ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি ঙাইহাক্কী মমাঙদা গুগলগী সি.ই.ও. শ্রী সুন্দর পিচাইগা ভিদিও কন্ফরেন্সিংগী খুত্থাঙদা ৱারী শানখ্রে।

শ্রী পিচাইনা প্রধান মন্ত্রীদা কোবিদ-১৯গী মতাংদা মীয়ামদা ৱাখল তাহন্নবা অমদি অচুম্বা ই-পাউ য়ৌহন্নবা লৌখৎলিবা থৌরাংশিংগী মতাংদা পাউদমখি। প্রধান মন্ত্রীনা লৌখৎখিবা অকনবা লোকদাউনগী খোঙথাং অদুনা লাইচৎ অসিগী মায়োক্তা ভারতকী লান্থেংগী অকনবা য়ুমফম অমা শেমখি। গুগলনা অরানবা পাউ থেংনবদা অমদি মথৌ তাবা চেকশিন থৌরাংশিংগী মতাংদা ই-পাউ য়ৌহনবদা লৌরিবা থৌদাংবু প্রধান মন্ত্রীনা তরাম্না ওকখি। মখা তানা তোক্নোলোজীবু হেল্থকেয়র সর্ভিসেসকী লমদা শীজিন্ননবা ৱাফমসু মহাক্না ফোংদোকখি।

প্রধান মন্ত্রীনা হায়খিবদা ভারত মচাশিং অসি তেক্নোলোজীগা চুশিন্নবদা অমদি তোক্নোলোজীবু শীজিন্নবদা খোঙজেল য়াঙনা চৎলি। মহাক্না লৌমীশিংনা তোক্নোলোজীদগী ফংবা কান্নবশিং অমসুং এ.আই.না লৌউ –শিংউদা পাক-চাউনা কান্নবা পীবা য়াবশিংগী মতাংদসু ৱাফমশিং ফোঙদোকখি। মহৈরোয়শিংনা অমসুং লৌমীশিংনা শীজিন্নবা য়াবা ভর্চুএল লেবশিংগী মতাংদসু প্রধান মন্ত্রীনা ৱাখল্লোনশিং থমখি। সুন্দর পিচাইনা লৈবাকসিদা গুগলগী অনৌবা পোত্থোক অমদি থৌরাংশিংগী মতাংদা পি.এম.দা পাউদমখি। বেঙ্গলুরুদা এ.আই. রিছর্চ লেব হৌদোকপা অমসুং গুগলগী ঈচাউ মাঙজৌননা খঙদোক্নবা থৌরাংশিংগী কান্নবশিংগী মতাংদা পনখি।

ভারত্তা গুগলগী অচৌবা ইনভেস্তমেন্ত ফন্দ অমসুং মরুওইবা খোঙবু ওইবগী থৌরাংশিংগী মতাংদা প্রধান মন্ত্রীদা পাউদমখি। প্রধান মন্ত্রীনা ভারত অসি মালেমদা খ্বাইদগী লৌথুপ লৌকোই লৈতবা শেন্মিৎলোনশিংগী মনুংদা অমনি হায়বা ৱাফম থমখি। কুইদ্রিঙৈদা লৈঙাক্না লৌখৎখিবা লৌউ-শিংউগী লমদা অহোংবা পুরকপগী খোঙথাংশিংগী মতাংদা অমদি মীয়ামবু অমুক হন্না স্কিল ওইহন্দুনা অনৌবা থবকশিং শেমগৎপগী কেম্পেনগী মতাংদসু মহাক্না ৱাফম কয়া থমখি।

প্রধান মন্ত্রীনা দেতা সিক্যুরিতী অমসুং মরন্নাই ওইবা ৱাফমগী মতাংদা লৈরিবা নুংনাংনিংঙাই ওইবা ৱাফমশিংগী মতাংদসু খন্নখি। তেক কম্পেনীশিংনা থাজবা ৱাৎলিবসি মেনশিন্নবা হোৎনবা মথৌ তাই হায়না মহাক্না হায়খি। মহাক্না সাইবর ক্রাইম অমসুং সাইবর এতেক্না পীরিবা শীংনবশিংগী মতাংদসু ৱারী শাখি। মদুদা খন্নখিবা অতোপ্পা হীরমশিংগী মরক্তা ওনলাইন ইদুকেসনগী মীৎয়েং হেন্না পাক-চাউথোকহন্নবা তোক্নোলোজীগী পাম্বৈ, মমালোনদা তোক্নোলোজী শীজিন্নহনবা, শান-খোৎনবগী লমদা এ.আর./ভি.আর. শীজিন্নদুনা স্তেদিয়মদা য়েংবগুম্না ফাওহনবা, অমসুং দিজিতেল পেমেন্তকী মতাংদা খুমাঙ চাউশিনবা হায়রিবশিংসি য়াওরি।