ভারতকী প্রধানমন্ত্রী

প্রধান মন্ত্রীনা ২০২০গী মার্চ ৭কী অয়ুক পুং ১১.৩০ তাবা মতমদা নোভেল কোরোনা ভাইরস (কোভিদ-১৯)গী ফিভম অমসুং তোঙান তোঙানবা মন্ত্রালয়শিংনা হৌজিক ফাওবদা লৌখৎলিবা খোংথাংশিং য়েংশিনখ্রে। মীফম অদুদা হেল্থ অমসুং ফেমিলী ৱেলফেয়রগী কেন্দ্র মন্ত্রী দা. হর্শ ভর্ধন, এক্সতর্নেল এফিয়ার্সকী কেন্দ্র মন্ত্রী দা. এস. জয়শঙ্কর, হেল্থ অমসুং ফেমিলী ৱেলফেয়রগী কেন্দ্রগী রাজ্য মন্ত্রী শ্রী অশ্বিনি কুমার চৌবে, কেবিনেৎ সেক্রেতরী এস.ঐচ. রজিব গৌবা, নীতি অয়োগকী মীহুৎ দা. বিনোদ কে. পৌল অমসুং চিফ ওফ দিফেন্স স্তাফ জেনরেল বিপিন রাৱত অমসুং হেল্থ, ফার্মা, সিভিল এভিয়েসন, এক্সতর্নেল এফিয়ার্স, হেল্থ রিসর্স, হোম, শিপ্পিং, এন.দি.এম.এ.গী সেক্রেতরীশিং অমসুং অতোপ্পা ওফিসিয়েলশিংনা শরুক য়াখি।

হেল্থ অমসুং ফেমিলী ৱেলফেয়রগী সেক্রেতরীনা কোভিদ-১৯ থেংননবা শেম-শারিবা অমসুং রেস্পোন্সকা মরী লৈননা হৌজিক ওইরিবা ফিভম অমসুং হেল্থ অমসুং ফেমিলী ৱেলফেয়র মন্ত্রালয় অমসুং অতোপ্পা সপোর্তিং মন্ত্রালয়শিংনা লৌখৎলিবা খোংথাংশিংদা প্রজেন্তেসন অমা লান্থোকখি। প্রজেন্তেসন অসিদা এন্ত্রী অমসুং কম্যুনিতীগী পোইন্তশিং, লেবোরেতরী সপোর্ত, হোস্পিতালদা শেম শারিবা, লোজিস্তিক অমসুং রিক্স কম্যুনিকেসন্দা সর্ভিলেন্সকী মরুওইবা লমশিংদা অকনবা ৱাফম থমখি।
ফার্মা বিভাগকী সেক্রেতরীনা ভারত্তা শিজিন্ননবা হিদাক-লাংথকশিং, এক্তিব ফার্মাতিকেল ইনগ্রিদেন্তস (এ.পি.আই.) অমসুং অতোপ্পা কঞ্জুম তৌবা য়াবশিংগী স্তোক মরাং কাইনা লৈরিবগী মতাংদা পাউদমখি।

মীফম মনুংদা এয়ারপোর্ত, সীপোর্ত অমসুং লেন্দ বোর্দর ক্রোসিং পুম্নমক্তা মখা তানা য়েংশিনবা মথৌ তাবা, প্রোতোকোলগী মতুং ইন্না কম্যুনিতী লেভেল সর্ভিলেন্স, অমসুং অনাবা মীওইশিং তোঙান্না থম্নবগী মতিক চাবা ফমুংশিং ফংহনবগী হিরমশিংদা খন্ন-নৈনখি। দা. হর্শ ভর্ধন্না মতম চানা রেস্পোন্স তৌনবগীদমক রাজ্যশিংগা লোয়ননা এফেক্তিব কোওর্দিনেসনগী মথৌ তাবদা অকনবা ৱাফম থমখি। নীতি অয়োগকী মীহুৎনা অনাবশিংবু হোস্পিতালদা এদমিত তৌনবগীদমক কেপাসিতী হেঙ্গৎহনবগী মথৌ তাবদা অকনবা ৱাফম থমখি। লোয়ননা ইরানদগী ভারত মচাশিংবু লৌথোক্নবগীদমক হায়জরকপশিংদা মীৎয়েং থমখি।

প্রধান মন্ত্রীনা হৌজিক ফাওবদা পায়খৎলিবা থবকশিংগীদমক বিভাগ পুম্নমকপু থাগৎপা ফোংদোক্লদুনা হায়খি মদুদি ভারতনা হৌজিক ওইরিবা ফিভম অসি থেংননবগীদমক মপুং ফানা থৌরাং তৌবা তাই। বিভাগ খুদিংমক্না খুৎশম্নদুনা থবক তৌগদবনি অমদি কম্যুনিতীগী মরক্তা লাইনা অসিগী মরমদা এৱার্নেস পীনবা অমসুং চেকশিন থৌরাং লৌখৎনবা থবক তৌগদবনি। মহাক্না ওফিসারশিংবু মালেম পুম্বদা অমদি তোঙান তোঙানবা লৈবাকশিংদা কোভিদ-১৯ থেংননবগীদমক পায়খৎলিবা খ্বাইদগী ফবা প্রেক্তিসশিং মশক খংদোক্নবা অমসুং মদু এদোপ্ত তৌনবা ৱাফম থমখি। এক্সপর্তশিংনা ফোংদোরকপগী মতুং ইন্না প্রজাশিংনা য়ারিবা মখৈ মীয়াম তিনবা থৌরমদগী লাপথোক্নবা মহাক্না ফোংদোকখি লোয়ননা করি তৌগনি, করি তৌরোইদবগে হায়বদু পাউতাক পীনবা খংহনখি। মহাক্না লাইনা অসি শন্দোরকপগী ফিভমদা অনাবশিংবু তোঙাননা থম্নবা অমসুং মখোয়বু চেকশিন্না য়েংশিন্নবগী খুদোংচাবা ফংহন্নবগীদমক মতিকচাবা লোকেসনশিং মশক খংদোকপগী থবক অথুবা মতমগী মনুংদা পায়খৎনবা পাউতাক পীখি। মহাক্না ওফিসিয়েলশিংবু ইরান্দা পন্দুনা লৈরিবা ভারত মচাশিংবু অথুবা মতমদা তেস্ত তৌদুনা লৌথোক্নবা থৌরাং তৌনবা পাউতাক পীখি। মহাক্না পব্লিক হেল্থ পর্সপেক্তিব অমদগী লৌনগনবা লাইনা অসি মেনেজ তৌনবগীদমক এদভান্স অমসুং এদিক্বেৎ প্লানিং অমসুং মতম চানা রেস্পোন্স তৌবগী দরকার ওইবদা ৱা ঙাংখি।

**********