ভারতকী প্রধানমন্ত্রী

কেবিনেত্তা লৈরিবা ঐহাক্কী মরুপশিং, লৈবাক অসিগী ঙাক-শেল মন্ত্রী, শ্রীমান রাজনাথ সিংহ, শ্রী অর্জুন মুন্দাজী, শ্রী কিরেন রিজিজুজী, শ্রীমতি রেনুকা সিংহ সরুদাজী অমসুং লৈবাক্কী মফম খুদিংদগী মফম অসিদা লাক্লিবা ঐহাক্কী নহা ওইরবা মরুপশিং, কোরোনা তসেংনা ফিভম কয়া অমা হোংহল্লে। মাস্ক, কোরোনা তেস্ত, ফুৎ ৬কী অরাপ্পা থম্বা, হৌজিক্তি মখোয়শিং অসি নোংমগী পুন্সিগী থৌওং অমগুম্লে। ঐখোয়না মমাংদা ফোতো নম্বা চৎপা মতমদদি কেমেরা কাপ্পা মীওই অদুনা নোকউ হায়নরম্বনি। হৌজিক্তি মাস্ক উপ্পদগী মদুসু হায়বা য়াদ্রে। মফম অসিদসু মীওইশিংনা তোঙান-তোঙান্না ফম্নবা শিল লাংবগী তঙাই ফদবা অসিসু ঐহাক্না উবা ফংই।  খরা খরা শন্দোক্না ফমদবসু য়াদ্রে। অদু ওইরবসু, নখোয়না থৱাই য়াওবা অমসুং নুংঙাইবগী মওংদদি হন্থবগী ফিভমদি উবা ফংদে, হান্নগুম্না অদুম মান্নরি।

মরুপশিং,

নখোয় ময়ামশিং অসি লৈবাক্কী তোঙান-তোঙানবা মফমশিংদগী লাক্লিবনি। লৈবাক্কী লাপ্লবা মফমশিংদগী মরুপ কয়া অমা, এন.সি.সি.-এন.এস.এস.কী ভলন্তিয়রশিং অমসুং রাজপাথতা তোঙান-তোঙানবা রাজ্যশিংগী পাউজেল, মওংশিং অসি অতোপ্পা লৈবাকশিংদা খঙহন্নবা খুৎ-শা হৈরবা মীওই কয়া অমা মফমসিদা লাক্তুনা লৈরে। নখোয়না রাজপাথতা কদম-তাল তৌবা মতমদা লৈবাক মীয়াম খুদিংনা হরাওগদৌরিবনি। নখোয়না ভারতকী নাৎ, চৎনবী কয়াগী মওং উৎপা মতমদা লৈবাক মীয়াম খুদিংনা চাউথোকচগদৌরিবনি। অদুগা পেরেদকী মনুংদা ঐহাক্কী নাকলদা  অতোপ্পা লৈবাক্কী মীওই অমদি অদুমক লৈগনি। মখোয়শিং অসি উবদা মখোয়না অঙকপা ফাওবগা লোয়ননা ঐঙোন্দা ময়াম অসিগী মরম হংই, ৱাহং কয়া অমা হংই অমসুং খঙনবা য়াম্না হোৎনজৈ। লৈবাক্কী করম্বা মফমদা করি লৈ, মতৌ করম্না তৌই, কনা কনা লৈ হায়বনচিংবা কয়া অমা হংই। ত্রাইবেলগী মীওইশিংনা রাজপাথতা মখোয়গী সংস্কৃতীগী মচু উৎলকপা মতমদা, ভারত অসি মখোয়গী মচুনা পুমথন থল্লি। গনতন্ত্রা দিবসকী পেরেদ অসিনা ভারতকী নীংথিরবা খুন্নাই অমসুং সংস্কৃতীগী মরী অমসুং ঐখোয়গী থৌরাং য়াৎপা ঙম্বগী মতিকপুসু ইকায় খুম্নবা উৎলি। মসিগী পেরেদ অসিনা মালেমগী খ্বাইদগী চাউবা দীমোক্রেসী ওইহল্লিবা ঐখোয়গী সংবিধানবুসু ইকায় খুম্নবা উৎলি। ঐহাক্না জনুৱারি ২৬কী নীংথিরবা কুমহৈ অসিগীদমক্তা নখোয়বু থাগৎলি। অদোম্না ঐহাক্না হায়জনিংবা অমসু লৈ। হৌজিক দিল্লীদা য়াম্না ইঙই। খারোমদগী লাকপা মীওইশিংদদি নুংঙাইতবা হেন্না হেল্লমগনি অমসুং নখোয়না মফমসিদা লৈরক্লিবা অসি খরদি কুইরে অমসুং নখোয়গী মরক্তা ইঙবা হৈনদবা মীওইসু অদুম য়াওরমগনি। অয়ুক অঙনবদা হৌগৎলগা নখোয়না দ্রিলগীদমক্তা শেম-শানবা থোকই। নখোয়না ইশাগী হকশেলগী মতাংদা খরা চেকশিনবীয়ু হায়না ঐহাক্না হায়জনীঙই।

মরুপশিং,

হন্দক্কী চহি অসিদা ঐখোয়গী লৈবাক অসিনা নিং-তম্বগী ৭৫শুবা চহিদা চঙশিল্লক্লিবনি। হন্দক চই অসি গুরু তেগ বহাদুরগী ৪০০শুবা মপোক কুমওনসু তাই। অদুগা লোয়ননা হন্দক্কী চহিসিদা নেতাজী সুভাস চন্দ্র বোসকী ১২৫শুবা মপোক কুমওনসু পাংথোক্লি। মহাক্কী মপোক নুমিৎ অসি পরাক্রম দিবস হায়না পাংথোকপা হায়দুনা লৈবাক্না ৱারেপসু লৌখ্রে। ঙরাং ঐহাক্না মহাক্কী পরাক্রম দিবস্তা মহাক্কী পোক্নফম লমদম, কোলকতাদা চৎলুই। নিং-তম্বগী ৭৫শুবা চহি, গুরু তেগ বহাদুরগী পুন্সি, নেতাজীগী থৌনা, মখোয়শিং অসি ঐখোয়গী য়াম্না চাউরবা ইথিল অমনি। ঐখোয়না লৈবাক্কী নিং-তম্বগীদমক্তা কত্থোকপা ফংহৌদ্রে, মসিগী মরমদি ঐখোয় অয়াম্বনা নিং-তম্বগী মতুংদা পোকখিবা ঙাক্তনি। অদুবু লৈবাক অসিনা ঐখোয়গী থৌদাং পাংথোকপগী খুদোংচাবদি অদুমক পীবিখি। ঐখোয়না লৈবাক্কীদমক্তা অফবা তৌবা য়াবা, ভারতপু মপাঙ্গল হেন্না কলহন্নবা তৌফম থোকপা থবক খুদিংমক ঐখোয়না তৌগদবনি।

মরুপশিং,

মফম অসিদা গনৎন্ত্রা দিবসকী শেম-শাবা মতমদা নখোয়না ভারত অসি মখল-মথেলনি থল্লি হায়বা ৱাফম অসি শোইদনা ফাওরমগনি। তোঙানবা লোল, ৱাঙাং, চাবা-থবকপগী মওং। খেৎনবা য়াম্না লৈরবসু ভারত্তি অমত্তনি। ভারত হায়বদি মীওই করোর কয়াগী ৱাজমন, থাজবা/অপাম্বশিংগী শক্তি অমনি। ভারত হায়বদি রাজ্য ময়াম অমা অদুবু লৈবাক অমা হায়বনি। ভারত হায়বদি খুন্নাই য়াম্বা, ৱাখল্লোন্দি অমা হায়বনি। ভারত হায়বদি লম্বী য়াম্বা, পন্থুংফম অমা হায়বনি। ভারত হায়বদি চৎনবী য়াম্বা, মগুন্দি অমা হায়বনি। ভারত হায়বদি লোল য়াম্বা, ফোংদোকপদি অমা হায়বনি। ভারত হায়বদি মচু য়াম্বা, অদুবু মচু অহুমদি অমখক্তনি হায়বনি। শম্না হায়রবদা, লম্বী মশিং য়াম্লবসু, পন্থুংফমদি অমা খক্তনি হায়বনি। ঐখোয়গী পন্থুংফমদি – ভারত অমা, মপাঙ্গল কনবা ভারত অমা।

মরুপশিং,

ভারত অমা, মপাঙ্গল কনবা ভারত অমা হায়রিবা খোল্লাও অসি ঙসিদি লৈবাক্কী মফম খুদিংদা উবা ফংলে অমসুং মপাঙ্গল লৈবসু হেনগৎলক্লি। নখোয়না উবসু উরম্লনি, তাবসু তারম্লনি, মিজোরমগী চহি ৪ খক্তা ঙাইরিবী নুপীমচা অমনা বন্দে মাতরম শকপা অদুদা অতাবা মীওই খুদিংমক তু-চুংখিবনি। কেরলাগী স্কুল কারিবী অঙাং নুপীমচা অমনা য়াম্না ৱানা তমদুনা, ঈশৈ      অমা নীংথিনা শকখিবা অদুদা লৈবাক্কী মপাঙ্গল উবা ফংখি। তেলেগু ঙাংজবী ইচানুপী অমনা স্কুলগী প্রোজেক্ত অমা ওইনা হরিয়ানাগী চাবা-থকপগী চৎনবীগী মতাংদা তাকখিবা মতমদা ভারতকী খ্বাইদগী হেনবগী ফিভম উবা ফংখি।

মরুপশিং,

হৌখিবা নুমিৎশিংদা কোরোনানা মরম ওইদুনা স্কুল অমসুং কোলেজ লোয়না থিংখিবা অদুগী মতমদসু লৈবাক্কী নহাশিংনা দিজিতেলগী খুত্থাংদা অতোপ্পা রাজ্যশিংগা লোয়ননা ৱেবিনার কয়া পাংথোকখি। মসিগী ৱেবিনারশিং অসিদা ঈশৈ-নোংমাই, জগোই, চাবা-থকপা অমসুং অতোপ্পা রাজ্যশিংগী তোঙান-তোঙানবা নুংঙাইরবা হীরমশিংগী মতাংদা খন্ন-নৈনখি। হৌজিকসু সরকারনা মফম খুদিংদা, লম-লমগী লোল অমসুং চৎনবীশিংগী মতাংদা খন্ন-নৈননবা অমসুং থাগৎহন্ননবা খোঙথাং কয়া অমা পায়খৎলি। লৈবাক অসিদা ভারতকী তোঙানবা রাজ্যশিংগী পুন্সি মহিং, কুমহৈশিংগী মতাংদা হেন্না খঙনবা হোৎনরি। খ্বাইদগী মরু ওইবা ওইনা ঐখোয়গী ত্রাইবেল ইচিল-ইনাওশিংগী চৎনবী অমসুং ক্রাফকী মতাংদা ঐখোয়না তমশিনবা য়াই। অসিগুম্বা থৌওং ময়াম অসি পাংথোকপা মতমদা মপাঙ্গল লৈবা ভারত অমা শেম্বদা তেংবাংগনি।

মরুপশিং,

হৌজিক্কান অসিদা ভোকেল ফোর লোকেল হায়বা ৱাহৈগী মতাংদা ঙাংনরিবা অসি নখোয়নসু খঙলমগনি। নখোয়গী অকোয়বগী মনাক্তা পোত্থোক শারিবা, লোকেলগী মফমশিংদা পোত্থোক পুথোক্লিবশিং অদুবু থাগৎপা, পুক্নিং থৌগৎপগী থৌওং অদুবু ভোকেল ফোর লোকেল হায়রিবসিনি। অদুবু মসিগী ৱাখল্লোন অসিবু ভারত অমা, মপাঙ্গল লৈবা ভারত অমগী ৱাখল্লোন অসিনা শৌগৎলবা মতুংদা হেন্না মপাঙ্গল লৈরক্কনি। ঐহাক্না তমিল নাদুদা লৈরবসু, হরিয়ানাগী করিগুম্বা পোত্থোক অমগীদমক্তা ঐহাক্না চাউথোকচগদবনি। কেরলাগী পোত্থোক অমগীদমক্তা হিমাচলদা লৈবা মীওই অমনসু চাউথোকচগদবনি। অতোপ্পা মফম অমগী লোকেলগী পোত্থোক্তা অতোপ্পা মফমগী মীওইনা শৌগৎপা মতমদা লোকেলগী পোত্থোকশিং অসি খক্তনা লৈবাক্কী মফম খুদিংদা য়ৌবা ঙমগনি অমসুং মসিবু মালেমগী ওন্থোকপা ঙম্বগী পাঙ্গল লাক্কনি।

মরুপশিং,

মসিগী ভোকেল ফোর লোকেল, আত্মানির্ভর ভারত অভিয়ান, মসিগী মাই-পাকপা অসি নখোয় নহাশিংগী খুত্তা লৈ অমসুং ঙসি ঐহাক্কী মাংদা এন.সি.সি. অমসুং এন.এস.এস.কী নহা কয়া অমসু লৈরি। মখোয়দদি অসিগুম্বা মহৈ-মশিং অসি পীরবনি। ঐহাক্না ঙসি নখোয়দা অপিকপা থবক অমা শিন্ননীংই। ঐহাক্কী লৈবাক্কী নহা ওইরিবা এন.সি.সি.গী কেদেৎশিংনা ঐহাক্কী তেংবাংগনি থাজৈ। নখোয়না থবক অমতা তৌবীয়ু। অয়ুক হেক হৌগৎপদগী নুমিদাংগী তুম্লমদাই ফাওবা শিজিন্নবা পোত্থোকশিং – তুথ পেস্ত ওইরো, ব্রশ ওইরো, মোম্পাক ওইরো, য়ুমগী এ.সি. ওইরো, মোবাইল ওইরো, পোত্থোক অমা হেক্তা য়াই, নখোয়না করি পোত্থোক তঙাই ফদগে হায়বা য়েংবীয়ু অমসুং মখোয়শিং অদুদগী করম্বা পোত্থোক্তা ঐখোয়গী লৈবাক্কী শিন্মীশিংগী হুমাং মনম নম্বগে অমসুং করম্বা পোত্থোক্তা ইরৈবাক অসিগী লৈবাক্কী মনম নম্বগে হায়বা য়েংবীয়ু। অতোপ্পা মীরমগী পোত্থোক ময়াম্না ঐখোয়গী পুন্সিসে থল্লে হায়বা খঙবগা নখোয় ঙক্কনি। মদুদা মুন্না য়েংলবা মতুংদা মরোমদোম লেপচবা ঙম্বা ভারত ওইহনবা অসি ঐখোয় ইশাদগী হৌই হায়বা খঙগনি। মসিদা ঐহাক্না নখোয়না মীরমগী পোত্থোকশিং অসি হয়েংমক হুন্দোকউ হায়বা নত্তে। ঐহাক্কীসি মীরমদদি শাবা অমসুং ঐখোয়গীদি লৈজদবা পোত্থোকশিং শিজিন্নগনু হায়বসু নত্তে। অদুবু অসিগুম্বা মীরমগী পোত্থোকশিং অসিনা ঐখোয়গী নোংমগী পুন্সিদা পুম্থন থল্লে  অমসুং মখোয়না ঐখোয়বু মীনায় ওইহল্লে হায়বসি ঐখোয় ইশানা ফাওবা খঙজদে। ঐহাক্না ৱাফম অসি ঐহাক্কী এন.সি.সি.গী নহাশিংদা খঙহন্নীংই। এন.এস.এস.কী ভলন্তিয়রশিংদা খঙহনজনীংই। নখোয়না নখোয়গী ইমুং মনুংদা নীংথিনা ফম্মিন্নদুনা মসিগী মতাংদা হায়বীয়ু। মদুদগীদি নখোয়না ঐহাক্কী ৱাহৈ অসি নীংশিংদ্রগসু য়ারে, নখোয়না লৈবাক অসি কয়া য়াম্না শোকহল্লম্লবগে হায়বসি নখোয়গী থৱাইনা অদুমক হায়রক্লগনি।

মরুপশিং,

ভারতনা মীওই অমনা হায়রগা আত্মানির্ভর ওইগদবা নত্তে, ঐহাক্না হায়বগুম্না মসিদি ঐখোয়গী মরুপ নহাশিংনা পাংথোকপদগী ওইগনি। নখোয়দা মসিগী তঙাই ফদবা স্কিল-সেৎ লৈরবকান্দা মসিগী থবকসি হেন্না নীংথিজনা পাংথোকপা ঙমগনি।

মরুপশিং,

স্কিলগী অসিগুম্লবা মরু ওইবশিং অসি য়েংলবা তুংদা, ইং ২০১৪দা ঐখোয়গী সরকার হেক শেমখিবগা ঐখোয়না স্কিল দিভেলপমেন্তকী অখন্নবা মন্ত্রালয় অমা শেমখি। মসিগী খোঙথাং অসিগী মনুং চনবা ওইনা, ঙসি ফাওবদা করোর ৫দগী হেনবা নহাশিংদা তোঙান-তোঙানবা হীরম অমসুং স্কিলগী মতাংদা ত্রেনিং পীখ্রে। স্কিল চাউখৎপগী অসিগুম্লবা খোঙথাং অসিগী খুত্থাংদা ত্রেনিং খক্তা নত্তনা নহা লাখ কয়া অমদা থবক পীনবা তেংবাং কয়া অমসু পীবগী থবকসু লেপ্তনা চত্থরি। মসিগী পান্দমদি ভারত্তা স্কিল লৈবা নহা মতিক চানা লৈহনবনি অমসুং স্কিল-সেৎ অসিগী খুত্থাংদা থবক ফংবগী খুদোংচাবা কয়া অমা লৈহল্লে।

মরুপশিং,

মরোমদোম লেপচবা ভারত ওইহন্নবগীদমক্তা নহাশিংনা স্কিলদা মিৎয়েং চঙবা অসিগী থৌওং অনৌবা নেস্নেল এজুকেসন পোলিসীদসু য়াওহল্লে। নখোয়নসু মসিগী মতাংদা য়েংবা য়ারগনি। মসিদা মহৈ তম্বতা নত্তনা মদুগী শিজিন্নফমদসু হেন্না মিৎয়েং চঙলগনি। নেস্নেল এজুকেসন পোলিসীনা মরু ওইনা হোৎনরিবা অসিদি নহাশিংদা মখোয়না অপাম্বা হীরম খনবগী নিং-তম্বা ফংবা অসিনি। মখোয়না করমকান্দা মহৈ তম্বা হৌগনি, তোক্কনি অমসুং নৌহৌননা অমুক করম্বা মতমদা হৌবা য়াগনি হায়বা খনবগী খুদোংচাবা পীরগনি।

মরুপশিং,

মসিগী অনৌবা পোলিসী অসিদা ভোকেস্নেল এজুকেনবু অহানবা ওইনা এজুকেসনগী মরু ওইবা হীরমগী মনুংদা পুশিল্লক্নবা কন্না হোৎনরি। ক্লাস ৬তগী হৌনা মহৈরোয়শিংনা মহাক্কী মফমগা মরী লৈনবা মহাক্কী অপাম্বা কোর্স খন্দুনা মহৈ তম্বা হৌবা য়ারগনি। মসি শুপ্নগী তাকপীবগী কোর্স নত্তে, মসিদি তসেংনা মহৈ তম্বগী কোর্সনি। মসিদা লোকেলগী স্কিল লৈবা মীওইশিংনা প্রেক্তিকেল ওইবা মহৈ-মশিং তাকপীবগী খুদোংচাবসু পীগনি। মসিগী মতুংদা মিদ্দল স্কুলদা ভোকেস্নেল এজুকেসনবু তাঙ্কক নায়না য়াওহনবগী থৌরাংসু লৈরি। ঐহাক্না নখোয়গী মসিগী মতাংদা হায়রিবগী মরমদি, নখোয়না খঙদুনা লৈরিবমখৈ নখোয়গী তুংগী পুস্নিদা মাই-পাকপা হেনগনি হায়বগীদমক্তনি।

মরুপশিং,

নখোয় খক্তনা আত্মানির্ভর ভারত ওইহনবগী অশেংবা থৌমীনি। এন.সি.সি., এন.এস.এস. ওইরো, নত্ত্রগা অতোপ্পা লুপ ওইরো, ঐখোয়গী লৈবাক্কী মাংদা লাকখিবা শিংনবা খুদিং থেংনবগী নখোয়না থৌদাং লৌদুনা লাক্লি। কোরোনাগী মতমদসু, নখোয়না ভলন্তিয়র ওইনা পাংথোকখিবা থৌদাংশিং অসিদি থাগৎপগী লোইবা নাইরোই। লৈবাক অসিনা অমসুং লৈঙাক্লোইশিংনা থৌমীগী তঙাই ফদবা য়াম্না লৈরকখিবা মতমদা, নখোয়না ভলন্তিয়র ওইনা থোক্লক্তুনা শিল-লাংবগী থৌওংশিংদা তেংবাংখি। আরোগ্যা সেতুবু মীওই খুদিংদা য়ৌহনবগী মতাং নত্ত্রগা কোরোনাগা মরী লৈনবা ই-পাউশিংবু মীয়ামদা শন্দোকপগী মতাংদা নখোয়না থম্মোই শেংনা তেংবাংখি। কোরোনাগী মতম অসিদা ফিৎ ইন্দিয়া ইহৌগী খুত্থাংদা হকশেল ফনা লৈনবগী ই-পাউ শন্দোকপদা নখোয়না পাংথোকখিবা থৌদাংশিং য়াম্না থাগৎনীংঙাই ওইখি।

মরুপশিং,

নখোয়না হৌজিক ফাওবদা পাংথোকখিবশিং অসিবু অনৌবা থাক্তা অমুক পুখৎপগী মতম লাক্লবনি। ঐহাক্না নখোয়দা মসি হায়রিবগী মরমদি নখোয়না লৈবাক অসিগী মফম খুদিংদা অমসুং খুন্নাই খুদিংদা য়ৌবা ঙম্মি। হৌজিক লৈবাক অসিদা চত্থরিবা কোরোনাগী তিকা থাবগী থবকশিং অসিদসু তেংবাংবীয়ু হায়না ঐহাক্না নখোয়দা হায়নীংই। নখোয়না লৈবাক্কী লায়রবা মীওইশিং অমসুং মীচম-মীয়ামদা ভেক্সিন অমসুং মসিগী মরী লৈনবা ই-পাউশিং অসি য়ৌহনগদবনি। কোরোনাগী ভেক্সিন অসি ভারত্তা শাদুনা ভারতকী বৈগ্যানিকশিংনা মখোয়গী মথৌ নীংথিনা পাংথোকখ্রে। অরানবা পাউ অমসুং তোকঙা শন্দোকপশিং অসিবু ঐখোয়না অচুম্বা ই-পাউ শন্দোক্তুনা মাইথীবা পীগদবনি। ঐখোয়গী গনতন্ত্রনা মপাঙ্গল লৈরিবসি ঐখোয়গী মীচম-মীয়াম্না মথৌদা পুকচেল শেংবা অসিননি হায়না ঐহাক্না নখোয়দা খঙহন্নীংই। মসিগী ৱাখল্লোন অসিবু ঐখোয়না মপাঙ্গল কলহনগদবনি। মসিদগী ঐখোয়গী গনতন্ত্রগী মপাঙ্গলসু হেনগৎকনি অমসুং আত্মানির্ভর ভারত ওইহনবগী পান্দমসু ফংবা ঙমগনি। নখোয় খুদিংমক্না অসিগুম্বা লৈবাক্কী থবক অসিদা শরুক য়াবগী খুদোংচাবা ফংলিবনি। ৱাখল শেমগৎনবা, লৈবাকপু মশক খঙনবা অমসুং লৈবাক্কীদমক্তা করিগুম্বা খরা তৌবা ফংনবা, মসিদগী হেনবা অফবা করি লৈরিবগে। জনুৱারি ২৬কী মতুংদা নখোয়না য়ুমদা হন্নখিবা মতমদা মফম অসিদা পাংথোকখিবা থৌরম কয়া অমা নীংশিংলগা চৎখ্রগনি। অদুবু লৈবাক্কীদমক্তা করিগুম্বা খরা তৌগদবা লৈ হায়বসি কৈদৌনুংদা কাওগনু। মসিদ্দি শোইদনা পাংথোক্কদবা থবক্নি। ঐহাক্না নখোয় খুদিংদা য়াইফ পাউজেল পীরি।

হন্না হন্না থাগৎচরি।

****