ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ ଏନଡିଏ ସରକାରଙ୍କ ମୂଳ ଲକ୍ଷ୍ୟ ହେଉଛି “ସବକା ସାଥ, ସବକା ବିକାଶ, ସବକା ବିଶ୍ୱାସ‘ । ଏହି ନୀତି ତଥା ଜନସାଧାରଣଙ୍କୁ ଦେଇଥିବା ପ୍ରତିଶ୍ରୁତି ପୂରଣ କରିବାକୁ ଯାଇ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ମୁସଲିମ ମହିଳା (ବିବାହ ଅଧିକାର ସୁରକ୍ଷା) ବିଲ, 2019କୁ ଅନୁମୋଦନ କରିଛନ୍ତି । ଏହି ବିଲ ପୂର୍ବରୁ ଆଗତ ମୁସଲିମ ମହିଳା (ବିବାହ ଅଧିକାର ସୁରକ୍ଷା) ଦ୍ୱିତୀୟ ଅଧ୍ୟାଦେଶ, 2019 (2019ର ଆଦେଶନାମା 4)ର ସ୍ଥାନ ନେବ ।

ପ୍ରଭାବ : 

ଏହି ବିଲ ମୁସଲିମ ମହିଳାଙ୍କ ପାଇଁ ଲିଙ୍ଗଗତ ସମାନତା ଏବଂ ଲିଙ୍ଗଗତ ନ୍ୟାୟ ସୁନିଶ୍ଚିତ କରିବ । ଏହି ବିଲ ମଧ୍ୟ ବିବାହିତ ମୁସଲିମ ମହିଳାଙ୍କ ଅଧିକାରକୁ ସୁରକ୍ଷା ଦେବାରେ ସହାୟକ ହେବା ସହିତ ସେମାନଙ୍କ ପତିଙ୍କ ଦ୍ୱାରା “ତଲାକ ଇ ବିଦ୍ଦାତ‘ ଜରିଆରେ ଦିଆଯାଉଥିବା ଛାଡ଼ପତ୍ରକୁ ନିଷିଦ୍ଧ କରିବ ।

ପରିଣାମ :

ଏହି ବିଲରେ ଟ୍ରିପଲ ତଲାକର ପ୍ରଚଳନକୁ ଅବୈଧ ଏବଂ ବେଆଇନ ଘୋଷଣା କରିବାର ବ୍ୟବସ୍ଥା ରହିଛି । ଏହାର ଉଲ୍ଲଙ୍ଘନ ହେଲେ ତିନି ବର୍ଷର ଦଣ୍ଡବିଧାନ ଏବଂ ଜରିମାନାର ବ୍ୟବସ୍ଥା ରହିଛି । ଏହାଛଡ଼ା ବିବାହିତ ମୁସଲିମ ମହିଳା ଏବଂ ତାଙ୍କ ଉପରେ ନିର୍ଭରଶୀଳ ପିଲାଙ୍କୁ ଆର୍ଥିକ ଭରଣପୋଷଣ ଦେବାର ବ୍ୟବସ୍ଥା ମଧ୍ୟ ଏହି ବିଲରେ ରହିଛି ।

ଅପରାଧ କ୍ଷେତ୍ରରେ ପୋଲିସ ହସ୍ତକ୍ଷେପର ବ୍ୟବସ୍ଥା ମଧ୍ୟ ଏହି ପ୍ରସ୍ତାବିତ ବିଲରେ ରହିଛି । ଅପରାଧ ଘଟିବା କ୍ଷେତ୍ରରେ ପୀଡ଼ିତା ମୁସଲିମ ମହିଳା କିମ୍ବା ତାଙ୍କ ସହ ରକ୍ତ ସମ୍ପର୍କ ଅଥବା ବୈବାହିକ ସମ୍ପର୍କ ଥିବା କୌଣସି ବ୍ୟକ୍ତି  ଏ ସମ୍ପର୍କରେ ଦାୟିତ୍ୱରେ ଥିବା ପୋଲିସ ଅଧିକାରୀଙ୍କୁ ସୂଚିତ କଲେ ପୋଲିସ ନିଜ ଆଡ଼ୁ ମାମଲା ରୁଜୁ କରିପାରିବ ।

ଟ୍ରିପଲ ତଲାକରେ ପୀଡ଼ିତ ମୁସଲିମ ମହିଳା ମାଜିଷ୍ଟ୍ରେଟଙ୍କ ଅନୁମତି ନେଇ ମାମଲାକୁ ବିଚାରଯୋଗ୍ୟ ଭାବେ ଗ୍ରହଣ କରିପାରିବେ ବୋଲି ବିଲରେ ବ୍ୟବସ୍ଥା ରହିଛି ।

ଏହାଛଡ଼ା ଟ୍ରିପଲ ତଲାକ ପାଇଥିବା ବିବାହିତା ମୁସଲିମ ମହିଳାଙ୍କ ସମ୍ମୁଖରେ ଅଭିଯୁକ୍ତର ଜାମିନ ଆବେଦନ ବିଚାରପତି ଶୁଣାଣି କରିବାର ବ୍ୟବସ୍ଥା ମଧ୍ୟ ବିଲରେ ରହିଛି ।

ମୁସଲିମ ମହିଳା (ବିବାହ ଅଧିକାର ସୁରକ୍ଷା) ବିଲ, 2019 ପୂର୍ବରୁ ଆଗତ ମୁସଲିମ ମହିଳା (ବିବାହ ଅଧିକାର ସୁରକ୍ଷା) ଦ୍ୱିତୀୟ ଅଧ୍ୟାଦେଶ ଧାରାରେ ପ୍ରସ୍ତୁତ କରାଯାଇଛି ।

*****************