ভারতকী প্রধানমন্ত্রী

বিহারদা ইনফ্রাস্ত্রকচর, কনেক্তিবিতী, ইনর্দী সেক্যুরিতী অমসুং হেল্থ কেয়ার সর্বিসশিংগী চাওখৎ থৌরাংদা চানা ইনোৎ পীবা অমা ওইনা প্রধান মন্ত্রী শ্রী নরেন্দ্র মোদীনা ঙসি বরাওনিদা লুপা কোতি ৩৩,০০০গী প্রোজেক্তশিং মায়খুম হাংদোকখ্রে। বিহারগী রাজ্যপাল লালজী তন্দন, মুখ্য মন্ত্রী নিতিশ কুমার, উপ মুখ্য মন্ত্রী সুশিল মোদী, ফুদ অমসুং কঞ্জুমর এফিয়ার্সকী য়ুনিয়ন মিনিস্তর রামবিলাস পাসৱান, লোয়ননা শক্নাইরবা কয়ানা থৌরম অদুদা শরুক য়াখি। প্রোজেক্তশিং হৌদোক্লবা মতুংদা প্রধান মন্ত্রীনা মীয়াম তিনখিবা অমদা ৱা ঙাংখি।

প্রধান মন্ত্রীনা বত্তন নম্দুনা দিজিতেল ওইবা মওংদা লুপা কোতি ১৩,৩৬৫গী মমল ওইগদবা পতনা মেত্রো রেল প্রোজেক্তকী উরেপ উয়ুং তমখি। মসিদা কোরিদোর অনি লৈগনি- দানাপুরদগী মিথাপুর ফাওবা অমসুং পতনা রেলৱে স্তেসনদগী অনৌবা আই.এস.বি.তি. ফাওবনি অমসুং চহী মঙাগী মনুংদা লোইশিল্লবা য়ারি। প্রোজেক্ত অসিনা পতনা অমসুং নক্নবা লমদমশিংদা পব্লিক ত্রান্সপোর্ত ফগৎহল্লগনি।

থৌরম অসিদা প্রধান মন্ত্রীনা জগদিশপুর-বরানাসি নেচরেল গ্যাস পাইপলাইনগী ফুলপুর তু পতনা স্ত্রেতচসু শঙ্গাখি। মসিবু মহাক্না উরেপ উয়ুং তমখিবা অদু মহাক মশামক্না শঙ্গাবা প্রোজেক্তশিংগী অতোপ্পা খুদম অমা ওইনা ফোংদোকখি, প্রোজেক্ত অসি ২০১৫গী জুলাই থাদা মহাক্না হৌদোকখিবনি হায়না প্রধান মন্ত্রীনা নৌহৌনা নিংশিংখি। প্রধান মন্ত্রীনা হায়খি, “পতনাদা পাইপ গ্যাস সপ্লাই হৌদোকপনা মসিনা লোকেল ইন্দস্ত্রীশিং অমসুং নৌহৌনা মথৌ তৌবা হৌরবা বরাওনি ফর্তিলাইজর ফেক্তরীদা গ্যাস সপ্লাই তৌবা ঙমহল্লগনি। গ্যাসতা য়ুমফম ওইবা ইকোসিস্তেম্না লমদম অসিদা লৈরিবা নহাশিংগীদমক থবক ফংহন্নবা তঞ্জা পীরগনি।”

লমদম অসিগীদমক মহাক্কী প্রায়োরিতীশিং অদু ফোংদোক্লদুনা প্রধান মন্ত্রীনা হায়খি, “সরকার অসিনা নোংপার ভারত অমসুং বিহারগী ওভরওল দিবেলপমেন্তকীদমক ৱাশক্লি।” প্রধান মন্ত্রী উর্জা গঙ্গা য়োজনাগী মখাদা বরানাসি, ভুবনেশ্বর, কত্তক, পতনা, রাঞ্চি অমসুং জমশেদপুরবু গ্যাস পাইপলাইনগী থোংদা শম্নহল্লে। প্রধান মন্ত্রীনা পতনা সিতী গ্যাস দিস্ত্রীব্যুসন প্রোজেক্তসু শঙ্গাখি মদুনা পতনা সহর অমসুং থংনবা মফমশিংদা পাইপ গ্যাস সপ্লাই ফংহল্লগনি।
প্রোজেক্তশিং অসিনা অখন্ননা পতনা সহর অমসুং মনাক নকপা লমদমশিংদা কনেক্তিবিতী হেঙ্গৎহল্লগনি অমদি সহর অমসুং লমদম অসিদা ইনর্জী মরাং কাইনা ফংহল্লগনি।
লাইরবগী ফিভম ফগৎহন্নবা মহাক্কী ৱাশক অদু পল্লদুনা প্রধান মন্ত্রীনা হায়খি, “এন.দি.এ. সরকারগী ওইবা দিবেলপমেন্তকী পান্দম অসি পরিং অনিদা লৈরি, ইনফ্রাস্ত্রকচর দিবেলপমেন্ত অমসুং চহী ৭০গী মথক্তগী দরকার ওইবা চংদবা য়াদবশিং ফংনবা লান্থেংনরিবা অদুগুম্লবা শোত্থরবা কাংলুপকী ফিভম ফগৎহনবা।”

বিহারদা হেল্থ কেয়ার সিস্তেম পাকথোক চাওথোকহল্লিবা অদু মায়খুম হাংদোক্লদুনা মহাক্না হায়খি, “হেল্থ কেয়ার ইনফ্রাস্ত্রকচর দিবেলপমেন্তকী লমদা মসি বিহারগীদমক পুৱারি ওইরবা নুমীৎ অমনি। ছপরা অমসুং পুর্নিয়াদা অনৌবা মেদিকেল কোল্লেজশিং লৈরগনি অমদি গয়া অমসুং ভাগলপুরগী মেদিকেল কোল্লেজশিং অপগ্রেদ তৌরে।” মহাক্না মখা তাখি মদুদি পতনাদা এইম্স লৈরগনি অমসুং মীয়ামগী হেল্থ কেয়ারগী দরকার ওইবা অদু ফংহন্নবা রাজ্য অসিদা অতোপ্পা এইম্স লিংখৎনবা থবক পায়খৎলি।
পতনাদা রিভর ফ্রন্ত দিবেলপমেন্তকী অহানবা ফেজ প্রধান মন্ত্রীনা শঙ্গাখি। মহাক্না কর্মলিচাক সিৱেজ নেৎৱার্ক কিলোমীতর ৯৬.৫৪ হেঙ্গৎহন্নবা উরেপ উয়ুংসু তমখি। প্রধান মন্ত্রীনা বার্হ, সুলতানগঞ্জ অমসুং নাওগাসিয়াদা সিৱেজ ত্রিৎমেন্ত প্লান্তশিংগা মরী লৈনবা থবকশিং হৌদোকখি। মহাক্না তোঙান তোঙানবা মফমশিংদা অমরুৎ প্রোজেক্ত ২২গীদমক উরেপ উয়ুংসু তমখি।
পুলৱামাগী তেরর এতেক্ত মতুংদা লৈবাক অসিদা ফাওরিবা চৈনা, শাওনিংবা অমসুং থৱাই ৱাবা অদুগা মরী লৈননা প্রধান মন্ত্রীনা হায়খি, “ময়ামগী থম্মোয়দা চাক্লিবা অদুগা চপ মান্ননা ঐহাক্কী থম্মোয়দসু চাক্লি।” প্রধান মন্ত্রীনা লৈবাক অসিগীদমক মখোয়গী মথৱায় কত্থোকখ্রবা পতনাদগী অথৌবা কন্সতেবল সঞ্জয় কুমার সিনহা অমসুং ভাগলপুরদগী রতন কুমার থাকুরগী মফমদা ইকায় খুম্নবা উৎখি অমসুং অৱাবগী পুংফম অসিদা থৱায় থাখ্রবা অথৌবশিংগী ইমুং মনুংগা লোয়ননা লৈবাক পুম্বনা লেপ্লি হায়না হায়খি।

প্রধান মন্ত্রীনা বরাওনি রিফাইনরী এক্সপান্সিয়ন প্রোজেক্তকী ৯ এম.এম.তি এ.ভি.য়ু.গী উরেপ উয়ুংসু তমখি। মহাক্না দুর্গাপুরদগী মুজাফরপুর অমসুং পতনা ফাওবগী পরাদিপ-হল্দিয়া-দুর্গাপুর এল.পি.জি. পাইপলাইন চাওথোকহনবগী উরেপ উয়ুংসু তমখি। প্রধান মন্ত্রীনা বরাওনি রিফাইনরীদা এ.তি.এফ. হাইদ্রোত্রিতিং য়ুনিৎ (ইন্দজেৎ)কীদমক উরেপ উয়ুংসু তমখি। প্রোজেক্তশিং অসিনা সহর অমসুং লমদম অসিদা মতিক চাবা ইনর্জী ফংহল্লগনি।

খোংচৎ অসিগী মনুংদা প্রধান মন্ত্রীনা বরাওনিদা এমোনিয়া-য়ুরিয়া ফর্তিলাইজর কমপ্লেক্সকীদক উরেপ উয়ুংসু তমখি। মসিনা ফর্তিলাইজর পুথোকপদা ইনোৎ পীরগনি।

প্রধান মন্ত্রীনা মখাগী সেক্তরশিং অসিদা রেলৱে লাইনশিংগী ইলেক্ত্রিফিকেসনসু শঙ্গাখি: বরাওনি-কুমেদপুর, মুজাফরপুর-রাক্সোল, ফাতুহা-ইস্লামপুর, বিহারশারিফ-দানিয়াৱান। থৌরম অসিদা রাঞ্চি-পতনা এ.সি. ৱীক্লী এক্সপ্রেসসু হৌদোকখি।
বরাওনিগী মথংদা প্রধান মন্ত্রীগী মথংগী পন্থুংফম অসি ঝার্খন্দনি, মফম অদুদা মহাক্না হজারিবাগ অমসুং রাঞ্চিদা চৎকনি। মহাক্না হজারিবাগ, দুমকা অমসুং পালামুৱাদা হোস্পিতালশিংগীদমক উরেপ উয়ুং তমগনি অমসুং দিবেলপমেন্ত প্রোজেক্তশিংগী পরিং অমা শঙ্গাগনি।