ভারতকী প্রধানমন্ত্রী
অনৌবা চহী অমসুং অনৌবা চহী তরাগী খুজিংগী অহানবা মহাক্কী মন কী বাত্তা প্রধান মন্ত্রী শ্রী নরেন্দ্র মোদীনা ঙসি হায়খ্রে মদুদি ব্রু-রিয়াং এগ্রীমেন্তনা চহী তরাগী খুজিং অনি হেন্না কুইরবা রিফ্যুজী ক্রাইসিস লোইশিন্দুনা মিজোরামদা রিফ্যুজী ৩৫০০০ হেনবদা মতেং অমসুং রিলিফ পীরে।
প্রোব্লেম অদু শন্দোক্না তাক্লদুনা শ্রী মোদীনা হায়খি, “সমস্য অসি চহী ৯০গী চহী পরিংগী মতমগীনি, ১৯৯৭তা কাংলুপ মশেল উংখৎনবগী থৌদোক্তা ব্রু-রিয়াং চিংমী কাংলুপকী মীওইশিং অসি মিজোরামদগী থোরক্লগা ত্রিপুরাদা চংজফম লৌখি। মখোয়শিং অসি নোর্থ ত্রিপুরাগী কঞ্চনপুরদা শাবা কেম্পশিংদা লৈহনখি। য়াম্না নুঙাইতবা ৱাফম অমনা ব্রু-রিয়াং কাংলুপকী মীওইশিং অসিনা মখোয়গী পুন্সীগী মমল য়াম্লবা শরুক কয়া রিফ্যুজী ওইনা লেনখ্রে। কেম্পতা পুন্সী লেনবা হায়বগী অর্থদি খুদোংচাবা পুম্নমক মাংজবা হায়বনি। চহী ২৩ অসি য়ুম ইংখোল, ইমুং মনুং, অনা লায়েং, অঙাংশিংগী মহৈ মশিং পুম্নমক অসি অমত্তা য়াওদনা লৈরক্লবনি।”
প্রধান মন্ত্রীনা হায়খি মদুদি সরকার কয়া লাকখ্রে অদুবু মখোয়গী খুদোংচাদবা নুঙাইতবশিং অসিগীদমক্তদি করিমত্তা তৌবিরমদে। অদুম ওইনমক অসুক ৱারবা খুদোং চাদবা মরক অসিদা মখোয়না ভারতকী সংবিধান অমসুং চৎন লোনচৎপু চেৎনা থাজজৈ।
মহাক্না হায়খি মদুদি মখোয়গী থাজবা অদুনা ঙসিদি থা অসিদা দিল্লীদা পুৱারী ওইরবা য়ানা চেরোল খুৎয়েক পীনরে।
মহাক্না হায়খি, “মসিগী থাজবা অসিনা মখোয়গী পুন্সীদা ঙসি অনৌবা অয়ুক অমা লাক্লে। য়ানখিবা অসিগী মতুং ইন্না হৌজিক মখোয়গী পুন্সী অদু নুঙাইনা হিংজনবগী লম্বেল অমা লাক্লে। মমৈথংদা ২০২০গী অনৌবা চহী তরাগী মতম অসিনা ব্রু-রিয়াং কাংলুপকী মীওইশিংদা হিংনবগী অনৌবা অশা অমসুং থৌনাগী ময়োল চোংহল্লে।”
য়ানা চেরোল অসিগী কানবা অদু ফোংদোক্লদুনা প্রধান মন্ত্রীনা হায়খি, “চাউরাক্না রিফ্যুজী ওইনা লৈরম্বা ব্রু-রিয়াং ৩৪০০০বু ত্রিপুরাদা খুন্দা লৈতাহনবা য়াহল্লে। মসিদা নত্তনা মখোয়গী নৌনা খুন্দা লৈতাহনবা অমসুং হিরম খুদিংমক্তা চাউখৎহন্ননবা কেন্দ্র সরকারনা চাউরাক্না লুপা কোতি ৬০০কী তেংবাং পীগদৌরি। মসিগা লোয়ননা মখোয়বু রসনগী খুদোংচাবসু ফংহনগনি। নৌনা খুন্দারিবা ইমুং খুদিংমক্তা প্লোতসু পীগনি, য়ুম শাবদা মতেং পীগনি। হৌজিক মখোয় কেন্দ্র অমসুং রাজ্য সরকারগী খুদোংচাবশিং লৌবা য়ারগনি।”
য়ানা চেরোল অসিনা কোওপরেত ফেদরেলিজমগী ৱাখল্লোন উৎপনা য়াম্না অখন্নবা অমনি হায়না প্রধান মন্ত্রীনা ফোংদোকখি।
মহাক্না হায়খি, “য়ানা ৱারোল অসিনা ভারতকী চৎন লোনচৎতা য়াওরিবা মীনুংশিং অমসুং পুকচেল চাউবা অদু ময়েক শেংনা উৎলি।”
হিংসা থাদোকপা – মেনস্ত্রিমদা হল্লকপা
প্রধান মন্ত্রীনা হায়খি মদুদি হিংসানা সমস্যা অমা হেক্তগী সোলুসন পুরক্তে। অসমদা লালহৌ লুপ ৮গী মিলিতেন্ত ৬৪৪না খুৎলায় থাদোক্তুনা মহৌশাগী ফিভমদা হল্লক্নবা লৌখিবা ৱারেপ অদু মহাক্না থাগৎখি।
মহাক্না হায়খি, “চাউরবা খেলো ইন্দিয়া গেম্স মায় পাক্না শিনবা ঙম্বা অসামদা য়াম্না চাউরবা থবক অমসুং পাংথোকখ্রে। ময়াম্না পাউদা উবিরমগনি অসামদা তোঙান তঙানবা লালহৌলুপ ৮গী লালহৌবা ৬৪৪না খুৎলায় থাদোক্তুনা চংজরকখ্রে। অহানবদা হিংসাগী লম্বেলদা চৎলুরবা মখোয়না মশাগী থাজবা অমগা লোয়ননা শান্তিগী লম্বেলদা লাক্তুনা লৈবাক্কী চাউখৎনবা হোৎনবদা শরুক য়াগে হায়না লেপ্লি।”
মহাক্না হায়খি, “হিংসাগী পাম্বৈনা সমস্যাশিং কোকপা ঙমগনি হায়না খল্লুরবা মখোয়না হৌজিক অমুক শান্তি অমসুং অপুনবনা মসিগী অমত্তা ঙায়রবা পাম্বৈনি হায়না থাজবা ঙমলক্লে।”
হৌজিকসু হিংসাগী লম্বীদা খোংদারিবা মখোয়শিং অদুবু মহৌশাগী ফিভমদা হল্লক্নবা মহাক্না তকশিনখি।
“লৈবাক অসিগী লোইজিং লোয়াদা হৌজিক ফাওবা খুৎলায় পায়দুনা সমস্যা কোক্ননবা লম্বেল থিরিবা পুম্নমক্তা ঐহাক্না ঙসি গনতন্ত্র নুমীৎকী শেংলবা তঞ্জা অসিদা খুৎলায় থাদোকপীরো হায়না হায়জরি। হীরম খুদিংমক ইংনা তপ্না খন্নরগা পাংথোক্নবা ইশাগী অমসুং লৈবাক্কী থৌনাদা থাজবা থম্বিয়ু।”
