পি এম ইণ্ডিয়া

যুৱ বন্ধুসকল,

সঁচাকৈয়ে আপোনালোক সকলো উদ্ভাৱকক লগ পাই, কথা পাতি মোৰ বহুত ভাল লাগিছে৷ আপোনালোকে এনে কেতবোৰ নতুন নতুন বিষয় চুই গৈছে, আপোনালোকৰ দৰে যুৱক-যুৱতীসকলে নিজৰ কাম-কাজত যি নতুনত্ব আনিছে, যি আত্মবিশ্বাসেৰে আপোনালোকে নিজৰ কাম কৰিছে, সেইবোৰে মোৰ দৰে বহু লোকক কিবা নহয় কিবা এটা নতুন কৰাৰ বাবে প্ৰেৰণা যোগায়৷ এক কথাত আপোনালোক প্ৰেৰণাৰ উৎস, সেয়েহে মই আপোনালোক সকলোকে অভিনন্দন জনাইছো৷

স্মাৰ্ট ইণ্ডিয়া হেকাথন জনসাধাৰণৰ অংশগ্ৰহণৰ এক বৃহৎ নিদৰ্শন হৈ পৰিছে৷ আৰু বন্ধুসকল, এইবাৰৰ স্মাৰ্ট ইণ্ডিয়া হেকাথন কেইবাটাও দিশত অতি গুৰুত্বপূৰ্ণ। এতিয়াৰ পৰা কিছুদিন আগতে আমি স্বাধীনতাৰ ৭৫বছৰ সম্পূৰ্ণ কৰিলো। স্বাধীনতাৰ ১০০ বছৰৰ পাছত আমাৰ দেশ কেনেকুৱা হ’ব সেই সন্দৰ্ভত দেশে ডাঙৰ ডাঙৰ সংকল্পৰ কাম কৰি আছে। এই সংকল্পসমূহ পূৰণৰ বাবে আপোনালোকেই হৈছে ইয়াৰ ‘জয় অনুসন্ধান’ শ্লোগানৰ ধ্বজাবাহী উদ্ভাৱক।

অমৃতকালৰ এই ২৫ বছৰীয়া সময়ছোৱাই আপোনালোকৰ বাবে কঢ়িয়াই আনিছে অভূতপূৰ্ব সম্ভাৱনা। এই সম্ভাৱনা আৰু এই সংকল্পসমূহো আপোনাৰ কেৰিয়াৰ বৃদ্ধিৰ সৈতে প্ৰত্যক্ষভাৱে জড়িত। অহা ২৫ বছৰত আপোনালোকৰ দৰে যুৱক-যুৱতীসকলৰ সফলতাই ভাৰতৰ সফলতা নিৰ্ণয় কৰিব। সেইবাবেই আপোনালোক সকলোৰে প্ৰতি মই অতি বিশ্বাসী হৈ আছো। ভাৰতবাসীয়ে আপোনালোকক লৈ গৌৰৱান্বিত। আপোনালোক সকলোৰে অভিনৱ মানসিকতাই আগন্তুক ২৫ বছৰত ভাৰতক শীৰ্ষ পৰ্যায়ত উপনীত কৰাব। আপোনালোক সকলোৰে ওপৰত মোৰ দৃঢ় বিশ্বাস আছে।

বন্ধুসকল,

এইবাৰ ১৫ আগষ্টত লালকিল্লাৰ পৰা কৈছো যে আজি ভাৰতত কিমান ডাঙৰ আকাংক্ষিত সমাজ গঢ় লৈ উঠিছে, সম্প্ৰসাৰণ ঘটিছে। এই আকাংক্ষিত সমাজখনে এই অমৃতকালত চালিকা শক্তিৰ দৰে কাম কৰিব। ইয়াৰ আশা, ইয়াৰ আকাংক্ষা, ইয়াৰ লগত জড়িত প্ৰত্যাহ্বান ইত্যাদিয়ে আপোনালোকৰ বাবে বহু নতুন সুযোগ কঢ়িয়াই আনিব।

বন্ধুসকল,

আপোনালোক সকলোৱে নিশ্চয় শিক্ষাৰ প্ৰাৰম্ভিক পৰ্যায়ত পঢ়িছে যে সেউজ বিপ্লৱ ৬০-৭০ৰ দশকত সংঘটিত হৈছিল। ভাৰতৰ কৃষকসকলে নিজৰ সামৰ্থ্য প্ৰদৰ্শন কৰি খাদ্যৰ ক্ষেত্ৰত আমাক স্বাৱলম্বী কৰি তুলিলে। কিন্তু আপোনালোকে দেখিছে যে যোৱা ৭-৮ বছৰত ইটোৰ পিছত সিটো বিপ্লৱৰ জৰিয়তে দেশখনে দ্ৰুতগতিত আগবাঢ়িছে।

ভাৰতত বৰ্তমান এক আন্তঃগাঁথনি বিপ্লৱ হৈছে। ভাৰতত বৰ্তমান স্বাস্থ্য খণ্ডৰ বিপ্লৱ হৈছে। ভাৰতত বৰ্তমান ডিজিটেল বিপ্লৱ হৈছে। বৰ্তমান ভাৰতত প্ৰযুক্তি বিপ্লৱ হ’ব ধৰিছে। ভাৰতত বৰ্তমান প্ৰতিভা বিপ্লৱ চলি আছে। কৃষি খণ্ডই হওক, শিক্ষা খণ্ডই হওক, প্ৰতিৰক্ষা খণ্ডই হওক, বৰ্তমান দেশৰ গুৰুত্ব প্ৰতিটো খণ্ডক আধুনিকীকৰণ কৰা হৈছে৷ ই প্ৰতিটো খণ্ডক আত্মনিৰ্ভৰশীল কৰি তুলিছে। আৰু সেইবাবেই আপোনালোক সকলো যুৱক-যুৱতীৰ বাবে ভাৰতত প্ৰতিদিনে নতুন নতুন সুযোগৰ সৃষ্টি হৈছে।

ড্ৰোণ প্ৰযুক্তি, টেলি-কনচালটেচন, ডিজিটেল প্ৰতিষ্ঠান, ভাৰ্চুৱেল সমাধান, এই সকলোবোৰত আপোনালোকৰ বাবে সেৱাৰ পৰা আৰম্ভ কৰি উৎপাদনলৈকে বহু সম্ভাৱনা আছে। আপোনাকৰ দৰে যুৱক-যুৱতীসকলে কৃষি আৰু স্বাস্থ্য খণ্ডত ড্ৰোণ প্ৰযুক্তিৰ ব্যৱহাৰক প্ৰসাৰিত কৰাৰ বাবে উদ্ভাৱনীমূলক সমাধানৰ ওপৰত কাম কৰিব পাৰে। আমাৰ জলসিঞ্চনৰ সঁজুলি, জলসিঞ্চনৰ নেটৱৰ্ক কেনেকৈ স্মাৰ্ট কৰি তুলিব পাৰি তাৰো বহু সম্ভাৱনা আছে।

বন্ধুসকল,

বৰ্তমান দেশৰ প্ৰতিখন গাঁৱতে অপটিকেল ফাইবাৰ স্থাপনৰ কাম দ্ৰুত গতিত চলি আছে। আপোনালোকেও দেখিছে যে এতিয়া ভাৰতত ৫জি মুকলি কৰা হৈছে। এই দশকৰ শেষলৈকে আমি ৬জি মুকলি কৰাৰ প্ৰস্তুতি চলাইছো। গেমিং আৰু মনোৰঞ্জনৰ ক্ষেত্ৰতো চৰকাৰে ভাৰতীয় সমাধানক উৎসাহিত কৰিছে। চৰকাৰে যিদৰে এই সকলোবোৰ নতুন খণ্ডত বিনিয়োগ কৰিছে, যিদৰে তেওঁলোকক উৎসাহিত কৰিছে, আপোনালোক সকলো যুৱক-যুৱতীয়ে ইয়াৰ সুবিধা ল’ব লাগিব৷

বন্ধুসকল,

আপোনালোকে এই কথা মনত ৰাখিব লাগিব৷ বিশ্বত এক বিশাল জনসংখ্যা আছে যাৰ সমস্যা ভাৰতৰ দৰেই। কিন্তু সেই সমস্যাসমূহৰ সৈতে মোকাবিলা কৰিবলৈ উদ্ভাৱন আৰু ষ্টাৰ্ট-আপসমূহৰ বাবে সীমিত সুযোগ আছে। ভাৰতৰ উদ্ভাৱনসমূহে বিশ্বৰ ভিতৰতে আটাইতকৈ প্ৰতিযোগিতামূলক, সুলভ, বহনক্ষম, সুৰক্ষিত আৰু বৃহৎ পৰিসৰৰ ৰূপায়ণ সমাধান দিয়ে। সেইবাবেই ভাৰতৰ পৰা, আপোনালোকৰ দৰে যুৱক-যুৱতীৰ পৰা বিশ্বই আশা কৰিছে।

বন্ধুসকল,

আজিৰ কাৰ্যসূচীত আমাৰ সৈতে শিক্ষাৰ দিগ্গজ, নীতি নিৰ্ধাৰকসকল যোগ দিছে। ভাৰতত উদ্ভাৱনৰ সংস্কৃতি বৃদ্ধি কৰিবলৈ হ’লে আমি দুটা কথাত অহৰহ মনোযোগ দিব লাগিব৷ সামাজিক সমৰ্থন আৰু প্ৰতিষ্ঠানিক সমৰ্থন। আজি আমি দেখিবলৈ পাইছো যে উদ্ভাৱন আৰু উদ্যোগৰ সন্দৰ্ভত সমাজত পৰিৱৰ্তন পৰিলক্ষিত হৈছে। কেৰিয়াৰ গঢ়ি তোলাৰ পৰম্পৰাগত বিকল্পৰ উপৰি আমি নতুন নতুন ক্ষেত্ৰতো হাত আগবঢ়াবলৈ চেষ্টা চলাইছো। অৰ্থাৎ সমাজত এক বৃত্তি হিচাপে উদ্ভাৱন, ইয়াৰ গ্ৰহণযোগ্যতা বাঢ়িছে। এনে অৱস্থাত আমি নতুন ধাৰণা আৰু মৌলিক চিন্তাধাৰাক গ্ৰহণযোগ্যতা আৰু সন্মান দিব লাগিব। পদ্ধতিলৈকে গৱেষণা আৰু উদ্ভাৱনক কাম কৰাৰ ধৰণৰ পৰা জীৱন-যাপনৰ আহিলা হিচাপে গঢ় দিব লাগিব।

বন্ধুসকল,

গৱেষণা আৰু উদ্ভাৱনৰ দিশত প্ৰতিষ্ঠানিক সমৰ্থন বৃদ্ধিৰ বাবে চৰকাৰে অহৰহ কাম কৰি আছে। নতুন ৰাষ্ট্ৰীয় শিক্ষা নীতিত উদ্ভাৱনৰ এক শক্তিশালী ভেটি গঢ়ি তোলাৰ ৰোডমেপ আছে। অটল ইনকিউবেচন মিছনৰ অধীনত স্থাপন কৰা অটল টিংকাৰিং লেবসমূহে বিদ্যালয়সমূহত নতুন প্ৰজন্মৰ উদ্ভাৱকক প্ৰস্তুত কৰি তুলিছে। আই-ক্ৰিয়েটৰ দৰে সংস্থাসমূহেও দেশত সফলতাৰে কাম কৰি আছে, যিয়ে এতিয়ালৈকে পাঁচ শতাধিক ষ্টাৰ্টআপক সহায় কৰিছে।

বন্ধুসকল,

একবিংশ শতিকাৰ আজিৰ ভাৰতে নিজৰ যুৱপ্ৰজন্মৰ প্ৰতি পূৰ্ণ আস্থা লৈ অগ্ৰসৰ হৈছে। ইয়াৰ ফলত বৰ্তমান উদ্ভাৱন সূচকাংকত ভাৰতৰ ৰেংকিং উন্নীত হৈছে। বিগত ৮ বছৰত পেটেণ্টৰ সংখ্যা ৭ গুণ বৃদ্ধি পাইছে। ইউনিকৰ্ণৰ সংখ্যাও ১০০ অতিক্ৰম কৰিছে। আমি এইটো বিশ্বাস নকৰো, সমস্যাবোৰৰ সমাধান কেৱল চৰকাৰৰ হাতত আছে। আপোনালোকে চাওক, মই চৰকাৰক আপোনাৰ ওচৰলৈ লৈ আহিছো। চৰকাৰৰ এই সমস্যাবোৰৰ নৱ প্ৰজন্মই সমাধান দিয়ক আৰু আপোনালোকে আপুনি দিছে। আপোনাৰ সম্ভাৱনা মই সম্পূৰ্ণৰূপে বুজি পাইছো। আজিৰ নৱপ্ৰজন্ম ক্ষিপ্ৰ আৰু স্মাৰ্ট সমাধান লৈ আগবাঢ়ি আহিছে।

এই হেকাথন আয়োজনৰ আঁৰৰ এটা উদ্দেশ্য হ’ল চৰকাৰে যিবোৰ সমস্যা সমাধান কৰিব বিচাৰে, দেশৰ বিভিন্ন প্ৰান্তৰ পৰা ইয়ালৈ অহা মোৰ যুৱ বন্ধুসকলে সমস্যাটো বুজি পায়, সমস্যাবোৰৰ কাৰণ বুজি পায় আৰু লগতে তাৰ পৰা মুক্তি পোৱাৰ উপায় বিচাৰি উলিয়ায়, যুৱক-যুৱতীসকলে সেই সমস্যা সমাধান কৰে। ছাত্ৰ-ছাত্ৰী, চৰকাৰ আৰু ব্যক্তিগত সংগঠনৰ মাজত এনে সহযোগিতাৰ মনোভাৱ, সকলোৰে প্ৰচেষ্টাৰ এই মনোভাৱ, এখন উন্নত ভাৰত গঢ়াৰ বাবে অতি প্ৰয়োজনীয়।

বন্ধুসকল,

মই সম্পূৰ্ণ বিশ্বাসী যে আপোনালোক সকলোৱে এইবোৰ কথা মনত ৰাখি এনেদৰে এই উদ্ভাৱনৰ প্ৰদীপ জ্বলাই থাকিব। মই আপোনালোকক আশ্বাস দিছো যে আপোনালোকৰ কঠোৰ পৰিশ্ৰম, আপোনালোকৰ প্ৰচেষ্টাই চৰকাৰৰ নিৰন্তৰ সমৰ্থন লাভ কৰিব। প্ৰতিটো খোজতে চৰকাৰে আপোনালোকৰ লগত থিয় দিয়ে।

মই পুনৰবাৰ আপোনালোক সকলো যুৱক-যুৱতীক… যদিও আপোনালোকৰ বহুত ক’বলগীয়া আছে। আলোনালোকে ঘণ্টাৰ পিছত ঘণ্টা মগজু লগাইছে। আপোনালোকৰ কথা শুনাটোও মোৰ বাবে বহুত শিকাৰ এটা কাৰণ। আপোনালোকৰ বহুতৰে বহুত আছে। সকলোৰে কথা শুনিব পৰা নাছিলো। প্ৰতিনিধি হিচাপে দুই এজন যুৱকৰ সৈতে কথা পাতিছিল। যিসকলে কথা কোৱা নাই, তেওঁলোকৰ কামো কম নহয়, তেওঁলোকৰ প্ৰচেষ্টা কম নহয়। আৰু মই আপোনালোকক আশ্বাস দিছো, মই বিভাগৰ জৰিয়তে তেওঁৰ চমু আভাস লৈ যাম৷ আৰু আপোনালোকে কি কৰিছে বুজিবলৈ চেষ্টা কৰিম। সময় অধিক হোৱা হ’লে ময়ো আপোনালোকৰ লগত কথা পাতিলোহেতেন। কিন্তু যিসকলে কথা পাতিব পৰা নাই তেওঁলোকৰ কামো সমানেই গুৰুত্বপূৰ্ণ।

মই পুনৰবাৰ আপোনালোক সকলো যুৱক-যুৱতীলৈ আন্তৰিক অভিনন্দন জ্ঞাপন কৰিলো। আৰু চৰকাৰৰ কাম-কাজত চৰকাৰৰ লগত থিয় দি আমি এই জনতাৰ মংগলৰ অভিযানত আগুৱাই গৈ থকা উচিত, এয়াই মোৰ কামনা, আপোনালোক সকলোকে শুভেচ্ছা জ্ঞাপন কৰিলো।

বহত বহুত ধন্যবাদ!

***

DS/ST/NS/DB