পি এম ইণ্ডিয়া

প্ৰধানমন্ত্ৰী শ্ৰী নৰেন্দ্ৰ মোদীয়ে আজি থাইলেণ্ডত আয়োজিত সম্বাদ (SAMVAD) কাৰ্যসূচীৰ সময়ত ভিডিঅ ‘বাৰ্তাৰ জৰিয়তে তেওঁৰ মন্তব্য প্ৰকাশ কৰে। সমাৱেশত ভাষণ দি তেওঁ থাইলেণ্ডত সম্বাদ (SAMVAD) সংস্কৰণত যোগদান কৰি এই অনুষ্ঠানটো সম্ভৱ কৰি তোলাৰ বাবে ভাৰত, জাপান আৰু থাইলেণ্ডৰ বিশিষ্ট প্ৰতিষ্ঠান আৰু ব্যক্তিসকলক প্ৰশংসা কৰে। তেওঁ সকলো অংশগ্ৰহণকাৰীক শুভেচ্ছা জ্ঞাপন কৰে।

প্ৰধানমন্ত্ৰীগৰাকীয়ে তেওঁৰ বন্ধু শ্ৰী শ্বিনজো আবেক স্মৰণ কৰাৰ সুযোগ গ্ৰহণ কৰি উল্লেখ কৰে যে ২০১৫ চনত তেওঁলোকৰ কথোপকথনৰ পৰা সম্বাদ (SAMVAD)ৰ ধাৰণাটো উদ্ভৱ হৈছিল। তেতিয়াৰ পৰা সম্বাদে বিভিন্ন দেশ ভ্ৰমণ কৰি বিতৰ্ক, আলোচনা আৰু বুজাবুজি বৃদ্ধি কৰিছে।

সমৃদ্ধ সংস্কৃতি, ইতিহাস আৰু ঐতিহ্যৰ দেশ থাইলেণ্ডত সম্বাদ (SAMVAD)ৰ এই সংস্কৰণ অনুষ্ঠিত হোৱাৰ বাবে নিজৰ আনন্দ প্ৰকাশ কৰি শ্ৰী মোদীয়ে গুৰুত্ব আৰোপ কৰে যে থাইলেণ্ডে এছিয়াৰ দাৰ্শনিক আৰু আধ্যাত্মিক পৰম্পৰাৰ এক সুন্দৰ উদাহৰণ হিচাপে থিয় দিছে।

দুহেজাৰ বছৰতকৈও অধিক সময় ধৰি ভাৰত আৰু থাইলেণ্ডৰ মাজত থকা গভীৰ সাংস্কৃতিক সম্পৰ্কৰ ওপৰত গুৰুত্ব আৰোপ কৰি প্ৰধানমন্ত্ৰীয়ে মন্তব্য কৰে যে ৰামায়ণ আৰু ৰামাকিয়েনে দুয়োখন দেশক সংযোগ কৰে আৰু ভগৱান বুদ্ধৰ প্ৰতি থকা শ্ৰদ্ধাৰে তেওঁলোকক একত্ৰিত কৰে। তেওঁ উল্লেখ কৰে যে যেতিয়া ভাৰতে যোৱা বছৰ থাইলেণ্ডলৈ ভগৱান বুদ্ধৰ পবিত্ৰ অৱশেষ প্ৰেৰণ কৰিছিল, তেতিয়া লাখ লাখ ভক্তই তেওঁলোকৰ শ্ৰদ্ধা নিবেদন কৰিছিল। শ্ৰী মোদীয়ে ভাৰত আৰু থাইলেণ্ডৰ মাজত একাধিক খণ্ডত স্পন্দনশীল অংশীদাৰিত্বৰ ওপৰত গুৰুত্ব আৰোপ কৰি উল্লেখ কৰে যে ভাৰতৰ ‘এক্ট ইষ্ট’ নীতি আৰু থাইলেণ্ডৰ ‘এক্ট ৱেষ্ট’ নীতিয়ে পাৰস্পৰিক প্ৰগতি আৰু সমৃদ্ধিৰ প্ৰসাৰ কৰি পৰস্পৰৰ পৰিপূৰক হিচাপে চিহ্নিত হৈছে। তেওঁ মন্তব্য কৰে যে এই সন্মিলনখনে দুয়োখন ৰাষ্ট্ৰৰ মাজত বন্ধুত্বৰ আন এক সফল অধ্যায় চিহ্নিত কৰিছে।

সম্বাদ (SAMVAD)ৰ বিষয়বস্তুৰ ওপৰত আলোকপাত কৰি শ্ৰী মোদীয়ে উল্লেখ কৰে যে যদিও মানুহে প্ৰায়ে এছিয়াৰ অৰ্থনৈতিক উত্থানৰ কথা উল্লেখ কৰে, এই সন্মিলনখনে আলোকপাত কৰে যে এছিয়ান শতিকা কেৱল অৰ্থনৈতিক মূল্যৰ বিষয়েই নহয়, সামাজিক মূল্যবোধৰ বিষয়েও। তেওঁ গুৰুত্ব আৰোপ কৰি কয় যে ভগৱান বুদ্ধৰ শিক্ষাই বিশ্বক এক শান্তিপূৰ্ণ আৰু প্ৰগতিশীল যুগ সৃষ্টি কৰাত পথ প্ৰদৰ্শন কৰিব পাৰে আৰু তেওঁৰ জ্ঞানে মানৱ-কেন্দ্ৰিক ভৱিষ্যতৰ দিশে লৈ যোৱাৰ শক্তি ৰাখে।

সংঘাত পৰিহাৰ- সম্বাদ (SAMVAD)ৰ এই মূল বিষয়বস্তুৰ বিষয়ে আলোচনা কৰি প্ৰধানমন্ত্ৰীগৰাকীয়ে মন্তব্য কৰে যে সংঘাত প্ৰায়ে এই বিশ্বাসৰ পৰা উদ্ভৱ হয় যে কেৱল এটা পথহে সঠিক আৰু আনবোৰ ভুল। তেওঁ এই বিষয়ত ভগৱান বুদ্ধৰ অন্তৰ্দৃষ্টিৰ উদ্ধৃতি দি উল্লেখ কৰে যে কিছুমান লোকে কেৱল এটা পক্ষকহে সঁচা বুলি বিবেচনা কৰি নিজৰ দৃষ্টিভংগীৰ সৈতে লাগি থাকে আৰু তৰ্ক কৰে। তেওঁ ঋগবেদৰ কথা উল্লেখ কৰি কয় যে যেতিয়াই আমি স্বীকাৰ কৰিব পাৰো যে সত্যক বিভিন্ন দৃষ্টিৰে চাব পাৰি, তেতিয়াই আমি সংঘাত পৰিহাৰ কৰিব পাৰো।

শ্ৰী মোদীয়ে সংঘাতৰ আন এটা কাৰণ-আনক আমাৰ পৰা মৌলিকভাৱে পৃথক বুলি বিবেচনা কৰাৰ বিষয়ে আলোকপাত কৰে। তেওঁ মন্তব্য কৰে যে পাৰ্থক্যবোৰে দূৰত্বলৈ লৈ যায় আৰু দূৰত্ব বিবাদলৈ ৰূপান্তৰিত হ’ব পাৰে। ইয়াৰ প্ৰতিৰোধ কৰিবলৈ তেওঁ ধম্মাপদৰ এটা শ্লোক উল্লেখ কৰে, য’ত কোৱা হৈছে যে সকলোৱে বেদনা আৰু মৃত্যুক ভয় কৰে। তেওঁ গুৰুত্ব আৰোপ কৰি কয় যে আনকো নিজৰ দৰেই ভাবিব পাৰিলে কোনো ক্ষতি বা হিংসা নহয় বুলি আমি নিশ্চিত কৰিব পাৰো। তেওঁ লগতে কয় যে এই কথাবোৰ অনুসৰণ কৰিলে সংঘাত পৰিহাৰ কৰিব পাৰি।

শ্ৰী মোদীয়ে কয়, ‘বিশ্বৰ বহুতো সমস্যা সন্তুলিত দৃষ্টিভংগীৰ পৰিৱৰ্তে চৰম স্থিতি গ্ৰহণৰ পৰা উদ্ভৱ হয়।’ তেওঁ উল্লেখ কৰে যে অত্যাধিক মতবাদে সংঘাত, পাৰিপাৰ্শ্বিক সংকট আৰু মানসিক চাপজনিত স্বাস্থ্য সমস্যাৰ সৃষ্টি কৰে। তেওঁ গুৰুত্ব আৰোপ কৰি কয় যে এই প্ৰত্যাহ্বানসমূহৰ সমাধান ভগৱান বুদ্ধৰ শিক্ষাত নিহিত, যিয়ে আমাক মধ্যপথ অনুসৰণ কৰিবলৈ আৰু চৰম সীমাৰ পৰা আঁতৰি থাকিবলৈ আহ্বান জনাইছিল। তেওঁ উল্লেখ কৰে যে সংযমৰ নীতি আজিও প্ৰাসংগিক হৈ আছে আৰু ই বিশ্বজনীন প্ৰত্যাহ্বানৰ মোকাবিলা কৰাৰ ক্ষেত্ৰত নিৰ্দেশনা প্ৰদান কৰে।

প্ৰধানমন্ত্ৰীয়ে লক্ষ্য কৰে যে বৰ্তমান সংঘাত মানুহ আৰু ৰাষ্ট্ৰৰ বাহিৰলৈও সম্প্ৰসাৰিত হৈছে, মানৱতা ক্ৰমান্বয়ে প্ৰকৃতিৰ সৈতে সংঘৰ্ষত লিপ্ত হৈছে। তেওঁ মন্তব্য কৰে যে ইয়াৰ ফলত এক পৰিবেশ সংকটৰ সৃষ্টি হৈছে, যিয়ে বিশ্বৰ প্ৰতি ভাবুকিৰ সৃষ্টি কৰিছে। তেওঁ গুৰুত্ব আৰোপ কৰি কয় যে এই প্ৰত্যাহ্বানৰ উত্তৰ ধম্মাৰ নীতিত নিহিত এছিয়াৰ অংশীদাৰী পৰম্পৰাৰ ওপৰত নিৰ্ভৰ কৰে। তেওঁ উল্লেখ কৰে যে হিন্দু ধৰ্ম, বৌদ্ধ ধৰ্ম, শ্বিন্তো ধৰ্ম আৰু অন্যান্য এছিয়ান পৰম্পৰাই আমাক প্ৰকৃতিৰ সৈতে সম্প্রীতিৰে জীয়াই থাকিবলৈ শিকায়। তেওঁ কয় যে আমি নিজকে প্ৰকৃতিৰ পৰা পৃথক বুলি নেদেখো বৰঞ্চ ইয়াৰ এটা অংশ হিচাপেহে দেখো। শ্ৰী মোদীয়ে মহাত্মা গান্ধীয়ে সমৰ্থন কৰা ন্যাসৰ ধাৰণাটোৰ ওপৰত আলোকপাত কৰি কয় যে আজি প্ৰগতিৰ বাবে প্ৰাকৃতিক সম্পদ ব্যৱহাৰ কৰোতে আমি ভৱিষ্যত প্ৰজন্মৰ প্ৰতি আমাৰ দায়িত্বৰ কথাও বিবেচনা কৰিব লাগিব। তেওঁ মন্তব্য কৰে যে এই দৃষ্টিভংগীয়ে নিশ্চিত কৰে যে সম্পদসমূহ বিকাশৰ বাবে ব্যৱহাৰ কৰা হয়, লোভৰ বাবে নহয়।

শ্ৰী মোদীয়ে মন্তব্য কৰে যে তেওঁ পশ্চিম ভাৰতৰ এখন সৰু চহৰ ভাদনগৰৰ বাসিন্দা, যিখন এসময়ত বৌদ্ধ শিক্ষাৰ এক মহান কেন্দ্ৰ আছিল। ভাৰতীয় সংসদত তেওঁ বাৰাণসীক প্ৰতিনিধিত্ব কৰে, য’ত ভগৱান বুদ্ধই তেওঁৰ প্ৰথম বক্তৃতা প্ৰদান কৰা পবিত্ৰ স্থান সাৰনাথ অন্তৰ্ভুক্ত আছে। ভগৱান বুদ্ধৰ সৈতে জড়িত স্থানসমূহে তেওঁৰ যাত্ৰাক আকাৰ প্ৰদান কৰাটো এক সুন্দৰ কাকতালীয় ঘটনা বুলি তেওঁ উল্লেখ কৰে।

‘ভগৱান বুদ্ধৰ প্ৰতি আমাৰ শ্ৰদ্ধা ভাৰত চৰকাৰৰ নীতিত প্ৰতিফলিত হৈছে’, প্ৰধানমন্ত্ৰীগৰাকীয়ে কয়। তেওঁ উল্লেখ কৰে যে তেওঁলোকে বৌদ্ধ চাৰ্কিটৰ অংশ হিচাপে গুৰুত্বপূৰ্ণ বৌদ্ধ স্থানসমূহক সংযোগ কৰিবলৈ পৰ্যটন আন্তঃগাঁথনি বিকশিত কৰা হৈছে। তেওঁ মন্তব্য কৰে যে এই চাৰ্কিটৰ ভিতৰত ভ্ৰমণৰ সুবিধাৰ বাবে ‘বুদ্ধ পূৰ্ণিমা এক্সপ্ৰেছ’ বিশেষ ৰে’লগাড়ী আৰম্ভ কৰা হৈছে। তেওঁ গুৰুত্ব আৰোপ কৰি কয় যে কুশীনগৰ আন্তঃৰাষ্ট্ৰীয় বিমানবন্দৰৰ উদ্বোধন হৈছে এক ঐতিহাসিক পদক্ষেপ, যি আন্তঃৰাষ্ট্ৰীয় বৌদ্ধ তীৰ্থযাত্ৰীসকলক উপকৃত কৰে। তেওঁ বুদ্ধগয়াৰ আন্তঃগাঁথনি বৃদ্ধিৰ বাবে বিভিন্ন উন্নয়নমূলক পদক্ষেপৰ কথাও ঘোষণা কৰে আৰু ভগৱান বুদ্ধৰ দেশ ভাৰত ভ্ৰমণ কৰিবলৈ বিশ্বৰ বিভিন্ন প্ৰান্তৰ তীৰ্থযাত্ৰী, পণ্ডিত আৰু সন্ন্যাসীসকলক আন্তৰিকতাৰে আমন্ত্ৰণ জনায়।

বহু শতিকাৰ আগতে সংঘাতৰ শক্তিৰ দ্বাৰা ধ্বংস হোৱা নালন্দা মহাবিহাৰ ইতিহাসৰ অন্যতম সৰ্বশ্ৰেষ্ঠ বিশ্ববিদ্যালয় আছিল বুলি উল্লেখ কৰি প্ৰধানমন্ত্ৰীয়ে কয় যে ভাৰতে ইয়াক শিক্ষাৰ কেন্দ্ৰ হিচাপে পুনৰুজ্জীৱিত কৰি স্থিতিস্থাপকতা প্ৰদৰ্শন কৰিছে। ভগৱান বুদ্ধৰ আশীৰ্বাদত নালন্দা বিশ্ববিদ্যালয়ে ইয়াৰ পূৰ্বৰ গৌৰৱ পুনৰ লাভ কৰিব বুলি তেওঁ আস্থা প্ৰকাশ কৰে। ভগৱান বুদ্ধই শিক্ষা প্ৰদান কৰা ভাষা পালিৰ প্ৰচাৰৰ বাবে গ্ৰহণ কৰা গুৰুত্বপূৰ্ণ পদক্ষেপৰ ওপৰত আলোকপাত কৰি ইয়াৰ সাহিত্যৰ সংৰক্ষণ নিশ্চিত কৰিবলৈ ইয়াক এক ধ্ৰুপদী ভাষা হিচাপে ঘোষণা কৰে। তেওঁ লগতে বৌদ্ধ ধৰ্মৰ পণ্ডিতসকলৰ সুবিধাৰ বাবে প্ৰাচীন পাণ্ডুলিপি চিনাক্ত কৰাৰ লগতে তালিকাভুক্ত কৰা আৰু ডিজিটেলাইজেচনক উৎসাহিত কৰাৰ বাবে জ্ঞান ভাৰতম অভিযান আৰম্ভ কৰাৰ কথাও উল্লেখ কৰে।

শ্ৰী মোদীয়ে ভগৱান বুদ্ধৰ শিক্ষাৰ প্ৰচাৰৰ বাবে যোৱা দশকত বহুতো ৰাষ্ট্ৰৰ সৈতে সহযোগিতাৰ বিষয়ে আলোকপাত কৰে। তেওঁ উল্লেখ কৰে যে শেহতীয়াকৈ ভাৰতত ‘এছিয়া শক্তিশালী কৰাৰ ক্ষেত্ৰত বুদ্ধ ধম্মাৰ ভূমিকা’ শীৰ্ষক বিষয়বস্তুৰ অধীনত প্ৰথম এছিয়ান বৌদ্ধ সন্মিলন অনুষ্ঠিত হৈছিল আৰু ইয়াৰ পূৰ্বে ভাৰতে প্ৰথমবাৰৰ বাবে বিশ্ব বৌদ্ধ সন্মিলন আয়োজন কৰিছিল। তেওঁ নেপালৰ লুম্বিনীত ভাৰত আন্তঃৰাষ্ট্ৰীয় বৌদ্ধ সংস্কৃতি আৰু ঐতিহ্য কেন্দ্ৰৰ আধাৰশিলা স্থাপনৰ সন্মান আৰু লুম্বিনী সংগ্ৰহালয় নিৰ্মাণত ভাৰতৰ অৱদানৰ কথা উল্লেখ কৰে। ইয়াৰ উপৰি তেওঁ মংগোলিয়াৰ মঠসমূহলৈ ১০৮ টা খণ্ডৰ মংগোলিয়ান কাঞ্জুৰ ভগৱান বুদ্ধৰ ‘সংক্ষিপ্ত আদেশ’ পুনৰ প্ৰকাশ আৰু বিতৰণৰ বিষয়ে দৃষ্টিগোচৰ কৰে। বহু দেশত স্মৃতিসৌধ সংৰক্ষণৰ ক্ষেত্ৰত ভাৰতৰ প্ৰচেষ্টাই ভগৱান বুদ্ধৰ উত্তৰাধিকাৰৰ প্ৰতি দায়বদ্ধতাক শক্তিশালী কৰে বুলিও তেওঁ মন্তব্য কৰে।

প্ৰধানমন্ত্ৰীয়ে মন্তব্য কৰে যে সম্বাদ (SAMVAD)ৰ এই সংস্কৰণে বিভিন্ন ধৰ্মীয় নেতাসকলক একত্ৰিত কৰি এক ধৰ্মীয় ঘূৰণীয়া মেজমেলৰ আয়োজন কৰাটো উৎসাহজনক। তেওঁ আস্থা প্ৰকাশ কৰে যে এই মঞ্চৰ পৰা মূল্যৱান অন্তৰ্দৃষ্টি উদ্ভৱ হ’ব, যিয়ে এক অধিক সামঞ্জস্যপূর্ণ বিশ্ব গঠন কৰিব। শ্ৰী মোদীয়ে সন্মিলনখন আয়োজন কৰাৰ বাবে থাইলেণ্ডৰ জনসাধাৰণ আৰু চৰকাৰৰ প্ৰতি কৃতজ্ঞতা জ্ঞাপন কৰে। এই মহান অভিযানৰ অগ্ৰগতিৰ বাবে সমবেত হোৱা সকলো অংশগ্ৰহণকাৰীক তেওঁ শুভেচ্ছা জ্ঞাপন কৰে। ধম্মাৰ পোহৰে সকলোকে শান্তি, প্ৰগতি আৰু সমৃদ্ধিৰ যুগলৈ পথ প্ৰদৰ্শন কৰি থাকিব বুলি আশা প্ৰকাশ কৰি তেওঁ ভাষণৰ সামৰণি মাৰে।

***

MJPS/SR/MK