ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদী অরুনাচল প্রদেশ, অসম অমসুং ত্রিপুরাদা মহাক্কী খোংচৎকী শরুক অমা ওইনা ইতানাগরদা চৎখ্রে। মহাক্না গ্রীনফিল্দ এয়রপোর্ত অমসুং সেলা তনেলগীদমক উরেপ উয়ুং তমখি।

মহাক্না দি.দি. অরুন প্রভা চেনেল হৌদোকখি। মহাক্না ইতানগরগী আই.জি. পার্ক্তগী রাজ্য অসিদা পায়খৎকদবা অতোপ্পা দিবেলপমেন্ত প্রোজেক্ত কয়াগী মায়খুমসু হাংদোকখি। মফম অদুদা প্রধান মন্ত্রীনা লাইওন লূম ওপরেসনশিং য়েংশিনখি।

থৌরম অদুদা ৱা ঙাংলদুনা প্রধান মন্ত্রীনা হায়খি মদুদি অরুনাচল অসি নুমীৎ থোরকপা লমদম্নি। মসি লৈবাক অসিগী থাজবনি। প্রধান মন্ত্রীনা হায়খি, “ঙসি ঐহাক্না লুপা কোতি ৪০০০ হেনবগী প্রোজেক্তশিং মায়খুম হাংদোকপগী খুদোংচাবা অদু ফংজরে।” রাজ্য অসিদা লুপা কোতি ১৩০০০গী অহেনবা প্রোজেক্তশিং পায়খৎনবা থৌরাং তৌরি হায়না মহাক্না মখা তাখি। প্রধান মন্ত্রীনা অরুনাচল প্রদেশ অমসুং অতোপ্পা অৱাং নোংপোক রাজ্যশিংদসু চাউখৎ থৌরাংগা মরী লৈননা মহাক্কী সরকারগী থা ৫৫গী মতমবু মমাংগী সরকারগী চহী ৫৫গী মতমগা চাংদম্ননবা প্রজাশিংদা হায়খি।

প্রধান মন্ত্রীনা হায়খি মদুদি দিবেলপমেন্ত তৌগদবা মফমদদি দিবেলপমেন্ত তৌরমদ্রে। প্রধান মন্ত্রীনা হায়খি, “মমাংগী সরকারনা অরুনাচলবু থৌওইবিরমদ্রে অমদি মদু হোংদোক্নবা ঐখোয়না মফম অসিদা লাক্লি।” অৱাং নোংপোক চাউখৎলবা মতম খক্তদা অনৌবা ভারত শেমগৎপা ঙমগনি হায়না মহাক্না অকনবা ৱাফম থমখি। মহাক্না হায়খি, “ঐখোয়গী সরকারনা অরুনাচলদা লুপা কোতি ৪৪০০০ কায়থোকখ্রে মদু মমাংগী সরকারনা কায়থোকখিবা শেনফম অদুগী শরুক অনিনি।”

প্রধান মন্ত্রীনা হোল্লোনগিদা গ্রীনফিল্দ এয়রপোর্ত শেমগৎনবগীদমক উরেপ উয়ুং তমখি অমসুং নৌনা শেমজিল্লবা তেজু এয়রপোর্ত শঙ্গাখি। হোল্লোনগি তর্মিনেল অসি লুপা কোতি ৯৫৫ চংনা স্ক্ব্যার মীতর ৪১০০গী এরিয়াদা শাগৎকনি অমদি পুং অমদা পেসেঞ্জর ২০০গী পিক হেন্দলিং কেপাসিতী লৈগনি। থৌরম অদুদা মহাক্না হায়খি মদুদি ঙসিদগী রাজ্য অসিগী কনেক্তিবিতী ফগৎলগনি। হৌজিকমক্কী ওইনা, নোংথক্কী লম্বীদা ইতানগর চৎনবা অমত্তা ঙাইরবা লম্বী অসি গুৱাহাতি এয়ারপোর্ত্তা কুমদুনা বাই রোদ নত্রগা হেলিকোপ্তর সর্বিস শিজিন্নদুনা ত্রাভেল তৌবনি।

মহাক্না মসিমসু হায়খি, “তেজু এয়রপোর্ত অসি চহী ৫০গী মমাংদা শাখিবনি অদুবু সরকার অমত্তনা রাজ্য অসিগী মীয়াম্বু লৈবাক অসিগী অতোপ্পা শরুকশিংগা শম্নহন্নবা হোৎনখিদে। মসিগী অপিকপা এয়রপোর্ত অসি ঐখোয়না লুপা কোতি ১২৫ চাদিং তৌদুনা এয়রপোর্ত অসি পাকথোক চাউথোকহল্লে”। তেজু এয়রপোর্ত অসি অরুনাচলগী মীয়ামদা সর্বিসশিং পীনবা থৌরাং তৌরে হায়না মহাক্না মখা তাখি। উরান স্কিমনা অহোংবা মমলগী ফ্লাইতশিং ফংহনবগী থোংদা মীয়ামদা কানহল্লে। এয়রপোর্তশিং খক্তা নত্তনা, অরুনাচল প্রদেশতা লৈরিবা মীয়ামগী পুন্সী অনৌবা অমসুং হেন্না ফগৎলবা রেল অমসুং রোদ ফেসিলিতীশিংনা পাক চাউনা ফগৎহল্লগনি হায়না প্রধান মন্ত্রীনা হায়খি।

প্রধান মন্ত্রীনা অরুনাচল প্রদেশতা সেলা তনেলগী উরেপ উয়ুং তমখি। মসিনা তৱাং ভেল্লিবু চহীচুপ্পা অমা অইং–অশা, নোংজু–নুংশা খাক্তনা শম্নহল্লগনি অমদি তৱাং ফাওবা চৎপগী মতম পুং অমা হন্থহল্লগনি। মসি লুপা কোতি ৭০০ কী শেনফম অমগা লোয়ননা শেমগৎকনি। প্রধান মন্ত্রীনা হায়খি মদুদি রেল অমসুং রোদ অনিমক্কী ওইবা বোগিবেল থোংনা অরুনাচলবু মেনলেন্দগী য়াম্না নকশিন্নহল্লে। রাজ্য অসিগী কনেক্তিবিতী ফগৎহন্নবগীদমক্তা লুপা কোতি ১০০০গী মমল ওইবা প্রোজেক্তশিংদা সরকারনা হান্ননা থবক তৌরি। হৌখিবা চহী ২দা চাউরাক্না খুঙ্গং ১০০০ লম্বী থোংগী খুত্থাংদা শম্নহল্লে হায়না মহাক্না খংহনখি। ত্রান্স অরুনাচল হাইৱেগী থবকশু হৌজিক চত্থরি হায়না মহাক্না মখা তাখি। অৱাং নোংপোক রাজ্যশিংগী কোনুংশিংবু শম্নহন্নবা হোৎনরিবা অদুগী মখাদা ইতানগরসু রেলৱেনা শম্নহল্লে। অরুনাচল এক্সপ্রেস অসি নহারলাগুনদগী হপ্ত অমদা অনিরক চেল্লি। রাজ্য অসিগী মফম তরুক্তা অনৌবা রেল লাইন তিংনবা সর্ভে চত্থরি, মদুগী মনুংদা ৩দি সর্ভে তৌবা লোইরে। তৱাংবু রেলনা শম্নহন্নবা থৌরাংসু তৌরি।

সৌভাগ্য স্কিমগী মখাদা অরুনাচল প্রদেশতা য়ুমথোং ১০০দা চামা মৈ ফংহল্লে হায়না প্রধান মন্ত্রীনা লোওথোকখি। প্রধান মন্ত্রীনা অরুনাচল প্রদেশতা ১১০ মেগা ৱাৎ পারে হাইদ্রোইলেক্ত্রিক প্লান্তসু জাতিদা কত্থোকখি। প্রধান মন্ত্রীনা হায়খি, “ঐখোয়না পৱার জেনরেসন্দা পুক্নিং চংলি। ঙসি মেগা ৱাৎ ১১০গী হাইদ্রো ইলেক্ত্রিক প্রোজেক্ত ১২ হৌদোক্লে, মসিনা অরুনাচল প্রদেশ খক্তা নত্তনা য়ুমলোন্নবা রাজ্যশিংদসু মতেং ওইরগনি।”

মহাক্না ফোংদোকখি, “ঙরাং ঐহাক্না মীয়ামদা মখোয়গী অৱাং নোংপোক খোংচৎকী ফোতোশিং সেয়ার তৌনবা হায়জখি। সেকেন্দ খরগী মনুংদা ফোরেনরশিং য়াওনা মীয়াম্না ফোতো ১০০০ কয়া ত্বিৎ তৌরকখি।”

প্রধান মন্ত্রীনা অরুনাচল প্রদেশতা হেল্থ এন্দ ৱেলনেস সেন্তর ৫০ শঙ্গাখি। মহাক্না হায়খি মদুদি আয়ুশ্মান ভারত স্কিমগী থোংদা ঐখোয়না হেল্থ এন্দ ৱেলনেস সেন্তরশিং শেমগৎলি। সেন্তরশিং অসিগী থোংদা হেল্থ সর্বিস ফগৎহল্লগনি। প্রধান মন্ত্রী জন অরোগ্যা য়োজনাগী থোংদা নুমীৎ ১৫০গী মনুংদা চাউরাক্না লাইরবা মীওই লাখ ১১দা কানবা ফংহনখ্রে হায়না মহাক্না মখা তাখি।

প্রধান মন্ত্রীনা হায়খি মদুদি বজেৎতা প্রধান মন্ত্রী কিসান সামান নিধি লাওথোকখিবগী থোংদা একর মঙাদগী তানা লৈবা লৌমীশিংনা মখোয়গী বেঙ্ক একাউন্তদা ইন্তোলমেন্ত অহুমদা লুপা ৬০০০ ফংলগনি।

ইতানগরগী আই.জি. পার্ক্তা প্রধান মন্ত্রীনা অরুনাচল প্রদেশকীদমক নৌনা কত্থোক্লবা দি.দি. চেনেল–দি.দি. অরুন প্রভা হৌদোকখি। চেনেল অসি দুরদর্শন্না ওপরেৎ তৌবা ২৪শুবা চেনেল ওইগনি। চেনেল অসিগী থোংদা রাজ্য অসিগী মনুং হুঞ্জিনবা মফমশিংগী পাও ফাওবা মীয়ামদা য়ৌহল্লগনি। থৌরম অসিদা মহাক্না অরুনাচল প্রদেশকী জোতেদা ফিল্ম এন্দ তেলেভিজন ইন্সতিত্যুৎ ওফ ইন্দিয়া (এফ.তি.আই.আই.)গী পর্মনেন্ত কেম্পস অমগী উরেপ উয়ুং তমখি।

মহাক্না ৱাফম অসি হায়রদুনা তেনশিনখি, “অরুনাচল প্রদেশ অসি ভারতকী চাউথোকচনিঙাইনি। মসি ভারতকী গেৎৱেনি, অদুগা ময়ামদা থাজবা পীরি মদুদি ঐখোয়না মসিগী সেফতী অমসুং সেক্যুরিতী খক্তা শোয়হন্দবতা নত্তনা দিবেলপমেন্তকী ফাস্ত–ত্রেক অমদসু থম্লি।”