পি এম ইণ্ডিয়া

আজি নতুন দিল্লীৰ ভাৰত মণ্ডপামত অনুষ্ঠিত ভাৰত টেক্স ২০২৫ অনুষ্ঠানত প্ৰধানমন্ত্ৰী শ্ৰী নৰেন্দ্ৰ মোদীয়ে দৰ্শকক সম্বোধন কৰাৰ লগতে অনুষ্ঠানৰ লগত সংগতি ৰাখি প্ৰদৰ্শনীখনো ভ্ৰমণ কৰে। ভাষণত প্ৰধানমন্ত্ৰীয়ে ভাৰত মাণ্ডপামত আয়োজিত এই অনুষ্ঠানৰ দ্বিতীয় সংস্কৰণ বুলি উল্লেখ কৰি সকলো উপস্থিতসকলক উষ্ম আদৰণি জনায়। ভাৰত টেক্স ২০২৫ য়ে ভাৰতৰ চহকী ঐতিহ্যক উদযাপন কৰাই নহয়, জাতিটোৰ বাবে অপৰিসীম গৌৰৱৰ উৎস, উন্নত ভাৰতৰ দৃষ্টিভংগীও প্রদর্শন কৰা বুলি তেওঁ গুৰুত্ব আৰোপ কৰে৷ তেওঁ মন্তব্য কৰে যে ভাৰত টেক্স এক উল্লেখযোগ্য বিশ্বব্যাপী বস্ত্ৰ অনুষ্ঠান হিচাপে আত্মপ্ৰকাশ কৰিছে। প্ৰধানমন্ত্ৰীয়ে আলোকপাত কৰে যে এইবাৰৰ অনুষ্ঠানত বস্ত্ৰ উদ্যোগৰ বাৰটা খণ্ডকে সামৰি লোৱা হৈছে, য’ত আছে আনুষংগিক সামগ্ৰী, কাপোৰ, যন্ত্ৰপাতি, ৰাসায়নিক পদাৰ্থ, ৰং আদি। তেওঁ জোৰ দি কয় যে ভাৰত টেক্স বিশ্ব নীতি নিৰ্ধাৰক, চিইঅ’, আৰু উদ্যোগৰ নেতাসকলৰ বাবে নেটৱৰ্ক, সহযোগিতা আৰু অংশীদাৰিত্ব গঢ়ি তোলাৰ বাবে এক গুৰুত্বপূৰ্ণ মঞ্চলৈ বিকশিত হৈছে। ইয়াৰ উপৰিও তেওঁ অনুষ্ঠানটোৰ আয়োজনৰ লগত জড়িত সকলোৰে প্ৰচেষ্টাক প্ৰশংসা কৰে।

প্ৰধানমন্ত্ৰী শ্ৰী নৰেন্দ্ৰ মোদীয়ে কয়, “আজি ভাৰত টেক্সত ১২০ খনতকৈও অধিক দেশে অংশগ্ৰহণ কৰিছে।” তেওঁ জোৰ দি কয় যে এই বিশ্বব্যাপী অংশগ্ৰহণে প্ৰতিজন প্ৰদৰ্শকক ১২০খনতকৈও অধিক দেশৰ সৈতে পৰিচয় কৰাই দিয়ে, যিয়ে তেওঁলোকক স্থানীয়ৰ পৰা বিশ্ব পৰ্যায়লৈ নিজৰ ব্যৱসায় বৃদ্ধি কৰাৰ এক উল্লেখযোগ্য সুযোগ প্ৰদান কৰে। তেওঁ আৰু উল্লেখ কৰে যে নতুন বজাৰ বিচৰা উদ্যোগীসকলে বিভিন্ন আন্তঃৰাষ্ট্ৰীয় বজাৰৰ সাংস্কৃতিক দাবীৰ বিষয়ে মূল্যৱান অন্তৰ্দৃষ্টি লাভ কৰিছে। প্ৰদৰ্শনীখন ভ্ৰমণৰ কথা চিন্তা কৰি প্ৰধানমন্ত্ৰীয়ে শ্বেয়াৰ কৰে যে তেওঁ অসংখ্য ষ্টল ভ্ৰমণ কৰিছিল আৰু উদ্যোগীসকলৰ সৈতে জড়িত হৈছিল। তেওঁ লগতে কয় যে বহু অংশগ্ৰহণকাৰীয়ে যোৱা বছৰ ভাৰত টেক্সত যোগদান কৰাৰ অভিজ্ঞতাৰ কথা কৈছিল, তেওঁলোকে কেনেকৈ বৃহৎ পৰিসৰত নতুন ক্ৰেতা নিশ্চিত কৰিছিল আৰু তেওঁলোকৰ ব্যৱসায় যথেষ্ট সম্প্ৰসাৰণ কৰিছিল সেই বিষয়ে আলোকপাত কৰিছিল। শ্ৰী মোদীয়ে জোৰ দি কয় যে এই অনুষ্ঠানে বস্ত্ৰ খণ্ডৰ বিনিয়োগ, ৰপ্তানি, আৰু সামগ্ৰিক বৃদ্ধিৰ ক্ষেত্ৰত গুৰুত্বপূৰ্ণ ভূমিকা পালন কৰিছে। তেওঁ বেংকিং খণ্ডক বস্ত্ৰ উদ্যোগীসকলৰ প্ৰয়োজনীয়তাক সমৰ্থন কৰিবলৈও আহ্বান জনায়, যাতে তেওঁলোকে নিজৰ ব্যৱসায় আৰু অধিক সম্প্ৰসাৰণ কৰিব পাৰে, নিয়োগ সৃষ্টি কৰিব পাৰে, আৰু নতুন সুযোগ মুকলি কৰিব পাৰে।

প্ৰধানমন্ত্ৰী শ্ৰী নৰেন্দ্ৰ মোদীয়ে মন্তব্য কৰে যে ভাৰত টেক্সে আমাৰ পৰম্পৰাগত সাজ-পোছাকৰ জৰিয়তে ভাৰতৰ সাংস্কৃতিক বৈচিত্ৰ্যক প্ৰদৰ্শন কৰে। তেওঁ উল্লেখ কৰে যে পূবৰ পৰা পশ্চিমলৈ আৰু উত্তৰৰ পৰা দক্ষিণলৈ ভাৰতে পৰম্পৰাগত সাজ-পোছাকৰ এক চহকী বৈচিত্ৰ্যৰ গৌৰৱ কৰে। তেওঁ লক্ষ্ণৌই চিকাংকৰী, ৰাজস্থান আৰু গুজৰাটৰ বন্ধনী, গুজৰাটৰ পাটোলা, বাৰাণসীৰ বানাৰসী ৰেচম, দক্ষিণৰ কাঞ্জিৱৰাম ৰেচম, জম্মু-কাশ্মীৰৰ পশমিনা আদি আইকনিক কাপোৰৰ ওপৰত আলোকপাত কৰে। প্ৰধানমন্ত্ৰীয়ে জোৰ দি কয় যে ভাৰত টেক্সৰ দৰে অনুষ্ঠানৰ বাবে ভাৰতৰ বস্ত্ৰ উদ্যোগৰ বৈচিত্ৰ্য আৰু স্বকীয়তাক প্ৰসাৰিত কৰাৰ বাবে এয়া এক সুযোগ্য মুহূৰ্ত, ইয়াৰ বৃদ্ধি আৰু বিশ্বব্যাপী স্বীকৃতিৰ সূচনা।

যোৱা বছৰ তেওঁ বস্ত্ৰ উদ্যোগৰ বাবে পাঁচটা মূল কাৰকৰ ৰূপৰেখা দাঙি ধৰিছিল—কৃষি, আঁহ, কাপোৰ, ফেশ্বন, আৰু বিদেশী—প্ৰধানমন্ত্ৰী শ্ৰী নৰেন্দ্ৰ মোদীয়ে মন্তব্য কৰে যে এই দৃষ্টিভংগী এতিয়া ভাৰতৰ বাবে এক অভিযানলৈ ৰূপান্তৰিত হৈছে, কৃষক, বয়নকাৰী, ডিজাইনাৰ, আৰু ব্যৱসায়ীসকলৰ বাবে নতুন বৃদ্ধিৰ সুযোগ মুকলি কৰিছে। তেওঁ কয়, “যোৱা বছৰ ভাৰতে বস্ত্ৰ আৰু পোছাকৰ ৰপ্তানি ৭% বৃদ্ধিৰ সাক্ষী হৈছিল, আৰু এতিয়া বিশ্বজুৰি বস্ত্ৰ আৰু পোছাকৰ ৰপ্তানিকাৰক ষষ্ঠ বৃহত্তম দেশ হিচাপে বৃদ্ধি পাইছে।” প্ৰধানমন্ত্ৰীয়ে উল্লেখ কৰে যে ভাৰতৰ বস্ত্ৰ ৰপ্তানি ৩ লাখ কোটি টকা হৈছে, ২০৩০ চনৰ ভিতৰত এই সংখ্যা ৯ লাখ কোটি টকালৈ বৃদ্ধি কৰাৰ অভিলাষী লক্ষ্য।

বস্ত্ৰ খণ্ডৰ সফলতা এক দশকৰ ধাৰাবাহিক প্ৰচেষ্টা আৰু নীতিৰ ফল বুলি জোৰ দি প্ৰধানমন্ত্ৰী শ্ৰী নৰেন্দ্ৰ মোদীয়ে আলোকপাত কৰে যে বিগত দহ বছৰত বস্ত্ৰ উদ্যোগত বিদেশী বিনিয়োগ দুগুণ বৃদ্ধি পাইছে। তেওঁ লগতে কয়, ‘বস্ত্ৰ উদ্যোগ দেশৰ অন্যতম বৃহৎ নিয়োগৰ সুযোগ প্ৰদানকাৰী, ভাৰতৰ উৎপাদন খণ্ডত ১১% অৰিহণা যোগাইছে। প্ৰধানমন্ত্ৰীয়ে শেহতীয়া বাজেটত ঘোষণা কৰা মিছন মেনুফেকচাৰিং পদক্ষেপৰ উল্লেখ কৰি ইয়াৰ তাৎপৰ্যৰ ওপৰত আলোকপাত কৰে। তেওঁ মন্তব্য কৰে যে এই খণ্ডত বিনিয়োগ আৰু বৃদ্ধিয়ে কোটি কোটি বস্ত্ৰশিল্প শ্ৰমিকৰ ইতিবাচক প্ৰভাৱ পেলাইছে, নতুন সুযোগৰ সৃষ্টি কৰিছে আৰু জীৱিকাৰ উন্নতি কৰিছে।

প্ৰধানমন্ত্ৰী শ্ৰী নৰেন্দ্ৰ মোদীয়ে এই কথাত গুৰুত্ব আৰোপ কৰে যে প্ৰত্যাহ্বানসমূহ মোকাবিলা কৰা আৰু ভাৰতৰ বস্ত্ৰ খণ্ডৰ সম্ভাৱনা মুকলি কৰাটো চৰকাৰৰ এক মূল প্ৰতিশ্ৰুতি। তেওঁ উল্লেখ কৰে যে যোৱা দশকত ৰূপায়ণ কৰা প্ৰচেষ্টা আৰু নীতিসমূহ এইবাৰৰ বাজেটত প্ৰতিফলিত হৈছে। কপাহৰ নিৰ্ভৰযোগ্য যোগান নিশ্চিত কৰাৰ বাবে আৰু ভাৰতীয় কপাহৰ বিশ্বব্যাপী প্ৰতিযোগিতামূলক ক্ষমতা বৃদ্ধিৰ বাবে মূল্য শৃংখল শক্তিশালী কৰাৰ লক্ষ্যৰে কপাহ উৎপাদনশীলতাৰ অভিযান ঘোষণা কৰা হয়। প্ৰধানমন্ত্ৰীয়ে কাৰিকৰী বস্ত্ৰশিল্পৰ দৰে সূৰ্য্য উদয় খণ্ড আৰু থলুৱা কাৰ্বন ফাইবাৰ আৰু ইয়াৰ উৎপাদিত সামগ্ৰীৰ প্ৰচাৰৰ ওপৰত গুৰুত্ব আৰোপ কৰে। তেওঁ মন্তব্য কৰে যে ভাৰতে উচ্চমানৰ কাৰ্বন ফাইবাৰ উৎপাদনৰ দিশত উল্লেখযোগ্য অগ্ৰগতি লাভ কৰিছে। ইয়াৰ উপৰিও শ্ৰী মোদীয়ে উল্লেখ কৰে যে বস্ত্ৰ খণ্ডৰ বাবে অত্যাৱশ্যকীয় নীতিগত সিদ্ধান্তক অগ্ৰাধিকাৰ দিয়া হৈছে। তেওঁ এইবাৰৰ বাজেটত এম এছ এম ইৰ শ্ৰেণীবিভাজনৰ মাপকাঠী সম্প্ৰসাৰণ আৰু ঋণৰ উপলব্ধতা বৃদ্ধিৰ কথা উল্লেখ কৰি এই কথাত গুৰুত্ব আৰোপ কৰে যে এম এছ এম ইৰ জৰিয়তে ৮০% অৰিহণা যোগোৱা বস্ত্ৰ খণ্ডই এই ব্যৱস্থাসমূহৰ দ্বাৰা যথেষ্ট লাভৱান হ’ব।

প্ৰধানমন্ত্ৰী শ্ৰী নৰেন্দ্ৰ মোদীয়ে জোৰ দি কয়, “যিকোনো খণ্ডই দক্ষ কৰ্মশক্তি থাকিলে উৎকৃষ্ট হয়, আৰু বস্ত্ৰ উদ্যোগত দক্ষতাই গুৰুত্বপূৰ্ণ ভূমিকা পালন কৰে।” তেওঁ দক্ষ প্ৰতিভাৰ পুল সৃষ্টিৰ বাবে চলি থকা প্ৰচেষ্টাসমূহৰ ওপৰত আলোকপাত কৰে, দক্ষতাৰ বাবে ৰাষ্ট্ৰীয় উৎকৃষ্টতা কেন্দ্ৰ আৰু সমৰ্থ আঁচনিৰ ভূমিকাক উল্লেখ কৰে, যিয়ে সমগ্ৰ মূল্য শৃংখলত প্ৰয়োজনীয় দক্ষতা বিকাশত সহায় কৰি আছে। প্ৰধানমন্ত্ৰীয়ে প্ৰযুক্তিৰ যুগত হস্ততাঁত কাৰুকাৰ্য্যৰ প্ৰামাণ্যতা ৰক্ষা কৰাৰ গুৰুত্বৰ ওপৰত গুৰুত্ব আৰোপ কৰে, লগতে হস্ততাঁত শিপিনীসকলৰ দক্ষতা আৰু সুযোগ বৃদ্ধি কৰি তেওঁলোকৰ সামগ্ৰীয়ে বিশ্বৰ বজাৰত প্ৰৱেশ কৰাটো নিশ্চিত কৰে। তেওঁ লগতে কয়, “যোৱা ১০ বছৰত হেণ্ডলুমৰ প্ৰচাৰৰ বাবে ২৪০০ৰো অধিক বৃহৎ বিপণন অনুষ্ঠানৰ আয়োজন কৰা হৈছে।” শ্ৰী মোদীয়ে ভাৰতত হস্তনিৰ্মিত ই-কমাৰ্চ প্লেটফৰ্মৰ সৃষ্টিৰ কথাও উল্লেখ কৰে, যিয়ে হস্ততাঁত সামগ্ৰীৰ অনলাইন বিপণন বৃদ্ধি কৰিছে, ইতিমধ্যে হাজাৰ হাজাৰ হস্ততাঁত ব্ৰেণ্ড পঞ্জীয়ন কৰা হৈছে। ইয়াৰ উপৰিও তেওঁ হেণ্ডলুম সামগ্ৰীৰ বাবে ভৌগোলিক সূচক (জি আই) টেগিঙৰ উল্লেখযোগ্য সুবিধাসমূহ আঙুলিয়াই দিয়ে, যাৰ ফলত ইয়াৰ স্বীকৃতি আৰু মূল্য আৰু অধিক উন্নীত হয়।

যোৱা বছৰৰ ভাৰত টেক্স অনুষ্ঠানৰ সময়ত আৰম্ভ হোৱা টেক্সটাইলছ ষ্টাৰ্টআপ গ্ৰেণ্ড চেলেঞ্জৰ ওপৰত আলোকপাত কৰি প্ৰধানমন্ত্ৰী শ্ৰী নৰেন্দ্ৰ মোদীয়ে উল্লেখ কৰে যে এই পদক্ষেপে বস্ত্ৰ খণ্ডৰ বাবে যুৱক-যুৱতীসকলৰ পৰা উদ্ভাৱনীমূলক আৰু বহনক্ষম সমাধানৰ আমন্ত্ৰণ জনাইছে। তেওঁ শ্বেয়াৰ কৰে যে দেশৰ বিভিন্ন প্ৰান্তৰ পৰা অহা যুৱ অংশগ্ৰহণকাৰীসকলে এই প্ৰত্যাহ্বানত সক্ৰিয়ভাৱে অংশগ্ৰহণ কৰিছিল, আৰু বিজয়ীসকলক এইবাৰৰ অনুষ্ঠানলৈ আমন্ত্ৰণ জনোৱা হৈছে। এই যুৱ উদ্ভাৱকসকলক সহায় কৰিবলৈ ইচ্ছুক ষ্টাৰ্টআপকো আদৰণি জনোৱা হৈছে। দেশত ষ্টাৰ্টআপ সংস্কৃতি গঢ়ি তোলাৰ লক্ষ্যৰে পিটচ ফেষ্টৰ বাবে আই আই টি মাদ্ৰাজ, অটল ইনোভেচন মিছন, আৰু কেইবাটাও আগশাৰীৰ ব্যক্তিগত বস্ত্ৰ সংস্থাৰ সহায়ক স্বীকাৰ কৰে প্ৰধানমন্ত্ৰীয়ে। শ্ৰী মোদীয়ে যুৱক-যুৱতীসকলক নতুন টেকন’-টেক্সটাইল ষ্টাৰ্টআপক আগুৱাই নিবলৈ আৰু সতেজ ধাৰণা অন্বেষণ কৰিবলৈ উৎসাহিত কৰি বস্ত্ৰ উদ্যোগ আৰু আই আই টিৰ দৰে প্ৰতিষ্ঠানৰ মাজত উদ্ভাৱনী সঁজুলি বিকশিত কৰাৰ বাবে সহযোগিতাৰ পৰামৰ্শ দিয়ে। তেওঁ লক্ষ্য কৰিছিল যে নতুন প্ৰজন্মই আধুনিক ফেশ্বন ট্ৰেণ্ডৰ সমান্তৰালভাৱে পৰম্পৰাগত সাজ-পোছাকক ক্ৰমান্বয়ে আকোৱালি লৈছে, পৰম্পৰাক উদ্ভাৱনৰ সৈতে মিহলি কৰাৰ গুৰুত্বৰ ওপৰত গুৰুত্ব আৰোপ কৰিছে। তেওঁ উদ্যোগটোক পৰম্পৰাগত কাপোৰৰ পৰা অনুপ্ৰাণিত হৈ বিশ্বৰ যুৱক-যুৱতীসকলক আকৰ্ষণ কৰিব পৰা সামগ্ৰী মুকলি কৰিবলৈ আহ্বান জনায়। প্ৰধানমন্ত্ৰীয়ে নতুন ধাৰা আৱিষ্কাৰ আৰু উদ্ভাৱনী শৈলী সৃষ্টিৰ ক্ষেত্ৰত প্ৰযুক্তি, বিশেষকৈ এআইৰ ক্ৰমবৰ্ধমান ভূমিকাকো সম্বোধন কৰে। পৰম্পৰাগত খাদীৰ প্ৰচাৰ অব্যাহত থকাৰ সময়তে ফেশ্বন ট্ৰেণ্ড বিশ্লেষণৰ বাবে এআইৰ ব্যৱহাৰ কৰা হৈছে। মুখ্যমন্ত্ৰী হিচাপে গুজৰাটৰ পোৰবন্দৰত আয়োজন কৰা খাদী ফেশ্বন শ্ব’ৰ কথা মনত পেলাই শ্ৰী মোদীয়ে খাদীক প্ৰচাৰৰ প্ৰয়োজনীয়তাৰ ওপৰত গুৰুত্ব আৰোপ কৰি কয় যে স্বাধীনতা সংগ্ৰামৰ সময়ত ই “দেশৰ বাবে খাদী” আছিল যদিও এতিয়া ই “ফেশ্বনৰ বাবে খাদী” হ’ব লাগে।

শেহতীয়াকৈ বিশ্বৰ ফেশ্বন ৰাজধানী হিচাপে বিখ্যাত পেৰিছ ভ্ৰমণৰ কথা চিন্তা কৰি প্ৰধানমন্ত্ৰী শ্ৰী নৰেন্দ্ৰ মোদীয়ে পৰিৱেশ আৰু জলবায়ু পৰিৱৰ্তনৰ আলোচনাকে ধৰি বিভিন্ন বিষয়ত ভাৰত আৰু ফ্ৰান্সৰ মাজত গঠিত উল্লেখযোগ্য অংশীদাৰিত্বৰ ওপৰত আলোকপাত কৰে। তেওঁ বহনক্ষম জীৱনশৈলীৰ গুৰুত্বৰ বিশ্বব্যাপী স্বীকৃতিৰ ওপৰত গুৰুত্ব আৰোপ কৰে, যিয়ে ফেশ্বন উদ্যোগক ক্ৰমান্বয়ে প্ৰভাৱিত কৰিছে। তেওঁ মন্তব্য কৰে যে বিশ্বই ফেশ্বন ফৰ এনভাইৰনমেণ্ট এণ্ড এম্পাৱাৰমেণ্টৰ দৃষ্টিভংগী গ্ৰহণ কৰিছে, আৰু ভাৰতে এই ক্ষেত্ৰত আগবাঢ়ি যাব পাৰে। প্ৰধানমন্ত্ৰীয়ে খাদী, জনজাতীয় বস্ত্ৰশিল্প, প্ৰাকৃতিক ৰং ব্যৱহাৰৰ দৰে উদাহৰণ উল্লেখ কৰি ভাৰতৰ বস্ত্ৰ পৰম্পৰাৰ বহনক্ষমতা সদায় অবিচ্ছেদ্য অংগ বুলি আঙুলিয়াই দিয়ে। তেওঁ জোৰ দি কয় যে ভাৰতৰ পৰম্পৰাগত বহনক্ষম পদ্ধতিসমূহ এতিয়া অত্যাধুনিক প্ৰযুক্তিৰ দ্বাৰা বৃদ্ধি কৰা হৈছে, যাৰ ফলত শিল্পী, শিপিনী, আৰু উদ্যোগটোৰ সৈতে জড়িত লাখ লাখ মহিলাৰ বাবে নতুন সুযোগৰ সৃষ্টি হৈছে। পৰম্পৰা আৰু উদ্ভাৱনৰ এই সংমিশ্ৰণে ভাৰতক বহনক্ষমভাৱে বিশ্বৰ আগশাৰীৰ হিচাপে স্থান দিছে বুলি তেওঁ উল্লেখ কৰে।

প্ৰধানমন্ত্ৰী শ্ৰী নৰেন্দ্ৰ মোদীয়ে বস্ত্ৰ উদ্যোগত সম্পদৰ সৰ্বাধিক ব্যৱহাৰ আৰু আৱৰ্জনা উৎপাদন কম কৰাৰ গুৰুত্বৰ ওপৰত আলোকপাত কৰে। তেওঁ “দ্রুত ফেশ্বন আৱৰ্জনা”ৰ ক্ৰমবৰ্ধমান বিষয়টোৰ ওপৰত আলোকপাত কৰে, য’ত দ্ৰুতগতিত পৰিৱৰ্তিত ধাৰাসমূহৰ বাবে প্ৰতিমাহে লাখ লাখ কাপোৰ পেলাই দিয়া হয়, যাৰ ফলত পৰিৱেশ আৰু পৰিৱেশগত প্ৰত্যাহ্বানৰ সৃষ্টি হয়। তেওঁ উল্লেখ কৰে যে ২০৩০ চনৰ ভিতৰত ফেশ্বনৰ আৱৰ্জনা ১৪.৮ কোটি টন হ’ব পাৰে, বৰ্তমান বস্ত্ৰ আৱৰ্জনাসমূহৰ এক চতুৰ্থাংশতকৈও কম আৱৰ্জনা পুনঃব্যৱহাৰ কৰা হৈছে। শ্ৰী মোদীয়ে মন্তব্য কৰে যে ভাৰতৰ বস্ত্ৰ উদ্যোগে দেশৰ বস্ত্ৰ পুনঃব্যৱহাৰ আৰু আপ-চাইক্লিঙৰ চহকী পৰম্পৰাৰ সহায় লৈ এই প্ৰত্যাহ্বানক এক সুযোগলৈ ৰূপান্তৰিত কৰাৰ সম্ভাৱনা আছে। তেওঁ পুৰণি বা বাকী থকা কাপোৰৰ পৰা মেট, ৰাগ, আৱৰণ সৃষ্টিৰ লগতে মহাৰাষ্ট্ৰত ফটা কাপোৰৰ পৰা তৈয়াৰী মিহি কুইল্টৰ দৰে উদাহৰণ উল্লেখ কৰে। প্ৰধানমন্ত্ৰীয়ে এই কথাত গুৰুত্ব আৰোপ কৰে যে এই পৰম্পৰাগত পদ্ধতিসমূহত উদ্ভাৱনে বিশ্ব বজাৰৰ সুযোগ মুকলি কৰিব পাৰে, ভাৰতক বহনক্ষম বস্ত্ৰ সমাধানৰ ক্ষেত্ৰত আগশাৰীৰ হিচাপে স্থান দিব পাৰে। প্ৰধানমন্ত্ৰী শ্ৰী নৰেন্দ্ৰ মোদীয়ে ঘোষণা কৰে যে বস্ত্ৰ মন্ত্ৰালয়ে আপ-চাইকেলিঙৰ প্ৰসাৰৰ বাবে ৰাজহুৱা উদ্যোগ আৰু ই-মাৰ্কেটপ্লেচৰ স্থায়ী সন্মিলনৰ সৈতে বুজাবুজিৰ চুক্তিত স্বাক্ষৰ কৰিছে, ইতিমধ্যে বহু আপ-চাইকেলাৰ প্লেটফৰ্মত পঞ্জীয়ন কৰিছে। তেওঁ শ্বেয়াৰ কৰে যে নৱী মুম্বাই আৰু বাংগালুৰুৰ দৰে চহৰত ঘৰে ঘৰে বস্ত্ৰ আৱৰ্জনা সংগ্ৰহৰ বাবে পাইলট প্ৰজেক্ট চলি আছে। শ্ৰী মোদীয়ে ষ্টাৰ্টআপসমূহক এই পদক্ষেপসমূহত যোগদান কৰিবলৈ, নতুন সুযোগসমূহ অন্বেষণ কৰিবলৈ, আৰু বিশ্ব বজাৰত নেতৃত্বৰ স্থান স্থাপনৰ বাবে আগতীয়া পদক্ষেপ ল’বলৈ উৎসাহিত কৰে। তেওঁ প্ৰকল্প কৰিছিল যে অনাগত বছৰবোৰত ভাৰতৰ বস্ত্ৰ পুনঃব্যৱহাৰৰ বজাৰ ৪০ কোটি ডলাৰলৈ বৃদ্ধি পাব পাৰে, আনহাতে বিশ্বৰ পুনঃব্যৱহাৰযোগ্য বস্ত্ৰ বজাৰ ৭.৫ বিলিয়ন ডলাৰ হ’ব বুলি অনুমান কৰা হৈছে। সঠিক দিশ আৰু উদ্ভাৱনৰ দ্বাৰা ভাৰতে এই সম্প্ৰসাৰিত বজাৰৰ এক উল্লেখযোগ্য অংশ নিশ্চিত কৰিব পাৰে, বহনক্ষমতাক প্ৰতিযোগিতামূলক সুবিধালৈ ৰূপান্তৰিত কৰিব পাৰে বুলি তেওঁ জোৰ দিয়ে।

প্ৰধানমন্ত্ৰী শ্ৰী নৰেন্দ্ৰ মোদীয়ে প্ৰতিফলিত কৰিছিল যে বহু শতিকাৰ আগতে যেতিয়া ভাৰত সমৃদ্ধিৰ শিখৰত আছিল, তেতিয়া সেই সফলতাক আগুৱাই নিয়াত বস্ত্ৰ উদ্যোগে গুৰুত্বপূৰ্ণ ভূমিকা পালন কৰিছিল। তেওঁ জোৰ দি কয় যে ভাৰতে বিক্ষিত ভাৰত হোৱাৰ লক্ষ্যৰ দিশে আগবাঢ়ি যোৱাৰ লগে লগে বস্ত্ৰ খণ্ডই পুনৰবাৰ জাতিটোৰ বৃদ্ধিত এক ডাঙৰ অৰিহণা যোগোৱা হিচাপে আত্মপ্ৰকাশ কৰিব। প্ৰধানমন্ত্ৰীয়ে আলোকপাত কৰে যে ভাৰত টেক্সৰ দৰে অনুষ্ঠানে ভাৰতৰ সম্ভাৱনা আৰু ঐতিহ্য প্ৰদৰ্শন কৰি বিশ্ব বস্ত্ৰ উদ্যোগত ভাৰতৰ স্থান শক্তিশালী কৰিছে। ভাষণৰ সামৰণিত শ্ৰী মোদীয়ে আস্থা প্ৰকাশ কৰে যে ভাৰত টেক্সে সফলতাৰ নতুন অভিলেখ গঢ়িব আৰু প্ৰতি বছৰৰ লগে লগে অধিক উচ্চতাত উপনীত হ’ব, যাৰ ফলত বস্ত্ৰশিল্পৰ ক্ষেত্ৰত ভাৰতৰ নেতৃত্ব আৰু অধিক কঠিন হ’ব।

কেন্দ্ৰীয় বস্ত্ৰ মন্ত্ৰী শ্ৰীযুত গিৰিৰাজ সিং আৰু বস্ত্ৰ বিভাগৰ ৰাজ্যিক মন্ত্ৰী শ্ৰীযুত পবিত্ৰ মাৰ্ঘেৰিতা ডাঙৰীয়াৰ লগতে অন্যান্য বিশিষ্ট ব্যক্তিৰ লগতে উপস্থিত থাকে।

পটভূমি

১৪-১৭ ফেব্ৰুৱাৰীলৈ ভাৰত মাণ্ডপামত অনুষ্ঠিত হ’বলগীয়া মেগা গ্ল’বেল ইভেণ্ট ভাৰত টেক্স ২০২৫ অনন্য, কাৰণ ইয়াত কেঁচামালৰ পৰা আৰম্ভ কৰি সম্পূৰ্ণ সামগ্ৰীলৈকে সমগ্ৰ বস্ত্ৰ মূল্য শৃংখলক একক চালিৰ তলত একত্ৰিত কৰা হৈছে।

ভাৰত টেক্স প্লেটফৰ্মে বস্ত্ৰ উদ্যোগৰ আটাইতকৈ ডাঙৰ আৰু ব্যাপক অনুষ্ঠান হিচাপে থিয় দিছে, যিয়ে দুটা স্থানত বিস্তৃত মেগা এক্সপ’ক সামৰি লৈছে যিয়ে সমগ্ৰ বস্ত্ৰ পৰিৱেশ তন্ত্ৰক প্ৰদৰ্শন কৰে। এই অনুষ্ঠানত ৭০টাতকৈও অধিক সন্মিলন অধিবেশনৰ সৈতে বিশ্বব্যাপী সন্মিলন অনুষ্ঠিত হয়, য’ত গোলটেবুল, পেনেল আলোচনা, আৰু মাষ্টাৰ ক্লাছ আদি অন্তৰ্ভুক্ত কৰা হয়। এই অনুষ্ঠানত প্ৰদৰ্শনীসমূহে বিশেষ উদ্ভাৱন আৰু ষ্টাৰ্টআপ পেভিলিয়নসমূহক উজ্জ্বল কৰি তোলে, আনহাতে হেকাথন, ষ্টাৰ্টআপ পিচ ফেষ্ট, আৰু উদ্ভাৱন উৎসৱৰ দৰে পদক্ষেপে উদীয়মান ধাৰণাসমূহৰ বাবে এক মঞ্চ প্ৰদান কৰে। ইয়াৰ উপৰিও, টেক টেংক আৰু ডিজাইন প্ৰত্যাহ্বানসমূহে অগ্ৰণী বিনিয়োগকাৰীৰ জৰিয়তে ষ্টাৰ্টআপসমূহৰ বাবে পুঁজিৰ সুযোগ প্ৰদান কৰে, যাৰ ফলত ভাৰত টেক্স বস্ত্ৰ উদ্যোগত উদ্ভাৱন, সহযোগিতা, আৰু বৃদ্ধিৰ বাবে এক কেন্দ্ৰ হৈ পৰে।

ভাৰত টেক্স ২০২৫ এক ল্যাণ্ডমাৰ্ক ইভেণ্ট হ’বলৈ সাজু হৈছে, য’ত নীতি নিৰ্ধাৰক, সমগ্ৰ বিশ্বৰ পৰা অহা চিইঅ’সকল, ৫,০০০ৰো অধিক প্ৰদৰ্শক, আৰু ১২০ খনতকৈও অধিক দেশৰ ৬,০০০ আন্তঃৰাষ্ট্ৰীয় ক্ৰেতাক আকৰ্ষণ কৰা হ’ব, লগতে দৰ্শকৰ বৈচিত্ৰ্যপূৰ্ণ শৃংখল। এই অনুষ্ঠানত আন্তঃৰাষ্ট্ৰীয় বস্ত্ৰ নিৰ্মাতা ফেডাৰেচন (আইটিএমএফ), আন্তঃৰাষ্ট্ৰীয় কপাহ পৰামৰ্শদাতা সমিতি (আইচিএচি), ইউৰাটেক্স, বস্ত্ৰ বিনিময়, আৰু ইউএছ ফেশ্বন উদ্যোগ সংস্থা (ইউএছএফআইএ) আদি বিশিষ্ট সংস্থাকে ধৰি ২৫টাতকৈও অধিক আগশাৰীৰ বিশ্বব্যাপী বস্ত্ৰ সংস্থা আৰু সংস্থাই অংশগ্ৰহণ কৰিব। বিশ্বব্যাপী অংশীদাৰসকলৰ এই অভিসৰণে বস্ত্ৰ উদ্যোগত সহযোগিতা, উদ্ভাৱন আৰু বৃদ্ধিৰ বাবে এক প্ৰধান মঞ্চ হিচাপে অনুষ্ঠানটোৰ তাৎপৰ্য্যক আলোকপাত কৰে।

***

MJPS/SR