পি এম ইণ্ডিয়া

প্ৰধানমন্ত্ৰী শ্ৰী নৰেন্দ্ৰ মোদীয়ে আজি উত্তৰ-প্ৰদেশৰ গাজিয়াবাদ ভ্ৰমণ কৰে আৰু বিভিন্ন উন্নয়নমূলক প্ৰকল্প মুকলি কৰে৷ তেওঁ এখন ফলক মুকলিৰে হিন্দোন বিমানবন্দৰৰ চিভিল টাৰ্মিনেল উদ্বোধন কৰে৷ ইয়াৰ পাছত তেওঁ ছিকন্দৰপুৰ ভ্ৰমণ কৰে আৰু দিল্লী-গাজিয়াবাদ-মীৰাট ৰিজঅ’নেল ৰেপিড ট্ৰান্সজিট ছিষ্টেমৰ আধাৰশিলা স্থাপন কৰে৷ তেওঁ লগতে বিভিন্ন অন্যান্য উন্নয়নমূলক প্ৰকল্প মুকলি কৰে আৰু বিভিন্ন চৰকাৰী আঁচনিৰ উপভোক্তাৰ মাজত প্ৰমাণ পত্ৰ বিতৰণ কৰে৷

প্ৰধানমন্ত্ৰীয়ে গাজিয়াবাদৰ শ্বহীদ স্থল(নিউ বাছ আড্ডা) মেট্ৰ’ ষ্টেচন পৰিভ্ৰমণ কৰে আৰু শ্বহীদ স্থল ষ্টেচনৰ পৰা দিলশ্বাদ গাৰ্ডেনলৈ মেট্ৰ’ ৰেল সেৱাৰ ফ্লেগ অফ কৰে৷ তেওঁ মেট্ৰ’ ৰেলত উঠি খন্তেক সময় যাত্ৰাৰ আমেজ লয়৷

উপস্থিত ৰাইজক সম্বোধন কৰি প্ৰধানমন্ত্ৰীয়ে কয় যে গাজিয়াবাদ এতিয়া ৰাজধানী চহৰৰ লগতে উন্নত যোগাযোগ ব্যৱস্থা আৰু স্বচ্ছতাৰ বাবেও পৰিচিত হৈ পৰিছে৷ এই প্ৰসংগত তেওঁ গাজিয়াবাদত সম্প্ৰসাৰিত হোৱা উন্নত পথ আৰু ৰেল সেৱা, স্বচ্ছ সৰ্বেক্ষণ ৰেংকিঙত গাজিয়াবাদে ত্ৰয়োদশ স্থান লাভ কৰা আদিৰ বিষয়েও উল্লেখ কৰে৷

প্ৰধানমন্ত্ৰীয়ে কয় যে হিন্দোন বিমানবন্দৰত নতুন চিভিল টাৰ্মিনেল মুকলি হোৱাত গাজিয়াবাদৰ নাগৰিকে এতিয়া বিমান সেৱাৰ বাবে দিল্লীলৈ অহাৰ পৰিৱৰ্তে নিজৰ চহৰৰ পৰাই দেশ-বিদেশলৈ উৰা মাৰিব পাৰিব৷ চিভিল টাৰ্মিনেল নিৰ্মাণৰ ক্ষেত্ৰত হোৱা তীব্ৰ গতিয়ে কেন্দ্ৰীয় চৰকাৰৰ কৰ্মস্পৃহা আৰু দৃঢ়তাক প্ৰতিফলিত কৰে৷ তেওঁ লগতে উল্লেখ কৰে যে শ্বহীদ স্থলৰ পৰা মুকলি হোৱা নতুন মেট্ৰ’ ৰেলে উত্তৰ-প্ৰদেশ আৰু দিল্লীৰ মাজত যাত্ৰীৰ দুৰ্ভোগ হ্ৰাস কৰিবলৈ সক্ষম হ’ব৷

প্ৰধানমন্ত্ৰীয়ে কয় যে ৩০,০০০ কোটি ব্যয় সাপেক্ষে নিৰ্মাণ হৈ থকা দিল্লী-মীৰাট আৰআৰটিএছ ছিষ্টেম হ’ল এইধৰণৰ প্ৰথমটো পৰিবহন ব্যৱস্থা৷ সম্পূৰ্ণ হৈ উঠিলে এই ব্যৱস্থাই দিল্লী আৰু মীৰাটৰ মাজৰ ভ্ৰমণ দূৰত্ব যথেষ্ট হ্ৰাস কৰিব৷ গাজিয়াবাদত নিৰ্মাণ হৈ থকা আধুনিক প্ৰযুক্তিৰ আন্তঃগাথনিয়ে চহৰখনৰ আৰু ইয়াৰ নিকটৱৰ্তী অঞ্চলৰ জনসাধাৰণৰ জীৱন-ধাৰণৰ মান সৰল কৰি তুলিব বুলিও প্ৰধানমন্ত্ৰীয়ে আশা প্ৰকাশ কৰে৷ তেওঁ লগতে কয় যে এইধৰণৰ আন্তঃগাথনি সমগ্ৰ দেশতে নিৰ্মাণ হৈ আছে৷

প্ৰধানমন্ত্ৰীয়ে শ্ৰম যোগী মান-ধন যোজনাৰ উপযোগিতাৰ বিষয়েও উল্লেখ কৰে৷ তেওঁ কয় যে এই আঁচনিয়ে অনানুষ্ঠানিক খণ্ডৰ কৰ্মীক বৃদ্ধাৱস্থাত বিত্তীয় সুৰক্ষা প্ৰদান কৰিব৷ প্ৰধানমন্ত্ৰী কিষাণ সন্মান নিধিৰ অধীনত দেশৰ প্ৰায় ২ কোটি কৃষকে প্ৰথম কিস্তিৰ ধন লাভ কৰিছে বুলিও প্ৰধানমন্ত্ৰীয়ে কয়৷

প্ৰধানমন্ত্ৰী শ্ৰী নৰেন্দ্ৰ মোদীয়ে কয় যে তেওঁৰ চৰকাৰে প্ৰধানমন্ত্ৰী আৱাস যোজনা, আয়ুষ্মান ভাৰত, প্ৰধানমন্ত্ৰী কিষাণ সন্মান নিধি আদিৰ দৰে কল্যাণকামী আঁচনিৰ মাধ্যমেৰে অসম্ভৱকো সম্ভৱ কৰি তুলিছে৷

*******

AKT/VJ/SKS/MS