ভারতকী প্রধানমন্ত্রী

মিস্তর চেয়রমেন,
শক্নাইরবশিং,

মসিগী ভিদিও কনফরেন্স অসি পাংথোকপগীদমক ঐনা ইকায়খুম্নরবা রাস্ত্রপতি ইলহাম অলিয়েব থাগৎলি। কোবিদ-১৯না মরম ওইদুনা মালেম শিনবা থুংনা মখোয়গী নুংশিরবা ইমু-মনুংগী মীওইশিং লৈখিদ্রবা মীয়ামগীঅৱাবদা অহানবদা ঐনা শরুক য়ারি।

ঙসিদি, মীওইবা খুন্নাইনা চহি কয়াগী মনুংদা খ্বাইদগী তমথিরবা অৱাবা মায়োক্নরি। মসিগী তাঞ্জা অসিদা, নন এলাইন মুবমেন্তনা মালেমগী অমত্তা ওইনা চুংশিন্নবদা মতেং পাংবা য়াগনি। নাম অসি মালেমগী অচুম্বগী খোল্লাউ ওইদুনা লাক্লি। মসিগী থৌদাং অসি মখা তানা লৌনবা, নাম অপুনবগী ওইনা লৈগদবনি।

শক্নাইরবশিং,

মালেমগী অপুনবা মীশিংগী শরুক তরুক থোকপগী শরুক অমা ভারত্তা লৈরি। ঐখোয় চাউখৎলক্লিবা লৈবাক অমসুং মনিংতম্বা খুন্নাই অমনি। মসিগী অৱাবা তারিবা মনুংদা, মীয়ামগী অশেংবা ইহৌ অমা শেমগৎনবা ঐখোয়না কমদৌনা গনতন্ত্র, থকশিং-খাসি অমসুং অচেৎপা ফিরেপ্না অমত্তা ওইনা পুনশিনবগে হায়বা উৎলি।

ভারতকী সভ্যতানা মালেম পুম্বা অসি ইমুং অমা ওইনা উরি। ঐখোয়গী ঐখোয়গী মীয়াম শেন্নবগা লোয়ননা, ঐখোয়না অতোপ্পা লৈবাকশিংসু মতেং পাংলি। কোবিদ-১৯ লাকশিন্নবা ঐখোয়না ঐখোয়গা হেক য়ুমথংনরিবা লৈবাকশিংগা মরী ফগৎহল্লি। মেদিকেলগী লমদা ভারতকী হৈশিংবশিং অতোপ্পা লৈবাকশিংদা খঙহন্নবা ঐখোয়না ওনলাইন ত্রেনিং পাংথোক্লি। মরুওইনা মমল হোংবা হিদাকশিং ফংহনবদা ভারত অসি মালেমগী ফারমাসি অমা ওইনা লৌনরে।

ঐখোয় ইশাগী দরকার ওইরবসু, নামগী মেম্বর ৫৯ য়াওনা মরূপ ওইরিবা লৈবাক ১২৩ হেনবদা ঐখোয়না হিদাকশিং ফংহল্লি।

অনাবা ফহনবা ঙম্বা লায়েংশিং অমসুং তিকা পুথোক্নবা মালেমগী থবকশিংদা ঐখোয় থৱায় য়াওরি। ভারত্তা মালেমদা খ্বাইদগী লিরবা মনা-মশিংনা লায়েংবগী মমাংঙৈগী লায়েং-কাংলোন লৈরি। মীয়াম্না মখোয়গী মহৌশাগী লায়না ঙাকথোকচবা ঙম্বগী মপাঙ্গল অদু হেনগৎহন্নবা ঐখোয়না লেম্না অয়ুর্বেদাগী লায়েংশিং পীরি।

শক্নাইরবশিং,

মালেম্না কোবিদ-১৯ থেংনরিঙৈদা, মীওই খরনা অতোপ্পা তমথিরবা মহিক শন্দোকপদা মথৌ চিল্লি। মসি তেরোরিজমগী মহিক্নি।

শেমজিন-শাজিনবা পাউশিং অমসুং শেমদোক্লবা ভিদিওশিংনা কাংলুপশিং অমসুং লৈবাকশিং তোখাই তাহল্লি। অদুবু ঙসিদি ঐনা অফবশিং খক্তদা মীৎয়েং চংবা পাম্মি।

ঐখোয়না ইহৌ অমা ওইনা পুন্না চৎমিন্নরবা মতমদা মসিগী হকশেলগী অৱাবা অসি থেংনবদা মালেমগী মতেং পাংবা ঙমগনি।

শক্নাইরবশিং,

মালেমগী হৌজিক ওইরিবা ফিবম অসিদা লৈরিবা অশোইবশিং অদু কোবিদ-১৯না ঐখোয়দা উৎলে। কোবিদ-১৯গী মতুংদা, অচুম্বা, মান্নবা অমসুং মীওইবা খুন্নাইদা য়ুম্ফম ওইবা মালেমগী অনৌবা ফম্বাক অমা ঐখোয়না দরকার ওইরে।

ঙসিগী মালেম অসিদা লৈবাক কয়া শরুক য়াগদবা মালেমগী লুপশিং ঐখোয়না দরকার ওই। শেন-থুমগী ফিবম ফগৎহনবা খক নত্তবা মীওইবগী নুংঙাই-য়াইফবা হেনগৎহনবা ঐখোয়না মথৌ তারি। অসিগুম্বা থবকশিংদা মতম কয়াগী মমাংদগী ভারতনা মাংজিল থাদুনা লাক্লি।

মালেমগী য়োগাগী নুমিৎনা মীওইবা খুদিংমক্কী হকচাং অমসুং ৱাখল ফগৎহনবা ঙমগনি। ইন্তরনেসনেল সোলার এল্লাইন্সনা ঐখোয়গী মালেম অসি অইং-অশাগী খল কাইরকপগী লায়নাদগী ফহনবদা মতেং পাংগনি। কোলিয়েসন ফোর দিজাস্তর রিসিলিয়েন্ত ইনফ্রাস্ত্রকচরনা, ঐখোয় ইশামক অইং-অশাগী খল কাইরকপা অমসুং অমাং-অতাদগী ঙাকথোকপা ঙমগনি।

শক্নাইরবশিং,

চাউখৎলক্লিবা লৈবাকশিংগী হকশেলগী মচাকশিং শেমগৎনবা মালেমগী লৈবাকশিং অমসুং ৱাল্ড হেল্থ ওর্গনাইজেসন্না হায়রকপদা নাম শরুক য়াগদবনি। মরম চাবা, মমল হোংবা অমসুং মতম চানা হকশেলগী পোৎথোকশিং অমসুং তেক্নোলোজিশিং মীওই খুদিংমক্তা ঐখোয়না ফংহনগদবনি।

ঐখোয়গী হৈথোই-শিংথোইবা খ্বাইদগী ফবা থবকশিং, খুদোংথিবা লাকশিন্নবা চৎন-কাংলোনশিং, রিছর্স অমসুং লন-থুমশিং অমত্তা ওইনা পুনশিন্নবা ঐখোয়না নাম লৈবাকশিংগী পুনফম অমা শেমগৎকদবনি।

শক্নাইরবশিং,

ঐখোয়গী ইহৌ অসি লিংখৎখিবগী ৱাখল্লোন্দা, ঙসি ঐখোয় পুন্না চৎমিন্ননবা পান্দম থমসি , তোখাই তারোইসি। ঐখোয়না অমত্তা ওইবা মতমদা লাইচৎ অসিদগী ঐখোয় খুদিংমক কনবা ঙমগনি। মালেমগী ওইনা অপুনবা অমসুং মতেং পাংনবগী পান্দম অমগী মখাদা ঐখোয় মরূপশিং ওইনা থবক তৌমিন্নসি।

অদোমবু থাগৎচরি,

শক্নাইরবশিং থাগৎচরি।