ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদী ঙসি উত্তর প্রদেশকী ঘাজিয়াবাদতা চৎখ্রে অমদি চাউখৎ থৌরাংগী প্রোজেক্ত কয়া হৌদোকখ্রে। মহাক্না হিন্দোন এয়রপোর্তকী সিবিল তর্মিনেল শঙ্গাবগী খুদম ওইনবা প্লেক মায়খুম হাংদোকখি। মদুগী মতুং মহাক সিকন্দরপুর চৎখি অমদি দিল্লী– ঘাজিয়াবাদ– মীরুৎ আর.আর.তি.এস.কী উরেপ–উয়ুং তমখি। মহাক্না অতোপ্পা চাউখৎ থৌরাংগী প্রোজেক্ত কয়া অমসু হৌদোকখি অমদি তোঙান তোঙানবা সরকারগী স্কিমশিংগী বেনেফিসরীশিংদা সর্তিফিকেৎশিং য়েন্থোকখি।

প্রধান মন্ত্রীনা ঘাজিয়াবাদকী শহীদ স্থল (ন্যু বস অদ্দা) মেত্রো স্তেসন্দসু চৎখি অমদি শহীদ স্থল স্তেসনদগী দিলশাদ গার্দেন ফাওবগী মেত্রো রেল লমথাখি। মহাক্না মেত্রো তোংদুনসু চৎখি।

ঘাজিয়াবাদকী সিকন্দরপুরদা মশিং য়াম্না তিনখিবা মীয়ামদা ৱা ঙাংলদুনা প্রধান মন্ত্রীনা হায়খি মদুদি ঘাজিয়াবাদ অসি ঙসিদি সি অহুম্না মশক তাক্লে; কনেক্তিবিতী, ক্লিনলিনেস অমদি কেপিতেল। মসিগা মরি লৈননা মহাক্না ঘাজিয়াবাদতা লম্বী–থোং অমসুং মেত্রো কনেক্তিবিতী হেঙ্গৎলক্লিবা, স্বচ্ছ সর্বেকশন্দা ১৩ শুবা রেঙ্কতা লাক্লিবা অমদি মসিবু উত্তর প্রদেশকী বিজিনেস হব অমা ওইনা লৌনরিবা অদু পন্দুনা ঙাংখি।

হিন্দোন এয়রপোর্তকী অনৌবা সিবিল তর্মিনেল অসিগা লোয়ননা ঘাজিয়াবাদকী মীয়াম্না দিল্লী তান্না চৎত্রবসু ঘাজিয়াবাদতগী এরোপ্লেন তোংদুনা চৎপা ফংলগনি হায়না প্রধান মন্ত্রীনা হায়খি। য়াম্না অথুবা মতমদা সিবিল তর্মিনেল অসি শাখিবা অসিনা কেন্দ্র সরকারগী অচেৎপা পুক্নীং অমসুং থবক তৌবগী মওং মতৌ অদু উৎলে হায়না মহাক্না ফোংদোকখি।

লুপা কোতি ৩০০০০ চংনা শাগৎলিবা দিল্লী–মীরুৎ আর.আর.তি.এস. সিস্তেম অসি ভারত্তা অসিগুম্বা মখলগী অহানবা ত্রান্সপোর্ত সিস্তেম্নি হায়না প্রধান মন্ত্রীনা হায়খি। মসিনা মপুং ফানা লোইশিল্লবা মতমদা মীরুৎ অমসুং দিল্লীগী মরক্তা চৎথোক–চৎশিন্দা লৌরিবা মতম ফনা য়াম্না হন্থহল্লগনি। ঘাজিয়াবাদতা শেমগৎলিবা মোদর্ন ইনফ্রাস্ত্রকচর অসিনা শহর অসিদা অমদি মনাক নকপা মফমশিংদা লৈবা মীওইশিংগী পুন্সি মহিং ফগৎহল্লগনি হায়না মহাক্না ফোংদোকখি। অসিগুম্লবা ইনফ্রাস্ত্রকচরশিং লৈবাক অসিগী মফম কয়াদা শেমগৎনি হায়না মহাক্না মখা তাখি।

প্রধান মন্ত্রীনা প্রধান মন্ত্রী শ্রম য়োগী মান–ধন য়োজনাগী কান্নবশিংগী মতাংদসু ঙাংখি। স্কিম অসিনা ইনফোর্মেল সেক্তরগী ৱার্করশিংবু চহী য়ামশিল্লক্লবা মতমদা শেল–থুমগী তেংবাং ফংহল্লগনি হায়না মহাক্না ফোংদোকখি। প্রধান মন্ত্রী কিসান সম্মান নিধীগী মখাদা লৌমী কোতি অনি হেনবনা মখোয়গী অহানবা ইন্সতোলমেন্ত ফংখ্রে হায়না মহাক্না মখা তাখি।

প্রধান মন্ত্রী অৱাস য়োজনা, আয়ুশ্মান ভারত, প্রধান মন্ত্রী কিসান, পি.এম.-এস.ৱাই.এম. অসিনচিংবা স্কিম কয়াগী থোংদা সরকার অসিনা ওইথোক্লোইদবশিং অদু ওইথোকহনবগী থবক চত্থরি হায়না প্রধান মন্ত্রীনা ফোংদোকখি। মসিবু ওইথোকহনবগী থৌনা অদু লৈবাক অসিগী মীয়ামদগী ফংবা ঙম্লি হায়না মহাক্না ফোংদোকখি।