পি এম ইণ্ডিয়া

প্ৰধানমন্ত্ৰী শ্ৰী নৰেন্দ্ৰ মোদীয়ে আজি ভিডিঅ’ কনফাৰেন্সযোগে সমাজ কল্যাণ সংস্থাসমূহৰ প্ৰতিনিধিসকলৰ সৈতে বাৰ্তালাপত মিলিত হয়৷

প্ৰধানমন্ত্ৰীয়ে কয় যে ক’ভিড-১৯ৰ প্ৰত্যাহ্বানৰ পৰা মুক্তি পাবলৈ সমগ্ৰ দেশবাসীয়ে সংযম আৰু ধৈৰ্যশীলতা প্ৰদৰ্শন কৰিছে৷ দেশক সেৱা কৰাৰ উত্তম উপায় হ’ল দৰিদ্ৰ আৰু বঞ্চিতসকলৰ সেৱা কৰা-মহাত্মা গান্ধীৰ এই আপ্তবাক্যশাৰীৰ উদ্ধৃতি দি প্ৰধানমন্ত্ৰীয়ে মানৱতাৰ দিশত সেৱা আগবঢ়োৱা সংস্থাসমূহৰ ভূমিকাক প্ৰশংসা কৰে৷

মানৱ অভিগমন, ব্যাপক বিস্তৃতি আৰু জনসাধাৰণৰ সৈতে সংযোগ স্থাপন-এই তিনিটা বিশেষ বৈশিষ্টৰ বাবে এই সংস্থাসমূহ বিশ্বাসযোগ্য গোটলৈ পৰিৱৰ্তিত হৈছে বুলি প্ৰধানমন্ত্ৰীয়ে উল্লেখ কৰে৷ তেওঁ কয় যে এই মুহূৰ্তত দেশবাসীয়ে অভাৱনীয় সংকটৰ মুখামুখি হৈছে আৰু সেইবাবে সংস্থাসমূহৰ সেৱাৰ অতিশয় প্ৰয়োজন হৈ পৰিছে৷ তেওঁ সংস্থাসমূহক দেশৰ দৰিদ্ৰসকলৰ প্ৰাথমিক প্ৰয়োজনীয়তা পূৰণৰ ক্ষেত্ৰত তথা চিকিৎসা সুবিধা প্ৰদান কৰা আদিৰ ক্ষেত্ৰত বৃহৎ ভূমিকা পালন কৰিব পাৰে বুলি মন্তব্য কৰে৷ এই প্ৰত্যাহ্বানৰ পৰা মুক্ত হ’বলৈ হ্ৰস্বম্যাদী পৰিকল্পনাৰ সৈতে দীৰ্ঘম্যাদী পৰিকল্পনাৰো আৱশ্যক বুলি প্ৰধানমন্ত্ৰীয়ে উল্লেখ কৰে৷

প্ৰধানমন্ত্ৰীয়ে কয় যে সংস্থাসমূহে উৰাবাতৰি, অন্ধবিশ্বাস তথা ভুৱা তথ্য দূৰীকৰণত গুৰুত্বপূৰ্ণ ভূমিকা পালন কৰিব পাৰে৷ তাৰোপৰি বিশ্বাসৰ ভিত্তিত জনসাধাৰণ একত্ৰিত হৈ সামাজিক ব্যৱধানৰ নীতি পৰিহাৰ কৰিছে বুলি তেওঁ আক্ষেপ কৰি সংস্থাসমূহক সামাজিক ব্যৱধানৰ গুৰুত্ব প্ৰচাৰ কৰিবলৈও আহ্বান জনায়৷

সংস্থাসমূহৰ প্ৰতিনিধিসকলে প্ৰধানমন্ত্ৰীয়ে এই জটিল সময়ছোৱাত দেখুওৱা দূৰদৰ্শী ভূমিকাৰ বাবে তেওঁক প্ৰশংসা কৰে৷ তেওঁলোকে পিএম-কেয়াৰ ব্যৱস্থাৰ সমৰ্থন কৰি সংকটৰ সময়ত ৰাষ্ট্ৰৰ সেৱাৰ বাবে নিজকে সম্পূৰ্ণভাৱে উৎসৰ্গিত কৰিব বুলি প্ৰতিশ্ৰুতি প্ৰদান কৰে৷ বৰ্তমানে তেওঁলোকে এই প্ৰত্যাহ্বানৰ সৈতে মোকাবিলা কৰিবলৈ ডিজিটেল মাধ্যমৰ জৰিয়তে সজাগতা প্ৰদান, অত্যাৱশ্যকীয় সামগ্ৰী আৰু খাদ্যৰ বিতৰণ আদিৰ দৰে কামত জড়িত হৈ আছে বুলি জানিবলৈ দিয়ে৷
প্ৰধানমন্ত্ৰীয়ে দৰিদ্ৰ আৰু অভাৱী লোকসকলক প্ৰাথমিক প্ৰয়োজনীতাৰ সামগ্ৰীৰ যোগান আৰু চিকিৎসা সেৱা প্ৰদানৰ বিষয়ে পুনৰ দোহাৰি সজাগতা প্ৰদানৰ আৱশ্যকতাৰ বিষয়েও আলোকপাত কৰে৷ তেওঁ এই মহামাৰীক প্ৰত্যাহ্বান জনাবলৈ ঐক্যৱদ্ধভাৱে কাম কৰাটো প্ৰয়োজন বুলি মন্তব্য কৰে৷

উল্লেখ্য, আজিৰ এই বৈঠকত প্ৰধানমন্ত্ৰীৰ উপদেষ্টা আৰু নিটি আয়োগৰ মুখ্য কাৰ্যবাহী বিষয়াও উপস্থিত আছিল৷

*****

VRRK/KP/MANN