ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি কোলকতাদা কোলকতা পোর্ত ত্রস্তকী ১৫০শুবা চহীগী কুওন থৌরমদা শরুক য়াখ্রে। থৌরম অদুদা মহাক্না কোলকতাদা রবিন্দ্র সেতু (হাউরা ব্রিজ)গী ইন্তরেক্তিব লাইত অমসুং সাউন্দ শো হৌদোকখ্রে। মফম অদুদা পাংথোকপা কলচরেল প্রোগ্রাম অমসু মহাক্না মীৎয়েং তাখি।

ৱেস্ত বেঙ্গোলগী রাজ্যপাল শ্রী জগদীপ ধনকর, মুখ্য মন্ত্রী শ্রীমতী মমতা বেনর্জী অমসুং অতোপ্পা শক্নাইরবশিংনা থৌরম অদুদা শরুক য়াখি।  

রবিন্দ্র সেতুগী অনৌবা লৈতেংগী লাইতিং অসিদা ৬৫০ পাৱর–ইফিসিয়েন্ত এল.ই.দি. অমসুং ম্যুজিক্কা লোয়ননা সিঙ্ক তৌগদবা শো অমা য়াওনা প্রোগ্রামেবল মল্তি–কলর লাইতিং অমগীদমক স্পোতলাইত ফিৎ তৌরি। লাইতিশিং অসিনা ইঞ্জিনীয়রিংগী অঙকপা অমনি হায়না লৌনরিবা থোং অসি হেরিতেজকী অহেনবা শক্তম অমা পীরগনি। অনৌবা ইন্তরেক্তিব শো অসিনা লমকোইবশিং অমসুং লমদম অসিগী মীওইশিংবু চিংশিনবদা মতেং ওইরগনি হায়না থাজবা থম্লি।

রবিন্দ্র সেতু অসি ১৯৪৩দা কমিসন তৌখি। রবিন্দ্র সেতুগী ৭৫শুবা চহী পালন থৌরম মমাং চহীদা পাংথোকখি। মসি ইঞ্জিনীয়রিংগী অঙকপা অমনি, মসিদা নৎ অমসুং বোল্তশিং য়াওদে, অদুবু স্ত্রকচর পুম্বা রেপিৎ ফাদুনা শেমখি। মসিদা স্তিল তন ২৬,৫০০ চংখি, মদুগী মনুংদা তন ২৩,০০০দি হাই–তেন্সাইল এলোই স্তীলনি।