પીએમઇન્ડિયા

મહામહિમ રાષ્ટ્રપતિ સિસિ,

બંને દેશોના મંત્રીઓ અને પ્રતિનિધિઓ

મીડિયાના મિત્રો,

શરૂઆતમાં, હું રાષ્ટ્રપતિ સિસિ અને તેમના પ્રતિનિધિમંડળનું ભારતમાં ઉષ્માભર્યું સ્વાગત કરવા માંગુ છું. રાષ્ટ્રપતિ સિસિ આવતીકાલે આપણા ગણતંત્ર દિવસની ઉજવણીમાં મુખ્ય અતિથિ તરીકે હાજરી આપી રહ્યા છે. આ સમગ્ર ભારત માટે ગૌરવ અને આનંદની વાત છે. મને એ વાતની પણ ખુશી છે કે ઇજિપ્તની એક સૈન્ય ટુકડી પણ આપણી પ્રજાસત્તાક દિવસની પરેડમાં ભાગ લઈ રહી છે અને તેનું ગૌરવ વધારી રહી છે.

મિત્રો,

ભારત અને ઇજિપ્ત વિશ્વની સૌથી જૂની સંસ્કૃતિઓમાં સામેલ છે. હજારો વર્ષોથી અમારો સતત સંબંધ છે. ચાર હજાર વર્ષ પહેલાં ઇજિપ્ત સાથેનો વેપાર ગુજરાતના લોથલ બંદર દ્વારા થતો હતો. અને વિશ્વમાં વિવિધ ફેરફારો હોવા છતાં, અમારા સંબંધો સ્થિર રહ્યા છે, અને અમારો સહયોગ સતત મજબૂત થયો છે.

છેલ્લા કેટલાક વર્ષોમાં અમારો સહયોગ વધુ ગાઢ બન્યો છે. અને આ માટે હું મારા મિત્ર રાષ્ટ્રપતિ સિસિના સક્ષમ નેતૃત્વને ખૂબ જ શ્રેય આપવા માંગુ છું.

આ વર્ષે ભારતે તેના G-20 પ્રેસિડેન્સી દરમિયાન ઇજિપ્તને અતિથિ દેશ તરીકે આમંત્રણ આપ્યું છે, જે અમારી વિશેષ મિત્રતાને દર્શાવે છે.

મિત્રો,

અરબી સમુદ્રની એક તરફ ભારત છે અને બીજી બાજુ ઇજિપ્ત છે. બંને દેશો વચ્ચે વ્યૂહાત્મક સહયોગ સમગ્ર ક્ષેત્રમાં શાંતિ અને સમૃદ્ધિને પ્રોત્સાહન આપવામાં મદદ કરશે. તેથી આજની મીટિંગમાં, રાષ્ટ્રપતિ સિસિ અને મેં અમારી દ્વિપક્ષીય ભાગીદારીને “વ્યૂહાત્મક ભાગીદારી”ના સ્તરે ઉન્નત કરવાનો નિર્ણય કર્યો. અમે નક્કી કર્યું છે કે ભારત-ઇજિપ્ત વ્યૂહાત્મક ભાગીદારી હેઠળ, અમે રાજકીય, સુરક્ષા, આર્થિક અને વૈજ્ઞાનિક ક્ષેત્રોમાં વધુ સહકારનું લાંબા ગાળાનું માળખું વિકસાવીશું.

ભારત અને ઈજિપ્ત વિશ્વભરમાં થઈ રહેલા આતંકવાદના ફેલાવાને લઈને ચિંતિત છે. અમે એકમત છીએ કે આતંકવાદ માનવતા માટે સૌથી ગંભીર સુરક્ષા ખતરો છે. બંને દેશો એ વાત પર પણ સહમત છે કે સરહદ પારના આતંકવાદને ખતમ કરવા માટે સંયુક્ત કાર્યવાહી જરૂરી છે. અને આ માટે અમે સાથે મળીને આંતરરાષ્ટ્રીય સમુદાયને એલર્ટ કરવાનો પ્રયાસ ચાલુ રાખીશું.

અમારી વચ્ચે સુરક્ષા અને સંરક્ષણ સહયોગ વધારવાની પણ અપાર સંભાવનાઓ છે. છેલ્લા કેટલાક વર્ષોમાં, અમારી સેનાઓ વચ્ચે સંયુક્ત કવાયત તાલીમ અને ક્ષમતા નિર્માણમાં નોંધપાત્ર વધારો થયો છે. અમે આજની બેઠકમાં અમારા સંરક્ષણ ઉદ્યોગો વચ્ચેના સહયોગને વધુ મજબૂત બનાવવા અને આતંકવાદ વિરોધી સંબંધિત માહિતી અને ગુપ્ત માહિતીના આદાન-પ્રદાનને વધારવાનો પણ નિર્ણય લીધો છે.

ઉગ્રવાદી વિચારધારાઓ અને કટ્ટરપંથી ફેલાવવા માટે સાયબર સ્પેસનો દુરુપયોગ એ વધતો જોખમ છે. અમે તેની સામે પણ સહકાર આપીશું.

મિત્રો,

અમે કોવિડ રોગચાળા દરમિયાન હેલ્થકેર ઇન્ફ્રાસ્ટ્રક્ચર અને વૈશ્વિક પુરવઠા શૃંખલા પરની પ્રતિકૂળ અસરોને નજીકથી નિહાળી છે. રાષ્ટ્રપતિ સિસી અને હું આ પડકારજનક સમયગાળા દરમિયાન નજીકના સંપર્કમાં રહ્યા છીએ અને બંને દેશોએ જરૂરિયાતના સમયે એકબીજાને તાત્કાલિક સહાય મોકલી છે.

આજે, અમે કોવિડ અને યુક્રેન સંઘર્ષથી પ્રભાવિત ખાદ્ય અને ફાર્મા સપ્લાય ચેઇનને મજબૂત કરવા પર વ્યાપક ચર્ચાઓ કરી છે. અમે આ ક્ષેત્રોમાં પરસ્પર રોકાણ અને વેપાર વધારવાની જરૂરિયાત પર પણ સહમત થયા છીએ. અમે સાથે મળીને નક્કી કર્યું છે કે આગામી પાંચ વર્ષમાં અમે અમારા દ્વિપક્ષીય વેપારને 12 બિલિયન ડૉલર સુધી લઈ જઈશું.

મિત્રો,

અમે સફળતાપૂર્વક COP-27નું આયોજન કરવા માટે અને આબોહવા ક્ષેત્રમાં વિકાસશીલ દેશોના હિતોને સુનિશ્ચિત કરવાના પ્રયાસો માટે ઇજિપ્તની પ્રશંસા કરીએ છીએ.

સંયુક્ત રાષ્ટ્ર અને અન્ય આંતરરાષ્ટ્રીય મંચોમાં ભારત અને ઇજિપ્ત વચ્ચે લાંબા સમયથી અને ઉત્તમ સહયોગ રહ્યો છે. અમે બંને આંતરરાષ્ટ્રીય વિવાદોના ઉકેલ માટે મુત્સદ્દીગીરી અને સંવાદની જરૂરિયાત પર સહમત છીએ.

મહામહિમ,

હું ફરી એકવાર તમારું અને તમારા પ્રતિનિધિમંડળનું ભારતમાં હાર્દિક સ્વાગત કરું છું. હું તમને અને ઇજિપ્તના લોકોને પણ નવા વર્ષની ખૂબ ખૂબ શુભેચ્છા પાઠવું છું.

ખૂબ ખૂબ આભાર!

YP/GP/JD