ভারতকী প্রধানমন্ত্রী

হিজ এক্সিলেন্সী রাস্ত্রপতিজী, ইকাই খুম্নজরবা উপরাস্ত্রপতিজী ইকাইখুম্নজরবা স্পীকর মহোদয়, শ্রীমান প্রহলাদজী অমসুং ইকাই খুম্নজরবা মীহুৎ পুম্নমক।

হৌখিবা মতম অদুগা লোইননা ঐখোয়গী মরী অসিবু চেৎশিলহনবা নুমিৎ খরা অমসুং তাঞ্জা খরসু লৈ। ঐখোয়বু হেন্না ফবা তুংলমচৎ অমসুং মাইকৈ অদোমদা থবক তৌনবগীদমক ইথিল পীনবী। ঙসি নবেম্বর ২৬কী নুমিৎ অসি পুৱারী ওইরবা নুমিৎনি। চহি ৭০গী মমাংদা ঐখোয়না কন্সতিত্যুসন অসি অনৌবা মশক অমগা লোইননা লৌশিনজখি (চৎনবা হৌখি), অদুবু মসিগা লোইননা ঙসিগী নবেম্বর ২৬তা চৈনাসু ফাওহনখি, ভারতকী অৱাংবা চৎন–লোনচৎ, চহি লিশিং কয়া লিরবা চৎনবী–নাৎকী লন–থুম, বসুধৈব কুতুম্বকমগী ৱাখল্লোন অসিবু পুদুনা চৎলিবা মসিগী চাউখ্রবা চৎন–লোনচৎ অসিবু ঙসিগী নবেম্বর ২৬ অসিগী নুমিৎ অসিমক্তদা মুম্বৈদা তেরোরিস্তকী থৌরাংনা মচেৎ তাহন্নবা হোৎনখি। ঐনা ঙসি অদুগুম্লবা চৈথেং ফংখ্রবা থৱাইশিং অদুগী মফমদা নোলুকচরি। চহি তরাগী খুজিং তরেৎকী মমাংদা সেন্ত্রেল হোল অসিমক্তা শেংলবা খোঞ্জেলতনা নিনখি, সংবিধানগী আর্তিকল অমমমতা ওইনা য়াম্না কুপ্না খন্নখি। মরৈ য়েৎনখি, অচুম্বা পুথোক্নখি, ৱাখল্লোন ফোংদোক্নখি, অচুমবশিংগী মরমদা নৈনখি, থাজবগী মরমদা খন্নখি, মঙলানশিংগী মরমদা ঙাংনখি, ৱাশকশিংগী মতাংদা নৈনখি। মওং অমরোমদা হাউস অসি, মফম অসি লৌশিংগী মহাকুম্ভ অমা ওইখি অমসুং মফম অসিদা ভারতকী কাচিন–কোয়া খুদিংমক্কী মঙলানবু ৱাহৈ ওইনা ওন্থোক্নবা অকনবা মওংদা হোৎনখি। দা. রাজেন্দ্র প্রসাদ, দা. ভীমহাও বাবা সাহেব অম্বেদকর, সরদার বল্লভ ভাই পতেল, পন্দিৎ নেহরু, আচার্য সুকরানীজী, মৌলানা আজাদ পুরুশোত্তম দাস তন্দন, সুচেতা কৃপলানী, হন্সা মেহতা, এল.দি. কৃষ্ণাস্বামী অয়্য়র, এন. গোপালাস্বামী এঙ্গর, জোন মথাইনচিংবা মশিং থিঙমদ্রবা মহাপুরুশ কয়ানা হকথেংননা অমদি নাকোইননা থৌদাং য়াদুনা চাউরবা লন–থুম অসি ঐখোয়গী খুত্তা শিন্নবীরম্মি। ঙসিগী থৌরম অসিদা ঐনা অদুগুম্লবা অফাওবা মীশকশিং অদুবু নীংশিংজরি অমসুং মখোয়বু ইকাই খুম্নমবগা লোইনা ইকোক নোঞ্জরি।

ঐগী ঐগী ৱা হৌদোকচবা অসিদা অদোম পুম্নমক্তা বাবা সাহেব অম্বেদকরনা নবেম্বর ২৫, ১৯৪৯দা, সংবিধান চৎনখিবা নোংমা ৱাৎলিঙৈদা মহাক্কী অরোইবা ৱারোল পীবদা হায়বীখিবা ৱাফম অদু শোইদনা পনজগে। বাব সাহেবনা লৈবাক অসিদা নীংশিংহনখি মদুদি ভারত অসি অহানবা ওইনা ১৯৪৭তা নীং তম্বা ফংখি নত্ত্রগা ১৯৫০দা গনতনত্ত্র (মীয়াম্না লৈঙাকচবা) ওইখি, হায়বা অসি নত্তে। ভারত অসি হান্নসু নীং তম্লম্মি অমসুং ঐখোয়গী অসিদা কয়া মরুম্না রিপব্লিকসু ওইখি, অমসুং মহাক্না মখাতানা ফোংদোকখি মদুদি অদুবু ঐখোয়গী অরানবা অশোইবা অদুমক্না ঐখোয়না মমাংদা নীংতম্বা অদুসু মাংজখি অমসুং রিপব্লিক কেরেক্তর অদুসু মাংহঞ্জখি। মসিদা বাব সাহেবনা লৈবাক অসিদা চেকশিহল্লদুনা হংখি মদুদি ঐখোয় নীং তম্বসু ফংলে, গনতন্ত্রসু ওইরে, অদুবু ঐখোয় মসিবু ঙাক্তুনা থম্বা ঙমগদৌরিবরা? হৌখ্রবশিং অদুদগী ঐখোয় তমজবা ঙমগদরা? ঙসি করিগুম্বা বাবা সাহেব লৈরম্লগদি মঙোন্দগী হেন্না নুংঙাইজবা কনা অমত্তা লৈরম্লোই। মরমদি ভারতনা চহি কয়া অসিদা শুপ্নগী মহাক্কী ৱাহংশিং অসিগী পাউখুম পীবতা নত্তনা মখোয়গী নীং তম্ববু, লোক্তন্ত্রবু হেন্না মপুং ফাহল্লে হেন্না মপাঙ্গল কলহল্লে মরম অসিনা ঙসিগী থৌরম অসিদা ঐনা অদোম পুম্নমক্তা হৌখিবা চহি তরাগী খুজিং তরেৎতা সংবিধানগী ৱাখল্লোন অসিবু ঙাক্তুনা থম্লক্লিবা লেজিসলেচর, এগজিক্যুতিব অমসুং জুদিসিয়রীগী খোংলোই পুম্নমকপু চাউথোকচবগা লোইননা নীংশিংজরি, ইকোক নোঞ্জরি। ঐনা থোইদোক হেন্দোক্না ভারত মচা করোর ১৩০গী মাংদা ইকোক নোঞ্জরি। মখোয়না ভারতকী লোকতন্ত্রগী মাইকৈদা থম্লিবা থাজবা অসি কৈদৌনুংদসু হন্থহনখিদে। ঐখোয়গী সংবিধানবু মতম পুম্নমক্তা শেংলবা লাইরিক অমা ওইনা লৌই, গাইদিং লাইৎ ওইনা লৌই।

সংবিধানগী চহি ৭০ অসি ঐখোয়গী নুংঙাইবা, মথুম–মরাংবা অমসুং ৱারোইশিনগী তোৎশিন–য়ানশিন্নরবা ৱাখল্লোন অদু পুদুনা লাক্লি। নুংঙাইবগী মরমদি সংবিধানগী ৱাখল্লোন অসি লেংদবা অমদি পুক্নীং অনি লোংদবা ওইরি। করিগুম্বা অসিগুম্বা মখলগী হোৎনবা য়াওরক্লবসু লৈবাক মচাশিংনা পুন্না মদুবু মাই পাকহন্দে। সংবিধানগী মতু নাম্মা ফাওবা শোকহনখিদে। মথু–মরাং হৌবগী মরমদি ঐখোয়না মসি রেজিস্তার তোখ্রে মদুদি ঐখোয়গী সংবিধানগী অচেৎপা অদুনা মরম ওইদুনা এক ভারত শ্রেশ্থ ভারতকী মাইকৈদা মাংদা চখৎপা ঙম্লিবনি। ঐখোয়না অহোংবা পুম্নমক অসি পুন্না হোৎনদুনা সংবিধানগী মনুংদা লৈদুনা পাংথোকই অমসুং ৱারোইশিন অদুদি মসিনি, পাক চাউরবা অমদি মখল–মখাতানা থল্লবা ভারত অসি চাউখৎ–থৌরাংগীদমক্তা, নীংথিজরবা তুংলমচৎকীদমক্তা অনৌবা ভারতকীদমক্তসু ঐখোয়গী মাংদা শুপ্নগী অমসুং শুপ্নগী সংবিধান, সংবিধানগী ঙমখৈশিং, সংবিধানগী ৱাখল্লোনশিং অসি অমত্তা ঙাইরবা লম্বী ওইরি। ঐখোয়গী সংবিধান অসি ঐখোয়গীদমক্তা খ্বাইদগী চাউরবা অমসুং শেংলবা লাইরিক অমনি। মসি ঐখোয়গী পুন্সিগী, ঐখোয়গী খুন্নাইগী, ঐখোয়গী চৎন–লোনচৎশিংগী, ঐখোয়গী থাজবশিংগী, ঐখোয়গী লিচৎ, ঐখোয়গী শাজৎ পুম্নমক অসি অমগা অমগা চপ মান্নহল্লিবা লাইরিক অমনি। লোইননা শিংনবা কয়াগী পাম্বৈসুনি। ঐখোয়গী সংবিধান অসি অসুক পাক–চাউরিবগী মরমদি মসিদা ঐখোয়না মপানদগী লাকপা মঙাল অদুগীদমক্তা ঐখোয়গী থোংনাওশিং হাংদোক্লি। অমসুং মদুগা লোইননা নুংগী মঙাল অসিবুসু হেন্না মঙাল নাইহন্নবা তাঞ্জাসু পীরি।

ঙসি তাঞ্জা অসিদা ঐখোয়না হায়বা তারবদি ঐনা ২০১৪দা ৱাফম অমখক লাল কিলাগী ফম্বাক্তগী হায়খি মদু ঐ অমুক হন্না নীংশিংজগে, সংবিধানবু করিগুম্বা অরাইবা লোন্দাদা হায়বা তারগদি হায়গনি দিগনিতী ফোর ইন্দিয়ন এন্দ য়ুনিতী ফোর ইন্দিয়া। মন্ত্র অনি অসি ঐখোয়গী সংবিধান্না পাংথোক্লি, নাগরিক্কী দিগনিতী অসি খ্বাইগী মথক্তা থম্লি অমসুং অপুনবা ভারতকী অমত্তা ওইবা অদু কাইহন্দনা থম্লি। ঐখোয়গী সংবিধান অসি মালেমগী ওইবা লোক্তন্ত্রগী অপুনবা মাই পাকপা অদুনি। মসি শুপ্নগী হক অদুখক্তমক খন্দে ঐখোয়গী থৌদাং অদুসু খঙনা চৎলি। মিৎয়েং অসিদগী ঐখোয়গী সংবিধান অসি মালেমদা খ্বাইদগী হেন্না সেক্যুলর ওইরি। ঐখোয়না করি তৌগনি, কয়াম চাউবা মঙলান মঙগনি অমসুং কদাই ফাওবা য়ৌশিনগনি মসিগীদমক করিগুম্বা মখল অমত্তগী অফা–অপুন লৈতে। সংবিধানমক্তদা হক্কী ৱাফম য়াওরি অমসুং সংবিধান অসিমক্তদা থৌদাং পাংথোকপগী ৱারোল পল্লি। ঐখোয়গী সংবিধান, ঐখোয়গী লৈবাক, ঐখোয়গী ইরাচাশিংগী মঙলানশিংনা ঐখোয়দা থাজবা থম্লিবা অদুগুম্না ঐখোয়না মীশক অমা ওইনা, ইমুং অমা ওইনা, খুন্নাই অমা ওইনা ঐখোয়গী থৌদাংশিং অদুগী মতাংদা অদুক্কী মতিক লুম্না লৌই। রাজেন্দ্র বাবুজীনা হায়বীরম্বা কন্সতিত্যুসন্দা ইদবা অদু ঐখোয়না কনভেন্সন্দগী শেমগৎগদবনি অমসুং মসিমক ভারতকী মগুন অদুনি। হৌখিবা চহি তরাগী খুজিং কয়াদা ঐখোয়না ঐখোয়গী হকশিং অদুদা শাফু পীখি অমসুং মদু মথৌসু তাখি অমসুং চুমসু চুমখি। মরমদি খুন্নাইদা অসিগুম্বা থৌরাংশিং শেমখ্রে মদুনা মরম ওইদুনা অচৌবা কাংলুপ অমবু হকশিং অদু ফংহনখিদে। হকশিং অদুগা মশক খঙনহন্দনা অচৌবা কাংলুপ অদুবু মান্নবা অমসুং অচুম্বা ৱায়েলগী ৱাখল্লোন ফাওহনবা অসি ওইথোক্তবনি। অদুবু ঙসি মতম্না পুরক্তুনা ঐখোয়না হক্কা লোইননা নাগরিক অমা ওইনা ঐখোয়গী থৌদাং, ঐখোয়গী ইথৌগী মরমদা নৈনগদবনি। মরমদি থৌদাং পাংথোক্তনা ঐখোয়না ঐখোয়গী হক অদু শোইদা ঙামদনা থম্বা ঙম্লোই।

হক অমসুং থৌদাংগী মরক্তা তৎপা য়াররোইদবা মরী অমা লৈনৈ অমসুং মরী অসিবু মহাত্মা গান্ধীজীনা য়াম্না অখন্নবা মওংদা শন্দোক্না তাকপীরম্মি। ঙসি লৈবাক অসিনা পুজা তৌনীংঙাইগী মশক ওইরবা বাপুগী ১৫০শুবা মপোক কুমওন পাংথোক্লিবা অসিদা মহাক্কী ৱাফম অদু য়াম্না মরী লৈনরক্লি। মহাক্না হায়বীরম্মি মদুদি রাইৎ ইজ দ্যুতী ৱেল পর্ফোর্ম্দ মহাক্না মফম অমদা ইবীরম্মি মদুদি ঐনা ঐগী লাইরিক হৈতবী অদুবু লাইশু খঙবী ইমাদগী তমজখি মদুদি হক খুদিংমক অদু অদোম্না থমোই শেংনা পাংথোকখিবা ইথৌ অদুদগী ফংই। হৌখিবা চহি চাগী হৌরকপা চহি তরাগী খুজিং খরদা মালেম পুম্নমক্না হক্কী ৱাফম পন্নরকপদা গান্ধীজীনা খোংথাং অমা কাখৎলদুনা হায়খি মদুদি লাকপীয়ু নাগরীকশিংগী থৌদাং হায়বদি দ্যুতিজ ওফ সিতিজেনগী মতাংদা ৱারী শাসি। ১৯৪৭তা য়ুনেস্কোগী দাইরেক্তর জেনরেল দা. জুলিয়ন হসক্লেনা মালেমগী খঙ হৈরবা ৬০দা, অফাওবা মীওইশিংদা চিথী ইখি অমসুং মখোয়দা লমজিংবীনবা/পাউতাক পীবীনবা হায়জখি অমসুং মহাক্না চিথীদা হংখি মদুদি ৱর্ল্দ চার্তর ওফ হ্যুমেন রাইৎস অসি শেম্বা তারবদি মসিগী য়ুম্ফম অদু করি ওইগনি। অমসুং মসিগী মতাংদা মহাক্না মালেমগী অখঙ–অহৈশিংগী মতাংদা ৱাখল্লোন হংখি, মহাত্মা গান্ধীদগীসু হংখি। অদুবু মালেমগী পুম্নমক্না পীখিবা ৱাখল্লোন অদুগা মহাত্মা গান্ধীনা পীখিবা ৱারোল অদুগা খরা খেন্নখি, মহাত্মা গান্ধীজীনা হায়খি মহাক্না পাউখুম পীখি মদুদি ঐখোয়না ঐখোয়গী পুন্সিদা নাগরিক অমগী থৌদাং অদু মপুং ফানা য়ারবতদা ঐখোয়গী হক অদু ফংবা ঙমগনি। হায়বদি অমরোমদা থৌদাং অসিমক্তদা হক অসি ঙাক–শেন্দুনা থম্লিবনি ৱাফম অসি মহাত্মা গান্ধীনা ঐখোয়না থৌদাংগী মতাংদা ৱারী শারকপা, মসিবু পাংথোকপনা লৈবাক অমা ওইনা ঐখোয়গী ৱাশক অদু মপুং ফাগদৌরিবা য়াম্না চম্বা থৌদাংশিংগী মতাংদা ৱারী শারকপা মতম অদুদসু ফোংদোকখি। অমসুং ঐখোয়না মসিদসু য়াম্না ময়েক শেংনা মিৎয়েং থমগদবনি মদুদি থৌদাং অমসুং সেবা, করিগুমদা ঐখোয় সেবা অসিবু থৌদাংনি হায়না লৌবসু য়াওই, সেবাগী ৱাখল, সংস্কার খুন্নাই খুদিংমক্কীদমক্তা য়াম্না মরু ওই। অদুবু সেবাগী ৱাখল্লোন অসিদগীসু থৌদাং অসিদি খরা তোঙাল্লি অমসুং মসি ঐখোয় করিগুম্বদা খল্লুদবা য়াওই। অদোম লম্বীদা চৎলিবা কনাগুম্বনা করিগুম্বা মতেংগী মথৌ তারকপা মতমদা অদোম্না তৌরিবা অদু সেবাগী ৱাখল্লোন্নি। সেবাগী ৱাখল্লোন অসিনা খুন্নাই অমবু, মীওই লোনচৎ অদুবু য়াম্না মপাঙ্গল লৈহল্লি। অদুবু থৌদাংগী ৱাখল্লোন অসিদি মদুদগী খরা তোঙাল্লি। লম্বীদা কনাগুম্বগী অৱাবদা অদোম্না মতেং পাংবা য়াম্না ফবা ৱানি অদুবু করিগুম্বা ত্রাফিক্কী কাংলোনশিং ঙাক্না চৎপা অমসুং কৈদৌনুংদসু কনাগুম্বগী অৱাবা ওইদনবা অসিগুম্বা থৌরাংগী শরুক অমা ওইনা থবক তৌবা অসি ঐগী ইথৌনি। অদোম্না তৌরিবশিং অদুদা ৱাহং অমগা লোইনরবা হায়বদি ঐখোয়না তৌরিবশিং অদুনা ঐগী লৈবাক অসিগী মপাঙ্গল কলহনগদৌরিবরা। ইমুংগী মীহুৎ অমা ওইনা ঐখোয়না ইমুং অদুগী মপাঙ্গল হেনগৎনবা থবক তৌই। মতৌ অসুম্না নাগরিক অমা ওইনা ঐখোয় লৈবাক অসিগী মপাঙ্গল হেনগৎনবা ঐখোয়গী লৈবাক অসি মতিক লৈবা অমা ওইননবা অদুগুম্বা থবক অদু ঐখোয় তৌসি।

নাগরিক অমনা মাগী মচা অদু স্কুলদা থাবা মতমদা মমা–মপা ওইবশিংনা মখোয়গী মথৌ পাংথোকই অদুবু মমা–মপা ওইবশিংনা মখোয়গী মচাশিংদা মমালোন তম্ননবা অপাম্বা ফোংদোক্লবদি অদুনা মখোয় নাগরিক অমা ওইবগী মথৌ পাংথোকপনি। লৈবাক্কী সেবাগী মথৌ পাংথোকপনি। অমসুং মরম অসিনা মীওই অমনা অপীক অপীকপা ৱাফমশিং ওইরিবা, ঈশিং মরিক মরিকশিং কঞ্জরবদি মখোয়গী নাগরিক অমগী মথৌ অদুসু পাংথোকপনি। করিগুম্বা তিকা থাফমদা চৎতুনা তিকা থারুরবা কনাবুসু ময়ুমদা চৎতুনা নীংশিংনরুবগী মথৌ তানদ্রবদি মদু মখোয়গী মথৌ পাংথোকপনি। ভোত থাদনবগীদমক তাক্নরুবা তৌদনা ভোৎ থাদবা চৎলবদি মদু মথৌ পাংথোকপনি। মতম চানা তেক্স থিগদবনি থিরবদি মদু মথৌ পাংথোকপনি। ঐখোয়গী মাংদা লৈরিবা কন্সতিত্যুস্নেল ভেলুজ অসিবু মপাঙ্গল কলহনবগা লোইননা ইশাবুসু ফিদম্নফম অমা ওইনা পুথোক্কদবনি। মসি ঐখোয়গী ইথৌদাংনি অমসুং ঐখোয়না খুন্নাইদা অফবা অহোংবা পুরক্নবগীদমক্তা থৌদাং অসিসু য়াজগদবনি, ঐখোয়না মসি হোৎনগদবনি মদুদি ঐখোয়গী থৌরম পুম্নমক্তা, ঐখোয় ৱারী শানদুনা দ্যুতীশিংদা ফোকস থমগদবনি। মীয়ামগী ৱারী শানবা মতমদা দ্যুতীগী মতাংদা পনবা ঐখোয় কাওরোইদবনি। ঐখোয়গী সংবিধান্দা ঐখোয় ভারতকী মীয়াম হায়না হৌরিবনি ৱি দ পিপল ওফ ইন্দিয়া ঐখোয়গী ভারতকী মীয়াম অসিমক মসিগী পাঙ্গলনি, ঐখোয়মক মসিগী ইথিলনি অমসুং ঐখোয় মসিগী পান্দম অদুনি।

ঐনা ওইরিবা অসিসু – খুন্নাই অসিগীদমক্তনি, লৈবাক অসিগীদমক্তনি, মসিগী থৌদাংগী ৱাখল্লোন অসি ঐখোয়গী ইথিল পোক্নফম্নি। ঐনা অদোম পুম্নমক্তা হায়জরি মদুদি ঐখোয় পুম্নমক অসিগুম্বা ৱাশক্কী পাঙ্গল অসিগা লোইননা ভারতকী মথৌ খঙবা নাগরিক অমা ওইনা ঐখোয়গী ইথৌ পাংথোকসি। লাকপীরো ঐখোয়গী গনতন্ত্রবু ঐখোয় থৌদাংতনা য়োমশিন্দুনা অনৌবা সংস্কৃতিগী মাইকৈদা পুদুনা চৎলসি। লাকপীরো ঐখোয় পুম্নমক লৈবাক অসিগী অনৌবা নাগরিক অমা ওইরসি। সংবিধান নুমিৎ অসিনা ঐখোয়গী সংবিধানগী ফিদম অসিবু কাইহন্দনা থম্লসনু অমসুং লৈবাক শেমগৎপদা থৌদাং য়াবগী ঐখোয়গী ৱাফম অদু চেৎশিলহল্লসি। ঐখোয়গী সংবিধান শেম্বীরম্বশিংনা মঙবীরম্বা মঙলান অদু মপুং ফাহনবা ঙম্ননবা ঐখোয়দা থৌনা পীনবীবা ওইরসনু। অমসুং মফম অসি শেংলবা মফম্নি মসিদা মন্থন পাংথোকখি মদুগী খোঞ্জেল ঙংদুনা লৈরি। খোঞ্জেল অসিনা ঐখোয়বু শোইদনা থৌজাল পীনবীগনি, খোঞ্জেল অসিনা ঐখোয়দা শোইদনা ইথিল কোপহনবীগনি, খোঞ্জেল অসিনা ঐখোয়দা শোইদনা থৌনা পীনবীগনি, খোঞ্জেল অসিনা ঐখোয়দা শোইদনা মাইকৈ পীনবীগনি। ৱাখল্লোন অসিগা লোইননা ঐনা অমুক্কা হন্না ঙসি সংবিধান নুমিৎকী শেংলবা তাঞ্জা অসিদা পুজা তৌনীংঙাইগী মশক ওইরবা বাবা সাহেব অম্বেদকরবু খুরুমজরি, সংবিধান শেম্বীরম্বশিংবু খুরুমজরি অমসুং ইরৈবাকচাশিংবু হন্না হন্না য়াইফ–পাউজেল পীজরি।

থাগৎচরি।