ಪಿಎಂಇಂಡಿಯಾ

ಪ್ರಧಾನಮಂತ್ರಿ ಶ್ರೀ. ನರೇಂದ್ರ ಮೋದಿ ಅವರ ಅಧ್ಯಕ್ಷತೆಯಲ್ಲಿ ನಡೆದ ಕೇಂದ್ರ ಸಚಿವ ಸಂಪುಟ ಸಭೆ, ಭಾರತ ಮತ್ತು ಜಾರ್ಜಿಯಾ ನಡುವೆ ವಾಯು ಯಾನ ಸೇವೆಗಳ ಒಪ್ಪಂದ (ಎ.ಎಸ್.ಎ.)ಕ್ಕೆ ಅಂಕಿತ ಹಾಕಲು ತನ್ನ ಅನುಮೋದನೆ ನೀಡಿದೆ.

ಎರಡೂ ದೇಶಗಳ ನಡುವಿನ ಈ ಒಪ್ಪಂದವು ಎರಡೂ ದೇಶಗಳ ನಡುವೆ ವಾಯು ಯಾನ ಸಂಪರ್ಕ ಸುಧಾರಿಸಲು ಮತ್ತು ನಾಗರಿಕ ವಿಮಾನಯಾನ ವಲಯದಲ್ಲಿ ಆಗಿರುವ ಬೆಳವಣಿಗೆಗಳನ್ನು ಗಮನದಲ್ಲಿಟ್ಟುಕೊಂಡ ಇತ್ತೀಚಿನ ಅಂತಾರಾಷ್ಟ್ರೀಯ ನಾಗರಿಕ ವಾಯುಯಾನ ಸಂಘಟನೆ (ಐ.ಸಿ.ಎ.ಓ) ಮಾದರಿಗೆ ಅನುಗುಣವಾಗಿದೆ. ಪ್ರಸ್ತುತ ಈ ಎರಡೂ ರಾಷ್ಟ್ರಗಳ ನಡುವೆ ಯಾವುದೇ ವಾಯು ಸೇವೆ ಒಪ್ಪಂದ ಇರುವುದಿಲ್ಲ. ಎ.ಎಸ್.ಎ. ಎರಡೂ ದೇಶಗಳ ಯಾವುದೇ ವಾಯು ಸೇವಾ ಕಾರ್ಯಾಚರಣೆದಾರರಿಗೆ ಮೂಲ ಕಾನೂನು ಚೌಕಟ್ಟಾಗಿದೆ.
ಈ ಎರಡು ರಾಷ್ಟ್ರಗಳ ನಡುವೆ ವಾಯು ಸಂಪರ್ಕ ಸ್ಥಾಪಿಸಲು ಈ ಒಪ್ಪಂದವು ನೆರವಾಗಲಿದೆ.

ವಾಯು ಸೇವೆಗಳ ಒಪ್ಪಂದದ ಮುಖ್ಯಾಂಶಗಳು ಈ ಕೆಳಗಿನಂತಿವೆ: 

i. ಎರಡೂ ದೇಶಗಳು ಒಂದು ಅಥವಾ ಅದಕ್ಕಿಂತ ಹೆಚ್ಚು ಏರ್ ಲೈನ್ಸ್ ಗಳನ್ನು ನಿಯುಕ್ತಿಗೊಳಿಸಲು ಅರ್ಹವಾಗಿರುತ್ತವೆ.

1. ಈಗ ಭಾರತದ ವಾಯು ಯಾನ ಸಂಸ್ಥೆಗಳು ಜಾರ್ಜಿಯಾದ ಯಾವುದೇ ಸ್ಥಳದಿಂದ ಭಾರತದ ಯಾವುದೇ ಸ್ಥಳಕ್ಕೆ ಕಾರ್ಯಾಚರಣೆ ಮಾಡಬಹುದಾಗಿದೆ. ಅದೇ ರೀತಿ, ಜಾರ್ಜಿಯಾದ ವಿಮಾನ ಯಾನ ಸಂಸ್ಥೆಗಳು ಭಾರತದ ದೆಹಲಿ, ಮುಂಬೈ, ಬೆಂಗಳೂರು, ಹೈದ್ರಾಬಾದ್, ಚೆನ್ನೈ ಮತ್ತು ಗೋವಾ ಸೇರಿ ಆರು ಸ್ಥಳಗಳಿಗೆ ನೇರವಾಗಿ ಹಾರಾಟ ನಡೆಸಬಹುದಾಗಿದೆ. ಇದರ ಜೊತೆಗೆ ಮಾರ್ಗಗಳ ನಮ್ಯತೆ ಮೂಲಕ ಯಾವುದೇ ಮಧ್ಯಂತರ ಸ್ಥಳ ಅಥವಾ ಅದರಾಚೆಯ ಸ್ಥಳಕ್ಕೂ ಎರಡೂ ಕಡೆಯ ನಿಯೋಜಿತ ಸಂಸ್ಥೆಗಳು ಸೇವೆ ಒದಗಿಸಬಹುದಾಗಿದೆ.

iii. ಎರಡೂ ದೇಶಗಳ ನಿಯೋಜಿತ ವಿಮಾನಯಾನ ಸಂಸ್ಥೆಗಳು ಮತ್ತೊಂದು ರಾಷ್ಟ್ರದ ಎಲ್ಲೆಯಲ್ಲಿ ತಮ್ಮ ಕಚೇರಿ ಸ್ಥಾಪಿಸಿ  ತಮ್ಮ ವಾಯುಯಾನ ಸೇವೆಯ ಮಾರಾಟ ಮತ್ತು ಪ್ರಚಾರ ಮಾಡಬಹುದಾಗಿದೆ.

1. ಪ್ರತಿ ರಾಷ್ಟ್ರದ ನಿಯೋಜಿತ ವಿಮಾನಯಾನ ಸಂಸ್ಥೆಗಳು ಅದೇ ರಾಷ್ಟ್ರದ ಅಥವಾ ಮತ್ತೊಂದು ರಾಷ್ಟ್ರದ ಹಾಗೂ ಮೂರನೇ ವ್ಯಕ್ತಿಯೊಂದಿಗೆ ಸಹಕಾರ ಮಾರುಕಟ್ಟೆ ಒಪ್ಪಂದ ಮಾಡಿಕೊಳ್ಳಬಹುದಾಗಿದೆ. ಈ ನಿಟ್ಟಿನಲ್ಲಿ, ಇದು ನೇರ ವಾಯು ಸಂಪರ್ಕದ ಜೊತೆಗೆ ಮೂರನೇ ರಾಷ್ಟ್ರದ ವಾಯುಯಾನ ಸಂಸ್ಥೆಯೊಂದಿಗಿನ ಸಂಪರ್ಕಕ್ಕೂ ಅವಕಾಶ ಮಾಡಿಕೊಡುತ್ತದೆ. ಇದು ಎರಡೂ ರಾಷ್ಟ್ರಗಳ ವಾಯುಯಾನ ಸಂಸ್ಥೆಗಳಿಗೆ ಕಾರ್ಯಸಾಧ್ಯ ಅವಕಾಶ ನೀಡುತ್ತದೆ.

ಭಾರತ ಮತ್ತು ಜಾರ್ಜಿಯಾ ನಡುವಿನ ವಾಯು ಯಾನ ಒಪ್ಪಂದವು ನಾಗರಿಕ ವಿಮಾನಯಾನ ವಲಯದ ಅಭಿವೃದ್ಧಿಯೊಂದಿಗೆ ಎರಡೂ ರಾಷ್ಟ್ರಗಳ ನಡುವೆ ಹೆಚ್ಚಿನ ವಾಣಿಜ್ಯ, ಹೂಡಿಕೆ, ಪ್ರವಾಸೋದ್ಯಮ ಮತ್ತು ಸಾಂಸ್ಕೃತಿಕ ವಿನಿಮಯದ ಸಾಮರ್ಥ್ಯ ಬಳಕೆಗೆ ಅವಕಾಶ ನೀಡುತ್ತದೆ. ಇದು ಹೆಚ್ಚಿನ ಮತ್ತು ತಡೆಹರಿತ ಸಂಪರ್ಕಕ್ಕೆ ಅವಕಾಶ ನೀಡುವುದರ ಜೊತೆಗೆ, ಎರಡೂ ರಾಷ್ಟ್ರಗಳ ವಾಯುಯಾನ ಸಂಸ್ಥೆಗಳಿಗೆ ಸುರಕ್ಷತೆ ಮತ್ತು ಭದ್ರತೆಯ ಖಾತ್ರಿಯೊಂದಿಗೆ ವಾಣಿಜ್ಯ ಅವಕಾಶಗಳನ್ನೂ ಒದಗಿಸುತ್ತದೆ.
******

AKT/VBA/SH