ভারতকী প্রধানমন্ত্রী

ঙসি প্রধান মন্ত্রী নরেন্দ্র মোদীনা মহাক্কী সাইন্স, তেক্নোলোজী এন্দ ইন্নোবেসন এদভাইজরী কাউন্সিল (পি এম–এস তি আই এ সি)গী মেম্বরশিংগা উনখ্রে অমসুংৱারী শানখ্রে । কাউন্সিলনা সাইন্স, তেক্নোলোজী অমসুং ইন্নোবেসনগা মরি লৈনবা ৱাফমশিংগী পাউতাক পীখি অমসুং হায়রিবা থবকশিং অসিদা প্রধান মন্ত্রীগী মঙলানশিং অদু থবক ওইনা পাংথোক্নবগী মতাংদা য়েংশিনগনি ।

সাইন্স অমসুং তেক্নোলোজীগী মরুওইবা হিরমশিংদা ইন্নোবেসন অমসুং রিসর্সকী থবক ফগৎহন্নবা পায়খৎকদবা তোঙান-তোঙানবা থবকশিংগী মতাংদা কাউন্সিলগী মেম্বরশিংনা প্রধান মন্ত্রীদা পাউদমখি ।

সাইন্স, তেক্নোলোজী অমসুং ইন্নোবেসনগী মহৈ মীচম মীয়ামদা য়ৌহনগদবনি, মীচমশিংনা নোংমদা থেংনরিবা খুদোংচাদবশিং কোকহনগদবনি অমসুং ভারতকী মীয়াম হিংবদা লাইহনগদবনি হায়না প্রধান মন্ত্রীনা তকশিনখি । মসিগী মতাংদা, মহাক্না কাউন্সিলগী মেম্বরশিংনা মহৈ তমফম শঙশিং, রিসর্স অমসুং দিবলপমেন্ত লেবশিং, উদোক অমসুং সরকারগী বিভাগশিংগী মরক্তা মরি লৈন্ননবা তকশিনখি । একাদেমিক অমসুং রিসর্স ইন্সতিতুৎশিংগী মরক্তা অপনবা লৈহন্দনবা মহাক্না তকশিনখি ।

স্কুলগী অঙাংশিংগী মরক্তা সাইন্তিফিক তেলেন্ত মশক খঙদোক্নবা অমসুং য়োকখৎনবা চুনবা ফিদা শেমগৎনবা অমসুং জিলাগী থাক্তা অমসুং লমদম-লমদমগী ওইনা মখোয়গা অতল তিনকরিং লেবশিংগা শম্ননবা প্রধান মন্ত্রীনা খঙহনখি । মরুওইবা রিসর্সকী হিরমশিং হায়বদি লৌউ-শিংউগী শেন্থোক হেনগৎহনবা, সিক্কল সেল এনেমিয়া, অমোৎপা লোইশিনবা অমসুং সাইবর সেকুরিতী য়াওনা অরিবা অমসুং জেনিতিক লায়নাশিং লায়েংনবগী লমদা থিজিন্নবা তকশিনখি ।

মীফম অদুদা প্রধান মন্ত্রীগী প্রিন্সিপাল সাইন্তিফিক এদভাইজর, প্রোফেসার কে বিজয় রাঘবন, কাউন্সিলগী মেম্বরশিং অমসুং ভারত সরকারগী সেনিয়র ওফিসিয়েলশিং শরুক য়াখি ।

c