પીએમઇન્ડિયા

મહામહિમ,

હું તમારો હૃદયપૂર્વક આભાર વ્યક્ત કરું છું અને હું જીલ બિડેનનો પણ હૃદયપૂર્વક આભાર વ્યક્ત કરું છું. તમે જે રીતે મારું અને અમારા પ્રતિનિધિમંડળનું ઉષ્માભર્યું સ્વાગત કર્યું, તેના માટે હું તમારો આભાર વ્યક્ત કરું છું અને એ પણ કારણ કે આજે તમે ભારતીય સમુદાય માટે વ્હાઇટ હાઉસના દરવાજા ખોલ્યા અને હજારો ભારતીયો અમેરિકા અને ભારત વચ્ચેના ભાવિ વ્યૂહાત્મક સંબંધોના સાક્ષી બનવા અમારી વચ્ચે હતા.

મહામહિમ,

તમે હંમેશા ભારતના શુભચિંતક રહ્યા છો અને જ્યારે પણ અને જ્યાં પણ તમને તક મળી છે, તમે હંમેશા ભારત-અમેરિકા સંબંધોના મહત્વ પર ખૂબ ભાર મૂક્યો છે. અને મને હજુ પણ યાદ છે કે 8 વર્ષ પહેલા, યુ.એસ.-ઈન્ડિયા બિઝનેસ કાઉન્સિલને સંબોધિત કરતી વખતે, તમે એક ખૂબ જ મહત્વપૂર્ણ વાત કહી હતી. તમે કહ્યું – “અમારું લક્ષ્ય ભારતનું શ્રેષ્ઠ મિત્ર બનવાનું છે.” તમારા આ શબ્દો આજે પણ ગુંજી રહ્યા છે. ભારત પ્રત્યેની તમારી અંગત પ્રતિબદ્ધતા અમને ઘણા સાહસિક અને મહત્વાકાંક્ષી પગલાં ભરવા માટે પ્રેરિત કરે છે.

આજે ભારત અને અમેરિકા અંતરિક્ષની ઊંચાઈઓથી લઈને મહાસાગરની ઊંડાઈ સુધી, પ્રાચીન સંસ્કૃતિથી લઈને આર્ટિફિશિયલ ઈન્ટેલિજન્સ સુધી દરેક મોરચે ખભે ખભા મિલાવીને ચાલી રહ્યા છે.

જ્યારે રાજદ્વારી દૃષ્ટિકોણથી કોઈપણ બે દેશો વચ્ચેના સંબંધોની વાત આવે છે, ત્યારે તે સામાન્ય રીતે ઔપચારિક સંયુક્ત નિવેદનો, કાર્યકારી જૂથો અને એમઓયુ વિશે હોય છે. ખરેખર, તેનું પોતાનું મહત્વ છે પરંતુ ભારત અને અમેરિકા વચ્ચેના સંબંધોને આગળ વધારનાર વાસ્તવિક એન્જિન આપણા લોકો વચ્ચેના મજબૂત સંબંધો છે. અને અમે વ્હાઇટ હાઉસના લૉન પર આ એન્જિનની જોરથી ગર્જના સાંભળી.

મહામહિમ,

તમે જે કહ્યું તે હું પુનરાવર્તિત કરવા માંગુ છું. આજના ઝડપથી બદલાતા વૈશ્વિક માહોલમાં દરેકની નજર વિશ્વના બે સૌથી મોટા લોકતાંત્રિક દેશો એટલે કે ભારત અને અમેરિકા પર છે. હું માનું છું કે વૈશ્વિક શાંતિ અને સ્થિરતા તેમજ માનવજાતના કલ્યાણ માટે લોકતાંત્રિક મૂલ્યોમાં વિશ્વાસ રાખતી તમામ શક્તિઓ માટે અમારી વ્યૂહાત્મક ભાગીદારી ખૂબ જ નિર્ણાયક અને પહેલા કરતાં વધુ મહત્વપૂર્ણ છે.

મને ખાતરી છે કે સાથે મળીને આપણે આખી દુનિયાની ક્ષમતા વધારવામાં ચોક્કસપણે સફળ થઈશું.

આજે આપણી વાતચીત દરમિયાન, આપણે આવા ઘણા મુદ્દાઓ પર ચર્ચા કરીશું અને આપણા વ્યૂહાત્મક સંબંધોમાં એક નવું પરિમાણ ઉમેરીશું. આપણી મિત્રતા માટે હું ફરી એકવાર તમારો હૃદયપૂર્વક આભાર વ્યક્ત કરું છું.

YP/GP/JD