ভারতকী প্রধানমন্ত্রী

য়োর এক্সিলেন্সী, ল্যোনশেল দা. লোতে শেরিং,

ভুতান অমসুং ভারত্তগী শরুক য়াবীরিবা অখন্নবা মীথুংশিং,

খুরুমজরি!

ভারত মচা পুম্নমক্কুম্না, ঐগী পুক্নীংদসু ভুতানগীদমক্তা অখন্নবা নুংশিবা অমদি মরূপ-মপাং ওইবগী মরী লৈজৈ, অমসুং মরম অসিনা অদোমগা হেক উনবা খুদিং, থোইদোকপা নকশিন্নবগী ৱাখল্লোন ফাওজৈ!

ভারত অমসুং ভুতানগী থোইদোক-হেন্দোকপা মরী, ঐখোয়গী অখন্নবা মরূপ শানবা অসি, শুপ্নগী লৈবাক অনি অসি খক্কী মমল নাইদ্রবা ওইবতা নত্তনা, মালেম অসিগী থোইদোকপা খুদম অমসুনি।

হৌখিবা চহিগী ঐগী ভুতান খোংচৎ অদুগী মশিং থিঙমদ্রবা নীংশিংনীংঙাই কয়া লৈরি। মখল অমরোমদা মিনিৎ খুদিংগী অনৌবা থৌদোক অনৌবা আশা অনৌবা থৌনা খোংচৎ অদু তশেংনা নীংশিংনীংঙাই ওইখি। ঐখোয়না ঐখোয়গী তেংবাং পীনবদা, শুন্দ্রং অমসুং ইমর্জিং তেক্নোলোজীশিংগুম্বা অনৌবা লমশিং য়াওহন্নবা মরু ওইবা খোংথাং লৌখৎখি।

২১শুবা চহিচাদা লৈবাক অনিগী মরক্তা, অমসুং মরুওইনা ঐখোয়গী নহা ওইরিবা মীরোলশিংগীদমক্তা, কনেক্তিবিতীগী লংলা অমা শেম্লগনি। ঐগী ভুতান খোংচৎ মনুংদা ঐখোয়না লৈবাক অনিগী মরক্তা রুপে কার্দ প্রোজেক্কী অহানবা ফেজ হৌদোকখি।

মসিদগী ভারতকী মীওইনা ভারতকী বেঙ্কনা পীবা কার্দশিংনা ভুতান্দা পৈশা চিংথোকপগী খুদোংচাবা ফংখ্রে। ঐহাক মসি খঙবদা নুংঙাইবা পোকই মদুদি ভুতান্দা হৌজিক ফাওবদা মায় পাক্না রুপে ত্রাঞ্জেক্সন ১১,০০০ তৌখ্রে। করিগুম্বা কোবিদ-১৯গী লাইচৎ লৈরমদ্রবদি মসিগী মশিং অসি শোইদনা মসিদগী হেল্লমগনি।

ঙসি ঐখোয় মসিগী নীংজরিবা প্রোজেক্ত অসিগী অনিশুবা ফেজ হৌদোক্কদৌরি। অমসুং মসিগা লোইননা রুপে নেতৱর্কতা ভুতানবু ফুল পার্তনর ওইনা তরামনা ওক্লি। মায় পাকপা অসিগীদমক্তা থৌদাং য়াবীখিবা ভুতানগী অমসুং ভারতকী ওফিসিয়েলশিংগী মফমদা, ঐনা নুংঙাইবা ফোংদোকচরি।

ঙসিগী মতুংদগী ভুতান নেস্নেল বেঙ্কনা পীবা রুপে কার্দশিং পায়বা ভারত্তা লাখ অমদগী হেন্না এ.তি.এম. অমসুং পোইন্ত ওফ সেল্স তর্মিনেল লাখ ২০দগী হেন্না শিজিন্নবা য়ারগনি। ঐনা থাজৈ মদুদি মসিদগী ভুতান্দগী লাকপা তুরিস্তশিংনা ভারত্তা মহৈ-মশিং, হকশেল, তীর্থ চৎপা নত্ত্রগা লমকোইবদা য়াম্না খুদোং চাহল্লগনি।

মসিদগী ভুতান্দা দিজিতেল ত্রাঞ্জেক্সন হেনগৎহনবদসু মতেং ওইনরগনি। হৌখিবা চহি খরদা ভারত্তা দিজিতেল ত্রাঞ্জেক্সন্দা হেনগৎলকপদগী মীওই করোর কয়াগী পুন্সিদা অহোংবা পুরকখ্রে।

এক্সিলেন্সীশিং, মরূপশিং,

স্পেস সেক্তর অসি ঐখোয়গী ইরক্তা কনেক্তিবিতী মপাঙ্গল কলহন্নবা য়াম্না মরু ওইবা অতোপ্পা লম অমনি। ভারতনা স্পেস কনেক্তিবিতী অসি মতম পুম্নমক্তা চাউখৎ-থৌরাংগীমক শিজিন্নৈ। ভারত অমসুং ভুতান্না অসিগুম্বা পান্দম অসিদা শরুক য়ামিন্নরি।

হৌখিবা চহিদা ঐনা ভুতান্দা সাউথ এসিয়া সেতিলাইৎ শিজিন্ননবা গ্রাউন্দ অর্থ স্তেসন শঙ্গাখি। ঐহাক নুংঙাইবা পোকই মদুদি স্তেসন অসিগী মতেংদগী ভুতান্না ব্রোদকাস্তিং অমসুং দিজাস্তর মেনেজমেন্তগীদমক্তা সাউথ এসিয়া সেতিলাইৎকী হেন্না কান্নবা মওংদা শিজিন্নবা ঙম্লি।

হয়েং ঐখোয়না পীসফুল য়ুজেস ওফ আউতর স্পেস্তা তেংবাং পীনবা হেনগৎহন্নবগী পান্দমদা ফ্রেমৱর্ক দোক্যুমেন্ত অমদা খুৎয়েক পীনগনি। মসিদগী লৈবাক অনিগী তোঙান তোঙানবা ইন্সতিত্যুৎশিংগী মরক্তা তেংবাং পীনবগী লম্বী য়াৎলগনি।

ভারতনা হন্দক্তা ঐখোয়গী শুন্দ্রংগী শরুকপু প্রাইভেৎ ইন্তর্প্রাইজশিংগীদমক্তা হাংদোক্লে, য়াম্না চাউবা রিফোর্ম তৌরে। মসিদগী কেপাসিতী, ইনোভেসন অমসুং স্কিলশিংদা ইনোৎ পীরগনি।

ঐহাক ৱাফম অসিগীদমক্তা থোইদোক্না নুংঙাইবা পোকই মদুদি মথংগী চহিদা ইসরোনা ভুতানগী সেতিলাইৎপু শুন্দ্রংদা থাগৎনবগীদমক্তা খোংজেল য়াংনা থবক পায়খৎলি।

মসিগীদমক্তা ভুতানগী হৈ-শিংলবা স্পেস ইঞ্জিনীয়র নহা মরি দিসেম্বরদা ইসরোদা চৎকনি। ঐনা নহা মরিবু হন্না হন্না য়াইফ-পাউজেল পীজরি। ঐহাক খঙই মদুদি হিজ মাজেস্তী ভুতান নিংথৌনা মহাক্কী লৈবাক্কী চাউখৎ থৌরাংগীদমক স্পেস তেক্নোলোজী শিজিন্নবা হেনগৎহনবা য়াম্না পাম্মি অমসুং মসিবু শৌগৎলি লোইননা মহাক মশাগী ভিজন অমসু লৈরি।

মহাক্কী ভিজন অসিবু মায় পাকহন্নবগীদমক ভারতনা মসিগী খঙ-হৈবা অমসুং মসিগী খুদোংচাবশিং শেয়র তৌননবগীদমক শেম শারি। মতৌ অসুম্না ভুতান্দা আই.সি.তি.-ইনেবল নোলেজ-বেজ সোসাইতী অমা লিংখৎনবা পান্দমদসু ঐখোয়না শৌগৎলি। ঐনা বুতানগীদমক্তা থর্দ ইন্তর্নেস্নেল ইনতর্নেত গেৎৱেগী খুদোংচাবা ফংহন্নবা বি.এস.এন.এল.গা লোইননা তৌনবা এগ্রীমেন্ত অমা থমোই শেংনা তরাম্না ওক্লি।

এক্সিলেন্সীশিং, মরূপশিং,

করিগুম্বা অসিগুম্বা নুংঙাইবগী পুংজা অসিবু ঐখোয়না হকথেংননা উন্নদুনা পাকথোকমিন্নরবদি কয়াদা নুংঙাইবা ওইরমগদবা। অদুবু কোরোনানা মরম ওইদুনা মদু ওইথোকপা ঙম্লোইদৌরে।

অদুবু অতোপ্পা মওংদা য়েংলুরগদি অমরোমদা মসি মতিকসু চাই মদুদি তেক্নোলোজীগী লমদা অসিগুম্বা ইনিসিএতিবশিং অসিগী নুংঙাইবা অসিসু ঐখোয়না তেক্নোলোজীগী মতেংনা ফোংদোকমিন্নরি!

ভুতানগী মীয়াম অমসুং সরকারনা কোবিদকী অৱাবা মতম অসিগা মায়োক্ননবা হোৎনবদা উৎখিবা খাংবা কনবা অমদি থক্সি-খাসি, অদুগীদমক ঐনা নুংঙাইবা ফোংদোকচরি। অমসুং অদোম ময়ামগী হকচাং ফনা লৈনবগীদমক্তা অমসুং মায় পাক্নবগীদমক্তা ঐগী মায়কৈদগী, হিন্দুস্তানী করোর চাম্মা কুনথ্রাগী মায়কৈদগী, অদোম ময়ামগীদমক্তা হেন্না ফবা হকশেল অমসুং মায় পাকপা ওইননবা থৌনীজরি।

ঐ অদোমদা থাজবা পীবা পামজৈ মদুদি অসিগুম্বা লুরবা মতম অসিদা ঐখোয়না ভুতানগা লোইননা লেপ্লি, অমসুং অদোমগী মথৌ তাবশিং মতম পুম্নমক্তা ঐখোয়গী মরু ওইবা ওইনা লৌরি।

অদোম ময়াম্বু অমুক্কা হন্না থাগৎচরি! রোয়েল ফেমিলীগী খ্বাইদগী ফবা হকশেলগীদমক থৌনীজরদুনা

তাশী দেলকা!

***