ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ନୂଆଦିଲ୍ଲୀର ଲାଲକିଲ୍ଲାଠାରେ 23 ଜାନୁଆରୀ 2019ରେ ସୁଭାଷ ଚନ୍ଦ୍ର ବୋଷ ସଂଗ୍ରହାଳୟର ଉଦ୍ଘାଟନ କରିବେ ।

ସେ ନେତାଜୀ ସୁଭାଷ ଚନ୍ଦ୍ର ବୋଷ ଏବଂ ଆଜାଦ ହିନ୍ଦ ଫୌଜ ଉପରେ ଆଧାରିତ ସଂଗ୍ରହାଳୟ ଉଦ୍ଘାଟନ ଲାଗି ଫଳକ ଉନ୍ମୋଚନ କରିବେ । ପ୍ରଧାନମନ୍ତ୍ରୀ ଏହି ସଂଗ୍ରହାଳୟ ପରିଦର୍ଶନ ମଧ୍ୟ କରିବେ ।

ଜାଲିଆନାୱାଲା ବାଗ ଏବଂ ପ୍ରଥମ ବିଶ୍ୱଯୁଦ୍ଧ ଉପରେ ୟାଦେ ଏ ଜଲିଆଁ ସଂଗ୍ରହାଳୟକୁ ପ୍ରଧାନମନ୍ତ୍ରୀ ପରିଦର୍ଶନ କରିବେ ।
ଲାଲକିଲ୍ଲାଠାରେ ଭାରତର ପ୍ରଥମ ସ୍ୱାଧୀନତା ସଂଗ୍ରାମ 1857 ସିପାହୀ ବିଦ୍ରୋହ ଏବଂ ଭାରତୀୟ କଳା ଉପରେ ଦୃଶ୍ୟକଳା ସଂଗ୍ରହାଳୟକୁ ମଧ୍ୟ ପ୍ରଧାନମନ୍ତ୍ରୀ ବୁଲି ଦେଖିବେ ।

ନେତାଜୀ ସୁଭାଷ ଚନ୍ଦ୍ର ବୋଷ ଏବଂ ଆଜାଦ ହିନ୍ଦ ଫୌଜ ଉପରେ ଥିବା ସଂଗ୍ରହାଳୟରେ ଉଭୟ ଆଜାଦ ହିନ୍ଦ ଫୌଜ ଏବଂ ନେତାଜୀଙ୍କ ଜୀବନୀ ଉପରେ ବିସ୍ତୃତ ବିବରଣୀ ରହିଛି । ଏଥିରେ ମଧ୍ୟ ସୁଭାଷ ଚନ୍ଦ୍ର ବୋଷ ଏବଂ ଆଜାଦ ହିନ୍ଦ ଫୌଜ ଉପରେ ବିଭିନ୍ନ କଳାକୃତି ରହିଛି । ନେତାଜୀଙ୍କ ଦ୍ୱାରା ବ୍ୟବହୃତ କାଠ ଚେୟାର ଓ ଖଣ୍ଡା, ଆଜାଦ ହିନ୍ଦ ଫୌଜର ମେଡାଲ, ବ୍ୟାଜ, ୟୁନିଫର୍ମ ଏବଂ ଅନ୍ୟ କଳାକୃତି ଏଠାରେ ରହିଛି ।

ଏହି ସଂଗ୍ରହାଳୟକୁ ଉଦ୍ଘାଟନ କରିବା ସହିତ ପ୍ରଧାନମନ୍ତ୍ରୀ ନିଜେ ଶିଳାନ୍ୟାସ କରିଥିବା ପ୍ରକଳ୍ପକୁ ନିଜେ ହିଁ ଉଦ୍ଘାଟନ କରିବାର ପରମ୍ପରାକୁ ବଜାୟ ରଖିବେ । ଏହି ସଂଗ୍ରହାଳୟ ପାଇଁ ଅକ୍ଟୋବର 21, 2018ରେ ପ୍ରଧାନମନ୍ତ୍ରୀ ଶିଳାନ୍ୟାସ କରିଥିଲେ । ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଗଠିତ ଆଜାଦ ହିନ୍ଦ ସରକାରଙ୍କ 75 ବର୍ଷ ପୂର୍ତ୍ତି ଉପଲକ୍ଷେ ଏହାର ଉଦ୍ଘାଟନ କରାଯାଇଥିଲା । ସ୍ୱାଧୀନତାର ମୂଲ୍ୟକୁ ଧାରଣ କରି ପ୍ରଧାନମନ୍ତ୍ରୀ ଏହି ଅବସରର ସ୍ମୃତିରେ ଲାଲକିଲ୍ଲାଠାରେ ଜାତୀୟ ପତାକା ଉତ୍ତୋଳନ କରିଥିଲେ । ବିପର୍ଯ୍ୟୟ ପ୍ରଶମନ ଅପରେସନରେ ସମ୍ପୃକ୍ତ ବ୍ୟକ୍ତିବିଶେଷଙ୍କୁ ସମ୍ମାନିତ କରିବା ଲାଗି ନେତାଜୀ ସୁଭାଷ ଚନ୍ଦ୍ର ବୋଷଙ୍କ ନାମରେ ନାମିତ ଏକ ପୁରସ୍କାର ମଧ୍ୟ ଏହି ଅବସରରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଘୋଷଣା କରିଥିଲେ । ଏହି ଅବସରରେ, 21 ଅକ୍ଟୋବର 2018ରେ ଜାତୀୟ ପୋଲିସ ସ୍ମାରକକକୁ ମଧ୍ୟ ରାଷ୍ଟ୍ର ଉଦ୍ଦେଶ୍ୟରେ ସମର୍ପଣ କରାଯାଇଥିଲା ।

30 ଡିସେମ୍ବର 2018ରେ ଆଣ୍ଡାମାନ ଏବଂ ନିକୋବାର ଦ୍ୱୀପ ସମୂହରେ ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଜୀବନାଦର୍ଶକୁ ପ୍ରଧାନମନ୍ତ୍ରୀ ପୁଣିଥରେ ସର୍ବସମ୍ମୁଖକୁ ଆଣିଥିଲେ । ସେ ଏକ ସ୍ମାରକୀ ଷ୍ଟାମ୍ପ, ମୁଦ୍ରା ଏବଂ ଫାଷ୍ଟ’ଡେ କଭର ଜାରି କରି ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଦ୍ୱାରା ଭାରତ ମାଟିରେ ତ୍ରିରଙ୍ଗା ଉତ୍ତୋଳନର 75ତମ ବର୍ଷ ପୂର୍ତ୍ତିର ସ୍ମୃତିକୁ ତାଜା କରିଥିଲେ । କିପରି ନେତାଜୀଙ୍କ ଆହ୍ୱାନରେ ଆଣ୍ଡାମାନର ବହୁସଂଖ୍ୟକ ଯୁବକ ସେମାନଙ୍କୁ ଭାରତର ସ୍ୱାଧୀନତା ସଂଗ୍ରାମରେ ସମର୍ପିତ କରିଥିଲେ ତାହା ସେ ସ୍ମରଣ କରାଇ ଦେଇଥିଲେ । 150 ଫୁଟ ଉଚ୍ଚ ତ୍ରିରଙ୍ଗା ଉଡ଼ାଇ 1943ରେ ନେତାଜୀ ପ୍ରଥମେ ତ୍ରିରଙ୍ଗା ଉଡ଼ାଇବାର ସ୍ମୃତିକୁ ଉଜ୍ଜିବିତ କରିବା ଲାଗି ଚେଷ୍ଟା କରାଯାଇଥିଲା । ନେତାଜୀଙ୍କୁ ସମ୍ମାନ ଜଣାଇବାର ପ୍ରତୀକ ସ୍ୱରୂପ ରୋସ ଦ୍ୱୀପକୁ ନେତାଜୀ ସୁଭାଷ ଚନ୍ଦ୍ର ବୋଷ ଦ୍ୱୀପ ଭାବେ ନାମିତ କରାଯାଇଥିଲା ।

ପୂର୍ବରୁ ଅକ୍ଟୋବର 2015ରେ ନେତାଜୀ ସୁଭାଷ ଚନ୍ଦ୍ର ବୋଷଙ୍କ ପରିବାର ସଦସ୍ୟମାନେ ପ୍ରଧାନମନ୍ତ୍ରୀଙ୍କୁ ଭେଟିଥିଲେ ଏବଂ ଭାରତ ସରକାରଙ୍କ ନିକଟରେ ଥିବା ନେତାଜୀଙ୍କ ସଂକ୍ରାନ୍ତ ଗୋପନୀୟ ଫାଇଲକୁ ଜାରି କରିବା ପାଇଁ ଅନୁରୋଧ କରିଥିଲେ । ଭାରତୀୟ ଜାତୀୟ ଅଭିଲେଖାଗାରଠାରେ ଜାନୁଆରୀ 2018ରେ ପ୍ରଧାନମନ୍ତ୍ରୀ 100ଟି ନେତାଜୀ ଫାଇଲର ଡିଜିଟାଲ କପି ଜାରି କରିଥିଲେ ।

ୟାଦେ ଇ ଜଲିଆଁ ସଂଗ୍ରହାଳୟ ଏପ୍ରିଲ 13, 1919ରେ ସଂଘଟିତ ଜାଲିଆନାୱାଲା ବାଗ ଗଣହତ୍ୟାର ବିସ୍ତୃତ ତଥ୍ୟ ପ୍ରଦାନ କରୁଛି । ଏହି ସଂଗ୍ରହାଳୟରେ ମଧ୍ୟ ପ୍ରଥମ ବିଶ୍ୱ ଯୁଦ୍ଧ ସମୟରେ ଭାରତୀୟ ସୈନିକମାନଙ୍କ ବୀରତ୍ୱ, ସାହସ ଏବଂ ବଳିଦାନର ସ୍ମୃତି ଦେଖିବାକୁ ମିଳିବ । 1857 ପ୍ରଥମ ସ୍ୱାଧୀନତା ସଂଗ୍ରାମ ଉପରେ ଆଧାରିତ ସଂଗ୍ରହାଳୟ ତତ୍କାଳୀନ ସମୟରେ ଭାରତୀୟ ସ୍ୱାଧୀନତା ସଂଗ୍ରାମୀମାନଙ୍କ ସାହସ, ବଳିଦାନ ବିଷୟରେ ଐତିହାସିକ ବିବରଣୀ ପ୍ରଦାନ କରୁଛି ।

ଭାରତୀୟ କଳାର ପ୍ରଦର୍ଶନୀ- ଦୃଶ୍ୟକଳାରେ ଷୋଡ଼ଷ ଶତାବ୍ଦୀଠାରୁ ଭାରତର ସ୍ୱାଧୀନତା ପର୍ଯ୍ୟନ୍ତ ଭାରତୀୟ କଳାକୃତିକୁ ପ୍ରଦର୍ଶିତ କରୁଛି ।
ସାଧାରଣତନ୍ତ୍ର ଦିବସ ପୂର୍ବରୁ ପ୍ରଧାନମନ୍ତ୍ରୀ ଏହି ସଂଗ୍ରହାଳୟ ପରିଦର୍ଶନ କରିବା ଦେଶ ପାଇଁ ପ୍ରାଣବଳୀ ଦେଇଥିବା ସ୍ୱାଧୀନତା ସଂଗ୍ରାମୀମାନଙ୍କ ପ୍ରତି ଶ୍ରଦ୍ଧାଞ୍ଜଳି ହେବ ।

**********