ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ভিদিও কনফরেন্সকী খুত্থাংদা দি তামিল নাদু দা. এম.ই.আর. মেদিকেল য়ুনিভর্সিতীগী ৩৩শুবা কনভোকেসন্দা ৱা ঙাংখ্রে। কনভোকেসন অদুদা কেন্দিদেৎ ২১০০০ হেনবদা দিগ্রীশিং অমসুং দিপ্লোমাশিং পীখ্রে। থৌরম অদুদা তামিল নাদুগী গভর্নর শ্রী বানৱারিলাল পুরোহিৎসু শরুক য়াখ্রে।

মহৈরোইশিংদা ৱা ঙাংলদুনা প্রধান মন্ত্রীনা দিগ্রীশিং অমসুং দিপ্লোমাশিং লৌরিবা কেন্দিদেৎশিংগী ৭০% হেনবদি  নুপী ওইখিবা অসি উবদা নুংঙাইবা ফোঙদোকখ্রে।  মহাক্না গ্রেজ্যুৎ পুম্নমক্তা নুংঙাইবা ফোঙদোকখ্রে অমসুং নুপী কেন্দিদেৎশিংদা মহাক্না অখন্ননা থাগৎ ৱাহৈ ফোঙদোকখ্রে। মহাক্না হায় লম অমা হেক্তদা নুপীশিংনা মাং থানা চংশিনবা উবা খুদিং অখন্নবা ওই। অসিগুম্বা মীকুপশিং অসি চাউথোকচনবগী মীকুপ অমনি অমসুং হরাও-তয়াম্বগী মীকুপ অমনি।

প্রধান মন্ত্রীনা হায় মহৈরোইশিং অমসুং ইন্সতিত্যুসন অসিনা মাই পাকপনা এম.জি.আর.পু য়াম্না হরাওহল্লগনি। শ্রী মোদীনা এম.জি.আর.গী লৈঙাক অসি লায়রবশিংদা মপুং ফানা মীনুংশি উৎখিবা অমনি হায়না নীংশিংখ্রে। হেল্থকিয়র, এজুকেসন অমসুং নুপীশিংবু শক্তি পীবা হায়বা লমশিং অসি মঙোন্দা মরু ওইখি। মহাক্না হায় এম.জি.আর.না পোকখিবা স্রী লঙ্কাদা ঐখোয়গী তামিল ইচিল-ইনাওশিংনা হেল্থ সেক্তরগীদমক থবক তৌরিবা অসি ভারতকী ওইনা লাইবক ফাবনি। ভারতনা শেন্থং পীথবা এম্ব্যুলেন্স সর্ভিস অসি স্রী লঙ্কাদা তামিল কাংলুপা পাক শন্না শিজিন্নরি। মহাক্না হায় অসুম্না তামিল কাংলুপকীদমক হেল্থকিয়রদা হোৎনরিবশিং অসিনা এম.জি.আর.বু য়াম্না নুংঙাইহল্লগনি।

প্রধান মন্ত্রীনা হায় ভারতকী মেদিকেল প্রোফেস্নেলশিং, সাইন্তিস্তশিং অমসুং ফার্মা প্রোফেস্নেলশিং অসিবু য়াম্না থাগৎনরি অমসুং ইকাই খুম্নরি। মহাক্না হায় ভারতনা মালেমগীদমক হিদাক-লাংথকশিং অমসুং বেক্সিনশিং পুথোক্লি। কোবিদ-১৯দা ভারত অসি মালেমগী ওইনা শীবগী চাং খ্বাইদগী নেম্বা অমসুং নাবা ফগৎপগী চাং খ্বাইদগী ৱাংবা ওইখি। মহাক্না হায় ভারতকী হেল্থ ইকোসিস্তেম অসি অনৌবা মীৎয়েং, অনৌবা ইকাই খুম্নবা অমসুং অনৌবা থাজবগা লোইননা য়েংনরি। মহাক্না মখা তারদুনা হায় লাইচৎ অসিগী তমশিলহৌবশিংনা তি.বি.গুম্বা অতোপ্পা লাইনশিংগী লাঞ্জংদা ঐখোয়দা মতেং ওইগনি।

প্রধান মন্ত্রীনা হায় সরকারনা মেদিকেল এজুকেসন অমসুং হেল্থ সেক্তরদা অওনবা পুরক্লি। দি নেস্নেল মিদেকেল কম্মিসননা অনৌবা মেদিকেল কোলেজশিং লিংখৎবা কাংলোনশিং রেস্নেলাইজ তৌগনি, ত্রান্সপরেন্সি হেন্না পুরক্কনি অমসুং সেক্তর অসিদা ক্বালিতী অমসুং হ্যুমেন রিসোর্স লৈহনবা হেনগৎহল্লগনি। মহাক্না হায় হৌখিবা চহি ৬ অসিদা এম.বি.বি.এস. সিৎশিং অসি লিশিং ৩০ হেন্না হেনগৎহনখ্রে হায়রিবা অসি ২০১৪দগীদি ৫০% হেন্না হেনগৎলে। পি.জি.গী সিৎ অসি লিশিং ২৪ হেনগৎলিবা অসি ২০১৪দগী ৮০%রোম হেনগৎলে। ২০১৪দা লৈবাক অসিদা এম্স ৬ লৈরমখি অদুবু হৌখিবা চহি ৬তা লৈবাক অসিদা এম্স ১৫ অমগা সেঙ্কসন তৌখ্রে।

প্রধান মন্ত্রীনা তামিল নাদুগী মেদিকেল কোলেজ অমত্তা লৈতবা জিলাশইংদা অনৌবা মেদিকেল কোলেজ ১১ লিংখৎনবা অয়াবা পীখ্রে হায়না লাউথোকখ্রে। মেদিকেল কোলেজশিং অসিগী ভারত সরকারনা লুপা করোর ২০০০ হেন্না পীগনি। মহাক্না হায় বজেৎতা লাউথোকখিবা পি.এম. আত্মানির্ভর স্বাস্থ ভারত য়োজনা অসিনা অনৌবা অমসুং থোরক্লিবা লাইনাশিং খঙদোক্নবা অমসুং লায়েংনবা প্রাইমারী, সেকেন্দরী অমসুং তর্সিয়রী হেল্থকিয়রগী মতিক-মগুনশিং হেনগৎহল্লগনি।

প্রধান মন্ত্রীনা হায় দোক্তরশিং অসি ঐখোয়গী লৈবাক্তা খ্বাইদগী ইকাই খুম্নবা শিনফমশিংগী মরক্তা অমনি অমসুং ইকাই খুম্নবা অসি লাইচৎ মতুংদনা হেন্না হেনগৎলকখ্রে। ইকাই খুম্নবা অসিগী মরমদি মীয়াম্না নখোয়গী শিনফম অসি কয়াম লুবগে হায়বা থেঙ্খাং কয়াদা খংবা ঙমখি কনাগুম্বা মীওই অমগী শিবা-চংবগী মরক্তা লৈরিবা ৱাফম অমা ওইখি। মহাক্না হায় অরুবা অমসুং অরুবা মানবা হায়বা অনি অসি তোখাইবা পোৎশকশিংনি অমসুং মহৈরোইশিংদা মখোয়না ৱাখল মুন্না খন্থনবা হায়খ্রে। মহাক্না হায় মসিনা মখোয়গী মমা-মপাশিং হরাও হনবদা অমদি মখোয়গী থাক ৱাংনা থম্বদা মতেংসু ওইরগনি। মহাক্না মহৈরোইশিংদা মখোয়গী হকশেল অমসুং মশা-মউ ফনা থম্বদা মীৎয়েং চংনবসু হায়খ্রে মরমদি মখোয়না লৈবাক অসি হকচাং ফনা থম্বীরি। মহাক্না মহৈরোইশিংদা ইশাগী ওইজবা থাদোক্নবা অমসুং অসুম্না তৌবনা মখোয়বু অকিবা পোকহল্লোই হায়না ফোঙদোকখ্রে।

***