ভারতকী প্রধানমন্ত্রী

প্রধান মন্ত্রীনা ঙসি ঔরঙ্গবাদতা মহারাস্ত্র স্তেত রুরেল লাইবলিহুদ মিসন্না শিন্দুনা সেল্ফ হেল্প গ্রুপশিংগী রাজ্যগী থাক্তা পাংথোকপা মহিলা সকশম মেলাবা নত্ত্রগা এমপাৱর্দ ৱুমেন্স মীত্তা ৱা ঙাংখ্রে।

মীয়াম তিনখিবা অদুদা ৱা ঙাংলদুনা প্রধান মন্ত্রীনা সেল্ফ হেল্প গ্রুপশিংগী খুত্থাংদা লৈবাক অসিবু শক্তি লৈহনগদবা অনৌবা ভারত শেমগৎপদা থৌদাং লৌরিবশিংবু থাগৎপা ফোংদোকখি।

ঔরঙ্গবাদ ইন্দস্ত্রীয়েল সিতী অসি ঔরঙ্গবাদ শহরগী মরুওইবা শরুক অমা ওইরক্লগনি অমসুং লাক্কদৌরিবা তুংলমচৎতা লৈবাক অসিগী মরুওইবা ইন্দস্ত্রীয়েল সেন্তর অমা ওইরগনি হায়না প্রধান মন্ত্রীনা ফোংদোকখি।

ঔরঙ্গবাদ অসি দিল্লী–মুম্বাই ইন্দস্ত্রীয়েল কোরিদোরগী মরুওইবা সেগমেন্ত অমসুনি হায়না প্রধান মন্ত্রীনা মখা তাখি। ঔরঙ্গবাদ ইন্দস্ত্রীয়েল সিতীদা শেল থাদরিবা ফার্মশিংনা থবক কয়া অমসু পীরগনি হায়না প্রধান মন্ত্রীনা ফোংদোকখি।

প্রধান মন্ত্রী উজ্জ্বলা য়োজনাগী মখাদা এল.পি.জি. কনেক্সন কোতি ৮গী পান্দম অদু ঙনখৎনা এচিব তৌনবা মার্ক তৌরদুনা প্রধান মন্ত্রীনা বেনেফিসরী মঙাদা এল.পি.জি. কনেক্সনশিং য়েন্থোকখি। মসি পান্দম থমখিবা মতম অদুদগী থা তরেৎ ঙনখৎনা ফংবা ঙম্লে হায়না ফোংদোক্লদুনা মহারাস্ত্র খক্তদা উজ্জ্বলা কনেক্সন লাখ ৪৪ পীখি হায়না প্রধান মন্ত্রীনা হায়খি। স্কিম অসিবু মহৈ য়ালহনবদা অচৌবা থৌদাং লৌখিবা অমসুং মতেং পাংখিবা পুম্নমকপুসু প্রধান মন্ত্রীনা থাগৎখি।   

প্রধান মন্ত্রীনা মখা তাখি মদুদি কনেক্সনশিং পীবা খক্তা নত্তনা ভারতকী খুঙ্গংগী লমদমশিংদা অয়াম্বা ওইনা অনৌবা এল.পি.জি. দিস্ত্রিব্যুতর ১০,০০০ য়াওবা হোলিস্তিক ইনফ্রাস্ত্রকচর অমা শেমগৎলে। অনৌবা বোত্লিং প্লান্তশিং শেমগৎলে। হিথাংফমশিংগা নক্ননা তর্মিনেল কেপাসিতী হেঙ্গৎহল্লে অমসুং পাইপলাইন নেৎৱার্ক হেন্না পাকথোক চাউথোকহল্লে। কিলোগ্রাম ৫গী সিলিন্দরশিং প্রমোৎ তৌরে। পাইপ গ্যাসসু দেলিভর তৌরে। ঐখোয়না হোৎনরিবদি লৈবাক অসিদা এল.পি.জি. কনেক্সন ফংদবা ইমুং অমত্তা লৈহন্দবা অদুনি।   

নুপীশিং ঈশিংগীদমক অৱাবা কয়া মায়োক্নরিবা অদুদগী নান্থোকহন্নবগীদমক্তা জল জীবন মিশন হৌদোক্লে হায়না প্রধান মন্ত্রীনা ফোংদোকখি। জল জীবন মিশন্দা ঈশিং মাংহন্দবা অমসুং য়ুম–য়ুমদা ঈশিং য়ৌহনবা য়াওরি। লাক্কদৌরিবা চহী মঙা অসিদা সরকারনা ঈশিংগী খোংজং অসিদা চাউরাক্না লুপা কোতি লাখ ৩ চাদিং তৌরগনি হায়না মহাক্না ফোংদোকখি।

ভারতকী নুপীশিংনা খ্বাইদগী চাউনা মায়োক্নরিবা অনিদি ঈশিং অমসুং তোইলেৎনি হায়না শ্রী রাম মনোহর লোহিয়ানা হায়বীরম্বা অদু নৌহৌনা নীংশিংলদুনা প্রধান মন্ত্রীনা হায়খি মদুদি ইসু অনিসি ৱারোইশিন পুরক্লগদি লৈবাক অসি নুপীনা লুচিংবা ঙম্লগনি। মরাথাৱারা রিজন অসি জল জীবন মিশন্দগী য়াম্না চাউনা কান্নবা ফংলগনি, লৈবাক অসিদা অহানবা ৱাতর গ্রিদ রিজন অসিদা পায়খৎলে হায়না প্রধান মন্ত্রীনা ফোংদোকখি।

সরকারগী স্কিমশিংদা মীয়াম্না শরুক য়াবগী মরুওইবা অদু তাক্লদুনা প্রধান মন্ত্রীনা হায়খি মদুদি মশাগী চহী ৬০ লান্থোকলবা মতুং লৌমী খুদিংমক্তা সরকারনা পেন্সন ফংহল্লি। শা–শনশিংগী তিকা থানবগীদমক মসিগা মান্নবা খোংথাংশিসু পায়খৎলি হায়না প্রধান মন্ত্রীনা হায়খি।

আজীবিকা  – নেস্নেল রুরেল লাইবলিহুদ মিসন্না নুপীশিংগীদমক শেল তান্নবা খুদোংচাবা পীরি। ২০১৯গী য়ুনিয়ন বজেৎতা সেল্ফ হেল্প গ্রুপশিংগীদমক মরুওইবা ৱাফম লাওথোকখিবা অদু মরম অসিননি। ৱুমেন সেল্ফ হেল্প গ্রুপশিংনা শেন্দোয়দা ফংলিবা সবসিদী অদু হৌজিক্তি লৈবাক পুম্বদা চৎনহনবা হৌরে। মতৌ অসুম্না গ্রুপকী মীহুৎশিংগী মনাক্তা জন–ধন বেঙ্ক একাউন্ত লৈবশিংনা লুপা লিশিং ৫ ফাওবগী ওভর দ্রাফকী অহেনবা খুদোংচাবা ফংলগনি।

ৱুমেন্স সেল্ফ হেল্প গ্রুপশিংগী এমপাৱরমেন্তকীদমক পায়খৎলিবা অতোপ্পা খোংথাংশিংগী মতাংদা ঙাংলদুনা প্রধান মন্ত্রীনা হায়খি, “মুদ্রা য়োজনাগী মখাদা সেল্ফ হেল্প গ্রুপ খুদিংমক্কী নুপী মেম্বর অমনা লুপা লাখ অমা ফাওবগী লোন ফংগনি। মসিনা মখোয়বু মখোয়গী করোবার হৌদোকপা নত্ত্রগা মদুবু চাউথোকহনবদা মতেং ওইরগনি। য়োজনা অসিগী মখাদা হৌজিক ফাওবদা লৈবাক পুম্বদা চাউরাক্না লোন কোতি ২০ য়েন্থোকখ্রে। মদুগী মনুংদা চাউরাক্না লোন কোতি ১৪দি ঐখোয়গী ইচল–ইচেশিংগী মখুৎতা চৎখ্রি। মহারাস্ত্রদসু মুদ্রা য়োজনাগী বেনিফিসরী কোতি অমা মখায়গী মনুংদা বেনিফিসরী কোতি অমগা লাখ কুনমঙাদি ঐখোয়গী ইমাশিং অমসুং ইচল ইচেশিংনি।”

ভারতকী চন্দ্রয়ান ২ মিশনগী মতাংদা ঙাংলদুনা প্রধান মন্ত্রীনা হায়খি, “চন্দ্রয়ান্দা ওইখিবা ফিভম অদু ময়াম পুম্নমক খংবীরম্লগনি। ঐখোয়গী বিজ্ঞানিকশিংনা য়াম্না চাউবা পান্দম অমা ফংনবা হোৎনখিবনি, অদুবু মদুদা খুদোংচাদবা অমা লাকখি। মিশন অসিগীদমক বিজ্ঞানিকশিংনা মতম কয়াদগী হোৎনদুনা লাকখিবনি।”

অথুবা মতমদা ভারতনা মশামকপু ও.দি.এফ. ওইনা লাউথোক্লগনি হায়না প্রধান মন্ত্রীনা ফোংদোকখি।

সরকারনা ইচম চম্বা য়ুম নত্তবা মতিক চাবা য়ুম ফংহনবা পামই হায়না ফোংদোক্লদুনা প্রধান মন্ত্রীনা হায়খি, “ঐখোয়না পাম্লিবসি ইচম চম্বা য়ুমদু নত্তে মপুং ফাবা য়ুম শাবদুনি। ফক্লাং মরিনা কোয়শিনবা য়ুমদু নত্তে, অদোমগী মংলানগী য়ুম শাবনি। খুদোংচাবা পুম্নমক লৈবা য়ুমদুনি ঐখোয়না শাবা পাম্লিবা। হায়বদি য়ুমগী মিংদা ফক্লাং মরি য়ুংখৎপগী মওং মতৌ অদুদগী তোঙানবা হেন্না ফবা মওং মতৌ পাংথোকপগী দরকার ওইবা অদুনি। য়ুম অদুদা মখল খুদিংমক্কী চংদবা য়াদবশিং ফংহন্নবা ঐখোয়না সরকারগী তোঙান তোঙানবা স্কিমশিংবু অমত্তা ওইনা পুন্সিল্লে। মদুনা য়ুমশিং অদুদা ইলেক্ত্রিসিতী, গ্যাস কনেক্সন, লেত্রিন অমদি অসিগুম্লবা ফেসিলিতী কয়া অমসু ফংহল্লে।”

থৌরম অদুদা প্রধান মন্ত্রীনা শ্রী উমাজী নায়কপু মহাক্কী মপোক কুমওন্দা ইকায় খুম্নবা উৎলদুনা মহাক অথোইবা ফ্রিদম ফাইতর অমা ওইবিরম্মি হায়না শিংথাখি।

থৌরম অদুদা প্রধান মন্ত্রীনা “ত্রান্সফোর্মিং রুরেল মহারাস্ত্রা” হায়না মিংথোনবা লাইরিক অমা মায়খুম হাংদোকখি।

থৌরম অদুদা মহারাস্ত্রগী রাজ্যপাল শ্রী ভগৎ সিংহ কোশিয়ারী, মহারাস্ত্রগী মুখ্য মন্ত্রী শ্রী দেবেন্দ্র ফদনাবিস, রেলৱেজ অমদি কম্মর্স অমসুং ইন্দস্ত্রীগী কেন্দ্রগী মন্ত্রী শ্রী পিয়ুশ গোয়ন্দ, মহারাস্ত্র সরকারগী রুরেল দিবেলপমেন্ত, ৱুমেন এন্দ চাইল্দ দিবেলপমেন্ত মন্ত্রী, শ্রীমতী পানকাজা মুন্দে, অমসুং মহারাস্ত্র সরকারগী ইন্দস্ত্রীজ অমসুং মাইনিংগী মন্ত্রী শ্রী সুভাশ দেসাইসু শরুক য়াখি।