮಾರ್ ಗೆ ನಮಿಸದೆಯೇ ಭಾರತದ ಸ್ವಾತಂತ್ರ್ಯ ಹೋರಾಟದ ಇತಿಹಾಸ ಸಂಪೂರ್ಣವಾಗದು. ಸುಭಾಷ್ ಚಂದ್ರ ಬೋಸ್ ಅವರು ‘ನೀವು ನನಗೆ ರಕ್ತ ನೀಡಿ, ನಾನು ನಿಮಗೆ ಸ್ವಾತಂತ್ರ್ಯ ಕೊಡುತ್ತೇನೆ’ ಎಂದು ಘರ್ಜಿಸುತ್ತಾ ಹೇಳಿದ ನೆಲವಿದು. ಅವರ ಈ ಘೋಷಣೆಯನ್ನು ಕೇಳಿ ಭಾರತವನ್ನು ತಮ್ಮ ಪ್ರಾಣಕ್ಕಿಂತ ಹೆಚ್ಚಾಗಿ ಪ್ರೀತಿಸುವ ಸಾವಿರಾರು, ಲಕ್ಷಾಂತರ ಯುವಕ ಮತ್ತು ಯುವತಿಯರು ತಮ್ಮ ಪ್ರಾಣವನ್ನು ಲೆಕ್ಕಿಸದೆ ಭಾರತದಲ್ಲಿ ಮತ್ತು ಭಾರತದ ಹೊರಗೆ ಆಜಾದ್ ಹಿಂದು ಫೌಜ್ ಗೆ ಸಹಕಾರ ನೀಡಲು ಹೊರಟಿದ್ದರು. ಅಂದಿನ ಆ ಆಜಾದ್ ಹಿಂದೂ ಫೌಜ್ ನಲ್ಲಿ ಕೆಲ ಕಾಲ ತಮ್ಮ ತಾರುಣ್ಯವನ್ನು ಕಳೆದ, ಈಗ ಸಾಕಷ್ಟು ಹಿರಿಯರಾಗಿರುವ ಅವರನ್ನು ಭೇಟಿಯಾಗುವ ಮತ್ತು ಆಶೀರ್ವಾದ ಪಡೆಯುವ ಸೌಭಾಗ್ಯ ದೊರೆತಿದೆ. ನೇತಾಜಿ ಅವರು ಇಲ್ಲಿ ಆಜಾದ್ ಹಿಂದು ಸರ್ಕಾರದ ಘೋಷಣೆ ಮಾಡಿದಾಗ ಭಾರತದಲ್ಲಿ ಬ್ರಿಟಿಷ್ ಸರ್ಕಾರದ ಬುಡಗಳು ಅಲುಗತೊಡಗಿದ್ದವು. ಬಾಲ ಗಂಗಾಧರ ತಿಲಕ್ ಅಥವಾ ಲೋಕಮಾನ್ಯ ತಿಲಕ್ ಅವರು ಮಾನ್ಲೆ ಜೈಲಿನಲ್ಲಿ ಆರು ವರ್ಷ ಖೈದಿಯಾಗಿದ್ದಾಗ ಗೀತ ರಹಸ್ಯ ಗ್ರಂಥವನ್ನು ರಚಿಸಿದ್ದ ಪವಿತ್ರ ನೆಲವಿದು. ಮಹಾತ್ಮಾ ಗಾಂಧಿ, ಲಾಲಾ ಲಜಪತ್ ರಾಯ್, ರವೀಂದ್ರನಾಥ್ ಟ್ಯಾಗೋರ್ ಅವರಂತಹ ಮಹಾನ್ ವ್ಯಕ್ತಿಗಳು ಹಲವು ಸಲ ಈ ಪವಿತ್ರ ನೆಲದ ಮೇಲೆ ಕಾಲಿರಿಸಿದ್ದರು.

ವಿದೇಶಿ ಶಕ್ತಿಗಳ ಮೂಲಕ ಭಾರತಕ್ಕೆ ಸ್ವಾತಂತ್ರ್ಯ ಕೊಡಿಸಲು ದೇಶದ ವೀರ ಸಿಪಾಯಿಗಳು ತಮ್ಮ ಮನೆ ಬಿಟ್ಟು ಹೋಗಬೇಕಾಗುತ್ತಿತ್ತು, ಆಗೆಲ್ಲ ಅವರಿಗೆ ಮ್ಯಾನ್ಮಾರ್ ಎರಡನೆಯ ಮನೆಯಾಗುತ್ತಿತ್ತು. 1857ರ ಪ್ರಥಮ ಸ್ವಾತಂತ್ರ್ಯ ಸಂಗ್ರಾಮದ ನಂತರ ಬಾದ್ ಶಾಹ್ ಬಹಾದ್ದುರ್ ಶಾಹ್ ಜಫರ್ ಅವರಿಗೆ ಈ ನೆಲದಲ್ಲಿ ಸ್ವಲ್ಪ ಜಮೀನು ದೊರೆತಿತ್ತು. ನಾನು ಯಾವ ದೇಶಕ್ಕೆ ಹೋದರೂ ಅಲ್ಲಿನ ಭಾರತೀಯ ಸಮುದಾಯದವರನ್ನು ಭೇಟಿಯಾಗಿ ಅವರ ಆಶೀರ್ವಾದ ಪಡೆಯುವ ಅವಕಾಶ ನನಗೆ ದೊರೆತಿದೆ. ಕೆಲವು ದಿನಗಳ ಹಿಂದೆ ಶ್ರೀಲಂಕಾ ಪ್ರವಾಸದ ಸಂದರ್ಭದಲ್ಲಿ ನಾನು ಜಾಫ್ನಾಗೆ ಹೋಗಿದ್ದೆ. ನಾನು ಜಾಫ್ನಾಗೆ ಹೋದ ಮೊದಲ ಭಾರತೀಯ ಪ್ರಧಾನ ಮಂತ್ರಿಯಾಗಿದ್ದೆ. ಅಲ್ಲಿ ನಾನು ತಮಿಳು ಮೂಲದ ಜನರನ್ನು ಭೇಟಿಯಾದೆ. ಭಾರತದ ನೆರವಿನಿಂದ ಅವರಿಗಾಗಿ ನಿರ್ಮಿಸಿದ್ದ ಮನೆಗಳನ್ನು ಅವರಿಗೆ ನೀಡುವ ಅದೃಷ್ಟವು ನನಗೆ ದೊರೆತಿತ್ತು. ಈ ವರ್ಷ ಮತ್ತೊಮ್ಮೆ ಬುದ್ಧ ಪೂರ್ಣಿಮೆಯ ಸಂದರ್ಭದಲ್ಲಿ ನನಗೆ ಶ್ರೀಲಂಕಾಗೆ ಹೋಗುವ ಅವಕಾಶ ಸಿಕ್ಕಿತು. ಅಂತಾರಾಷ್ಟ್ರೀಯ ಸಮಾರಂಭದಲ್ಲಿ ಭಾಗವಹಿಸುವುದಕ್ಕೆ ನನಗೆ ಆಹ್ವಾನ ದೊರೆತಿತ್ತು. ಆಗ ನಾನು ಮಧ್ಯ ಶ್ರೀಲಂಕಾದ ತಮಿಳು ಸೋದರ ಸೋದರಿಯರನ್ನು ಭೇಟಿಯಾಗಿದ್ದೆ. ಅಲ್ಲಿ ಭಾರತದ ನೆರವಿನಿಂದ ನಿರ್ಮಿಸಲಾದ ಆಸ್ಪತ್ರೆಯನ್ನು ಉದ್ಘಾಟಿಸಿದ ಬಳಿಕ ಸಾವಿರಾರು ಜನರು ಬಂದು ನನಗೆ ಅದೆಷ್ಟು ಪ್ರೀತಿ ತೋರಿಸಿದರೆಂದರೆ ನಾನು ಆ ದಿನವನ್ನು ಎಂದಿಗೂ ಮರೆಯುವುದಿಲ್ಲ. ನನ್ನ ತಮಿಳು ಸೋದರರು ಶ್ರೀಲಂಕಾ ನೆಲದಲ್ಲಿ ನನಗೆ ಅದೆಷ್ಟು ಪ್ರೀತಿ ನೀಡಿದರು. ನಾನು ಸೌದಿ ಅರೇಬಿಯಾಗೆ ಹೋಗಿದ್ದಾಗ ನಿರ್ಮಾಣ ಕೆಲಸ ಮಾಡುತ್ತಿದ್ದವರಾಗಲಿ, ಕೀನ್ಯಾದಲ್ಲಿ ರೈತರು ಮತ್ತು ವ್ಯಾಪಾರಿಗಳಾಗಲಿ ಅಥವಾ ಸಿಲಿಕಾನ್ ವ್ಯಾಲಿಯಲ್ಲಿ ಇಂಜಿನಿಯರ್ ಗಳಾಗಲಿ ವಿದೇಶಗಳಲ್ಲಿ ವಾಸಿಸುವ ಭಾರತೀಯರು ಮತ್ತು ಭಾರತೀಯ ಮೂಲದ ಜನರನ್ನು ಭೇಟಿಯಾದಾಗಲೆಲ್ಲ ನನ್ನತನದ ಭಾವನೆ ಮೂಡುತ್ತದೆ. ಒಂದು ರೀತಿಯಲ್ಲಿ ಇವರು ನಮ್ಮ ಸರ್ಕಾರೀ ವ್ಯವಸ್ಥೆಯಲ್ಲಿ ರಾಯಭಾರಿಗಳಾಗಿರುತ್ತಾರೆ, ನೀವೆಲ್ಲ ನಮ್ಮ ರಾಯಭಾರಿಗಳು. ನೀವು ಎಲ್ಲಿರುತ್ತೀರೋ, ಅಲ್ಲೆಲ್ಲ ಅಭಿವೃದ್ಧಿ ಹೊಂದುತ್ತಾ ಮತ್ತು ಸಾಮರಸ್ಯದಿಂದ ಭಾರತೀಯ ಸಂಸ್ಕಾರಗಳು ಮತ್ತು ಮೌಲ್ಯಗಳನ್ನು ಜೀವಂತವಾಗಿರಿಸಿದ್ದೀರಿ ಎಂದು ನಿಮ್ಮ ಮೇಲೆ ಹೆಮ್ಮೆಯಾಗುತ್ತದೆ. ಇದು ಬಹಳ ದೊಡ್ಡ ವಿಷಯವಾಗಿದೆ.

ಸಂಯುಕ್ತ ರಾಷ್ಟ್ರದಲ್ಲಿ ಮೂರು ವರ್ಷಗಳ ಹಿಂದೆ ಭಾರತದ ನೇತೃತ್ವದಲ್ಲಿ ಅಂತಾರಾಷ್ಟ್ರೀಯ ಯೋಗ ದಿವಸದ ಪ್ರಸ್ತಾಪವಾದ ಕೂಡಲೇ ದಾಖಲೆಯ ಸಮಯದಲ್ಲಿ ಬಹಳ ಸ್ಪೂರ್ತಿಯೊಂದಿಗೆ ಅದು ಜಾರಿಯಾಯಿತು. ಕಳೆದ ಮೂರು ವರ್ಷಗಳಿಂದ ವಿಶ್ವಾದ್ಯಂತ ಜೂನ್ 21ರಂದು ಅಂತಾರಾಷ್ಟ್ರೀಯ ಯೋಗ ದಿವಸವನ್ನಾಗಿ ಆಚರಿಸಲಾಗುತ್ತಿದೆ ಮತ್ತು ಯೋಗದ ಮಾತು ಬರುತ್ತಿದ್ದಂತೆಯೇ ಭಾರತವನ್ನು ಸ್ಮರಿಸುವುದು ಸ್ವಾಭಾವಿಕವಾಗಿದೆ.

ಯೋಗಕ್ಕೆ ಈ ವಿಶ್ವ ಮಾನ್ಯತೆ ಸಿಕ್ಕಿದ್ದು ನಿಮ್ಮ ಸಾಧನೆಯಾಗಿದೆ. ಏಕೆಂದರೆ ಭಾರತೀಯರು ವಿಶ್ವದ ಎಲ್ಲ ಮೂಲೆಗಳಿಗೂ ಇದನ್ನು ತಲುಪಿಸಿದ್ದರು.

ಭಾರತದೊಂದಿಗೆ ನಿಮ್ಮದು ಕೇವಲ ಭಾವನ್ಮಾತಕ ಸಂಬಂಧವಲ್ಲ. ನೀವು ಭಾರತದ ಪ್ರಗತಿಯ ದೃಷ್ಟಿಯಿಂದಲೂ ದೃಢವಾಗಿ ಸೇರಿದ್ದೀರಿ. ಹಲವು ಅನಿವಾಸಿ ಭಾರತೀಯರು ಈಗ ಭಾರತದ ಪ್ರಗತಿಯಲ್ಲಿ ಸಹಕಾರ ನೀಡುತ್ತಿದ್ದಾರೆ. ಯುವ ವರ್ಗವಂತೂ ಇನ್ನೂ ಹೆಚ್ಚು ಸಕ್ರಿಯವಾಗಿದೆ. ಕೇವಲ ಸಾಮಾಜಿಕ ಮಾಧ್ಯಮಗಳ ಮೂಲಕ ನಿಯಮಿತವಾಗಿ ತೊಡಗಿಕೊಂಡಿಲ್ಲ, ಭಾರತದ ಬಗ್ಗೆ ತಿಳಿದುಕೊಳ್ಳುವ ಆಸಕ್ತಿಯೂ ದಿನೇದಿನೇ ಹೆಚ್ಚುತ್ತಿದೆ ಮತ್ತು ಅಧಿಕವಾಗಿ ಬಲವಾಗುತ್ತಾ ಹೋಗುತ್ತಿದೆ. ಕಳೆದ ವರ್ಷ ನಾವು ಅನಿವಾಸಿ ಭಾರತೀಯರಿಗೆ Know India ಅಥವಾ ಭಾರತವನ್ನು ಅರಿಯಿರಿ ಎಂಬ ರಸಪ್ರಶ್ನೆ ಸ್ಪರ್ಧೆಯನ್ನು ಆಯೋಜಿಸಿದ್ದವು. ಈ ರಸಪ್ರಶ್ನೆ ಸ್ಪರ್ಧೆಯು ನಿರಂತರವಾಗಿ ನಡೆಯುವ ಪ್ರಕ್ರಿಯೆಯಾಗಿದೆ. ಇದರಲ್ಲಿ ಸುಮಾರು 100 ದೇಶಗಳ ಅನಿವಾಸಿ ಯುವ ಭಾರತೀಯರು ಭಾಗವಹಿಸಿದ್ದರು ಎಂಬುದನ್ನು ತಿಳಿದು ನನಗೆ ಸಂತೋಷವೂ ಆಯಿತು, ಆಶ್ಚರ್ಯವೂ ಆಯಿತು. ಆ ದೇಶಗಳಲ್ಲಿ ಎರಡನೆಯ ಪೀಳಿಗೆಯ, ಮೂರನೆಯ ಪೀಳಿಗೆಯ ಭಾರತೀಯರು ಉಳಿದಿದ್ದಾರೆ. ಅವರು ಇದರಲ್ಲಿ ಉತ್ಸಾಹದಿಂದ ಭಾಗವಹಿಸಿದ್ದರು.

ನಿಮ್ಮನ್ನು ಭೇಟಿಯಾದಾಗ ವಿದೇಶಗಳಲ್ಲಿ ನೆಲೆಸಿರುವ ನಮ್ಮ ಜನರ ನಡುವಿನ ಸಂಪರ್ಕವು ಭಾರತದ ಸರ್ಕಾರೀ ವ್ಯವಸ್ಥೆಯೊಂದಿಗೆ ಏಕಮುಖ ಸಂಚಾರವಲ್ಲ ಎಂಬ ಭಾವನೆ ಮೂಡಿದೆ. ಇಲ್ಲಿಗೆ ಬರುವುದಕ್ಕೆ ಮೊದಲು ನಾನು ನಿಮ್ಮಿಂದ ನರೇಂದ್ರ ಮೋದಿ ಆ್ಯಪ್ ನ ಮೂಲಕ ಸಲಹೆಗಳನ್ನು ಕೇಳಿದ್ದೆ. ನೀವು ನನಗೆ ಬಹಳಷ್ಟು ಉತ್ತಮ ಸಲಹೆಗಳನ್ನು ಕಳುಹಿಸಿದ್ದೀರಿ. ಇದಕ್ಕಾಗಿ ನನಗೆ ಸಂತೋಷವಾಗಿದೆ ಮತ್ತು ನಾನು ನಿಮಗೆ ಆಭಾರಿಯಾಗಿದ್ದೇನೆ.

ನಾನು ಸರ್ಕಾರ ರಚಿಸಿದ ಮೊದಲ ದಿನದಿಂದಲೇ ಅನಿವಾಸಿ ಭಾರತೀಯರ ಯೋಗಕ್ಷೇಮಕ್ಕೆ ಆದ್ಯತೆ ನೀಡಿದ್ದೇನೆ. OCI ಮತ್ತು PIO ಯೋಜನೆಗಳನ್ನು ವಿಲೀನಗೊಳಿಸುವುದು. ದೀರ್ಘಕಾಲೀನ ವೀಸಾ ಹೊಂದಿರುವವರಿಗೆ ಪೊಲೀಸರ ಹತ್ತಿರ ವರದಿ ಮಾಡಿಕೊಳ್ಳುವುದರಿಂದ ಮುಕ್ತಿ ಕೊಡಿಸುವುದು, ಪಾಸ್ ಪೋರ್ಟ್ ಸುಲಭವಾಗಿ ಸಿಗುವಂತೆ ಮಾಡುವುದು, ಭಾರತೀಯ ಸಮುದಾಯ ಯೋಗಕ್ಷೇಮ ನಿಧಿಯನ್ನು ಸೂಕ್ತವಾಗಿ ಮತ್ತು ಪರಿಣಾಮಕಾರಿಯಾಗಿ ಬಳಸಿಕೊಳ್ಳುವುದು, ಅನಿವಾಸಿ ಭಾರತೀಯ ದಿವಸವನ್ನು ಮರು ಚೈತನ್ಯಗೊಳಿಸುವುದು ಮತ್ತು ವಿಶ್ವದ ಬೇರೆಬೇರೆ ಭಾಗಗಳಲ್ಲಿ ಸ್ಥಳೀಯ ಅನಿವಾಸಿ ಭಾರತೆಯ ದಿವಸವನ್ನು ಆಯೋಜಿಸುವುದು, ಹೀಗೆ ನಾವು ಅನಿವಾಸಿ ಭಾರತೀಯರ ಅವಶ್ಯಕತೆಗಳು ಮತ್ತು ಹಿಮ್ಮಾಹಿತಿಗಳನ್ನು ಗಮನದಲ್ಲಿಟ್ಟುಕೊಂಡು ಇಂತಹ ಅನೇಕ ಹೆಜ್ಜೆಗಳನ್ನು ಇಟ್ಟಿದ್ದೇವೆ.

ವಿದೇಶದಲ್ಲಿ ನೆಲೆಸಿರುವ ಅಥವಾ ಸಂಕಷ್ಟಕ್ಕೆ ಸಿಲುಕಿರುವ ತಮ್ಮ ದೇಶದ ಜನರ ದುಃಖ, ಕಷ್ಟಗಳಿಗೆ ತ್ವರಿತವಾಗಿ ಸ್ಪಂದಿಸುವ ಭಾರತದ ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್ ಅವರಂತಹ ಬೇರಾವುದೇ ದೇಶದ ವಿದೇಶಾಂಗ ಮಂತ್ರಿ ಇದ್ದಾರೆ ಎಂದು ನನಗೆ ಅನ್ನಿಸುತ್ತಿಲ್ಲ.

ಇಡೀ ವಿಶ್ವದಲ್ಲಿ ಯಾವುದೇ ಭಾರತೀಯ ನಾಗರಿಕರಿಗೆ ಅಥವಾ ಭಾರತೀಯ ಮೂಲದ ಪ್ರವಾಸಿಗರಿಗೆ ಯಾವುದೇ ರೀತಿಯ ಸಮಸ್ಯೆಯಾದರೂ ಅವರು ಹಿಂಜರಿಯದೆ ಶ್ರೀಮತಿ ಸುಷ್ಮಾ ಸ್ವರಾಜ್ ಅವರನ್ನು ಟ್ವಿಟರ್ ನಲ್ಲಿ ಸಂಪರ್ಕಿಸುತ್ತಾರೆ, ಅವರ ಸಮಸ್ಯೆಗೆ ಪರಿಹಾರ ದೊರಕುತ್ತದೆ. ನಿಮ್ಮೆಲ್ಲರಿಗೆ ಪಾಸ್ ಪೋರ್ಟ್ ನ ಸಮಸ್ಯೆಯಾಗಲಿ ಅಥವಾ ವೀಸಾ ಅಥವಾ ಹೊರದೇಶದಲ್ಲಿ ಕಾನೂನಿನ ನೆರವಾಗಲಿ, ಭಾರತದ ರಾಯಭಾರ ಕಚೇರಿಯ ಬಾಗಿಲು ಭಾರತೀಯ ಸಮಾಜದವರಿಗಾಗಿ 24*7=365 ದಿನಗಳು ತೆರೆದಿರುತ್ತದೆ ಎಂದು ಸಹ ನನ್ನ ಸಂದೇಶವಾಗಿದೆ.

ಸ್ನೇಹಿತರೆ, ಭಾರತವನ್ನು ಇಂದು ವಿಶ್ವದಲ್ಲಿ ಗೌರವದ ದೃಷ್ಟಿಯಿಂದ ನೋಡುತ್ತಿದ್ದಾರೆ. ಅದಕ್ಕೆ ಕಾರಣ, ಅದಕ್ಕೆ ಕಾರಣ, ಅದಕ್ಕೆ ಕಾರಣ ನೀವು. ನೀವು ಭಾರತದ ನಿಜವಾದ ರಾಯಭಾರಿಗಳು ಮತ್ತು ಅದಕ್ಕೆ ಕಾರಣ ಭಾರತವು ಬಹಳ ವೇಗವಾಗಿ ಬದಲಾಗುತ್ತಿದೆ, ಮುನ್ನಡೆಯುತ್ತಿದೆ.

ನಾವು ಕೇವಲ ನಮ್ಮ ದೇಶವನ್ನು ಸುಧಾರಿಸುತ್ತಿಲ್ಲ, ನಾವು ಭಾರತವನ್ನು ಬದಲಿಸುತ್ತಿದ್ದೇವೆ. ನಾವು ಭಾರತವನ್ನು ಕೇವಲ ಬದಲಾಯಿಸುತ್ತಿಲ್ಲ, ನಾವು ನವಭಾರತವನ್ನು ನಿರ್ಮಿಸುತ್ತಿದ್ದೇವೆ. ಕಳೆದ ತಿಂಗಳು ನಾವು 70ನೆಯ ವರ್ಷದ ಸ್ವಾತಂತ್ರ್ಯ ದಿನವನ್ನು ಆಚರಿಸಿದೆವು. 2022ರಲ್ಲಿ ಭಾರತವು ಸ್ವಾತಂತ್ರ್ಯ ಗಳಿಸಿ 75 ವರ್ಷಗಳಾಗುತ್ತದೆ.

ಬಡತನ ಮುಕ್ತ, ಭಯೋತ್ಪಾದನೆ ಮುಕ್ತ, ಮತಾಂಧತೆ ಮುಕ್ತ, ಜಾತಿವಾದ ಮುಕ್ತ, ಭ್ರಷ್ಟಾಚಾರ ಮುಕ್ತ ಸ್ವಚ್ಛ ಭಾರತವನ್ನು ನಿರ್ಮಿಸುತ್ತೇವೆ ಮತ್ತು ನಿರ್ಮಿಸಿಯೇ ತೋರಿಸುತ್ತೇವೆ. New India Website ಮೂಲಕ ನೀವು ಸಹ ಈ ಮಹಾನ್ ಕಾರ್ಯದಲ್ಲಿ ಭಾಗವಹಿಸಿ ಎಂದು ನಿಮ್ಮನ್ನು ಸಹ ಕೇಳುತ್ತಿದ್ದೇನೆ. ಸ್ನೇಹಿತರೆ, 19ನೆಯ ಶತಮಾನ, 19ನೆಯ ಶತಮಾನದ ವಿನ್ಯಾಸದಲ್ಲಿ 21ನೆಯ ಶತಮಾನದ ಹೆದ್ದಾರಿ ನಿರ್ಮಿಸುವುದು ಕಾರ್ಯಸಾಧುವಲ್ಲ. ಹೆದ್ದಾರಿಯೆಂದರೆ ಅದರರ್ಥ ಕೇವಲ ರಸ್ತೆಗಳನ್ನು ನಿರ್ಮಿಸುವುದು ಮತ್ತು ರೈಲು ಸಂಪರ್ಕ ಹೆಚ್ಚಿಸುವುದು ಎಂದಲ್ಲ. 21ನೆಯ ಶತಮಾನದ ಹೆದ್ದಾರಿಗೆ ಆಧಾರವಾಗಿರುವುದು ಪ್ರತಿಯೊಂದು ವಸ್ತುವನ್ನು ಜನರು ತಂತ್ರಜ್ಞಾನದ ಮೂಲಕ ಸಂಪರ್ಕಿಸುವುದು, ಅವರ ಜೀವನದಲ್ಲಿ ಬದಲಾವಣೆ ತರುವುದು, ಜೀವನದ ಗುಣಮಟ್ಟದಲ್ಲಿ ಬದಲಾವಣೆ ತರುವುದೇ ಆಗಿದೆ. ಇಡೀ ವಿಶ್ವದಲ್ಲಿ ಸೌರಶಕ್ತಿ ಬಳಕೆ ಹೆಚ್ಚಿಸುವ ಎಲ್ಲಕ್ಕಿಂತ ದೊಡ್ಡ ಕಾರ್ಯಕ್ರಮ ಇಂದು ಭಾರತದಲ್ಲಿ ನಡೆಯುತ್ತಿದೆ.

ಪ್ರಸ್ತುತ ಭಾರತದಲ್ಲಿ ರೈಲ್ವೆ, ರಸ್ತೆ, ವಿಮಾನ ನಿಲ್ದಾಣಗಳ ಮೇಲೆ ಅದೆಷ್ಟು ಬಂಡವಾಳ ಹೂಡಲಾಗುತ್ತಿದೆ ಎಂದರೆ ಹಿಂದೆಂದೂ ಇಷ್ಟು ಬಂಡವಾಳ ಹೂಡಿರಲಿಲ್ಲ. ದೇಶದ ಪ್ರತಿಯೊಂದು ಗ್ರಾಮ ಪಂಚಾಯತಿಯನ್ನು ಆಪ್ಟಿಕಲ್ ಫೈಬರ್ ಮೂಲಕ ಜೋಡಿಸುವ ಕೆಲಸ ಬಹಳ ವೇಗವಾಗಿ ಆಗುತ್ತಿದೆ. ಸಮುದ್ರ ತೀರಗಳಲ್ಲಿ ಇರುವ ಪಟ್ಟಣಗಳು ಮತ್ತು ವಿಮಾನ ನಿಲ್ದಾಣಗಳನ್ನು ಅಭಿವೃದ್ಧಿಗೊಳಿಸುವ ಕಾರ್ಯವು ‘ಸಾಗರಮಾಲಾ ಪರಿಯೋಜನೆ’ಯ ಮೂಲಕ ತ್ವರಿತವಾಗಿ ಆಗುತ್ತಿದೆ. ಈ ಪ್ರಯತ್ನಗಳಿಂದ ದೇಶದಲ್ಲಿ ಹೆದ್ದಾರಿಯ ಜೊತೆಗೆ ಒಂದು ಹೊಸ ಬಗೆಯ ಹೆದ್ದಾರಿಯೂ ವಿಕಾಸಗೊಳ್ಳುತ್ತದೆ ಎಂದು ನಾನು ಭಾವಿಸುತ್ತೇನೆ. ಕೃಷಿಯು ಅದರ ಒಂದು ಅವಿಭಾಜ್ಯ ಅಂಗವಾಗಲಿದೆ. ನಮ್ಮ ಸರ್ಕಾರವು ರೈತರ ಆದಾಯವನ್ನು ದ್ವಿಗುಣಗೊಳಿಸುವ ಗುರಿಯೊಂದಿಗೆ ಕೆಲಸ ಮಾಡುತ್ತಿದೆ. ಇದಕ್ಕಾಗಿ ಬೀಜದಿಂದ ಮಾರುಕಟ್ಟೆಯವರೆಗೆ ನಾವು ಹಲವು ಕ್ರಮಗಳನ್ನು ಕೈಗೊಳ್ಳುತ್ತಿದ್ದೇವೆ. ಉದಾಹರಣೆಗೆ ಮಣ್ಣಿನ ಆರೋಗ್ಯ ಕಾರ್ಡ್, ಬೇವು ಲೇಪಿತ ಯೂರಿಯಾ, ಸೂಕ್ಷ್ಮ ನೀರಾವರಿ, ಬೆಳೆ ವಿಮೆ, ಆಹಾರ ಸಂಸ್ಕರಣಾ ಪಾರ್ಕ್ ಗಳು, ಶೈತ್ಯ ಸಂಗ್ರಹಾಗಾರಗಳಂತಹ ಸರಪಳಿಗಳನ್ನು ನಾನು ಎಣಿಸಬಲ್ಲೆ. ಹಸಿರು ಕ್ರಾಂತಿಯೆಂದರೆ ನಮಗೆ ಗೊತ್ತು, ಶ್ವೇತ ಕ್ರಾಂತಿಯೆಂದರೆ ಗೊತ್ತು. ಆದರೆ ಇನ್ನೂ ಎರಡು ಕ್ರಾಂತಿಗಳಿಗೆ ನಾವು ಒತ್ತು ನೀಡುತ್ತಿದ್ದೇವೆ, ಒಂದು ನೀಲಿ ಕ್ರಾಂತಿ, ಮತ್ತೊಂದು ಸಿಹಿ ಕ್ರಾಂತಿ. ನಾನು ನೀಲಿ ಕ್ರಾಂತಿಯ ಬಗ್ಗೆ ಹೇಳುವಾಗ ಅದು ಕೇವಲ ಮೀನುಗಾರರ ಕಲ್ಯಾಣವಷ್ಟೇ ಅಲ್ಲ, ಸಮುದ್ರದ ಸಾಮರ್ಥ್ಯದ ಒಂದು ಹೊಸ ಯುಗವು ಆರಂಭವಾಗಿದೆ. ಅದೇ ರೀತಿ ಸಿಹಿ ಕ್ರಾಂತಿ ಅಂದರೆ ಜೇನು ಸಾಕಣೆಯಿಂದ ಜೇನುತುಪ್ಪ ಪಡೆಯುವ ಮೂಲಕ ಬಹಳ ದೊಡ್ಡ ಆದಾಯ ಗಳಿಸುವ ಸಾಧ್ಯತೆಗಳನ್ನು ನಾವು ಸೃಷ್ಟಿಸುತ್ತಿದ್ದೇವೆ, ಪ್ರಯತ್ನಿಸುತ್ತಿದ್ದೇವೆ.

ಜೊತೆಗೆ ದೇಶದ ಹಿತಕ್ಕಾಗಿ ದೊಡ್ಡ ಮತ್ತು ಕಠಿಣ, ದೇಶದ ಹಿತಕ್ಕಾಗಿ ಕಠಿಣ ನಿರ್ಧಾರ ಕೈಗೊಳ್ಳುವುದಕ್ಕೆ ಸ್ವಲ್ಪವೂ ಹಿಂಜರಿಯುವುದಿಲ್ಲ. ನಮಗೆ ಪಕ್ಷಕ್ಕಿಂತ ದೇಶ ದೊಡ್ಡದು, ಅದಕ್ಕಾಗಿ ಇದನ್ನು ಮಾಡುತ್ತೇವೆ. ನಮ್ಮ ಪಾಲಿಗೆ ದೇಶವೇ ಎಲ್ಲವೂ ಆಗಿದೆ. ನಿರ್ದಿಷ್ಟ ದಾಳಿಯಾಗಿರಬಹುದು, ನೋಟು ಅಮಾನ್ಯೀಕರಣವಾಗಿರಬಹುದು ಅಥವಾ ಜಿಎಸ್ ಟಿ ಆಗಿರಬಹುದು, ಈ ಸರ್ಕಾರವು ದೇಶದ ಒಳಿತಿಗಾಗಿ ಪ್ರತಿಯೊಂದು ನಿರ್ಧಾರವನ್ನು ಯಾವುದೇ ಭಯ ಅಥವಾ ಸಂಕೋಚವಿಲ್ಲದೆ ತೆಗೆದುಕೊಂಡಿದೆ.

ಈಗ ಅರ್ಥ ವ್ಯವಸ್ಥೆ ಮತ್ತು ಕಾಳಧನ ಹಾಗೂ ಭ್ರಷ್ಟಾಚಾರದಿಂದ ಮುಕ್ತಿ ದೊರಕಿಸಿಕೊಡಲು ಕಠಿಣ ನಿರ್ಧಾರ ತೆಗೆದುಕೊಳ್ಳುವ ಅಗತ್ಯ ಬಿದ್ದಾಗ 1000 ಮತ್ತು 500 ರೂಪಾಯಿಯ ನೋಟುಗಳನ್ನು ಹಿಂದಕ್ಕೆ ತೆಗೆದುಕೊಳ್ಳುವ ನಿರ್ಧಾರವನ್ನು ನಾವು ಮಾಡಿದೆವು. ಬೆರಳೆಣಿಕೆಯ ಕೆಲವು ವ್ಯಕ್ತಿಗಳ ಭ್ರಷ್ಟಾಚಾರದಿಂದಾಗಿ ದೇಶದ ನೂರಾ ಇಪ್ಪತ್ತೈದು ಕೋಟಿ ಜನರು ಬೆಲೆ ತೆರುತ್ತಿದ್ದರು, ಇದು ನಮಗೆ ಒಪ್ಪಿಗೆಯಲ್ಲ. ಅಪ್ರಾಮಾಣಿಕ ಹಣವು ಎಲ್ಲಿಂದ ಬರುತ್ತಿದೆ, ಯಾರ ಬಳಿ ಹೋಗುತ್ತಿದೆ ಎಂಬುದೆಲ್ಲ ಕಾಗದದ ಮೇಲೆ ಕಾಣಿಸುತ್ತಿರಲಿಲ್ಲ ಎಂಬುದೇ ಅದರ ಶಕ್ತಿಯಾಗಿತ್ತು. ಕಪ್ಪು ಹಣಕ್ಕೆ ಯಾವುದೇ ವಿಳಾಸ ಇರುವುದಿಲ್ಲ.

ಸ್ನೇಹಿತರೆ, ನೋಟು ಅಮಾನ್ಯಗೊಳಿಸಿದ ಬಳಿಕ ಈಗ ಲಕ್ಷಾಂತರ ಜನರ ಅಕೌಂಟ್ ಗಳಲ್ಲಿ ಕೋಟ್ಯಂತರ, ನೂರಾರು ಕೋಟ್ಯಂತರ ಹಣ ಜಮೆಯಾಗಿರುವುದು ನನ್ನ ಗಮನಕ್ಕೆ ಬಂದಿದೆ. ಆದರೆ ಅವರೆಂದೂ ಆದಾಯ ತೆರಿಗೆಯನ್ನು ಸಲ್ಲಿಸಿರಲಿಲ್ಲ. ಕಪ್ಪು ಹಣವನ್ನು ಕೇವಲ ಇಲ್ಲಿಂದ ಅಲ್ಲಿಗೆ ಇಡುವ ಕೆಲಸವನ್ನಷ್ಟೇ ಮಾಡುತ್ತಿದ್ದ ಲಕ್ಷಾಂತರ ಕಂಪನಿಗಳ ಬಗ್ಗೆಯೂ ಗೊತ್ತಾಗಿದೆ. ಕೇವಲ ಮೂರು ತಿಂಗಳಲ್ಲಿ ನನ್ನ ಪ್ರೀತಿಯ ದೇಶಬಂಧುಗಳೇ, ಕೇವಲ ಮೂರು ತಿಂಗಳಲ್ಲಿ ಎರಡು ಲಕ್ಷಕ್ಕಿಂತ ಹೆಚ್ಚು ಇಂತಹ ಕಂಪನಿಗಳ ನೋಂದಣಿಯನ್ನು ರದ್ದುಪಡಿಸಲಾಗಿದೆ ಮತ್ತು ಅವುಗಳ ಬ್ಯಾಂಕ್ ಅಕೌಂಟ್ ಗಳನ್ನು ಸಹ ಅಮಾನತ್ತಿನಲ್ಲಿ ಇಡಲಾಗಿದೆ ಎಂಬುದನ್ನು ತಿಳಿದು ನಿಮಗೆ ಸಂತೋಷವಾಗಬಹುದು.

ಈಗ ಎರಡು ತಿಂಗಳ ಹಿಂದೆಯಷ್ಟೇ ದೇಶದಲ್ಲಿ ಜಿಎಸ್ ಟಿ ಜಾರಿಗೆ ತರಲಾಗಿದೆ. ನಾನು ಜಿಎಸ್ ಟಿಯನ್ನು ಸರಳ ಭಾಷೆಯಲ್ಲಿ ಸರಕು ಮತ್ತು ಸರಳ ತೆರಿಗೆ ಎಂದು ಹೇಳುತ್ತೇನೆ. ಜಿಎಸ್ ಟಿಯಿಂದಲೂ ದೇಶದಲ್ಲಿ ಪ್ರಾಮಾಣಿಕತೆಯಿಂದ ವ್ಯವಹಾರ ನಡೆಸುವ ಹೊಸ ಸಂಸ್ಕೃತಿ ಹುಟ್ಟಿಕೊಳ್ಳುತ್ತಿದೆ. ಕಳೆದ ಆರು ವರ್ಷಗಳಲ್ಲಿ ದೇಶದ ತೆರಿಗೆ ಪದ್ಧತಿಗೆ ಸೇರದ ವ್ಯಾಪಾರಿಗಳಿದ್ದರು. ಜಿಎಸ್ ಟಿ ಜಾರಿಯಾದ ಕೇವಲ ಎರಡೇ ತಿಂಗಳಲ್ಲಿ ಅವರು ಇದಕ್ಕೆ ಸೇರಿದ್ದಾರೆ. ಆರು ವರ್ಷಗಳಲ್ಲಿ ಆಗದ ಕಾರ್ಯ ಕೇವಲ 60 ದಿನಗಳಲ್ಲಿ ಹೇಗೆ ಆಗುತ್ತಿದೆ ಎನ್ನುವುದಕ್ಕೆ ಇದು ಉದಾಹರಣೆಯಾಗಿದೆ. ಕಳೆದ ಮೂರು ವರ್ಷಗಳಲ್ಲಿ ಭಾರತದಲ್ಲಿ ಬದಲಾವಣೆಯ ಒಂದು ದೊಡ್ಡ ಗಾಳಿ ಬೀಸಿತು. ಕನಿಷ್ಠ ಸರ್ಕಾರ, ಗರಿಷ್ಠ ಆಡಳಿತದ ಸಿದ್ಧಾಂತದ ಮೇಲೆ ನಡೆಯುತ್ತಿರುವ ಎಲ್ಲ ಪ್ರಕ್ರಿಯೆಗಳನ್ನು ಸುಲಭಗೊಳಿಸಲಾಗುತ್ತಿದೆ, ಸರಳಗೊಳಿಸಲಾಗುತ್ತಿದೆ. ಕಾನೂನುಗಳನ್ನು ಬದಲಿಸಲಾಗುತ್ತಿದೆ, ನಿಶ್ಚಿಂತೆಯಿಂದ ವ್ಯವಹಾರ ಮಾಡುವುದಕ್ಕಾಗಿ ನಿಯಮಗಳನ್ನು ಸರಳಗೊಳಿಸಲಾಗುತ್ತಿದೆ. ಭಾರತ ಬದಲಾಗಬಲ್ಲದು, ಮುಂದೆ ಬರಬಲ್ಲದು, ದಶಕಗಳಷ್ಟು ಹಳೆಯ ಕೆಡುಕುಗಳು ಭಾರತವನ್ನು ಬಿಗಿಯಾಗಿ ಬಂಧಿಸಿದ್ದವು, ಅವುಗಳಿಂದ ಈಗ ಭಾರತ ಮುಕ್ತವಾಗಬಲ್ಲದು ಎಂಬ ಭರವಸೆಗಳು ದೇಶದ ಜನರಲ್ಲಿ ಮೂಡಿವೆ.

ಸ್ನೇಹಿತರೆ, ಭಾರತವು ತನ್ನ ಪ್ರಗತಿಯ ಲಾಭವನ್ನು ಕೇವಲ ತಾನು ಮಾತ್ರ ಇಟ್ಟುಕೊಳ್ಳುವುದಿಲ್ಲ. ನಮ್ಮ ಜೊತೆ ಯಾರು ಯಾರು ಇದ್ದಾರೋ, ಅವರ ಜೊತೆ ಸೇರಿ ಹಂಚಿಕೊಂಡು ತಿಂದರೆ ಅದರ ಆನಂದ ಹಲವು ಪಟ್ಟು ಹೆಚ್ಚುತ್ತದೆ. ಆಫ್ರಿಕವಾಗಲಿ ಅಥವಾ ದಕ್ಷಿಣ ಏಷ್ಯಾ ಅಥವಾ ಪೆಸಿಫಿಕ್ ದ್ವೀಪಗಳಾಗಲಿ ನಮ್ಮ ಸಾಮರ್ಥ್ಯಗಳು, ನಮ್ಮ ಅನುಭವ, ನಮ್ಮ ಎಲ್ಲ ಅಭಿವೃದ್ಧಿಶೀಲ ರಾಷ್ಟ್ರಗಳ ಜೊತೆ ತೆರೆದ ಮನಸ್ಸಿನಿಂದ ಹಂಚಿಕೊಳ್ಳುತ್ತಿದ್ದೆವು. 2014ರಲ್ಲಿ ನಾನು ದಕ್ಷಿಣ ಏಷ್ಯಾ ಉಪಗ್ರಹದ ಮಾತು ನೀಡಿದ್ದೆ. ಈ ವರ್ಷ ನಾವು ಈ ಉಪಗ್ರಹವನ್ನು ಹಾರಿಸಿದ್ದೇವೆ. ಭಾರತವಷ್ಟೇ ಅಲ್ಲ, ಎಲ್ಲ ನೆರೆದೇಶಗಳು ಇದರಲ್ಲಿ ಸೇರಿವೆ, ಅವರಿಗೂ ಈ ಉಪಗ್ರಹದ ಪ್ರಯೋಜನ ದೊರಕುತ್ತಿದೆ.

ಪ್ರಕೃತಿ ವಿಕೋಪ ಅಥವಾ ಬೇರಾವುದೇ ರೀತಿಯ ಸಂಕಷ್ಟದ ಸಮಯದಲ್ಲೂ ನಾವು ಮೊದಲು ಸ್ಪಂದಿಸುವವರಾಗಿದ್ದೇವೆ. ಕೇವಲ ಭಾರತೀಯರನ್ನಷ್ಷೇ ಅಲ್ಲ, ಪ್ರತಿಯೊಬ್ಬರಿಗೂ ನೆರವು ನೀಡುವಲ್ಲಿ ನಾವೇ ಮೊದಲಿಗರಾಗಿದ್ದೇವೆ, ಪ್ರಯತ್ನ ಪಟ್ಟಿದ್ದೇವೆ. ನಾವು ಈ ರೀತಿ ನೆರವಾಗುವಾಗ ನಾವು ಯಾವುದೇ ಪಾಸ್ ಪೋರ್ಟ್ ಬಣ್ಣ ಕೇಳುವುದಿಲ್ಲ. ನೇಪಾಳದಲ್ಲಿ ಭೂಕಂಪ ಬಂದಿತು, ಮಾಲ್ಡೀವ್ಸ್ ನಲ್ಲಿ ಇದ್ದಕ್ಕಿದ್ದಂತೆ ನೀರಿನ ಸಮಸ್ಯೆ ಎದುರಾಯಿತು, ಫಿಜಿಯಲ್ಲಿ ಸಮುದ್ರ ಬಿರುಗಾಳಿ ಎದ್ದಿತು, ಪಶ್ಚಿಮ ಏಷ್ಯಾದಲ್ಲಿ ಹಿಂಸೆಗೊಳಗಾದ ಪ್ರದೇಶದಲ್ಲಿ ಸಾವಿರಾರು ಭಾರತೀಯರನ್ನು, ವಿದೇಶಿಗರನ್ನು ಅಲ್ಲಿಂದ ಸ್ಥಳಾಂತರಗೊಳಿಸುವ ವಿಷಯವಾಗಲಿ, ಮ್ಯಾನ್ಮಾರ್ ನಲ್ಲಿ ಸೈಕ್ಲೋನ್ ನಂತರದ ಪರಿಹಾರ ಕಾರ್ಯಗಳಾಗಲಿ ಮತ್ತು ಪುನರ್ವಸತಿ ಕಲ್ಪಿಸಲು ನೆರವಾಗುವಲ್ಲಿ ನಾವು ಒಬ್ಬ ಒಳ್ಳೆಯ ನೆರೆರಾಷ್ಟ್ರದ ಕರ್ತವ್ಯವನ್ನು ನಿರ್ವಹಿಸಿದ್ದೇವೆ.

ಸ್ನೇಹಿತರೆ, ವಸುಧೈವ ಕುಟುಂಬಕಂ ಅಂದರೆ ಇಡೀ ವಿಶ್ವವೇ ಒಂದು ಕುಟುಂಬ ಎಂಬ ವಿಚಾರಧಾರೆಯು ನಮ್ಮ ಪರಂಪರೆಯಾಗಿದೆ ಮತ್ತು ಇದು ನಮ್ಮ ನರನಾಡಿಗಳಲ್ಲೇ ಇದೆ ಎಂಬುದು ನಮಗೆ ಹೆಮ್ಮೆಯ ವಿಷಯವಾಗಿದೆ. ಇಂದು ಇಡೀ ವಿಶ್ವವು ಭಾರತವನ್ನು ಮೂರನೆಯ ಮುಂದಾಳುವಿನ ರೂಪದಲ್ಲಿ ಗುರುತಿಸಲು ಆರಂಭಿಸಿದೆ. ಅಂತಾರಾಷ್ಟ್ರೀಯ ಯೋಗ ದಿವಸದ ಪ್ರಸ್ತಾಪವಾಗಲಿ ಅಥವಾ ಅಂತಾರಾಷ್ಟ್ರೀಯ ಸೌರ ಒಕ್ಕೂಟದ ಹೊಸ ಹೆಜ್ಜೆಯಾಗಲಿ ಅಥವಾ ಬ್ರಿಕ್ಸ್ ನ ಮುಂದಿನ 10 ವರ್ಷಗಳ ಸುವರ್ಣ ದಶಕದ ವಿಚಾರಧಾರೆಯಾಗಲಿ, ವಿಶ್ವಕ್ಕೆ ಭಾರತದ ಬಗ್ಗೆ ಒಂದು ಆಶಾಭಾವನೆ ಮೂಡಿದೆ.

ಸೋದರೆ ಮತ್ತು ಸೋದರಿಯರೆ, ಭಾರತವು ಈಶಾನ್ಯ ರಾಜ್ಯಗಳನ್ನು ನೈಋತ್ಯ ಏಷ್ಯಾದ ಹೆಬ್ಬಾಗಿಲು ಎಂದು ಭಾವಿಸುತ್ತದೆ. ಈ ಹೆಬ್ಬಾಗಿಲು ಮ್ಯಾನ್ಮಾರ್ ಕಡೆಯೇ ತೆರೆದುಕೊಳ್ಳುತ್ತದೆ. ಆದ್ದರಿಂದ ಭಾರತವು ಈ ಹೆಬ್ಬಾಗಿಲಿಗೆ ಸಂಪರ್ಕಿಸುವ ರಸ್ತೆಗಳನ್ನು ನಿರ್ಮಿಸಲು ವೇಗವಾಗಿ ಕೆಲಸ ಮಾಡುತ್ತಿದೆ. ಕೆಲವು ತಿಂಗಳ ಹಿಂದೆ 1600 ಕೋಟಿ ರೂಪಾಯಿಗಳ ಇಂಫಾಲ್-ಮೋರೆ ವಿಭಾಗವನ್ನು ಉನ್ನತೀಕರಿಸುವ ಕಾರ್ಯಕ್ಕೆ ನಾವು ಮಂಜೂರಾತಿ ನೀಡಿದ್ದೇವೆ. ಮೋರೆಯಲ್ಲಿ ಒಂದು ಸಂಯೋಜಿತ ಚೆಕ್ ಪೋಸ್ಟ್ ಅನ್ನು ಸಹ ನಿರ್ಮಿಸಲಾಗುತ್ತಿದೆ. ಈ ಯೋಜನೆಯ ನಂತರ ಮಣಿಪುರ ಮತ್ತು ಮ್ಯಾನ್ಮಾರ್ ನ ಮಧ್ಯೆ ವ್ಯಾಪಾರವಹಿವಾಟು ಮತ್ತು ಜನರು ಹೋಗಿಬರಲು ಸಹ ಸುಲಭವಾಗುತ್ತದೆ. ಸಿಟ್ ವೇ ಬಂದರು ಮತ್ತು ಪಾಲೆಟ್ ವಾ ಒಳನಾಡಿನ ಜಲ ಸಾರಿಗೆಯ ಕಾರ್ಯವನ್ನು ಪೂರ್ತಿಗೊಳಿಸಿ ಕಲಾಡನ್ ಯೋಜನೆಯಲ್ಲಿ ನಿರಂತರ ಮತ್ತು ಪ್ರತ್ಯಕ್ಷ ಪ್ರಗತಿಯನ್ನು ಸಾಧಿಸಲಾಗಿದೆ.

ರಸ್ತೆ ಘಟಕದ (Road component) ಕೆಲಸವೂ ಆರಂಭವಾಗಿದೆ. ಈ ಸಾರಿಗೆ ಕಾರಿಡಾರ್ (transport corridor) ಸುತ್ತಮುತ್ತಲಿನ ಪ್ರದೇಶಗಳ ಅಭಿವೃದ್ಧಿ ಕಾರಿಡಾರ್ (development corridor) ಆಗಿ ಸಹ ಬದಲಾಗುವುದರಲ್ಲಿ ನನಗೆ ಸಂದೇಹವಿಲ್ಲ, ನನಗೆ ಆ ವಿಶ್ವಾಸವಿದೆ. Upper ಮ್ಯಾನ್ಮಾರ್ ನ ಅವಶ್ಯಕತೆಗಳನ್ನು ಪೂರೈಸುವ ಸಲುವಾಗಿ ಭಾರತದಿಂದ ಅತಿ ವೇಗದ ಡೀಸೆಲ್ ಟ್ರಕ್ ಗಳನ್ನು ಕಳಿಸುತ್ತಿದ್ದೇವೆ. ನಾವು ಗಡಿ ಪ್ರವೇಶಿಸುವ ಒಪ್ಪಂದ ಮತ್ತು ಮೋಟಾರು ವಾಹನಗಳ ಒಪ್ಪಂದವನ್ನು ಮಾಡಿಕೊಂಡು power ಮತ್ತು energy trading ಗೆ ಇನ್ನಷ್ಟು ಒತ್ತು ಕೊಟ್ಟು ಪರಸ್ಪರ ಸಹಕಾರವನ್ನು ಹಲವು ಪಟ್ಟು ಹೆಚ್ಚಿಸಿಕೊಳ್ಳಲು ಬಯಸುತ್ತೇವೆ. ನಾವು ನಮ್ಮ ಅಭಿವೃದ್ಧಿ ಸಹಕಾರ ಮತ್ತು ಸಾಮರ್ಥ್ಯ ವೃದ್ಧಿ ಸಹಕಾರದ ಮೂಲಕ ಏನು ಗಳಿಸಿದ್ದೀವೊ ಅದರ ಬಗ್ಗೆ ಭಾರತಕ್ಕೆ ಹೆಮ್ಮೆಯಿದೆ.

ಭಾರತದ ರಾಜತಾಂತ್ರಿಕ ಅನುಭವಗಳನ್ನು ನಾವು ಮ್ಯಾನ್ಮಾರ್ ಜೊತೆ ಹಂಚಿಕೊಳ್ಳುತ್ತಿದ್ದೇವೆ. ಎರಡೂ ದೇಶಗಳ ಜನರ ನಡುವಿನ ಬಾಂಧವ್ಯ ಮತ್ತು ಸಾಮಾಜಿಕ ಸಾಂಸ್ಕೃತಿಕ ಸಂಬಂಧಗಳು ನಮ್ಮ ದೊಡ್ಡ ರಕ್ಷಕರಾಗಿವೆ. ಈ ಸಂಬಂಧಗಳನ್ನು ಇನ್ನಷ್ಟು ಬೆಸೆಯುವ ಸಲುವಾಗಿ ಭಾರತಕ್ಕೆ ಬರಲು ಇಚ್ಛಿಸುವ ಮ್ಯಾನ್ಮಾರ್ ನ ಎಲ್ಲ ನಾಗರಿಕರಿಗೆ, ಮ್ಯಾನ್ಮಾರ್ ನ ಎಲ್ಲ ನಾಗರಿಕರಿಗೆ ಉಚಿತ ವೀಸಾ ನೀಡಲು ನಾವು ತೀರ್ಮಾನ ಕೈಗೊಂಡಿದ್ದೇವೆ. ಈಗ ಭಾರತದ ಜೈಲುಗಳಲ್ಲಿ ಬಂಧಿಯಾಗಿರುವ ಮ್ಯಾನ್ಮಾರ್ ನ 40 ಮೀನುಗಾರರನ್ನು ಬಿಡುಗಡೆ ಮಾಡಲು ನಿರ್ಧರಿಸಿದ್ದೇವೆ. ಶ್ರೀಘ್ರದಲ್ಲೇ ಅವರು ಮ್ಯಾನ್ಮಾರ್ ಗೆ ಹಿಂತಿರುಗಿ ತಮ್ಮ ಕುಟುಂಬದವರನ್ನು ಸೇರಿಕೊಳ್ಳಬಹುದು.

ಈ ದಿನ ಬಗಾನ್ ನಲ್ಲಿ ಆನಂದ ದೇವಾಲಯಕ್ಕೆ ಭೇಟಿ ನೀಡಿದ್ದೆ. ಕಳೆದ ವರ್ಷ ಸಂಭವಿಸಿದ್ದ ಭೂಕಂಪದಿಂದಾಗಿ ಆನಂದ ದೇವಾಲಯ ಮತ್ತು ಇತರ ಐತಿಹಾಸಿಕ ಹಾಗೂ ಸಾಂಸ್ಕೃತಿಕ ಕಟ್ಟಡಗಳಿಗೆ ಹಾನಿಯಾಗಿತ್ತು. ಭಾರತದ ಸಹಕಾರದೊಂದಿಗೆ ಇವುಗಳನ್ನು ಜೀರ್ಣೋದ್ಧಾರಗೊಳಿಸಲಾಗುತ್ತಿದೆ. ಭಾರತ ಮತ್ತು ಮ್ಯಾನ್ಮಾರ್ ನಡುವೆ ಇಷ್ಟು ಐತಿಹಾಸಿಕ ಸಂಬಂಧವಿದೆ ಎನ್ನುವ ಮಾಹಿತಿಯೇ ಬಹಳ ದೊಡ್ಡ ವಿಷಯವಾಗಿದೆ. ಮುಂದಿನ ಪೀಳೆಗೆಗಳಿಗೂ ಈ ಮಾಹಿತಿ ಗೊತ್ತಿರಬೇಕು ಎಂದು ನಾನು ಭಾವಿಸುತ್ತೇನೆ. ಈ ವಿಷಯವಾಗಿ ಒಟ್ಟಾಗಿ ಸಂಶೋಧನೆಗಳನ್ನು ನಡೆಸುವ ಪ್ರಯತ್ನಗಳನ್ನು ಮಾಡಬೇಕು.

ಇಲ್ಲಿ ನಡೆದ ಮಾತುಕತೆಯಲ್ಲಿ ನಾನು ಸರ್ಕಾರದ ಎದುರು ಒಂದು ಪ್ರಸ್ತಾಪವನ್ನು ಇಟ್ಟಿದ್ದೇನೆ. INA ಮೆಮೊರಿಯಲ್ ಸಮೀಕ್ಷೆಯನ್ನು ನಾವು ಜೊತೆಯಾಗಿ ಮಾಡಬಹುದು. ಒಂದು ಜಂಟಿ ಐತಿಹಾಸಿಕ ಯೋಜನೆಯನ್ನು ಆರಂಭಿಸಿದರೆ ಎರಡೂ ದೇಶಗಳ ಜನರ ನಡುವಿನ ಬಾಂಧವ್ಯ ಇನ್ನಷ್ಟು ಗಟ್ಟಿಯಾಗುತ್ತದೆ.

ನಾವು ನ್ಯಾಷನಲ್ ರಿಜಿಸ್ಟ್ರೇಷನ್ ಕಾರ್ಡ್ ಆಧಾರದ ಮೇಲೆ OCI ಕೊಡುವ ನಿರ್ಧಾರ ಮಾಡಿದ್ದೇವೆ. ಎರಡೂ ದೇಶಗಳ ನಡುವಿನ ಸಾಂಸ್ಕೃತಿಕ ಸಂಬಂಧಗಳನ್ನು ಮತ್ತಷ್ಟು ದೃಢಗೊಳಿಸಲು ಇಂಡಿಯನ್ ಕೌನ್ಸಿಲ್ ಫಾರ್ ಕಲ್ಚರಲ್ ರಿಲೇಶನ್ಸ್ ನ ವಿದ್ಯಾರ್ಥಿ ವೇತನಗಳ ಸಂಖ್ಯೆಯನ್ನು ಹೆಚ್ಚಿಸುವ ನಿರ್ಧಾರನ್ನು ಸಹ ಭಾರತ ಸರ್ಕಾರವು ತೆಗೆದುಕೊಂಡಿದೆ.

ಸ್ನೇಹಿತರೆ, ಭಾರತ ಮತ್ತು ಮ್ಯಾನ್ಮಾರ್ ನ ಸಂಬಂಧಗಳಿಗೆ 5B, 5B ಆಧಾರವಾಗಿವೆ ಎಂದು ನಾನು ಓದಿದ್ದೇನೆ. ಅಂದರೆ Buddhism, Business, Bollywood, Bharatanatyam ಮತ್ತು Burma Teak. ಆದರೆ ಇವುಗಳಲ್ಲಿ ಎಲ್ಲಕ್ಕಿಂತ ಮುಖ್ಯವಾದ B ಬಿಟ್ಟು ಹೋಗಿದೆ. ಈ B ಏನೆಂದರೆ ಭರವಸೆ, ಭಾರತ ಮತ್ತು ಮ್ಯಾನ್ಮಾರ್ ಗಳ ನಡುವಿನ ಪರಸ್ಪರ ಭರವಸೆ. ಈ ಭರವಸೆಯ ಬುನಾದಿಯು ನೂರಾರು ವರ್ಷಗಳಿಂದ ದೃಢವಾಗಿದೆ ಮತ್ತು ಕಾಲ ಕಳೆದಂತೆ ಮತ್ತಷ್ಟು ದೃಢವಾಗುತ್ತ ಹೋಗುತ್ತಿದೆ.

ಸೋದರ ಮತ್ತು ಸೋದರಿಯರೆ, ಎಲ್ಲರ ಜೊತೆ ಎಲ್ಲರ ಪ್ರಗತಿ ಎಂಬ ಮಂತ್ರದ ಆಧಾರದ ಮೇಲೆ ನಮ್ಮ ಸರ್ಕಾರವು ನಡೆಯುತ್ತಿದೆ, ಅದು ಗಡಿಗಳಲ್ಲಿ ಬಂಧಿಯಾಗಿಲ್ಲ. ಎಲ್ಲರ ಜೊತೆ ಅಂದರೆ ಪ್ರತಿಯೊಂದು ದೇಶದ ಜೊತೆಗೆ, ಎಲ್ಲರ ಪ್ರಗತಿ ಅಂದರೆ ಪ್ರತಿಯೊಂದು ದೇಶದ ಪ್ರಗತಿ ಎಂದಾಗುತ್ತದೆ. ಪ್ರಗತಿಯ ಕಾರ್ಯಗಳಲ್ಲಿ ಭಾರತವು ಜೊತೆಜೊತೆಯಾಗಿ ನಡೆಯಲು ಸಂಪೂರ್ಣವಾಗಿ ಬದ್ಧವಾಗಿದೆ.

ನೀವು ನೀಡಿದ ಆಶೀರ್ವಾದಕ್ಕಾಗಿ ನಾನು ಮತ್ತೊಮ್ಮೆ ನಿಮಗೆ ನಮಿಸುತ್ತೇನೆ. ನಿಮ್ಮನ್ನು ನೋಡುವ ಸೌಭಾಗ್ಯ ಸಿಕ್ಕಿತು, ನಿಮಗೆಲ್ಲರಿಗೂ ಬಹಳ ಬಹಳ ಧನ್ಯವಾದಗಳು. ಇಷ್ಟು ದೊಡ್ಡ ಸಂಖ್ಯೆಯಲ್ಲಿ ನೀವು ಬಂದಿದ್ದೀರಿ, ದೇಶದ ಮಾತುಗಳನ್ನು ಕೇಳಲು, ದೇಶದ ಮೇಲಿನ ಸೆಳೆತದಿಂದಾಗಿ, ದೇಶದ ಜೊತೆ ಇರುವ ಇಚ್ಛೆಯಿಂದ ಇಷ್ಟೊಂದು ಸಂಖ್ಯೆಯಲ್ಲಿ ಬಂದಿದ್ದೀರಿ. ನಾನು ಮತ್ತೊಮ್ಮೆ ನಿಮಗೆ ಹೃದಯಪೂರ್ವಕವಾಗಿ ಆಭಾರಿಯಾಗಿದ್ದೇನೆ. ಈ ಮಣ್ಣಿಗೆ ನಮಿಸುತ್ತೇನೆ, ನಿಮ್ಮೆಲ್ಲರಿಗೂ ನಮಿಸುತ್ತೇನೆ. ಬಹಳ ಬಹಳ ಧನ್ಯವಾದಗಳು.