ভারতকী প্রধানমন্ত্রী

খুরুমজরি !

ঐনা অহানবদা অথোইবা মওংদা ৱাখল্লোন ফোঙদোকখিবা, মচা খায়না ৱা ঙাঙখিবা, ৱাখল্লোন মমুৎ তানা নীংথিবা মওংদা ফোঙদোকখিবা মখোয় নহা অহুমবু থম্মোয়নুংদগী তরাম্না ওকচরি‍। মখোয়দা মশানা মশাবু থাজজবা মতৌ উখি‍। হায়রিবা মরূপ অহুম অসিবু, ঐখোয়গী নহাশিংবু মখোয়না মীয়ামদগী মকোক থোংলকপসিদা য়াইফ-পাউজেল পীজরি‍। লোক সভা স্পীকর শ্রী ওম বিরলা জী, মহৈ মশিংগী মন্ত্রী শ্রী রমেশ পোফ্রিয়াল নিসঙ্ক জী, শান্ন-খোৎনবা অমদি নহারোলগী থৌরম মন্ত্রী শ্রী কিরন রিজিজু জী, অমসুং লৈবাক শিনবা থুংবদগী নহা ওইরিবা মরূপশিং, অদোম পুম্নমক্কী মফমদা লৈবাক্কী নহাশিংগী নুমিৎকী য়াইফ-পাউজেল পীজরি‍।

স্বামি বিবেকানন্দগী মপোক কুমওন নুমিৎসিনা ঐখোয় খুদিংমক্তা অনৌবা ইনোৎ হাপ্লি‍। ঙসিদি নুমিৎ অসি হন্দক্তি য়ুথ পার্লিয়ামেন্তসু লৈবাকসিগী পার্লিয়ামেন্তকী সেন্ত্রেল হোলদা পাঙথোক্লিবা অসিনা হেন্না মরু ওইহল্লে‍। সেন্ত্রেল হোল অসি সংবিধান হৌদোরকপগী খুদম্নি‍। লৈবাকসিনা মশিং য়াম্লবা অচৌবা মীওইশিংনা মফমসিদা নীং তম্বা ভারতকী ফিরেপ কয়া লৌখি, ভারতকী তুংগীদমক খন্ন-নৈনখি‍। ভারতকী তুংগীমক মখোয়গী মঙলান, মখোয়গী কত্থোকপা, মখোয়গী থৌনা, মখোয়গী মতিং, মখোয়না হোৎনরম্বা ময়ামদুগী মমি ঙসিসু সেন্ত্রেল হোলসিদা তারি‍। অদুগা মরূপশিং, অদোম্না ঙসি ফম্লিবা ফম্ফমদুদা সংবিধান হৌদোকখিবা মতমদা লৈবাকসিগী মমীং লৈরবা মীওই অমা নৎত্রগা অমা ফম্লমগনি, ঙসি অদোম্না হায়রিবা ফম্ফমদুদা ফম্লিবনি‍। লৈবাকসিগী অচৌবা মীওইশিংনা ফম্লমবা ফম্ফমদুদা অদোম্না ঙসি ফম্লিবা অসিদা লৈবাকসিনা অদোমগী মফমদা কয়া য়াম্না থাজবা থম্লমগদগে হায়বদু ৱাখলনা শাগৎপিয়ু‍‍। হায়রিবা ৱাখল অসি হৌজিক সেন্ত্রেল হোলদা ফম্লিবা নহা মরূপ খুদিংমক্কী মফমদা লৈরমগনি হায়না ঐনা থাজৈ‍।

অদোম খুদিংমক্না মফমসিদা খন্নখিবা, নৈনখিবা ময়ামদু য়াম্নমক মরু ওইবা ঙাক্তনি‍। অসুম্না অথোই অহেন তান্নবা অসিদা মায় পাক্লিবা খুদিংমক্কী মফমদা নুংঙাইবা ফোঙদোকপগা লোয়ননা ঐনা য়াইফ-পাউজেল পীজরি‍। অদুগা মফমসিদা ঐনা অদোমগী ৱাহৈশিং তাবা মতমদা অদোম্না হায়খিবা ৱাহৈশিং অদু ঐনা ঐগী ত্বীতর হেন্দলদা ত্বীত তৌগনি হায়না ঐগী ৱাখলদা খল্লকখি‍। অদুগা অদোম অহুমখক্তগী নত্তনা রেকোর্দিং মচাক ফংলববদি ঙরাং ফাইনেল পেনেলদা ঙাঙখিবা ৱাহৈশিং অদুসু পার্লিয়ামেন্তকী মফম অসিদা কমদৌনা থৌওং অসি চত্থরিবগে হায়বদু লৈবাক মীয়ামদা খঙহন্নবগীদমক ত্বীত তৌগনি‍। অদোমগী ৱারোলশিং ত্বীত তৌবা হায়বসি ঐগীদমক্তা চাউথোকচনিংঙাইনি‍।

মরূপশিং,

স্বামি জীনা লৈবাক অমদি খুন্নাইসিদা পীরম্লিবশিং অদুনা মতম অমসুং মফমগী মতুং ইন্না মীরোল খুদিংবু পুক্নিং থৌগৎকনি অমদি লম্বী তাক্কনি‍। স্বামি জীগা নকশিন্নবগী ইথিল চেন্দবা পুক্নিং থৌগত্তবা খুঙ্গঙ, ময়োল্লম অমদি মীওই অমবু লৈরমখিগদরা হায়বসি অদোমসু উবিরমগনি‍। স্বামি জীগী থৌওংনা নীংতম ইহৌদা অনৌবা মতিং হাপখি‍। মীনাই নাইথাং ওইনা চহী লিশিং কয়া লৈরকপনা ভারতপু মহাক্কী মপাঙ্গল মথৌনাদগী লাপ্না থম্লমখি‍। স্বামি বিবেকানন্দনা ভারতপু মহাক্কী মপাঙ্গল নীংশিনহনখি, ইথিল পোকহনখি, মথৌনা হাপখি, পুক্নিংগী থৌনা নৌনা ময়োল চোংহনখি, মরৈবাক নীংবগী ইথিল পোকহনখি‍। মতমদুদা লালহৌগী পরিংদা অমদি ইং চিকপগী পরিংদা নীং তম্বগী লান্থেং চত্থিবা অদুদা নীংতম ইহৌ হৌখিবশিং অদু মতৌ অমা নৎত্রগা অমদা স্বামি বিবেকানন্দনা পুক্নিং থৌগৎখি‍ হায়বসি খঙবদা অদোম ঙক্লমবসু য়াই‍। মখোয়বু ফাবা মতমদা, থৌরি য়ানখিবা মতমদা স্বামিজীগা মরী লৈনবা সাহিত্যশিং পুলিসনা শোয়দনা ফংলমগনি‍। স্মামি বিবেকানন্দগী ৱাখল্লোন্দা মীয়ামবু লৈবাক নীংবগী, লৈবাক শেমগৎপগী, নীং তম্বগীদমক থৱায় কত্থোকপগী ইথিল পীবা, নহা খুদিংমক্কী ৱাখলদা ইথিল পীবা য়াবা করিবু য়াওবগে হায়না মতমদুদা নৈনখি‍। মতম অসুম হৌখিদুনা লৈবাক নীং তম্লকখি, অদুবু ঙসিসু স্বামি জীনা ঐখোয়গী ইরক্তা লৈদুনা মতম পুম্বদা পুক্নিং থৌগৎলি, মহাক্কী ৱাখল্লোন ঐখোয়গী থৌওংসিংদা মওং অমা নৎত্রগা অমদা ঙসিসু উবা ফংলি‍। ৱাখল্লোনগী মতাংদা মহাক্না হায়রমবা, লৈবাক নীংবা-লৈবাক শেমবা-লৈবাক্কী কান্নবা হায়বসিদা মহাক্না হায়রম্বা, মীয়ামগী থৌগলদগী হৌরগা খুন্নাই থৌগলফাওবদা মহাক্কী ৱাখল্লোনশিং ঐখোয়গী পুক্নিং ৱাখলদা মনুং য়ৌনা ইথিল পীরি‍। হায়রিবা ৱাফম অসি নহা ওইরিবা মরূপ ময়ামগী মফমদসু শোয়দনা ফাওরমগনি হায়না ঐনা থাজৈ‍। করিগুম্বদা বিবেকানন্দ জীগী লাই উবা মতমদা অদোম্না খন্থরুদনা পুক্নিংদা ইকায়খুম্নবগী ইথিল অমা পোক্লমগনি, কোক নোল্লমগনি, হায়রিবশিং অসি শোয়দনা থোক্লমগনি‍।

মরূপশিং,

স্বামি বিবেকানন্দনা অতোপ্পা মমল নাইদ্রবা খুদোল অমসু পীবিরম্মি‍। খুদোল অসি মীয়াম শেমগৎনবা, লূপশিং শেমগৎনবা খুদোলনি‍। মসিগী মতাঙদা তাঙনা খন্ন-নৈনবা ঙম্লি‍। অদুবু ঐখোয়না মুন্না খঞ্জিল্লুরবদি ঙসিসু মীয়ামগী য়াইফনবা থবক নীংথিনা তৌরিবা লূপশিং স্বামি বিবেকানন্দনা শেমগৎলম্মি হায়বসি খঙবা ঙমগনি‍। মহাক্কী লীচৎ, মীয়ামগী মতেং পাংবগী ৱাখল, মহাক্কী অথোইবা ৱাখলনা মতম পুম্বদা মীয়ামবু হৌদোক্লি‍। মীয়াম্না লূপ শেমবা অমদি লূপনা মীয়াম অমুক শেমগৎপা হায়রিবা লেঙদ্রবা পরিং অসি চত্থদুনা লাক্লি‍। মীয়াম্না স্বামি জীগী মতুং ইন্দুনা লাক্তুনা লূপশিং শেম্নবগী ইথিল পোহল্লি, লূপশিং শেমগৎলি, অদুগা হায়রিবা লূপশিং অসিগী ওইরিবা ফীভম, ৱাখল্লোন, মওং মতৌদগী স্বামি জীনা তাকপিরম্বা অনৌবা মীওইশিংগা পুনশিন্নবগী লম্বী পরিংদা চৎখিবা মীওইশিং থোলক্লকই‍। মীয়ামদগী ইন্সতিত্যুসন অমদি ইন্সতিত্যুসনদগী মীয়াম হায়রিবা পরিং অসি ঙসিসু ভারতকী মপাঙ্গল ওইরি‍। অদোম্না ওন্ত্রপ্রিন্যুরসিপকী মরমদা কয়া অমা তারম্লগনি‍। মদুমক মসিগা মান্নবা থৌওংনি‍। মতিং লৈবা মীশক অমনা মশক থোকপা কম্পেনী অমা শেম্মি‍। তুংদা হায়রিবা কম্পেনি অসিদা শেম্লক্লিবা ইকো-সিস্তেম অদুনা মরম ওইরগা মফমদুদগী মতিং লৈবা মীশক কয়া থোরকই‍। হায়রিবা মীশকশিংদুনা অমুক অনৌবা কম্পেনীশিং শেমগৎলকই‍। লনাই মীওই অমদি ইন্সতিত্যুসনগী পরিং অসি লৈবাক অমদি খুন্নাইসিগী হীরম খুদিংদা, তাঙ্কক খুদিংদা মরু ওইরি‍।

মরূপশিং,

ঙসি লৈবাকসিদা চৎনরিবা অনৌবা নেসনেল এজুকেসন পোলিসী অসিনসু মীয়ামবু শেমগৎপদা মরুওইবা মীৎয়েঙ থম্লি‍। মীয়াম শেমগত্তুনা লৈবাক শেমগৎপগী থৌরাং অসিনা নহাশিংগী অপাম্বা, নহাশিংগী হৈ শিংবা, নহাশিংগী লৌসিং, নহাশিংগী ফিরেপ্পু অথোইবা মফম পীরি‍। হৌজিক্তি অদোম্না অপাম্বা সবজেক্ত, অপাম্বা কোম্বিনেসন, অপাম্বা স্ত্রীম খনবা য়ারে‍। কোর্স অমা মরক্তা লেপ্লগা অনৌবা কোর্স অমা তৌবা পাম্লবসু মদু য়ারে‍। মদুদা অহানবগী কোর্সতুদা অদোম্না হোৎনখিবা ময়াম অদু লেম্না মাঙলরোই‍। অদোম্না তম্লুরিবা খুদিংগী সর্তিফিকেত ফংলগনি, মদুগী মখা চত্থহনগনি‍।

মরূপশিং,

ঙসিদি ঐখোয়গী নহাশিংনা মপান লৈবাকশিংদা চত্তুনা থিরুরিবা অনৌবা ইকোসিস্তেম অদু লৈবাকসিদা লৈহনগদৌরি‍। মফমদুগিঈ অনৌবা মতমগী মহৈ মশিং, হেন্না ফবা এন্তরপ্রাইজকী খুদোংচাবা, হৈশিংববু খঙবিবা, ইকায় খুম্নবিবা ফীভম অদুনা অদোমগী পুক্নিং চিংশিল্লম্বনি‍। হৌজিক্তি অদুগুম্বা ফীভম অদু ঐখোয়গী নহাশিংদা ফংহন্নবা ঐখোয়না থৌরাং তৌরে অমদি হোৎনরি‍। ঐখোয়গী নহাশিংনা মখৌ পোঙনা মখোয়গী হৈশিংবা, মখোয়গী মঙলান উত্থোকচবা ঙমগদবা এনভাইরনমেন্ত অমা, ইকো-সিস্তেম অমা লৈহন্নবগীদমক মহৈ মশিং, খুন্নাই, আইন, হীরম খুদিংবু কেন্দ্রগী মখাদা থম্লক্লি‍। হীরম অসিদা স্বামি জীনা মরুওইবা ৱাফম ফোঙদোক্লম্মি হায়বসিসু ঐখোয়না কাউরোইদবনি‍। স্বামি জীনা মতম পুম্নমক্তা হায়রম্বা, মরুওইপবা ফোঙদোক্লমবা, থৌনা উত্থোক্লমবা, পুক্নিং ৱাখলগী মতিং উৎলম্বা ৱাফমদি য়োৎকী মশিং স্তীলগী নাউরি হায়বসিনি‍। মহাক্কী ইথিল অসিনা ঙসি ভারতকী নহাশিংবু হকচাঙ অমদি পুক্নিং ৱাখল ফনা থম্নবগীদমক অখন্নবা মীৎয়েঙ থম্লি‍। ফিত ইন্দিয়া মুভমেন্ত ওইরবসু, য়োগগী খুত্থাঙদা মীকপ থোকহনবা ওইরবসু নৎত্রগা শান্ন-খোৎনবগা মরী লৈনবা অনৌবা মতমগী মচাক মথুম ওইরবসু মখোয়শিং অসিনা নহাশিংবু পুক্নিং ৱাখল অমদি হকচাঙ ফনা থম্বগা মতেং ওইরি‍।

মরূপশিং,

হন্দক মরক্তি অদোম্না ৱাফম খরা হঞ্জিন হঞ্জিন তারমগনি, অদোমগী নাকোংদা য়ৌরক্লমগনি‍। পর্সোনেলিতী দেভেলপমেন্ত অমসুং তীম মেনেজমেন্ত হায়বা ৱাফমশিং অসি অদোম্না স্বামি বিবেকানন্দগী মরমদা নৈনরবা মতুংদা লায়না খঙবা ঙম্লক্কনি‍। পর্সোনেলিতী দেভেলপমেন্তকী মতাঙদা মহাক্কী লাইৱাদি – ‘নশাবু থাজৌ’ হায়বসিনি‍। লুচিংবগী মতাঙদা মহাক্কী লাইৱাদি ‘পুম্নমকপু থাজৌ’ হায়বসিনি, মহাক্না হায়রম্মি – “অরিবা লাইনিংগী মতুং ইন্না নাস্তিক হায়বসি লাইদা থাজদবা মীওইদুবুনি‍। অদুবু অনৌবা লাইনিংগী মতুং ইন্নদি নাস্তিক হায়বসি মশানা মশাবু থাজবা ঙমদবা মীওইদুবিনি‍।” অদুগা লুচিংবগী মতাঙদদি মহাক মশাদগী হান্না মহাক্কী কাঙবুদা থাজবা থমবা মীশক্নি‍। ঐনা মফম অমদা পাখিবা ৱারী অমা অদোমগী মফমদসু তাহনবা পাম্মি‍। নোংমা স্বামি জীনা মহাক্কী খোঙবু স্বামি সার্দানন্দ জীগা মীয়ামদা ৱা ঙাঙননবা লন্দন্দা চৎখি‍। থৌরাং পুম্নমক তৌবা লোইদুনা তাগদবা মীয়াম পুন্দুনা লৈখি, অমদি মীপুম খুদিংমক্না স্বামি বিবেকানন্দগী ৱা তানবা পুক্নিংনা চিংদুনা লাক্নখি‍। অদুবু ঙাঙলমদাই মতম য়ৌরকপদা স্বামি জীনা ঙসিগী ৱারোল অসি ঐনা ঙাঙলরোই স্বামি সার্দানন্দ জীনা ঙাঙগনি‍। সার্দানন্দ জীদি খঙহৌদনা মাগী মথৌ তারক্কনি হায়না খল্লুদে‍! মহাক মদুগীদমক্তা শেম শাখিবসু লৈখিদে‍। অদুবু সার্দানন্দ জীনা ৱা ঙাঙবা হৌরকপদা মীপুম খুদিংমক ঙক্নখি, মাগী ৱাহৈ তাবদা পুক্নিং শুমহৎখ‍ি‍। মসিমক লুচিংবা অমদি মহাক্কী কাঙবুদা থাজবা থমবগী মতৌ অদুনি‍! ঙসি ঐখোয়না স্বামি বিবেকানন্দ জীগী মরমদা খঙলিবশিং অসিদা স্বামি সার্দানন্দ জীগী চাউরবা থৌদাং য়াওরি‍।

মরূপশিং,

মতম অদুদা অকিবা লৈতবা, লৌথুপ লৌকোই লৈতবা, পুকচেল শেংবা, থৌনা ফবা অমদি পান্দম তাল্লিবা নহাশিংনা লৈবাক অসিনা তুংদা চাউখৎলক্নবগী য়ুম্ফমনি হায়বিরমবা মীওই অদু স্বামিজীনি‍। মহাক্না নহাশিংদা, নহাগী পাঙ্গলদা য়াম্না থাজরম্মি‍। হৌজিক অদোম্না মহাক্কী থাজবা অদুবু থবক ওইনা উৎকদবন‍ি‍। ভারতপু অনৌবা মতোল লোমহনবগী থৌদাং, লৈবাকসিবু মরোমদোম লেপচবা ঙমহনবগী থৌদাং নহাশিংনা লৌগদবনি‍। অদোমগী মরক্তগী মীওই খরনা হৌজিক্তি ঐখোয় চহীসু য়ামদ্রি, নোকপা, শান্নবা পুন্সিগী নুংঙাইবা মহাও লৌবগী মতম্নি হায়না খল্লমগনি‍। মরূপশিং, পান্দম চুম্লবদি, হোৎনবগী থৌনা লৈরবদি চহীনা অপনবা পীদে‍। চহী মতাঙগী থোইদোকপা মথৌ তাদে‍। অদোম্না মতম পুম্নমক্তা নীংশিংগদবদি নীংতম লানগী পজেং ফিরাল নহারোলশিংনা পায়খিবনি‍। সহীদ খুদিরাম বোসনা থৌরি কোঙ্গোয় থুখিবদা মহাক্কী চহী কয়া ওইখি খঙবিবরা? শুপ্নতগী চহী ১৮-১৯ খক্তনি‍। ভগৎ সিংহ থৌরি য়ানখিবদা মহাক্কী চহী কয়া শুখি? শুপ্নতগী চহী ২৪ খক্তনি‍। ভগবান বির্সা মুন্দানা থৱায় কৎখিবদা মহাক্কী চহী কয়া শুখি? য়াম্লবদা চহী ২৫ মঙায়‍। মতমগী মীরোলদুনা লৈবাক্কী নীং তম্নবগীদমক হিংগনি, লৈবাক নীংতম্নবগীদমক শিগনি হায়বা ফিরেপ লৌখি‍। উকিল, প্রোফেসর, বেঙ্কর, তোঙান তোঙানবা শিন্ফমদগী নহা মীরোলশিংনা থোরক্তুনা ঐখোয়বু নীং তম্বা ফংহনখি‍।

মরূপশিং,

ঐখোয় মতমদুদা পোকপনি, ঐসু নীং তম্লবা হিন্দুস্তান্দা পোকপনি‍। ঐনা লোইলম লৈঙাক উখিদে অদুগা ঐগী ইমাঙদা ফম্লিবা ময়ামসু নীং তম্লবা মতুংদা পোকপনি‍। ঐখোয় লৈবাক্কী নীংতম্বগীদমক থৱায় কত্থোকপগী তাঞ্জা ফংদ্রবসু ঐখোয়দা নীংতম্লবা ভারতপু মাঙদা পুখৎনবগী তাঞ্জা অদুদি ফংলি‍। হায়রিবা খুদোংচাবা অসি ঐখোয়না মাঙহল্লোইদবনি‍। ঐগী নহা ওইরিবা লৈবাক মীয়ামশিং, নীংতম্লবা মতুং চহী ৭৫দগী চহী ১০০ ফাওবগী চহী ২৫ -২৬গী মতম অসি য়াম্না মরুওই‍। ২০৪৭দা নীং তম্বগী চহী ১০০ মপুং ফারকপদা চহী ২৫-২৬কী খোঙচৎ অসি য়াম্না মরু ওইগদৌরিবনি‍। মরূপশিং অদোমসু খনবিয়ু ঙসি অদোমগী চহী মতাঙ অসি অদোমগী সনাগুম্লবা চহী মতাঙনি, অথোইবা মতম্নি অমদি মতম অসিনা অদোমবু ভারতকী নীং তম্বগী ১০০শুবা কুমওনগী মায়কৈদা পুদুনা চৎলি‍। হায়বদি অদোমগী চাউখৎপগী পন্দোল, নীং তম্বগী চহী ১০০ মপুং ফাবগী পান্দম অনি অসি পুন্না চৎমিন্নগদৌরিবনি, হায়বদি অদোমগী পুন্সিগী চহী ২৫-২৬ অসিগা লৈবাকসিগী লাক্কদৌরিবা চহী ২৫-২৬ অসিগা মান্নবা কয়া মরুওইবা কয়া লৈরি‍। অদোমগী পুন্সিগী হায়রিবা চহী খরসিদা লৈবাক্কীদমক অথোইবা মফম অমা পীবিয়ু, লৈবাক্কী থৌগল তৌবিয়ু‍। বিবেকানন্দ জীনা হায়রম্মি চৎলিবা চহীচা অসি ভারতকীনি‍। চৎলিবা চহীচা অসি ভারতকী ওইহনবা হায়বসি অদোমগী থৌদাংনি‍। অদোম্না তৌবা থবক খুদিংদা, অদোমগী ফিরেপ খুদিংদা লৈবাক্কী করি কান্নবা য়াওবগে হায়বসি মতম পুম্নমক্তা খনবিয়ু‍।

মরূপশিং,

ঐখোয়গী নহাশিংগী থোরক্তুনা লৈবাক্কী তুংগী লাইবক লেপকদবনি হায়না স্মামি বিবেকানন্দনা হায়রম্মি‍। মরম অসিনা ভারতকী তুংগী লাইবকপু লমজিংবা হায়বসি অদোমগী থৌদাংনি‍। অদোমগী থৌদাং অসি লৈবাকসিগী রাজনিতিদসু লৈ‍। মরমদি রাজনিতি হায়বসি লৈবাকসিদা অফবা অওনবা পুরক্নবা চঙদ্রবা য়াদ্রবা পাম্বৈ অমনি‍। হীরম খুদিংমক্কুম রাজনিতিদসু নহাশিংগী মথৌ য়াম্না তাই‍। অনৌবা ৱাখল্লোন, অনৌবা থৌনা, অনৌবা মঙলান, অনৌবা পান্দম লৈবাকসিগী রাজনিতিদা য়াম্নমক মথৌ তাই‍।

মরূপশিং,

মমাঙদদি কনাগুম্বা নহা অমনা রাজনিতিদা মায় ওনশিল্লক্লবদি য়ুমগী মীওইশিংনা অঙাঙ অসি মাঙবা হৌরে হায়নরম্মি‍। মরমদি রাজনিতিগী মশকসি খৎন-চৈনবা, ৱাথোক লান্থোক, লুত-পাত, শেঞ্জা থুমজানা ওইরম্মি‍। অথি-অথিবা ৱাহৈ কয়া হায়বিরম্মি‍। হীরম খুদিংমক্তা অওনবা পুরকপা ঙম্লবসু লৈঙাক্লোন্দদি অওনবা পুরকপা ঙম্লোই হায়না মীয়াম্না ঙাঙনরম্মি‍। অদুবু ঙসিদি অদোমসু য়েংবিয়ু, ঙসিদি লৈবাক মীয়াম ৱাখল লৌশিং লৈরকপদগী রাজনিতিদা পুকচেল শেংবা মীগীদমক লেপ্নরক্লি‍। লৈবাক্কী মীচম মীয়ামনা পুকচেল শেংবা, পুক্নিং লোঙদবা, থৌগলগী ৱাখল্লোন চেনবা রাজনিতিদা লাকপা মীওইশিংগা খোঙফম লেঙদনা লেপমিন্নরি‍। পুকচেল শেংবা অমদি থবক পাঙথোকপা হায়বসি ঙসিগী রাজনিতিগী অহানবা চঙদ্রবা ৱাফম ওইরক্লি‍। মসি লৈবাকসিদা ৱাখল তানরকপগী চাং ৱাংখৎলকপননি‍। শেঞ্জা থুমজানা মচৎ ওইরম্বা মখোয় কয়া অম ঙসিদি মখোয়গী শেঞ্জা থুমজানা পোৎলুম ওইদুনা লৈরি‍। মখোয়না ফনা হোৎনদুনসু মদুদগী ৱাংমা লান্থোকপা ঙমদনা লৈরিবসি লৈবাক মীয়াম্না ৱাখল তারকপদগীনি‍। হৌজিক্তি লৈবাকসিনা পুকচেল শেংবশিংবু নুংশিরি, পুকচেল শেংবশিংদা থৌজাল পীরি, পুকচেল শেংবশিংগীদমক মখোয়গী মথৌনা পুথোক্তুনা লেপ্লি‍, মখোয়গী থাজবা থম্লি‍। হৌজিক্তি মীয়ামগী মীহুৎশিংসু মথংগী মীখলদা মীখল থেংনগে খল্লবদি সি.ভি. মপাঙ্গল কলহনগদবনি, থবক পাঙথোকখিবশিংগী হিসাব নীংথিনা থমগদবনি হায়বা খঙলক্লে‍। অদুবু মরূপশিং, অহোংবা খরা পুরকপদি হৌজিকসু মথৌ তারি‍ অমদি হায়রিবা অহোংবশিং অসি লৈবাকসিগী নহাশিংনা, অদোম্না পুরক্কদবনি‍। মীয়ামগী লৈঙাক্কী খ্বাসদগী চাউরবা য়েক্নবা অমা হৌজিকসু লৈরি অদুগা য়েক্নবা অদুদি শাগৈগী রাজনিতী অসিবুনি‍। শাগৈগী রাজনিতী অসি মরু ফংনা মুত্থৎখিবা মথৌ তারিবা লৈবাক মাঙদা তাদুনা লৈরিবা শিংনবা অমনি‍। হৌজিক শাগৈগী মিংদা মীখল লায়না কারম্বশিংগী মতম লোইশিল্লক্লে হায়বসি অচুম্বনি‍। অদুবু রাজনিতীদা শাগৈগী লায়না অসি হৌজিকসু লায়চুদুনা লৈরি‍। মখোয়গী ৱাখল্লোন, মওং মতৌ, পান্দম খুদিংমক ইমুং মনুংগী রাজনিতী অমসুং রাজনিতীদা ইমুং মনুং কনখৎপনা মথৌ ওইজবা মীওই খরা হৌজিকসু লৈরি‍।

মরূপশিং,

হায়রিবা শাগৈগী রাজনিতী অসি মীয়ামগী লৈঙাক্তা মওং অমগী শুপ্নম লৈঙাক ওইবগা লোয়ননা লৈবাক্কী মতিং ফুদোকপদা পোৎলুম হেনগৎহল্লি‍। শাগৈগী রাজনিতীদা লৈবাক্না মাঙদা থম্বগী মহুৎ শুপ্নতগী ঐ অমসুং ঐগী ইমুং মনুং হায়বা ৱাখল্লোনসি চেৎশিনহন্নবা হোৎনরি‍। মসিমক ভারতকী রাজনিতী অমসুং খুন্নাইগী লমদা শেঞ্জা থুমজা লৈরকপগী অচৌবা মরম অমা ওইরি‍। শাগৈগী রাজনিতীনা মরম ওইরগা মাঙদা কাখৎলক্লিবা মীওইশিংদুনা মখোয়গী মপা মপুশিংগী শেঞ্জা থুমজাগী হিসাব পুথোকপা ঙমখিদ্রবনিনা মখোয়গীসু কনা অমত্তনা মতু নাম্মা শোকপা ঙম্লোই হায়না খল্লি‍। মখোয়দি মখোয়গী ময়ুমদা ফাওবা অসিগুম্বা চৎনরোল অসি উবা ফংলি‍। মরম অসিনা অসিগুম্বা মীওইশিংসিনা চৎন-কাঙলোনবু ইকায়খুম্নদে অমদি চৎন-কাঙলোনবু নাচুংদে‍।

মরূপশিং,

হায়রিবা ফীভম অসি হোংদোকপগী থৌদাং লৈবাক মীয়াম্না ৱাখল তারকপদা, লৈবাক্কী নহারোলশিংদা লৈরে অমদি রাস্ত্রয়াম জাগ্রিয়াম হায়রিবা লাইৱাসিগা লোয়ননা হিংবা মথৌ তাই‍। অদোম্না হেক ঙম্লিবমখৈ রাজনিতীদা শরুক য়াবিয়ু, থোইদোক হেন্দোক্না শরুক য়াবিয়ু‍। ওইজ-ওইথক্কী ৱাখল্লোন নত্তবদা করিগুম্বা খরা তৌরম্নবগী ৱাখলগা লোয়ননা থোকপিরকউ‍। অদোমগী ৱাখল্লোন অমসুং মঙলান পুদুনা থোকপিরকউ‍। পুনশিন্নদুনা থবক তৌসি, অমত্তা ওইনা তৌসি, নীংহন্নবা লৈতনা তৌসি‍। লৈবাক্কী মীচন নহাশিংনা রাজনিতীদা য়াওদ্রিবমখৈ শাগৈগী হু অসিনা ঐখোয়গী মীয়ামগী লৈঙাক অসিবু মপাঙ্গল শোন্থহন্দুনা লৈখিগনি হায়বসি নীংশিংবিয়ু‍। লৈবাকসিদা মীয়ামগী লৈঙাক কন্নবগীদমক অদোম রাজনিতী য়াওবা মথৌ তাগনি‍। অদুগা ঐখোয়গী নহাশিংগী লোয়শঙগী খুত্থাঙদা মোক পার্লিয়ামেন্ত লেপ্পা লৈতনা পাঙথোক্লিবা অসিদা লৈবাক্কী হীরমশিংদা নহা ওইরিবা মরূপশিংনা পুনশিন্নদুনা খন্ন-নৈনরি‍। লৈবাক্কী নহারোলশিংবু ভারতকী সেন্ত্রেল হোলদা পুরক্লি‍। মসিগী পান্দমদি লৈবাকসিঈ লাক্কদৌরিবা নহারোলশিংবু ঐখোয়গা পুন্না লাক্কদৌরিবা চহীশিংদা লৈবাক অসিবু লমজিংনবা, মাঙদা পুখৎনবা শেম শানবগীদমক্তনি‍। অদোমগী মাঙদা স্বামি বিবেকানন্দ গুম্বা অচৌবা মীওইশিংনা তাকপিরম্বা লম্বী লৈরে‍। মদুদগী পুক্নিং থৌগত্তুনা অদোমগুম্বা নহাশিংনা রাজনিতীদা খোঙদারকপা মতমদা লৈবাক অসি হেন্না মপাঙ্গল কনগদৌরিবনি‍।

মরূপশিং,

স্বামি বিবেকানন্দ জীনা নহাশিংগীদমক য়াম্না মরুওইবা লাইৱা অমসু তাকপিরম্মি‍। মহাক্না হায়রম্মি – “খুদোংথিবা নৎত্রগা অৱাবা ফীভম অমদগী হেন্না মরুওইবদি মদুদগী তমহৌরিবা ৱাফমদুনি‍।” মসিদগী অদোম্না করি খঙজিনবা য়াবগে‍। ঐখোয়না লাংফম অমা নংলকপদা পুক্নিং ইংথবসু মথৌ তাই থৌনাসু মথৌ তাই‍। অসিগুম্বা লাংফম অসিনা ঐখোয়দা শোয়খ্রিবা অদু অমুক মেনখৎপা নৎত্রগা অনৌবা খোঙফম অমদগী অমুক নৌনা হৌননবা তাঞ্জা পীরি‍। অয়াম্বা মতমদা ঐখোয়না লাংফম অমদি খুদোংথিবা অমা নংলবা মতমদা অনৌবা ৱাখল খল্লকই অমদি হায়রিবা ৱাখল অদুনা তুংগী মহৈদা কমদৌনা অহোংবা পুরকপগে হায়বদু য়েংই‍। অদোমগী পুন্সিদসু অসিগুম্বা ফীভম থেংনরমগনি‍। ঙসি অদোমগী মফমদা ৱাফম অমা শোয়দনা থমবা পাম্মি‍। ২০০১দা গুজরাতকী কচ্ছতা য়ুহা হাবা মতমদা মীকুপ খরদা পুম্নমক মাঙ তাক্লম্মি‍। কচ্ছ পুম্নমক মওং অমদা অশিবগী ফিঙৌনা কুপ্তুনা তুমখিবগুম লৈখি, য়ুম্বী কয়া লৈমায়দা কিন্থখি‍। ফীভম অদু উরগা মীয়াম্না কচ্ছ মতম পুম্বগী ওইনা মাঙ তাক্লে হায়নখি‍।‍ য়ুহা হাখিবা মতুং থা খরা লৈরগা ঐনা গুজরাতকী মুখ্য মন্ত্রী ওইনা থৌ পুননবগী থৌদাং ফংখি‍। মায়কৈ খুদিংদা হৌজিক্তি গুজরাত পুম্মাঙ মাঙলে হায়বা খোঞ্জেলনা নিনখি‍। ঐখোয়না অনৌবা থৌওং অমদা থবক পায়খৎখি, লাল্লোং অনৌবা অমা য়াৎখি‍। ঐখোয়না য়ুম্বীশিং নৌনা শাবখক নত্তনা কচ্ছপু চাউখৎপগী অনৌবা পন্দোল লোমহন্নবা ৱাশকখি‍। মতমদুদা মফমদুদা লম্বী লৈরমদে, মৈগী ফীভম ফৎলমদে, ঈশিংসু লায়না ফংবা ওইরমদে‍। ঐখোয়না খুদিংমক শেমগৎলকখি‍। ঐখোয়না কিলোমিতর চা কয়া শাংবা লৌখোং তৌদুনা কচ্ছতা ঈশিং পুরকখি, পাইপলাইন্দা ঈশিং পুরকখি‍। মতমদুদা লৈরমবা কচ্ছকী ফীভমদু তুরিজমগী ৱাখল কনাদসু লৈখিদে‍। মদুগী ওন্নবদা মীওই লিশিং কয়া কচ্ছতগী য়ুম হোংনখি‍। হৌজিক্তি চহী কয়াগী মমাঙদা কচ্ছ থাদোক্তুনা চৎনখিবা মীওইশিংদু ঙসিদি হল্লকপা হৌনরে‍। ঙসিদি কচ্ছদা লম কোয়বা লাখ কয়া রন উৎসবকী নুংঙাইবা লৌননবা লাক্নরি‍। হায়বদি লাংফমদা ঐখোয়না মাঙদা চঙশিন্নবগী তাঞ্জা থিদুনা পায়খৎখি‍।

মরূপশিং,

মতমদুদা ময়াম্না থোইদোক্না শিংথানদবা অচৌবা থবক অমসু পায়খৎখি‍। ঙসি কোরোনাগী মতমসিদা অদোম্না দিজাস্তর মেনেজমেন্ত এক্তকী মমীং তোয়না তারমগনি‍। মতম অসিদা লৈঙাক্কী য়াথং পুম্নমক এক্ত অসিগী মখাদা থোক্তুনা চৎনরি‍। অদুবু এক্ত অসিগীসু ৱারী অমা লৈরি, কচ্ছতা য়ুহা হাখিবগা মসিগা মরী অমা লৈনরি অমদি মসি অদোমদা তম্লবদি অদোম হরাউগনি‍।

মরূপশিং,

মমাঙদদি ঐখোয়গী লৈবাকসিদা দিজাস্তর মেনেজমেন্ত অসি শুপ্নতগী লৌউ-শিংউ লোয়শঙদা লোইশঙ অসিগী শরুক অমা ওইনা লৈরম্মি, মদুগী ওইনা খন্নরম্মি‍। মরমদি ঐখোয়গীসিদা দিজাস্তর হায়রগদি ঈচাউ নৎত্রগা ঈকঙ অসিবু খঙনরম্মি‍। ঈশিং হেন্না তারক্লগদি দিজাস্তর, ঈশিং লীক্লগসু দিজাস্তর, ঈচাউনচিংবা লাকপা মতমদা লৌউ-শিংউগী লমদা শেলগী মতেংনচিংবা পীববু দিজাস্তর মেনেজমেন্ত ওইরম্মি‍। অদুবু কচ্ছতা য়ুহা হাখিবদগী পরা তমহৌদুনা গুজরাতনা ২০০৩দা গুজরাত স্তেত দিজাস্তর মেনেজমেন্ত এক্ত শেমখি‍। মতমদুদা লৈবাকসিগী অহানবা ওইনা দিজাস্তর মেনেজমেন্তপু লৌউ-শিংউ লোয়শঙদগী লৌথোক্তুনা হোম দিপার্তমেন্তকী মখাদা থমখি‍। তুংদা ২০০৫দা কেন্দ্র লৈঙাক্না গুজরাতকী চৎন-কাঙলোন অদুগী মতৌ তম্লগা লৈবাক পুম্বগী ওইনা দিজাস্তর মেনেজমেন্ত এক্ত শেমখি‍। হৌজিক্তি এক্ত অসিগী মতেংদগী, পাঙ্গলদগী লৈবাকসিনা লাইচৎ অসিগী মায়োক্তা চাউখ্রবা লান্থেং অসি চঙশিল্লি‍। ঙসিদি এক্ত অসি ঐখোয়গী লৈবাক মীয়াম লাখ কয়াগী পুন্সি কনবদা মতেং ওইরি, লৈবাকসিনা লুখ্রবা লাংফম অসিদগী নান্থোরকপদা মতেং ওইনরি‍। মসিদসু নত্তনা মতম অমদা দিজাস্তা মেনেজমেন্ত হায়রগা শেন্মাঙ ফুক্কৎনবা মতেং খরা পীরমবা ভারতকী দিজাস্তর মেনেজমেন্ততকী ঙসি মালেম অসিনা মতৌ তম্নরি‍।

মরূপশিং,

লাংফমগী মতমদা চাউখৎপগী লম্বী শেমজনবা তমহৌবা খুন্নাই অদুনা মশাগী তুংগী লম্বী য়াৎচবনি‍। মরম অসিনা ঙসি ভারত অমসুং ভারত মচা করোর ১৩০না মখোয়গী তুংগী লাইবক, খ্বাইদগী ফবা তুংগী মরাইবক মীয়াম মশানা শেমজরি‍। অদোম্না পাঙথোকপা থবক খুদিংমক, থৌগলগী থৌরাং খুদিংমক, ইনোভেসন খুদিংমক অমদি পুকচেল শেংনা হোৎনজবা খুদিংমক্না তুংগী লাইবক্কীদমক য়ুংলিবা মতিং লৈরবা য়ুম্বীশিং ওইরি‍। অদোমগী হোৎনজমল মায় পাকপা ওইসনু হায়বা য়াইফ-পাউজেলসিগা লোয়ননা ঐনা অমুক্কা হন্না লৈবাক শিনবা থুংবদগী নহা লাখ কয়াবু কোরোনাগী লাংফম মতমসিদা মফম খরদা হকথেংননা, মফম খরদনা ভর্চুএল ওইনা নহাশিংগী ইহৌ অসিবু মাঙদা পুখৎপদা থৌদাং লৌরিবা দিপার্তমেন্তকী মীয়ামবু থাগৎচরি‍। মসিদা শরুক য়ারিবা নহাশিংসু থাগৎচরি অমদি মায় পাক্লবশিংবুসু য়াম্লবা য়াইফ-পাউজেল পীজবগা লোয়ননা মখোয়না ফোঙদোকখিবা ৱাফমশিং খুন্নাইগী মরুদা চঙদুনা মীয়ামবু ৱাখল তাহনবদা মায় পাক্না মাঙদা চঙশিনবা ওইসনু হায়না য়াইফ-পাউজেল পীজরি‍। ঐনা অমুক্কা হন্না স্পীকরবু পার্লিয়ামেন্ত মনুংদা থৌরম অসি পাঙথোকহনবগীদমক্তা তৌবিমল খঙবা উৎচবগা লোয়ননা ঐগী ৱাফম মতাঙসিদা লোইশিঞ্জরগে‍।

হন্না হন্না থাগৎজরি‍।

*****