ভারতকী প্রধানমন্ত্রী

‘মন কী বাত ২.০’গী ১২সুবা তাঙ্কক্তা ৱা ঙাংবদা প্রধান মন্ত্রী নরেন্দ্র মোদীনা হায়খি মদুদি অপুনবা থবকশিংগা লোয়ননা ঐখোয়গী লৈবাক্তা কোরোনাগী মায়োক্তা অকনবা লাল শোক্নরি। শেন-থুমগী মরুওইবা শরুক অমা হাংদোরকপা অসিদা কোবিদ লাইচৎ অসিদগী হেন্না চেকশিন্নবা অমসুং মিকুপ-নাহুম শিংনবা মহাক্না মীয়ামদা তকশিনখি।

প্রধান মন্ত্রীনা হায়খি, শ্রমিক স্পিসিয়েল ত্রেনশিং য়াওনা ত্রেনশিং চেনবা হৌরে; অতোপ্পা অখন্নবা ত্রেনশিংসু চেনবা হৌরে। চেকশিন-থৌরাংশিং পায়খৎতুনা ফ্লাইতশিং অমুক পাইবা হৌরে; উদ্যোগসু হান্নগুম থবক হৌরে; অসুম্না শেন-থুমগী মরুওইবা শরুক অমা হাংদোকপা হৌরে। অসিগুম্বা ফিবম অমদা, ঐখোয় হেন্না চেকশিনবা অমসুং মিকুপ-নাহুম শিংবা দরকার ওইরি। ফিৎ ৬ থাপ্না লৈবা, মাইখুম উপ্পা নত্ত্রগা য়ুমদা লেংদনা লৈবা দরকার ওইরবসু, ঐখোয়গী পুন্সি মহিংদা কোমথোকপা অমতা তৌরোইদবনি। অৱাবা কয়া খাংদুনা লাক্লবা মতুংদা, লৈবাক অসিনা লাইচৎ অসি লাকশিল্লিবা অসি লেম্না মাংহল্লোইদবনি।

ঐখোয়গী মীয়াম্না উৎলিবা থবক মতেং পাংনিংবগী ৱাখল্লোল অসি প্রধান মন্ত্রীনা থাগৎখি অমসুং মসি খ্বাইদগী কনবা পাঙ্গলনি হায়খি । মহাক্না হায়খি। ‘সেবা পর্মো ধর্ম’, থবক তৌবা অসি নুংঙাইবা অমনি… থবক তৌবা অসি মশামক অপেনবা অমনি হায়বা ৱাখল্লোল অসিগা ঐখোয়গা অমতা ওইরি । লৈবাক শীনবা থুংনা লৈরিবা মেদিকেলগী থবক তৌরিবা মীওইশিং থাগৎলদুনা লৈবাক অসিগী দোক্তরশিং, নর্সশিং, সেনিতেসনগী মীওইশিং, পুলিসকী মীওইশিং অমসুং মীদিয়াগী মীওইশিংগী থবক তৌনিংবগী ৱাখল্লোল অদু প্রধান মন্ত্রীনা থাগৎলি। মসিগী ৱারবা মতম অসিদা নুপী সেল্প হেল্প গ্রুপশিংগী শিংথানিংঙাই ওইরবা থবকশিংসু মহাক্না থাগৎখি।

মখোয়গী শেন-থুমগী ফিবম ফৎত্রবসু মসিগী ৱারবা মতম অসিদা অতোপ্পশিং মতেং পাংখিবা মীচমশিং হায়বদি তামিল নাদুগী কে.সি মোহন, অগরতলাগী গৌতম দাস, পাথানকোতকী দিবয়াং অমা ওইরিবা রাজুগী থবকশিং মহাক্না ফোংদোকখি। মহাক্না হায়খি নুপীশিংগী সেল্প হেল্প গ্রুপশিংগী মাইপাকপগী ৱারি কয়া লৈবাক্কী মফম কয়াদগী লাক্লি।

লাইচৎ অসি থেংননবা অচৌবা থৌদাং লৌরিবা লনাই মীওইশিংগী থবকশিংসু প্রধান মন্ত্রীনা থাগৎলি। মহাক্কী ত্রেক্তরদা সেনিতাইজ তৌনবা মেছিন অমা পানশীনখিবা নাসিক্কী রাজেন্দ্র য়াদবগী খুদম মহাক্না পীখি। ‘দো গজ কী দুরী’ ঙাক্নবা দুকান ফম্বশিংনা মখোয়গী দুকানশিংদা অচৌবা উতোংশিং থমখি ।

লাইচৎ অসিনা মরম ওইদুনা অৱাবা কয়া খাংলিবা মীয়ামগী অৱাবশিংদা মহাক্কী অৱাবা শরুক য়ারদুনা প্রধান মন্ত্রীনা হায়খি কোরোনাভাইরসনা খুন্নাইগী কাংলুপ খুদিংমক শোকহল্লে অদুবু লাইরবশিং অমসুং শিন্মীশিংনা হেন্না শোকহল্লি। কেন্দ্র, রাজ্যশিং, লোকেল বোদিশিং অমসুং মী খুদিংমক খুৎশম্নদুনা য়াম্না য়াংনা মতেং পাংবগী থবক পায়খৎলি। মখোয়না থেংনরিবা অৱাবশিং লৈবাক শীনবা থুংনা খঙই অমসুং অৱাবা ফাওরি অমসুং কেন্দ্র, রাজ্যশিং, লোকেল বোদিশিং অমসুং মী খুদিংমক নুমিৎ চুপ্পা থবক তৌরি। ত্রেনশিং অমসুং বসশিংদা শিন্মীশিং পুরিবা, মখোয়গী চানবা থৌরাং তৌরিবা অমসুং জিলা খুদিংমক্তা মখোয় ক্বারেনতাইন তৌনবা চোকথবা নাইদনা হোৎনরিবা মীওইশিং মহাক্না থাগৎখি ।

হৌজিক ওইরিবা ফিবম অসিদা অনৌবা পাম্বৈ অমা থিবগী মরুওইবা অদু প্রধান মন্ত্রীনা পনখি। মহাক্না হায়খি মসিগী মতাংদা সরকারনা থবক কয়া পায়খৎলে। খুঙ্গংদা থবক ফংহন্নবা, মশা মরোমদোম থবক পীজনবা অমসুং অপীকপা উদোকশিং মতেং পাংনবা খুদোংচাবা কয়া লৈবা ৱারেপশিং হন্দক কেন্দ্রনা লৌরে। চৎলিবা দিকেত অসিদা আত্মনির্ভর ভারত কেম্পেন্না লৈবাক অসি অৱাংবা থাকশিংদা পুখৎকনি হায়না মহাক্না অচেৎপা থাজবা থমখি।

প্রধান মন্ত্রীনা হায়খি কোরোনা লাইচৎ মনুংদা মফম খুদিংমক্তা মীয়াম্না য়োগা অমসুং অয়ুর্বেদগী মরমদা খঙবা পামখি অমসুং মসি পুন্সিগী শরুক অমা ওইনা লৌখি। য়োগা অসি “মীয়ামগী, লায়না ঙাকথোক্নবা অমসুং অপুনবগী শক্তম শেমগৎনবা” মহাক্না তকশিনখি। মহাক্না হায়খি ভাইরস অসিনা ঐখোয়গী শ্বর হোনবগী কয়াৎশিং খ্বাইদগী শোকহনবা মরম্না, হৌজিক লাইচৎ মনুং অসিদা য়োগা অসি য়াম্না মরুওইরে। য়োগাদা, ঐখোয়গী শ্বর হোনবগী কয়াৎশিং মপাঙ্গল কনখৎহনবা প্রানায়াম মখল কয়া লৈরি অমসুং কান্নবশিং মতম কয়াগী মমাংদগী খঙদুনা লাক্লি।

মখা তানা, অয়ুস মিনিস্ত্রিনা শীনবা ‘মাই লাইফ, মাই য়োগা’ মালেমগী ভিদিও ব্লোগ কম্পিতিসনদা মখোয়গী ভিদিওশিং শরুক য়ানবা প্রধান মন্ত্রীনা মীয়ামদা তকশিনখি। চাংদম্নবা অসি শরুক য়ানবা অমসুং লাকলিবা মালেমগী য়োগা নুমিৎকী শরুক অমা ওইনবা প্রধান মন্ত্রী মোদীনা মীয়ামদা হায়জখি।

লাইচৎ থেংননবা সরকারনা পায়খৎলিবা থবকশিং প্রধান মন্ত্রীনা থাগৎখী অমসুং ‘অয়ুশ্মান ভারত’ স্কিমগী কান্নবা ফংলবা মীওই ক্রোর অমা হেনবদা চাউথোকচবা পোকখি। লাইচৎ মনুংদা অনাবশিং লায়েংলিবা দোক্তরশিং, নর্সশিং অমসুং মেদিকেলগী মীওইশিং অমসুং অয়ুশ্মান ভারতকী কান্নবা ফংলবা মীওইশিং মহাক্না থাগৎখি ।

প্রধান মন্ত্রীনা হায়খি অমরোমদা ঐখোয়না কোরোনাভাইরস থেংনরি অমসুং নোংলৈ নুংশিৎ অম্ফানসু থেংনরি। অকনবা নোংলৈ নুংশিৎ অম্ফান থৌনা ফনা থেংনখিবা নোংচুপ বঙ্গাল অমসুং ওরিসাগী মীয়ামগী থৌনা অদু মহাক্না থাগৎখি। রাজ্যশিং অদুগী লৌমীশিংনা মাংখিবশিং অদু মহাক্না পনখি অমসুং মখোয়না খাংবা কনবা অমসুং অচেৎপা ফিরেপ অমগা লোয়ননা অৱাবা থেংনখিবা অদু থাগৎফম থোকই হায়খি।

প্রধান মন্ত্রীনা হায়খি নোংলৈ নুংশিৎকী অৱাবা মথক্তা লৈবাক্কী মফম কয়াদা কৌজেংশিংনা লান্দারকখি। অৱাবা মরক্তা সরকারনা চোকথবা লৈতনা থবক পায়খৎলি ,মরম অদুনা লৈবাক শীনবা থুংনা মীচম মীয়াম্না তঙাইফদবা পোৎলমশিং ফংবদগী অৱাবা থেংনখিদে। মসিগী অৱাবা মরক অসিদা লৌমীশিং মতেং পাংনবা অমসুং মহৈ-মরোং মাংবা হন্থহন্নবা কেন্দ্র সরকার, রাজ্য সরকারশিং, এগ্রিকলচর দিপার্তমেন্ত, মী খুদিংমক শরুক য়ারি অমসুং অনৌবা তেক্নিকশিং শীজিন্নরি।

ঈশিং তুংশিন্নবা হৌজিক্কী মীরোলনা মখোয়গী থৌদাং মশক খঙবগী দরকার ওইবা অদু প্রধান মন্ত্রীনা থমখি। মহাক্না হায়খি নোংগী ঈশিং তুংশিনবা দরকার ওই অমসুং মী খুদিংমক ঈশিং তুংশিন্নবা হোৎনগদবনি। চহি অসিগী ‘ইনভাইরনমেন্ত দে’ লাকপদা উ চারাশিং থাদুনা মহৌগী সেবা তৌগদবনি অমসুং মহৌশাগা নক্নবা মরী থম্নবা হোৎনগদবনি। লোকদাউন অসিনা পুন্সিগী খোঙজেল তপথহল্লে অদুবু মহৌশাদা ফজনা য়েংনবা খুদোংচাবা পীরে অমসুং লম্লক্কী শা-উচেকশিং মশিং য়াম্না থোরকলে।

মহাক্কী ৱারোল লোইশিল্লকপদা প্রধান মন্ত্রীনা হায়খি চেকশিন্দবা য়ারোই । কোরোনা লান্থেংনবা অসি হৌজিক ফাওবা য়াম্না তমথিবা ওইরি।