ପିଏମଇଣ୍ଡିଆ

ତାମିଲନାଡୁର କୋଲାଚେଲ ନିକଟବର୍ତ୍ତୀ ଇନାୟାମଠାରେ ଏକ ପ୍ରମୁଖ ବନ୍ଦର ପ୍ରତିଷ୍ଠା ପ୍ରସ୍ତାବକୁ କେନ୍ଦ୍ର କେବିନେଟ ମଞ୍ଜୁରି ପ୍ରଦାନ କରିଛନ୍ତି । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ମଙ୍ଗଳବାର (05.07.2016) ଅନୁଷ୍ଠିତ କେବିନେଟ ବୈଠକରେ ଏହି ପ୍ରସ୍ତାବ ଉପରେ ଆଲୋଚନା ପରେ ଏହାକୁ ସ୍ୱୀକୃତି ମିଳିଛି ।

ଏହି ବନ୍ଦର ନିର୍ମାଣ ପାଇଁ ଏକ ସ୍ଵତନ୍ତ୍ର ଯୌଥ କମ୍ପାନୀ (SPV) ଗଠନ କରାଯିବ । ତାମିଲନାଡୁର ପ୍ରମୁଖ ତିନୋଟି ବନ୍ଦର ଯଥା- ଓଭି ଚିଦାମ୍ବରନାର ବନ୍ଦର ଟ୍ରଷ୍ଟ, ଚେନ୍ନାଇ ପୋର୍ଟ ଟ୍ରଷ୍ଟ ଏବଂ କାମରାଜ ପୋର୍ଟ ଟ୍ରଷ୍ଟ ସମାନ ଭାବେ ପ୍ରାଥମିକ ଇକ୍ୱିଟି ନିବେଶ କରିବେ । ସ୍ଵତନ୍ତ୍ର ସଂସ୍ଥା ଏକ ବନ୍ଦର ଭିତ୍ତିଭୂମି ଗଠନ କରିବା ସହ ଡ୍ରେଜିଂ, ରିକ୍ଲେମେସନ ବ୍ରେକ ୱାଟର ନିର୍ମାଣ ଏବଂ ସଂଯୋଗୀକରଣ ଆଦି କାର୍ଯ୍ୟ ସମ୍ପାଦନ କରିବ ।

ଏବେ ଭାରତର ଅଳ୍ପ କେତେକ ବନ୍ଦରରେ ଆବଶ୍ୟକ ସୁବିଧାସୁଯୋଗ ରହିଛି ଯାହା ବିଶ୍ୱସ୍ତରୀୟ ମାଲ ବୋଝେଇ ଓ ଖଲାସ କାର୍ଯ୍ୟ ସୂଚାରୁରୂପେ ସମ୍ପାଦନ କରିପାରିବ । ତେଣୁ ଭାରତର ଅଧିକାଂଶ ବିଦେଶୀ ମାଲ ପରିବହନ କାର୍ଯ୍ୟ କଲମ୍ବୋ, ସିଙ୍ଗାପୁର ଏବଂ ଅନ୍ୟ ଆନ୍ତର୍ଜାତିକ ବନ୍ଦରମାନଙ୍କ ମାଧ୍ୟମରେ କରାଯାଇଥାଏ । ଏଥିପାଇଁ ଭାରତକୁ ବର୍ଷକୁ 1500 କୋଟି ଟଙ୍କାର ରାଜସ୍ୱ କ୍ଷତି ସହ୍ୟ କରିବାକୁ ପଡିଥାଏ । ତେଣୁ ଇନାୟାମ ପୂର୍ବ ଉପକୂଳରେ ଦେଶର କଣ୍ଟେନର ଓ ମାଲ କାରବାର କ୍ଷେତ୍ରରେ ପ୍ରବେଶପଥ ଭାବେ ମୁଣ୍ଡଟେକିବା ସହ ପ୍ରାଚ୍ୟ ଓ ପାଶ୍ଚାତ୍ୟ ଜାହାଜ ଯୋଗାଯୋଗ ପଥର ଏକ ବିଶ୍ୱସ୍ତରୀୟ ବନ୍ଦରରେ ପରିଣତ ହେବ ।