ପିଏମଇଣ୍ଡିଆ

ଭାରତୀୟ କ୍ଷୁଦ୍ର ଶିଳ୍ପ ବିକାଶ ବ୍ୟାଙ୍କ (SIDBI) ଅଧିନରେ ଷ୍ଟାର୍ଟ ଅପ ମାନଙ୍କ ପାଇଁ ଫଣ୍ଡ ଅଫ ଫଣ୍ଡସ (ଏଫଏଫଏସ) ଗଠନ ପାଇଁ କେନ୍ଦ୍ର ସରକାର ନିଷ୍ପତି ନେଇଛନ୍ତି । ଭାରତୀୟ ସିକ୍ୟୁରିଟି ଏବଂ ଏକ୍ସଚେଞ୍ଜ ବୋର୍ଡ (ସେବି) ଅଧିନରେ ପଞ୍ଜିକୃତ ବିକଳ୍ପ ପୁଞ୍ଜି ନିବେଶ ପାଣ୍ଠିକୁ ଏଥିରୁ ସହାୟତା ଦିଆଯିବ । ଭାରତ ସରକାରଙ୍କ ପକ୍ଷରୁ ଜାନୁଆରୀ ୨୦୧୬ରେ ଉନ୍ମୋଚିତ ଷ୍ଟାର୍ଟ ଅପ ଇଣ୍ଡିଆ କାର୍ଯ୍ୟାନ୍ୱୟନ ଯୋଜନା ଆଧାରରେ ଏହି ପାଣ୍ଠି ଗଠନ କରାଯାଇଛି । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଆଜି ଅନୁଷ୍ଠିତ କେନ୍ଦ୍ର ମନ୍ତ୍ରୀମଣ୍ଡଳ ବୈଠକରେ ଏହି ନିଷ୍ପତି ନିଆଯାଇଛି ।

ଏହି ଏଫଏଫଏସ କର୍ପସ ପାଣ୍ଠିର ମୋଟ ଆକାର ହେବ ଦଶ ହଜାର କୋଟି ଟଙ୍କା । ଚତୁର୍ଦ୍ଦଶ ଏବଂ ପଞ୍ଚଦଶ ଅର୍ଥ କମିଶନଙ୍କ ଅବଧି ମଧ୍ୟରେ ପର୍ଯ୍ୟାୟକ୍ରମେ ଏହି ପାଣ୍ଠି ଯୋଗାଡ କରାଯିବ । ତେବେ କାର୍ଯ୍ୟ।ନ୍ୱୟନ ଯୋଜନାର ସଫଳତା ଏବଂ ପାଣ୍ଠିର ଉପଲବ୍ଧତା ଆଧାରରେ ଏହି ପାଣ୍ଠି ପରିଚାଳିତ ହେବ । ଇତି ମଧ୍ୟରେ କେନ୍ଦ୍ର ସରକାର ଏହି କର୍ପସ ପାଣ୍ଠି ପାଇଁ 2015-16 ବର୍ଷରେ 500 କୋଟି ଟଙ୍କା ଏବଂ ଚଳିତ 2016-17 ଆର୍ଥିକ ବର୍ଷ ପାଇଁ 600 କୋଟି ଟଙ୍କା ପ୍ରଦାନ କରିଛନ୍ତି । ଏହି ଷ୍ଟାର୍ଟ ଅପ ପାଣ୍ଠିର ଉପଯୋଗ ଦ୍ୱାରା 18 ଲକ୍ଷ ଲୋକଙ୍କ ପାଇଁ ପୂର୍ଣ୍ଣକାଳୀନ ନିଯୁକ୍ତି ସୁଯୋଗ ସୃଷ୍ଟି ହେବାର ଆଶା କରାଯାଉଛି ।

ଏହା ବ୍ୟତୀତ କେନ୍ଦ୍ର ସରକାରଙ୍କ ଶିଳ୍ପ ନୀତି ଓ ବିକାଶ ବିଭାଗ (ଡିଆଇପିପି) ପକ୍ଷରୁ ଏଫଏଫଏସ ପାଣ୍ଠିକୁ ବଜେଟ ସହାୟତା ଗ୍ରାଣ୍ଟ ଆକାରରେ ଯୋଗାଇ ଦିଆଯିବ । ଶିଳ୍ପ ନୀତି ଓ ବିକାଶ ବିଭାଗ ଷ୍ଟାର୍ଟ ଅପ ଇଣ୍ଡିଆ କାର୍ଯ୍ୟ।ନ୍ୱୟନ ଯୋଜନାର କାର୍ଯ୍ୟ ଓ ଅଗ୍ରଗତିକୁ ସମୀକ୍ଷା ତଥା ତଦାରଖ କରିବ ।

ଏଫଏଫଏସ କର୍ପସ ପାଣ୍ଠିର ଦୈନନ୍ଦିନ କାର୍ଯ୍ୟ ପରିଚାଳନାକୁ ଅଧିକ ସୁସଂହତ କରିବା ନିମନ୍ତେ ସିଡବି ତାର ବୈଷୟିକ ସହାୟତା ଯୋଗାଇଦେବ । ଏକ ନିର୍ଦ୍ଦିଷ୍ଟ ସମୟ ସୀମା ମଧ୍ୟରେ ଷ୍ଟାର୍ଟ ଅପ ଉଦ୍ୟୋଗଗୁଡିକର ସଫଳ ରୂପାୟନ ନେଇ ନିୟମିତ ଭାବେ ସିଡବି ଓ ଶିଳ୍ପ ନୀତି ଓ ବିକାଶ ବିଭାଗ ପକ୍ଷରୁ ତଦାରଖ କରାଯିବ ।

ଦେଶରେ ଷ୍ଟାର୍ଟ ଅପ ଉଦ୍ୟୋଗଗୁଡିକୁ କ୍ରମାଗତ ଭାବେ ପାଣ୍ଠିଗତ ସହାୟତା ଯୋଗାଇ ଦିଆଗଲେ ବ୍ୟାପକ ଭାବେ ନିଯୁକ୍ତି ସୁଯୋଗ ସୃଷ୍ଟି ହେବ । ଏହି 10,000 କୋଟି ଟଙ୍କାର କର୍ପସ ପାଣ୍ଠି ପ୍ରକାରାନ୍ତରେ 60,000 କୋଟି ଟଙ୍କାର ଇକ୍ୟୁଟି ପୁଞ୍ଜି ନିବେଶକୁ ପ୍ରୋତ୍ସାହିତ କରିବ ।