ভারতকী প্রধানমন্ত্রী

1. প্রধান মন্ত্রী থেরেসা মেনা চেবাও পীরকপদগী, ভারতকী প্রধান মন্ত্রী নরেন্দ্র মোদী সরকারগী মীথুংলেন ওইনা ২০১৮গী এপ্রিল ১৮দা য়ুনাইতেদ কিংদম (য়ু কে )দা চৎখি। লুচীংবা অনিনা হীরম কয়াদা কান্নরবা ৱারী কয়া শানখি অমসুং ঐখোয়গী লৈনরিবা মরুওইবা মরিগী মতাংদা অমসুং লমদম লমদমগী অমসুং মালেমগী থৌদোক ৱাথোকশিংগী মতাংদা খন্নখি। ২০১৮গী এপ্রিল ১৯-২০দা লন্দনদা পাংথোক্কদবা কম্মনৱেল্থ হেদ ওফ গভর্মেন্ত মিতিংদা প্রধান মন্ত্রী মোদী শরুক য়াগনি।

2. মালেমগী খ্বাইদগী লিরবা অমসুং চাউবা গনতন্ত্র চৎপা লৈবাকশিং ওইনা ভেল্যু, মান্নবা আইন অমসুং ইন্সতিতুসনশিংদা য়ুম্ফম ওইরগা য়ু কে অমসুং ভারতনা লৈবাক অনিগী লৈনরিবা মরি অসি ফগৎহনবগী অপাম্বা লৈরি। ঐখোয় কম্মনৱেল্থগী মেম্বর ঙাক্তনি। ঐখোয়গী মালেমগী চপ মান্নবা মীৎয়েং লৈরি অমসুং আইনদা য়ুম্ফম ওইবা সিস্তেম অমদা থাজবা থম্লি অমসুং নমফু অমসুং নত্তবা উপায় শীজিন্নদুনা সিস্তেম অসি শিথনবা হোৎনবশিং কন্না মায়োক্নরি। ঐখোয়না লৈবাক অনিগী মরক্ত মশিং থিঙমদ্রবা মীওই কয়া অমসুং শিনফম কয়াগী মীওইশিংগা মরি লৈনরি।

3. মালেমগী শিংনরকপশিং ময়োক্ননবা য়ু কে অমসুং ভারতনা অতোপ্পা কম্মনৱেল্থ মেম্বর স্তেৎশিং, কম্মনৱেল্থ সেক্রেতরীয়েৎ অমসুং চৎমিন্নরিবা লুপশিংনা পুন্না থবক তৌমিন্নগনি। অপীকপা অমসুং খুদোংথিনীংঙাই ওইবা লৈবাকশিং অমসুং কম্মনৱেল্থকী অপুনবা মীশিংগী চাদা ৬০ ওইরিবা নহারোলশিংদা কম্মনৱেল্থকী মরুওইবশিং অমুক হন্না খঙহন্নবা ঐখোয়না হোৎনরি। মীফম অসিগী পান্দম ‘অমত্তা ওইবা তুংলমচৎ অমদা’ হায়বা অসিদা পাংথোক্লিবা কম্মনৱেল্থ হেদ ওফ গভর্মেন্ত মিতিং অসিনা ঐখোয় অমত্তা ওইনা পুনশিন্দুনা খুদোংচাদবশিং খন্নবগী তাঞ্জা অমা পীরে। কম্মনৱেল্থগী মীয়ামদা তুংকোইবা, নুংঙাইবা অমসুং হেন্না ফবা ওইহনবদা ভারত অমসুং য়ু কেনা মতেং, থবকশিং লৌখৎতুনা পাংগনি:

o কম্মনৱেল্থগী খুৎথাংদা মালেমগী ওইনা প্লাস্তিক পোলুসন থিংনবা থবক লৌখৎপা অমসুং ভারতনা য়ুমবু ওইদুনা ৱার্ল্দ ইনভাইরনমেন্ত দে পাংথোকপা

o কম্মনৱেল্থ লৈবাকশিংনা সাইবর সেক্যুরিতীগী ফিবম ফগৎনবা মতেং পাংবা

o তেক্নিকেলগী ওইবা মতেং পীদুনা কম্মনৱেল্থ লৈবাকশিংনা ৱার্ল্দ ত্রেদ ওর্গেনাইজেসন (দব্লিউ তি ও)গী য়ান-ৱারোলশিং ঙাক্না চৎনবা হোৎনবদা মতেং পাংবা অমসুং কম্মনৱেল্থগী অপীকপা লৈবাকশিংদা মতেং পীবা হেনগৎহনবা।
তেক্নোলোজীগী মতেং পীনবা

4. ঐখোয়গী হৌজিক্কী অমসুং তুংগী মীরোলগী য়াইফনবা য়ু কে অমসুং ভারতনা তেক্নোলোজীগী মতেং পীনবা অসি ঐখোয়গী পান্দমগী য়াম্না মরুওইবা অমনি। ঐখোয়গী লৈবাকশিং অসি তেক্নোলোজীগী অওনবা পুরকপদা মাংজিল থারিবা লৈবাকশিংনি। মালেমগী থাক্ত চৎনবা য়ারবা অনৌবশিং পুথোকপদা ঐখোয়না লৌশিং, থিজিনবা অমসুং পুন্না থবক তৌমিন্নবদা মতেং পীনগনি। ঐখোয়গী তেক্নোলোজীশিং অসি অফবা থবক পীনবা, পোৎথোক হেনগৎনবা, ললোন-ইতিক অমসুং শেল থাদবা হেনগৎনবদা শীজিন্নগনি।

5. আর্তিফিসিয়েল ইন্তিলিজেন্স (এ আই), দিজিতেল ইকনোমী, হেল্থ তেক্নোলোজী, সাইবর সেক্যুরিতীগী লমদা লাক্লিবা মালেমগী অওনবশিং অসি থেংনবা ঙম্নবা নাকল অনিনা তুংদা লাক্কদৌরিবা তেক্নোলোজীগী মতেং পীনবা হেনগৎহনগনি অমসুং অনানবা শহর অমসুং চৎথোক-চৎশিনগী পাম্বৈ শেমগৎপা অমসুং নহারোলশিংগী তুংগী লৌশিং শেমগৎনবা থবক পায়খৎকনি।

6. লৈবাক অনিনা তেক্নোলোজীগী মতেং পীনবা হেনগৎলকপগী শরুক অমা ওইনা ভারত্তা য়ু কে-ভারত তেক হব অমা লিংখৎনবা য়ু কেনা লৌখৎলক্লিবা খোঙথাং অসি ভারত সরকারনা তরাম্না ওক্লি। তেক হব অসিনা হাই-তেক কম্পেনীশিং পুনশিন্দুনা শেল থাদনবা অমসুং মপান্দা পোৎ থাদোক্নবা শীনগনি অমসুং চৎথোক-চৎশিন, মেন্যুফেকচরিং, ভারতকী এস্পিরেসনেল দিস্ত্রিক প্রোগ্রামগী মখাদা হকশেলগী থবক্তা এ আই শীজিন্নবদা মতেং পীনগনি। অপুনবগী ওইনা আর & দি অমসুং অনৌবা পুথোক্নবা ভারতকী রাজ্যশিংদা লৈরিবা তেক ক্লস্তরশিংগা য়ু কেগা মতেং পীনগনি। লৈবাক অনিগী সরকারশিংগী মতেংগা লোয়ননা ঐখোয়না ভারত-য়ু কে তেক সি ই ও এলাইন্স অমা শেম্লে, স্কিল অমসুং অনৌবা তেক্নোলোজীদা য়ুম্ফম ওইদুনা য়ু কে/নাসকোমগী এম ও য়ু অমা খুৎয়েক পীনরে। মসিদা উদ্যোক্কী এপ্রেনতিসসিপ স্কিমশিং, ফিনতেক চাউখৎনবা অনৌবা য়ু কে ফিনতেকরোকেদসিপ এৱার্দ লিংখৎপা অমসুং ভারত্তা ইন্ত্রপ্রিনরশিপ পাক-শন্না পায়খৎপা য়াওরি।

7. মালেমগী ওইনা শিংনরকপশিং পুন্না থেংনমিন্ননবা, লৈবাক অনিনা ব্রিতিশ অমসুং ভারতকী খ্বাইদগী ফবা মীওইশিং সাইন্স, রিসর্স অমসুং তেক্নোলোজীদা শীজিন্নরি । ইন্তর্নেসনেল রিসর্স অমসুং ইন্নোভেসন্দা য়ু কে অসি ভারতকী অনিশুবা খ্বাইদগী চাউবা মরূপনি। য়ু কে-ভারত নিউতোন ভবা প্রোগ্রামনা ২০২১ ফাওবদা পাউন্দ মিলিয়ন ৪০০গী অপুনবা রিসর্স অমসুং ইন্নোভেসন পায়খৎকনি, মসি ২০০৮দগী হৌরকখিবনি। এ আই হেনগৎহনবা অমসুং দিজিতেল হেল্থ তেক্নোলোজীশিংগী মতেংনা য়ু কে অমসুং ভারত অসি হকচাং ফনা লৈনবা হকশেলগী লমদা ভারত অমসুং য়ু কেনা হেন্না থবক তৌমিন্নগনি।

ললোন- ইতিক অমসুং শেল থাদবা

8. য়ু কেনা লৈবাক অসিগী মনীংতম্বা ললোন-ইতিক্কী থৌশিলশিংগী থৌদাং লৌদুনা ভারত-য়ু কেগী অনৌবা ললোন-ইতিক্কী মওং শেমগৎপা লুচীংবশিংনা য়ানরে। মসিনা নাকল অনিমক্না শেল থাদবা অমসুং মতেং পীনবা হেনগৎহনগনি। হন্দক পাংথোকখিবা য়ু কে –ভারতগী অপুনবা ত্রেদ রিভ্যুগী ৱারেপশিংদা য়ুমফম ওইদুনা ললোন-ইতিক্কী অথিংবশিং হন্থনবা, লৈবাক অনিমক্তা ললোন-ইতিক তৌবদা লাইথোকহন্নবা অমসুং য়ু কেনা ই য়ুদগী থোরকখ্রবা মতুংদা নাকল অনিগী ললোন-ইতিক্কী মরি ফগৎহন্নবা পুন্না থবক তৌমিন্নগনি। য়ু কেনা ই য়ুদগী থোরকখ্রবা মতুংদা ই য়ু-ভারতগী য়ানখিবশিং ঐখোয়না মখা তানা য়ু কেদা চৎনখিগনি অমসুং মতম অসি লোইরবা মতুংদা ই য়ু-ভারতগী য়ানখিবশিং অতোপ্পা অমা মহুৎশিন্নবা হোৎনগনি ।

9. নিয়মশিংগী মখা পোন্না ললোন-ইতিক্কী থবকশিং পায়খৎনবা লুচীংবশিংনা অমুক হন্না ৱারেপ লৌরে অমসুং তুংকোইনা চাউখৎপা পুরক্নবা অথিংবা য়াওদনা ললোন-ইতিক তৌনবগী মরুওইবশিং থমখি। দব্লিউ তি ওগী মেম্বরশিং পুন্না থবক তৌমিন্ননবা মখোয়না অমুক হন্না ৱারেপ লৌরে অমসুং মালেমগী ওইনা চৎন-কাংলোন্দ য়ুমফম ওইদুনা অমসুং দব্লিউ তি ওগী থৌদাং মাংদা থমদুনা জোইন্ত ৱার্কিং গ্রূপগী মখাদা ৱারী শান্নবা খন্নখি।

10. হৌখিবা চহি ১০ রোমদগী য়ু কে অসি ভারত্ত শেল খ্বাইদগী য়াম্না থাদবা জি ২০গী লৈবাক অমা ওইরি অমসুং ভারতনা য়ু কেদা ইনভেসমেন্ত প্রোজেক্ত থাদবদা মরিশুবদা লৈরি। মতেং পীননবা তুংদা লাক্কদৌরিবা খুদোংচাবশিংগী মতাংদা শেল থাদবা হেনগৎনবা ঐখোয়না নৌনা ৱারী শান্নবা হৌরগন ।

11. য়ু কেদা ভারতনা শেল থাদরিবা অসিগী ফাস্ত ত্রেক মেকানিজম অমা লিংখৎতুনা ভারতকী ললোন-ইতিক্কী থবকশিংদা অহেনবা মতেং পীনবা য়ু কেনা ৱারেপ লৌরকপদা ভারতনা তরাম্না ওক্লি। তেক্নিকেলগী মতেং পীনবগী থৌরম অমনা চৎন-কাংলোনশিং শেম্বগী মওং ফগৎহল্লগনি। ভারত অমসুং য়ু কেনা নুংঙাইবা শরুক য়ামিন্ননবা ঙসি পাংথোকলিবা য়ু কে-ভারত সি ই ও ফোরমনা পুখৎলকপশিং য়াওনা নাকল অনিনা ললোনবশিংগী থবক থৌরমশিংদা শৌগৎকনি।
12. মালেমগী ওইনা শেল থাদবগী থবক্তা লন্দন শহরনা লৌরিবা মরুওইবা থৌদাং লৈবাক অনিনা তরাম্না ওকখি। মালেমগী ওইনা রুপিনা মশিং য়াম্বা ‘মসালা বোন্দ” গী চাদা ৭৫ লন্দন স্তোক একচেঞ্জদা পীরি অমসুং মসিগী শরুক অহুম থোকপগী অমদি গ্রিন বোন্দশিংনি।

13. ভারতকী নেসনেল ইনভেসমেন্ত এন্দ ইনফ্রাস্ত্রকচর ফন্দগী মখাদা ভারত অমসুং য়ু কে সরকারনা পুন্না লিংখৎপা গ্রিন গ্রোদ ইক্যুইতী ফন্দ( জি জি ই এফ)না ভারতকী রিন্যুএবল ইনর্জী সেক্তরদা শেন্থং পীগনি। নাকল অমমম্না পাউন্দ মিলিয়ন ১২০ পুথোক্নদুনা জি জি ই এফনা পাউন্দ মিলিয়ন ১৫০ খোমগৎনবা পান্দম থম্লি। ২০২২ ফাওবগী মনুংদা ভারতনা রিন্যুএবল ইনর্জী গিগাৱার্দ ১৭৫ পুথোক্নবা পান্দম থম্লিবা অদু ফংবা ঙম্নবা জি জি ই এফনা মতেং পাংগনি অমসুং অনানবা ত্রান্সপোর্তত্রেসন, ঈশিং অমসুং অমোৎপা শেংদোকপগী থবক্তসু মতেং পাংগনি। ইনর্জী অমসুং ইনফ্রাস্ত্রকচর পোলিসী অমসুং সমার্ত আর্বান্নাইজেসন্দা মতেং পীনবা হায়না ঐখোয়না য়ানরে।

14. মতেং পীননবা নৌনা শেম্লিবা য়ান-ৱারোলশিং অসি য়াওনা লৈবাক অনিগী মরক্ত ফিনতেক দাইলোগ অমা লৈরকপা অসি ঐখোয়না তরাম্না ওক্লি। ইন্সোলভেন্সি, পেন্সন অমসুং ইন্সুরেন্সগী লমদা মতেং পীনবা হেনগৎহন্দুনা ঐখোয়গী শেল-থুমগী লমদা মতেং পীনবা অসি তেক্নিকেলগী মতেং পীনদুনা হেনগৎহনগনি। মখা তানা মতেং পীননবা ৱাফমশিং চহী অসিগী অরোইবদা পাংথোক্কদবা ইকনোমিক অমসুং ফাইনান্সিয়েল দাইলোগকী ১০ শুবা মীফমদা খন্নগনি।
15. ঙসিগী মালেম অসিদা চৎথোক-চৎশিনগী মরুওইবশিং ভারত অমসুং য়ু কেনা খঙমিন্নখি। চৎথোক-চৎশিনগী থবক অসি অফবা লৈঙাক, নিয়ম ঙাকপা, অরোন-অথুপ লৈতবা, খুন্নাইগী অমসুং অকোয়বগী ফিবমগী চৎনবী ঙাকপা, শেল-থুমগী থৌদাং লৌবা, মালেমগী চৎনবীশিং ঙাকপা য়াওনা হীরম কয়াদা য়ুমফম ওইদুনা পাংথোক্কদবনি।
থৌদাং লৈবা মালেমগী লুচীংবা

16. অইং-অশাগী খল কাইরক্লিবা অসি মাংজিল থাদুনা থেংননবা লুচীংবশিংনা ৱারেপ লৌখি। অইং-অশাগী খল কাইরকপা থেংনবা অমসুং অফবা, অনানবা অমসুং অহোংবা ইনর্জী ফংহনবা অসি নাকল অনিনা মরুওইনা লৌখি অমসুং অনৌবা তেক্নলোজী, লৌশিং পীথোক পীশিন তৌনবা, ত্রেনীং পীবা, ললোন-ইতিক, শেল থাদবা অমসুং প্রোজেক্ত পায়খৎতুনা অফবা ইনর্জী অহোংবা মমলদা পুথোক্নবা অমসুং শীজিন্ননবা মতেং পীনবা হায়না য়ানখি।

17. ইন্তর্নেসনেল সোলর এলাইন্স (আই এস এ) লিংখৎনবা ভারতনা মাংজিল থাদুনা লৌখৎলক্লিবা থবক য়ু কেনা তরাম্না ওক্লি। কম্মনৱেল্থ লৈবাকশিংগী লুচীংবশিংগী মীফমগী শরুক অমা ওইনা লৈবাক অনিগী সরকারশিংগী মতেংগা লোয়ননা আই এস এ অমসুং লন্দন স্তোক একচেঞ্জ (এল এস ই)গী মরক্ত অপুনবা থৌরম অমা মাইপাক্না পাংথোকপদা লুচীংবশিংনা থাগৎনখি। থৌরম অদুগী শরুক অমা ওইনা য়ু কে আই এস এদা য়াওখি, সোলরগী লমদা শেল থাদবা, অনৌবা তেক্নোলোজীশিং পুথোকপা য়াওনা য়ু কে অমসুং আই এস এগী মরক্ত মতেং পীনবা অমসুং আই এস এগী পান্দম অদু ফংবা ঙম্নবা য়ু কেগী সোলরগী অখঙবশিং মতেং পাংবগী ৱাফম খন্নখি। ২০৩০ ফাওবদা আই এস এগী পান্দমশিং ফংবা ঙম্নবা এল এস ইনা শেল থাদনবগী মরুওইবা থৌদাং লৌদুনা আই এস এগী লৈবাকশিংনা ফংবা থোকপা সোলর ইনর্জী ফংবা ঙম্নবা য়ু এস দোল্লর বিলিয়ন ১,০০০ থাদনবা খন্নখি।

18. গনতন্ত্র চৎপা লৈবাকশিং ওইনা, ঐখোয়না পুন্না থবক তৌমিন্নবগী ৱাখল্লোন লৈরি অমসুং মালেমগী নিয়মশিং ঙাকনবা, শান্তি পুরক্নবা অমসুং তংদু লৈতাবা লৈনবা মালেমগী নিয়মশিং শৌগৎপা হায়না য়ানখি। তম্বা ঙমদবা ফিবম অমদা লৈরিবা মালেম অসিদা ভারত অমসুং য়ু কেনা পুন্না অফবা থবক তৌবগী তঙাইফদবা লৈরি। শেল চংদনা কেন্সর লায়েংবা ঙম্নবা ভারতকী দিপার্তমেন্ত ওফ বাইওতেক্নোলোজী অমসুং কেন্সর রিসর্স য়ু কেনা পাউন্দ মিলিয়ন ১০গী অপুনবা রিসর্স প্রোজেক্ত অমা পায়খৎনবা হোৎনরি। মালেমগী মফম অমদা লৈরিবা অপীকপা অমসুং লায়রবা লৌমীশিংগী পুন্সি মহিং ফগৎনবা সমার্ত এগ্রিকলচরগী ওপন-সোর্স দেতা প্লেদফোর্ম অমা য়ু কেগী বাইওতেক্নলোজী এন্দ বাইওলোজিকেল সাইন্স রিসর্স কাউন্সিল অমসুং দি বি তিনা মাংজিল থাদুনা শেম্লগনি। তুংকোইনা চৎনগদবা চাউখৎ থৌরাংগী থবকশিং পায়খৎনবা দি বি তনা য়ু কেগী নেচরেল ইনভাইরনমেন্তেল রিসর্স কাউন্সিল (এন ই আর সি)গা খুৎশম্নদুনা থবক পায়খৎলগনি।
19. মালেমগী ওইনা চাউখৎপা পুরক্নবা অমসুং ২০৩০ ফাওবগী মনুংদা কা হেন্না লায়রবা মুৎথৎপা ঙম্নবা থবক পায়খৎনবা লৈবাক অনিগী লৈনরিবা মরূপ-মপাং ওইবগী মরি ঐখোয়না হেন্না ফগৎহনগনি। শেল থাদবা, অনৌবা কৈথেল, ললোন-ইতিক, শেন্থং পীবা, চৎথোক-চৎশিন, শেল-থুমগী থবকশিংগী কান্নবশিং লৈবাকশিং অসিগী লায়রবশিংগী মরক্তগী খ্বাইদগী লায়রবশিংনা ফংবা ঙম্নবা অমসুং নুংঙাই য়াইফবা ওইনবা ঐখোয়না থবক তৌগনি।
ঙাকশেল অমসুং সাইবর সেক্যুরিতী

20. ঐখোয়গী মরিদা ঙকশেলগী থবক্না মরুওইনা থবক পায়খৎনবা ২০১৫দা অনৌবা দিফেন্স এন্দ ইন্তর্নেসনেল সেক্যুরিতী পার্তনরসিপ (দি আই এস পি) অমা শেম্নবা ঐখোয়না ৱাশক লৌরে। ঐখোয়না লেপ্তনা থেংনরিবা শিংনবশিংগী মওং তোইনা হোংবা মরম্না ঐখোয়গী লাল্লোংসু হোংগদবনি অমসুং ঐখোয়না ফজনা খুৎ হনগদবনি। কিহল্লকপশিং মায়োক্নবা ঙম্নবা ঐখোয়না তেক্নোলোজীশিং দিজাইন তৌগদবনি, শেমগদবনি অমসুং পুথোক্কদবনি অমসুং ঐখোয়গী সেক্যুরিতী অমসুং মিলিতরি ফোর্সশিংনা তেক্নোলোজীশিং অমসুং খুৎলায়শিং অদু শীজিন্নগদবনি।

21. অশোয়-অঙাম লৈতবা, নীংতম্বা, পুম্নমক হিংমিন্নবা অমসুং নুংঙাই-য়াইফবা ইন্দো-পেসিফিক লমদম অমা শেমগৎপা হায়বসি ভারত, য়ু কে অমসুং মালেমগী মীয়ামগী অপাম্বনি। সমুদ্রগী হুরানবশিং থেংননবা, মনীং তৌনা হি হোনবা ঙম্নবা, সমুদ্রগী শরুক ফংবা ঙম্নবা অমসুং লমদম অসিগী সমুদ্রগী হিরমদা ৱাখল্লোন তাবা হেনগৎহন্নবা য়ু কে অমসুং ভারতনা পুন্না থবক তৌমিন্নগনি।

22. মনীং তম্বা, অরোনবা লৈতবা, শান্তি ওইবা অমসুং অশোয়-অঙাম লৈতবা মালেমগী নিয়মগী মখাদা মালেমগী ওইবা অফবা সাইবরস্পেস অমা শেমগৎনবা মতেং পীনবা হেনগৎহনবা হায়না ঐখোয়না য়ানরে।
তেরোরিজম থেংনবা

23. ভারত অমসুং য়ু কেদা থোক্লিবা মখল খুদিংমক্কী তেরোরিজম অমসুং মসিগা মরি লৈনবা থৌদোকশিং লুচীংবা অনিনা অকনবা মওংদা য়ানীংদবা ফোংদোক্লি। মরম অমত্তাদা তেরোরিজম অসি অচুম্বনি হায়নবা হোৎনবা য়ারোই অমসুং থৌওং অসি ধর্ম্ম, কাংলুপ, খুন্নাই অমসুং ফুরুপ অমত্তাগা মরি লৈনহনবা য়ারোই হায়না লুচীংবা অনিনা অচেৎপা ফিরেপ লৌখি।

24. তেরোরিস্ত অমসুং এক্সত্রিমিস্ত লুপশিংনা মীচম মীয়াম্বু মখোয়রোমদা পুশিন্নবা হোৎনবা অমসুং খুৎ থানবা থবকশিংদা শীজিন্ননবা হোৎনরকপদা মদুগী মফম অমত্তা পীরোইদবনি হায়না লুচীংবশিংনা য়ানখি। মসিগীদমক তেরোরিস্তশিংগী নেতৱার্ক থুগায়নবা, মখোয়গী শেল লাকফম অমসুং চৎথোক-চৎশিন অমসুং মপান লৈবাকশিংদগী লান্মী খোমজিনবা থিংনবা লৈবাকশিংনা পুন্না থবক তৌমিন্নগদবনি।

25. মালেম্না মশক খঙলবা তেরোরিস্তশিং অমসুং মখোয়গী লুপশিং – লাস্কার-ই-তোইবা, জাইস-ই– মহমদ, হিজব-উল-মুজাহিদিন, হক্কনি নেতৱার্ক, অল কাইদা, আইসিস অমসুং মখোয়গা চৎমিন্নরিবশিংগী মথক্ত অকনবা থবক লৌখৎনবা মতেং পীনবা হেনগৎহন্নবা লুচীংবশিংনা য়ানখি।

26. য়ু কেগী সালিসব্যুরীদা নার্ব এজেন্ত শীজিন্নরকপা অসিদগী, কেমিকেলনা খুৎলাই ওইনা শীজিন্নবগী মায়োক্তা য়ু কে অমসুং ভারতনা লেপ্লি। সিরিয়াদা লেপ্তনা কেমিকেল ৱিপন শীজিন্নরকপদা লৈবাক অনি অসিনা নুংনাংবা পোক্লি। ফিবম অমত্তদা, মতম অমদা, মফম অমদা, কনাগুম্বা অমনা কেমিকেল ৱিপন শীজিন্নবা, লৈবাক অনিনা মদুগী মায়োক্ত লৈরি। কেমিকেল ৱিপন শীজিন্নবা অথুবা মতমদা থিজিন্দুনা কনভেন্সনগী মতুংইন্না চৈরাক পীনবা মখোয়না তকশিনখি।

মহৈ-মশিং তম্বা অমসুং মীগা মীগা উনবা

27. লৈবাক অনিগী নুংঙাই য়াইফবা পুরক্নবা খ্বাইদগী ফবা অমসুং হৈশিংবশিং য়ু কেদা লাইরিক তম্বা অমসুং থবক তৌবদা ঐখোয়না তরাম্না ওক্লি।

28. ভারত-য়ু কে ইয়র ওফ কলচর ২০১৭ মায়পাক্না লোইশিনখিবদা লুচীংবা অনিনা থাগৎখি। চহি অমা চুপ্না পাংথোকখিবা থৌরম অদুদা লৈবাক অনিনা অমুক্তা ওইখিদ্রিবা মওংদা কলচরগী থৌরমশিং উৎখি।
29. ব্রিতিশ কাউন্সিল ভারতগী ৭০শুবা মপোক কুমওন অমসুং কাউন্সিল অসিনা লৈবাক অসিগী ওজাশিং, নহারোলশিংদা ত্রেনীং পীবগী পায়খৎলিবা থবকশিং লুচীংবা অনিনা তরাম্না ওকখি।
30. লৈবাক অনিগী মীয়াম অসি অহিংবা থোং অমনি হায়বা লুচীংবা অনিনা য়ানখি অমসুং ভারত অমসুং য়ু কেগী তুংগী মীরোলশিংনা হেন্না চেৎপা মরি লৈনগদবনি হায়না য়ানখি।

ৱারোইশিন

31. মালেম শীনবা থুংনা অমসুং চহী চা কয়া শুরবা মরুওইবা মরি অসি লাক্কদৌরিবা চহিশিংদা ফগৎহন্নবা ঐখোয়না থাজবা থম্লি । ইমুং-মনুং, শেল-থুম,ললোন-ইতিক, বোলিৱুদ, শান্ন-খোৎনবা, সাইন্স য়াওনা লৈবাক অনিনা মমাংদগী লৈনরক্লবা মরি অসি ঐখোয়না ফগৎহনগদবনি ।

32. প্রধান মন্ত্রী থেরেশা মে অমসুং য়ু কে সরকারনা মহাক অমসুং মহাক্কী কাংবুবু তরাম্না ওকপীবগীদমক প্রধান মন্ত্রী মোদীনা থাগৎখি।