পি এম ইণ্ডিয়া

প্ৰধানমন্ত্ৰী শ্ৰী নৰেন্দ্ৰ মোদীয়ে আজি ভাৰতৰ উচ্চতম ন্যায়ালয়ত সংবিধান দিৱস উদযাপন উপলক্ষে আয়োজিত সভাত অংশগ্ৰহণ কৰি ভাষণ আগবঢ়ায়। ১৯৪৯ চনত সংবিধান সভাই ভাৰতৰ সংবিধান গৃহীত কৰাৰ স্মৃতিত ২০১৫ চনৰ পৰা ২৬ নৱেম্বৰত সংবিধান দিৱস উদযাপন কৰা হৈছে। প্ৰধানমন্ত্ৰীয়ে এই কাৰ্যসূচীৰ সময়ত ই-ক’ৰ্ট প্ৰকল্পৰ অধীনত বিভিন্ন নতুন পদক্ষেপো আৰম্ভ কৰে য’ত ভাৰ্চুৱেল জাষ্টিচ ক্লক, JustIS মোবাইল এপ ২.০, ডিজিটেল আদালত আৰু S3WaaS ৱেবছাইট উল্লেখযোগ্য।

সংবিধান দিৱসৰ শুভেচ্ছা জ্ঞাপন কৰি প্ৰধানমন্ত্ৰীয়ে ১৯৪৯ চনৰ আজিৰ দিনটোতে স্বাধীন ভাৰতে নিজৰ বাবে এক নতুন ভৱিষ্যতৰ ভেটি স্থাপন কৰাৰ কথা স্মৰণ কৰে। প্ৰধানমন্ত্ৰীয়ে আজাদী কা অমৃত মহোৎসৱৰ এই বছৰটোত সংবিধান দিৱসৰ গুৰুত্বৰ কথাও উল্লেখ কৰে। এই উপলক্ষে তেওঁ বাবাছাহেব ড° বি আৰ আম্বেদকাৰৰ লগতে সংবিধান সভাৰ সকলো সদস্যক শ্ৰদ্ধাঞ্জলি জ্ঞাপন কৰে।

প্ৰধানমন্ত্ৰীয়ে ভাৰতীয় সংবিধানৰ বিকাশ আৰু সম্প্ৰসাৰণৰ যাত্ৰাৰ বিগত ৭০ দশকত বিধানসভা, ন্যায়পালিকাৰ আৰু কাৰ্যপালিকাৰ অগণন ব্যক্তিৰ অৱদানৰ ওপৰত আলোকপাত কৰাৰ লগতে এই বিশেষ অনুষ্ঠানত সমগ্ৰ দেশৰ হৈ তেওঁলোকক ধন্যবাদ জনায়।

প্ৰধানমন্ত্ৰীয়ে ভাৰতৰ ইতিহাসৰ অন্ধকাৰ দিনটোক স্মৰণ কৰে, যেতিয়া দেশখনে সংবিধান দিৱসৰ গুৰুত্বপূৰ্ণ ক্ষণ উদযাপন কৰিছিল৷ প্ৰধানমন্ত্ৰীয়ে ২৬ নৱেম্বৰত ভাৰতে মানৱতাৰ শত্ৰুৰ দ্বাৰা ইতিহাসৰ আটাইতকৈ ডাঙৰ সন্ত্ৰাসবাদী আক্ৰমণৰ সন্মুখীন হোৱাৰ দিনটোও স্মৰণ কৰে৷ শ্ৰী মোদীয়ে মুম্বাই সন্ত্ৰাসবাদীৰ নৃশংস আক্ৰমণত প্ৰাণ হেৰুওৱাসকলৰ প্ৰতি শ্ৰদ্ধাঞ্জলি জ্ঞাপন কৰে।

প্ৰধানমন্ত্ৰীয়ে সোঁৱৰাই দিয়ে যে বৰ্তমানৰ বিশ্বজোৰা পৰিস্থিতিত বিশ্বই ভাৰতৰ ক্ৰমৱৰ্ধমান অৰ্থনীতি আৰু আন্তঃৰাষ্ট্ৰীয় ভাবমূৰ্তিৰ মাজত আশাৰে চাই আছে। তেওঁ কয় যে ইয়াৰ সুস্থিৰতাৰ বিষয়ে প্ৰাৰম্ভিক সকলো আশংকাক আওকান কৰি ভাৰতে পূৰ্ণ শক্তিৰে আগবাঢ়িছে আৰু ইয়াৰ বৈচিত্ৰ্যক লৈ গৌৰৱ অনুভৱ কৰিছে। এই সফলতাৰ বাবে তেওঁ আমাৰ সংবিধানক কৃতিত্ব দিয়ে। তেওঁ লগতে প্ৰস্তাৱনাৰ প্ৰথম তিনিটা শব্দ ‘আমি জনসাধাৰণ’ৰ কথা উল্লেখ কৰি কয়, ‘আমি জনসাধাৰণ’ হৈছে এক আহ্বান, আস্থা আৰু শপত। সংবিধানৰ এই মনোভাৱ ভাৰতৰ আত্মা, যি বিশ্বত গণতন্ত্ৰৰ মাতৃ হৈ আহিছে”, তেওঁ কয়। “আধুনিক সময়ত সংবিধানে দেশৰ সকলো সাংস্কৃতিক আৰু নৈতিক আৱেগক আকোঁৱালি লৈছে।”

প্ৰধানমন্ত্ৰীয়ে আনন্দ প্ৰকাশ কৰে যে গণতন্ত্ৰৰ মাতৃ হিচাপে দেশে সংবিধানৰ আদৰ্শক শক্তিশালী কৰি তুলিছে আৰু জনসমৰ্থক নীতিয়ে দেশৰ দৰিদ্ৰ আৰু মহিলাসকলক সবল কৰিছে। সাধাৰণ নাগৰিকৰ বাবে আইন সহজ আৰু সুলভ কৰি তোলাৰ লগতে সময়োপযোগী ন্যায় সুনিশ্চিত কৰাৰ বাবে ন্যায়পালিকাৰ বহু পদক্ষেপ গ্ৰহণ কৰা বুলি তেওঁ অৱগত কৰে।

স্বাধীনতা দিৱসৰ ভাষণত কৰ্তব্যৰ ওপৰত দিয়া গুৰুত্বৰ কথা উল্লেখ কৰি প্ৰধানমন্ত্ৰীয়ে কয় যে ই সংবিধানৰ মনোভাৱৰ প্ৰকাশ। অমৃত কালক ‘কৰ্তব্য কাল’ বুলি অভিহিত কৰি প্ৰধানমন্ত্ৰীয়ে সজোৰে কয় যে আজাদী কা অমৃত কালত যেতিয়া দেশে স্বাধীনতাৰ ৭৫ বছৰ সম্পূৰ্ণ কৰিছে আৰু আমি আগন্তুক ২৫ বছৰৰ উন্নয়নৰ যাত্ৰাত নামি অহাৰ লগে লগে কৰ্তব্যৰ মন্ত্ৰ দেশৰ প্ৰতি প্ৰথম আৰু প্ৰধান। ‘আজাদী কা অমৃত কাল দেশৰ প্ৰতি কৰ্তব্যৰ সময়। মানুহেই হওক বা প্ৰতিষ্ঠানেই হওক, আমাৰ দায়িত্ব আমাৰ প্ৰথম অগ্ৰাধিকাৰ”, প্ৰধানমন্ত্ৰীয়ে কয়। তেওঁ কয় যে নিজৰ ‘কৰ্তব্য পথ’ অনুসৰণ কৰিলে দেশখনে উন্নয়নৰ নতুন উচ্চতা লাভ কৰিব পাৰে।

প্ৰধানমন্ত্ৰীয়ে উল্লেখ কৰে যে এসপ্তাহৰ পাছত ভাৰতে জি-২০ৰ অধ্যক্ষতা লাভ কৰিবলৈ ওলাইছে আৰু এই উপলক্ষে ভাৰতৰ সন্মান আৰু মৰ্যাদাক দল হিচাপে বিশ্বত প্ৰসাৰিত কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে। “এয়া আমাৰ সামূহিক দায়িত্ব” বুলি উল্লেখ কৰি তেওঁ লগতে কয়, “গণতন্ত্ৰৰ মাতৃ হিচাপে ভাৰতৰ পৰিচয় আৰু অধিক শক্তিশালী কৰাৰ প্ৰয়োজন আছে।”

যুৱকেন্দ্ৰিক মনোভাৱৰ আধাৰত প্ৰধানমন্ত্ৰীয়ে কয় যে সংবিধানখন মুক্ত, ভৱিষ্যতবাদী আৰু আধুনিক দৃষ্টিভংগীৰ বাবে জনাজাত। ভাৰতৰ বিকাশৰ কাহিনীৰ সকলো দিশতে যুৱ শক্তিৰ ভূমিকা আৰু অৱদানক তেওঁ স্বীকাৰ কৰে।

সমতা আৰু সৱলীকৰণৰ দৰে বিষয়ত অধিক বুজাবুজিৰ বাবে যুৱক-যুৱতীসকলৰ মাজত ভাৰতৰ সংবিধান সন্দৰ্ভত সজাগতা বৃদ্ধি কৰাৰ প্ৰয়োজনীয়তাৰ ওপৰত গুৰুত্ব আৰোপ কৰি প্ৰধানমন্ত্ৰীয়ে আমাৰ সংবিধানৰ খচৰা প্ৰস্তুত হোৱাৰ সময় আৰু দেশৰ সন্মুখত থিয় দিয়া পৰিস্থিতিৰ কথা স্মৰণ কৰে। তেওঁ কয়, “সেই সময়ত সংবিধান সভাৰ বিতৰ্কত কি হৈছিল, আমাৰ যুৱক-যুৱতীসকলে এই সকলোবোৰ বিষয়ৰ প্ৰতি সজাগ হোৱা উচিত”। তেওঁ লগতে কয় যে ইয়াৰ ফলত তেওঁলোকৰ সংবিধানৰ প্ৰতি আগ্ৰহ বৃদ্ধি পাব। প্ৰধানমন্ত্ৰীয়ে উদাহৰণস্বৰূপে কয় যে যেতিয়া ভাৰতবৰ্ষত সংবিধান সভাত ১৫ গৰাকী মহিলা সদস্য আছিল আৰু তাৰ ভিতৰত দক্ষায়নী ভেলায়ুধনৰ দৰে মহিলাক উজ্জ্বল কৰি তুলিছিল যিসকলে এখন অভাৱগ্ৰস্ত সমাজৰ পৰা ওলাই আহি তাত উপস্থিত হৈছিল। প্ৰধানমন্ত্ৰীয়ে দক্ষাইনী ভেলায়ুধনৰ দৰে মহিলাৰ অৱদানৰ বিষয়ে খুব কমেইহে আলোচনা হোৱা বুলি আক্ষেপ প্ৰকাশ কৰে আৰু দলিত আৰু শ্ৰমিকৰ সৈতে জড়িত বহু বিষয়ত গুৰুত্বপূৰ্ণ হস্তক্ষেপ কৰা বুলি কয়। প্ৰধানমন্ত্ৰীয়ে দুৰ্গবাই দেশমুখ, হান্সা মেহতা আৰু ৰাজকুমাৰী অমৃত কৌৰৰ লগতে অন্যান্য মহিলা সদস্যসকলৰ উদাহৰণ দাঙি ধৰে, যিসকলে নাৰী সম্পৰ্কীয় বিষয়সমূহতো উল্লেখযোগ্য অৱদান আগবঢ়াইছিল। “যেতিয়া আমাৰ যুৱক-যুৱতীসকলে এই তথ্যসমূহ জানিব পাৰিব, তেতিয়া তেওঁলোকে তেওঁলোকৰ প্ৰশ্নৰ উত্তৰ বিচাৰি পাব”, বুলি উল্লেখ কৰি তেওঁ লগতে কয়, “ই আমাৰ গণতন্ত্ৰ, আমাৰ সংবিধান আৰু দেশৰ ভৱিষ্যতক শক্তিশালী কৰিব পৰা সংবিধানৰ প্ৰতি আনুগত্য গঢ়ি তুলিব।” ভাষণৰ সামৰণিত প্ৰধানমন্ত্ৰীয়ে কয়, ‘আজাদী কা অমৃত কালত এইটোৱেই দেশৰ প্ৰয়োজনীয়তা। আশা কৰোঁ এই সংবিধান দিৱসে এই দিশত আমাৰ সংকল্পক অধিক শক্তি প্ৰদান কৰিব।”

এই উপলক্ষে অনুষ্ঠানত ভাৰতৰ মুখ্য ন্যায়াধীশ ড° ডি ৱাই চন্দ্ৰচুড়, কেন্দ্ৰীয় আইন আৰু ন্যায় মন্ত্ৰী শ্ৰী কিৰেন ৰিজিজু, ভাৰতৰ উচ্চতম ন্যায়ালয়ৰ ন্যায়াধীশ ন্যায়াধীশ সঞ্জয় কিষাণ কৌল আৰু ন্যায়াধীশ এছ আব্দুল নাজীৰ, কেন্দ্ৰীয় আইন আৰু ন্যায় ৰাজ্যিক মন্ত্ৰী অধ্যাপক এছ পি ৱাঘেল, ভাৰতৰ এটৰ্ণি জেনেৰেল শ্ৰী আৰ ভেংকটাৰমনী, ছলিচিটৰ জেনেৰেল অৱ ইণ্ডিয়া শ্ৰী তুষাৰ মেহতা আৰু উচ্চতম ন্যায়ালয়ৰ উকীল সংস্থাৰ সভাপতি শ্ৰী বিকাশ সিং উপস্থিত থাকে৷

***

DS/TS/DB