পি এম ইণ্ডিয়া

প্ৰাক্তন প্ৰধানমন্ত্ৰী শ্ৰী অটল বিহাৰী বাজপেয়ীৰ বিয়োগত প্ৰধানমন্ত্ৰী শ্ৰী নৰেন্দ্ৰ মোদীয়ে গভীৰ শোক প্ৰকাশ কৰিছে৷

“মই বাকৰুদ্ধ হৈ পৰিছো৷ শূন্যতা অনুভৱ কৰিছো৷ আমাৰ সকলোৰে শ্ৰদ্ধাৰ অটল বিহাৰী বাজপেয়ী মহোদয় আমাৰ মাজত আৰু নাই৷ জীৱনৰ প্ৰতিটো মুহূৰ্ত তেওঁ ৰাষ্ট্ৰৰ কল্যাণৰ বাবে উৎসৰ্গা কৰিছিল৷ তেওঁৰ বিয়োগত এটা যুগৰ অন্ত পৰিল৷

বাজপেয়ী মহোদয় আজি আমাৰ মাজত নাই, কিন্তু তেওঁৰ প্ৰেৰণা, আদৰ্শই প্ৰতিগৰাকী ভাৰতীয় আৰু প্ৰতিগৰাকী বিজেপি কৰ্মীক উৎসাহিত কৰি যাব৷ ঈশ্বৰে তেওঁৰ আত্মাক চিৰশান্তি প্ৰদান কৰক আৰু তেওঁৰ সকলো শুভাকাংক্ষীক এই দুখ সহ্য কৰিব পৰাকৈ শক্তি দিয়ক৷ ওম শান্তি৷

আমাৰ শ্ৰদ্ধাৰ অটল বিহাৰী বাজপেয়ী মহোদয়ৰ বিয়োগত সমগ্ৰ দেশ আজি শোকাভিভূত৷ তেওঁৰ বিয়োগত এটা যুগৰ অন্ত পৰিল৷ তেওঁ ৰাষ্ট্ৰৰ উন্নয়নৰ নামত গোটেই জীৱন উৎসৰ্গা কৰিছিল৷ এই দুঃসংবাদৰ সময়ত মই তেওঁৰ পৰিয়ালবৰ্গ, বিজেপি কৰ্মকৰ্তা আৰু কোটি কোটি শুভাকাংক্ষীৰ ওচৰত সমবেদনা জ্ঞাপন কৰিছো৷ ওম শান্তি৷

অটল বিহাৰী মহোদয়ৰ নেতৃত্বত ২১ শতিকাত এখন শক্তিশালী, সমৃদ্ধিশালী আৰু সন্মিলিত ভাৰতবৰ্ষৰ ভেটি স্থাপিত হৈছিল৷ দেশৰ বিভিন্ন খণ্ডক সাঙুৰি ৰূপায়ন কৰা তেওঁৰ দূৰদৰ্শী নীতিয়ে  প্ৰতিগৰাকী নাগৰিকৰ জীৱনক স্পৰ্শ কৰিছিল৷

অটল মহোদয়ৰ দেহাৱসান মোৰ বাবে এক ব্যক্তিগত আৰু অপূৰণীয় ক্ষতি৷ তেওঁৰ সৈতে মোৰ অনেক মধুৰ স্মৃতি জড়িত হৈ আছে৷ মোৰ দৰে কৰ্মকৰ্তাৰ তেওঁ আছিল অনুপ্ৰেৰণাৰ উৎস৷ মই  তেওঁৰ প্ৰখৰ বুদ্ধিমত্তাক বিশেষভাৱে স্মৰণ কৰিম৷

বিজেপিৰ ক্ৰমবৰ্ধমান উত্থান আছিল অটল বিহাৰী বাজপেয়ী মহোদয়ৰ অধ্যাৱসায় আৰু সংগ্ৰামৰ ফল৷ বিজেপিৰ বাৰ্তা বিলাবলৈ তেওঁ দেশৰ প্ৰতিটো প্ৰান্ত ভ্ৰমণ কৰিছিল, যাৰ ফলস্বৰূপে দেশৰ ৰাষ্ট্ৰীয় ৰাজনীতিত বিজেপি এক শক্তিশালী দল হৈ পৰিছিল৷”, ধাৰাবাহিক টুইটত প্ৰধানমন্ত্ৰীয়ে এইদৰে কয়৷

ইয়াৰ পূৰ্বে, নতুন দিল্লীস্থিত সৰ্বভাৰতীয় চিকিৎসা বিজ্ঞান প্ৰতিষ্ঠানে এক প্ৰেছ বিজ্ঞপ্তিযোগে প্ৰকাশ কৰিছিল যে প্ৰাক্তন প্ৰধানমন্ত্ৰী শ্ৰী অটল বিহাৰী বাজপেয়ীৰ আজি সন্ধিয়া ৫ বাজি ৫ মিনিটত দেহাৱসান ঘটে৷

****

AKT/KP/MS