ভারতকী প্রধানমন্ত্রী

হৌখিবা নুমীৎ খরদগী ঐহাক্না সরকারগী তোঙান তোঙানবা স্কিমশিংগী কান্নবা ফংলবা মীওঈশিংগা মায়োক্নদুনা ৱারী শানবগী তাঞ্জা ফংজরে অমদি ঐহাক্কীদমক তোপ তোপ্পা এক্সপরিয়েন্স অমনি। মীয়ামদগী হকথেংননা তাবা ফংবা, মখোয়গী এক্সপরিয়েন্সশিং খঙবা ফংজবদা থমোয়দা অপেনবা ফাওই। অমদি থবক তৌবগী অনৌবা ইনর্জীসু ঐহাক্না ময়ামদগী ফংলি। ঙসি দিজিতেল ইন্দিয়াগী স্কিম খরগী কান্নবা ফংলবা মীওঈশিংগা ৱারী শানজবগী তাঞ্জা অদু ফংজরে।

ঙসিগী থৌরম অসিদা লৈবাক্কী মফম কয়াদা লৈরিবা কমন সর্বিস সেন্তর লাখ ৩গা শম্নবগী তাঞ্জা অদু ঐহাক্না ফংজরে। কমন সর্বিস সেন্তরশিং অসিবু ওপরেৎ তৌরিবা ভি.এল.ঈশিং অমদি মসিগী তোঙান তোঙানবা সর্বিসশিংগী কান্নবা লৌরিবা পুম্নমক ঙসিদি মফম অসিদা পুল্লরে। মসিদা নত্তনা লৈবাক্কী মফম কয়াদা লৈরিবা এন.আই.সি. সেন্তরশিংগী খুত্থাংদা দিজিতেল ইন্দিয়াগী কান্নবা ফংলবশিংসু তিল্লরি। এন.কে.এন. নেস্নেল নোলেজ নেৎৱর্ক্কা শম্নরিবা অদুগুম্লবা সংস্থান ১৬০০। মখোয়গী মহৈরোয়শিং, রিসর্স তৌরিবশিং, সাইন্তিস্ত, প্রোফেসরশিং পুম্নমক ঐখোয়গা পুল্লি। ভারতকী তোঙান তোঙানবা মফমশিংদা লৈরিবা সরকারগী স্কিমগী মখাদা লিংখৎলিবা বি.পি.ও. সেন্তরশিংগী নহা ওইরিবশিংনা মখোয়গী সেন্তরশিংদগীসু থৌরম অসিদা ঐখোয়গা লোয়নরি। মসিদসু নত্তনা মোবাইল মেনুফেকচরিং য়ুনিৎশিংদা থবক তৌরিবা নহাশিংনা ঐখোয়বু মখোয় মখোয়গী য়ুনিৎশিংসু য়েংহনগনি অমদি ঐখোয়গা ৱারী শানগনি।

লৈবাক পুম্বদা লৈরিবা মাইগোভ ভোলুনতীয়র লাখ কয়াসু শরুক য়ারি। মসি য়ামদ্রবদা মীওই লাখ ৫০ হেনবনা হিরম অমা খক্তদা অমত্তা ওইনা পুন্দুনা ৱারী শানগদবা তোপ তোপ্পা দাইলোগনি হায়না ঐহাক্না লৌই। মীপুম খুদিংগী এক্সপরিয়েন্স তানবা, মখোয়গা ৱারী শাননবা অমত্তা ঙাইরবা অঙকপা তাঞ্জানি। দিজিতেল ইন্দিয়া হৌদোকখিবনা লৈবাক অসিগী মীচম মীয়াম্বু, লাইরবশিংবু, লৌমীশিংবু, নহাশিংবু, খুঙ্গংশিংবু দিজিতেলগী সংসারগা শম্নহল্লে। মখোয়বু এমপৱার তৌরি। হৌখিবা চহি মরি অসিদা দিজিতেল এমপৱার্মেন্তকী এস্পেক্ত খুদিংমক্তা থবক তৌখি মদুনা খুঙ্গংশিংবু ফাইবর ওপ্তিক্সনা শম্নহনবা ওইরবসু। মীয়াম কোতি কয়াবু দিজিতেল্লি লিতরেৎ ওইহনবা ওইগেরা, সরকারগী ওইবা সর্বিসশিংবু মোবাইলগী থোংদা মীপুম খুদিংমক্কী মখুৎতা য়ৌহনবা ওইগেরা, ইলেক্ত্রোনিক মেনুফেকচরিংবু লৈবাক অসিদা দিবেলপ তৌবা ওইগেরা, স্তার্ত অপ নত্রগা ইনোবেসনবু পুক্নিং থৌগৎপা ওইগেরা, অরাপ-অরাপ্পা মফমশিংদা বি.পি.ওশিং হাংদোকপগী থবক চত্থবা ওইগেরা। ঙসিদি পেন্সন ফংলবা অহল-লমনশিংনা লাপ্না চৎতুনা মহাক হিংলি হায়বা তাকপা মথৌ তাদ্রে মদুগী মহুৎ মখোয়না খুঙ্গং অদুমক্তদা লৈবা কমন সর্বিস সেন্তরশিংদা চৎতুনা য়াম্না লায়না থবক তৌবা য়ারে। লৈবাক অসিগী লৌমীশিংনা নোংজু-নুংশাগী ফিভম, মহৈ-মরোংগা মরি লৈনবা ৱাফম, লৈপাক-লৈহাওগী মরমদা খঙবা ঙমলে। মখোয়না য়াম্না লাইনা ফংবা ঙম্লে। লোয়ননা দিজিতেল মার্কেৎতা ইনামগী খুত্থাংদা মখোয়গী পোত্থোকশিং অদু লৈবাক অসিগী কৈথেলশিংদা য়োনবা ঙমহল্লে। মখোয় মশাগী মোবাইল ফোনগী খুত্থাংদা নত্রগা সি.এস.সিগী সেন্তরদা চৎতুনা।

ঙসিদি খুঙ্গংদা মহৈ তম্লিবা মহৈরোঈশিংনা মখোয়গী স্কুল-কোলেজদা ফংলিবা লাইরিক অদু খক্তদা অরেপ্পা থমদ্রে। মখোয়না ইন্তর্নেৎ শিজিন্নদুনা দিজিতেল লাইব্রেরীগী খুত্থাংদা লাইরিক লাখ কয়া শিজিন্নরি। হৌজিক্তি মখোয় স্কোলর্শিপকী শেনফমগীদমক স্কুল-কোলেজকী প্লানিং সিস্তেমদা দিপেন্দ তৌদ্রে। মখোয়গী স্কোলর্শিপ অদু মখোয়গী বেঙ্ক একাউন্তা চংজরে। মসি পুম্নমক তেক্নোলোজীগী খুত্থাংদা ওইথোক্লিবনি। ঙসিদগী চহি খরগী মমাং ফাওবদা অচৌবা শহরশিংদগী লাপ্না লৈবা অপিকপা শহরশিং অমদি খুঙ্গংশিংদা লৈরিবা মীয়ামনা রেলৱে স্তেসন চৎলুদনা, পরেংদা লেপলুদনা রেলৱে তিকেৎ বুক তৌবা ফংগনি হায়বা থাজরমদে। তেক্স, মৈ ঈশিংগী বিল, সরকারগী ওফিস য়ৌরুদনা থিবা ঙমহল্লে। ঐখোয়গী পুন্সিগা মরি লৈনবা মরু ওইবা থবক কয়া খুৎশাশিংনা ফংবা মফমদা লৈরে। লৈবাক অসিগী মীয়াম খুদিংমকপু য়ারিবা মখৈ মখোয় মখোয়গী ময়ুম মনাক্তা খুদোংচাবা ফংহন্নবগীদমক লৈবাক্কী মফম পুম্নমক্তা লৈরিবা কমন সর্বিস সেন্তর নেৎৱর্ক হেন্না ফগৎহল্লে।

হৌজিক লৈবাক অসিদা কমন সর্বিস সেন্তর চাউরাক্না লাখ ৩ হাংদোক্লে। ঙসিদি দিজিতেল সর্বিস দেলিভর সেন্তরশিংগী পাক চাউখ্রবা নেৎৱর্ক অসি ভারতকী গ্রাম পঞ্চায়ৎ লাখ ১.৮৩দা শন্দোক্লে। ঙসিদি নহা ওইরিবা মীয়াম লাখ কয়ানা ভিলেজ লেভেল ইন্ত্রপ্রিনর্স (ভি.এল.ই) ওইনা থবক তৌরি অমদি নুংঙাইবা ৱাফমনা মসিগী মনুংদা নুপী ইন্ত্রপ্রিনর লিশিং ৫২না মথৌ তৌরি।

সেন্তরশিং অসিগী খুত্থাংদা মীওই লাখ ১০ হেন্না থবক ফংলে। সেন্তর অসিনা এজুকেসন, ইন্ত্রপ্রিনরশিপ নত্রগা এমপৱারমেন্তসু পুক্নীং থৌগৎলি।

ঐহাক্কী হিন্দুস্থানদা লাক্লিবা অওনবা, ময়াম পুম্নমক্না পুরক্লিবা অওনবা অসি ইশা ইশাগী খুৎশাগী ইনর্জীনা পুরকপনি। অমুক হন্না ময়াম পুম্নমকপু য়াইফ-পাউজেল পীজরি। হন্না হন্না থাগৎচরি।