ভারতকী প্রধানমন্ত্রী

ভারতকী মমল য়াম্লবা কলা সংস্কৃতিগী লন-থুম্বু থৱায় য়াওনা লুনা ৱাংনা খনবা অমদি খুন্নাইগী শেল-থুম ফগৎহন্নবা পুক্নীং লোঙদনা চংশিনবীখিবা, শ্রী ঐচ.দি. দেবে গৌরা, ১৮ মে ১৯৩৩দা কর্নাতক্কী জিলা হাসন, তালুক হোলেনরসিপুরগী হারাদনহল্লী খুঙ্গংদা পোকখি ।

সিবিল ইঞ্জিনীয়ারিং দিপ্লোমা পায়রবা, শ্রী দেবে গৌরা নহা ওইনা মশাগী চহি ২০ শুরকপদা থৱায় য়াওনা   রাজনিতীদা পুমলুপ লুপখি, মহাক্কী মহৈ মশিং লোয়রবা মতুং, ১৯৫৩দা কংগ্রেস পার্তী য়াওখি অমদি ১৯৬২ ফাওবা মেম্বর ওইরম্মি। লৌউ-শিংউবনা শিনফম ওইবা ময়াই ওইবা থাক্তগী হৌরকপা অমদি লৌমীগী লাইবক থীবা পুন্সিবু থেংনরক্লবা, খুন্নাইকী মীওৎ অনৈগী লৈঙাক অমদি হক্কী মখাদা, লায়রবা লৌমীশিংগী ফিভম ফগৎহন্নবা নহা ওইরিবা গৌরানা লানথেংননবা ৱাশকখি।

প্রজাতন্ত্রগী ওইবা শেমগৎ শাগৎপগী মখা থংবা লৈরোলদগী হৌরগা, শ্রী গৌরা রাজনিতীগী কৈরাক্তা মথং মথং কারকখি। অঞ্জেনিয়া কো-ওপরেতিব সোসাইতীগী প্রসিদেন্ত অমদি মতুং তারকপদা হোলেনরসিপুর তালুক দিবেলপমেন্ত বোর্দ মেম্বর ওইনা থবক তৌরিঙৈ মহাক মশাবু মীয়ামগী পুক্নীংদা নীংশিংনীংঙাই ওইবা মফম অমা কনবা ঙমখি।

খুন্নাইদা লৈরিবা মান্নদবা শক্তিশিংবু শেমদোক্নবগী ৱাখলদা, মহাক্না মতম চুপ্পা ফিদম্নফম ওইরবা ৱাখল্লোন্তনা শাগৎপা রাজ্য অমগী মঙ মঙলম্মি। শুপ্নগী চহি ২৮ শুরকপা মতমদা, নহা ওইরিবা গৌরানা মনীং তম্বা মীরেপ ওইনা থেংনখি অমদি ১৯৬২দা মহাক্না অহুমলক শুবা কর্নাতক বিধান সভাগী মীহুৎ ওইবা অহানবা নুমীৎ অদুদগী মাইপাকপগী লম্বীদা চংশিল্লকখি। সভাগী লৈমায়দসু কান্ননীংঙাই ওইবা স্পিকর অমা, মহাক্কী মথক থোংবা য়াওনা, ময়াম্না মহাকপু থৱাই-য়াওনা থাগৎনখি। হোলেনারাসিপুর কেন্দ্রগী মীয়াম্না মহাকপু সভাদা থংন-থংননা অহেনবা তার্ম অহুমলক অমগসু থাগৎলকখি, মদুদি মরিশুবা(১৯৬৭-৭১), মঙাশুবা(১৯৭২-৭৭) অমদি তরুকশুবা(১৯৭৮-১৯৮৩) সভাশিংনি।

সভাদা বিরোধীগী লুচিংবা ওইনা মহাক্কী থৌদাংদা, মার্চ ১৯৭২দগী মার্চ ১৯৭৬ ফাওবা অমদি ১৯৭৬ নবেম্বরদগী ১৯৭৭ দিসেম্বর ফাওবা, মহাকপু মীংচৎ ফংহনখি।

১৯৮২গী নবেম্বর ২২দা শ্রী দেবে গৌরানা তরুকশুবা সভাগী মীহুৎ ওইবগী ফম থাদোকচখি। তরেৎশুবা অমদি নিপালশুবা সভাগী মীহুৎ ওইনা, মহাক্না পব্লিক ৱার্কস অমদি ইরিগেসনগী মন্ত্রী ওইনা থবক পায়রম্মি। ইরিগেসনগী মন্ত্রী ওইনা মহাক্কী থবক পায়রিঙৈ মতমদা ইরিগেসন প্রোজেক্ত কয়া থবক তৌবা উরম্মি। ১৯৮৭দা ইরিগেসনগীদমক কায়থরকপা শেনফম মতিক চাদবগীদমক কেবিনেৎকী ফম থাদোকখি।

নীং তম্বা অমদি মান্নবা থাক্কীদমক থৌনা ফনা লানথেংনরিবা, মহাক্কী থৌওং অসিনা ১৯৭৫-৭৬তা কেন্দ্রদা শক্তি পায়রিবশিংবু শাওহন্দুখি,অমদি ইমার্জেন্সীগী মতমদা জেল চংখি। শ্রী দেবে গৌরানা ৱানা লেনবা মতম অসিবু লাইরিক মপুঙ ফানা পাদুনা মশাগী পুক্নীং লৌশিং হেঙ্গৎহন্নবা শিজিন্নখি। মসিনা মরম ওইরগা, মতম অদুদা জেলদা লৈরিবা ভারতকী রাজনিতীদা মমিং লৈরবা অতোপ্পা কয়াগা মহাক্কা শকখঙ মায়খঙনখি, মহাক্কী থোইদোকপা শাজৎ অমদি মওং মতৌ শাগৎপদা মতেং ওইখি। মহাকপু ফাজিল্লম্বা অদু থাদোরকপদগী মহাক হান্নদগী হেন্না পূক্নীং চপ য়ুংবা অমদি মতিক চাবা মীওই অমা ওইরকখি।

১৯৯১দা হাসন লোক সভা কোন্সতিতুয়েন্সীদগী লোকসভা গীদমক থাগৎলকখি, মরুওইনা রাজ্যগী লৌমীশিংগী খুদোংচাদবা কয়াবু থেংনবদা মাং থাবা মীশক ওইরকখি। লোকশভাদা, মহাক্না লৌমীশিংগী ফীভমদা অপন-অরাক লৈতনা মীচং চংবগীদমক মহাকপু ইকাই খুম্নবীখি। লোকসভা অমদি মসিগী মশাসিংদা ইজ্জৎ লৈনা অমসুং পুকচেল চাউনা থবক পাংথোকপা অমদি তেঙবাংশিনবগীদমক মহাক্না মীংচৎ অমসু ফংখি।

১৯৯৪দা শ্রী দেবে গৌরা রাজ্যগী থাক্তা অনিরক হন্না জনতা পার্তীগী প্রসিদেন্ত অমদি স্তেৎ জনতা দলগী প্রসিদেন্ত ওইরম্মি। ১৯৯৪দা রাজ্যদা জনতা দলনা শক্তি পাইরকপদা মহাক্না মনীংদগী শাফু অমা পীরম্মি। মহাকপু জনতা তল লেজিসলেতিব পার্তীগী লুচিংবা ওইনা খনখি অমদি ১৯৯৪গী দিসেম্বর ১১দা কর্নাতক্কী ১৪ শুবা মুখ্যমন্ত্রী ওইনা থবক পায়খি। মদুগী মতুং মহাক্না রামনগর বিধান সভা কোন্সতিতুয়েন্সীদা মীরেপ ওইরম্মি অমদি য়াম্না ৱাংনা মশিং হেল্লগা মাই পাকখি।

মহাক্কী রাজনিতীদা মতম শাংনা থৱাই য়াওরকপগী হৈজ-শিংজবা অমদি মরা চেৎপা য়ুম্ফমদগী হৌরকপনা রাজ্যনা মায়োক্নরিবা খুদোংচাদবা কয়াবু অচুম্বা লম্বীদা পুরক্তুনা থেংনবা ঙমহনখি। মহাক্না হুব্লীগী ঈদগহ মৈদানগী ৱাথোকপু মমাং থানা পুখৎতুনা মহাক্কী রাজনিতীগী বুদ্ধি লৌশিংবু অমুক হন্না মশক তাকখি। মসি মশিং য়ামজদবা কাঙলুপকী মনুংচনবা ৱাথোক ওইরম্মি অমদি রাজনিতীদা চরাংনহন্নবা মচাক ওইরম্মি। শ্রী গৌরানা ৱাথোক অসিদা শান্তি ওইবা ৱারোইশন অমা মাইপাক্না পুরকলম্মি।

১৯৯৫ জনুৱারীদা, শ্রী গৌরা স্বিৎজরলেন্দ খোংচৎতা ফোরম ওফ ইন্তর্নেস্নেল ইকোনোমিস্তা শরুক য়ারুই। মহাক্কী য়ুরোপিয়ন অমদি মিদ্দল ইস্তর্ন লৈপাকশিংগী খোংচৎনা মহাকপু রাজনিতীদা কৎথোক্লবা মীওই অমগী প্রমান ওইহনখি। মহাক্কী শিঙ্গাপুর খোংচৎনা, মরম ওইদুনা রাজ্যদা মীরৈবাক্তগী শেল থাদহন্নবগী মরুওইবা মচাক অদু পুরকখি, মহাক্কী লল্লোন ইতিক্কী ওইবা লৌশিং উৎখি।

৭০গী মতমদগী হৌনা, মহাক্কী রাজনিতী অমদি মসিগা মরি লৈনবা থৌওংশিংদা খ্বাইগা মান্নদবা মওং অমদা পুক্নীং লুপ্পগী মতৌদা মরূপ-মপাংশিং অমদি য়েক্নবশিংনা ৱাফম কয়া নৈনখি। মহাক্কী রাজনিতীদা, শ্রী গৌরানা হাইরম্মি মদুদি মীয়ামগী ওইবা রাজনিতীনি অমদি মখোয়গীদমক করিগুমবা খরা তৌবা অমদি মীয়াম্না মাগী অকোইবদা লৈরগা মহাক্কী অপেনবনি।

১৯৮৯দা, মহাক্কী কাঙলুপ ওইরিবা জনতা পার্তীনা বিধান সভাগী ফিদা ২২২গী লম্বা থেংনবদা ২ খক্তমক মায় পাক্তুনা কর্নাতক্তা তুশোন্নবা ফীভম অমদা লৈখি; শ্রী গৌরা মশামক মহাক্না লম্বা তৌখিবা কোন্সতিতুয়েন্সী অনিমক্তা মাইথিবা ফংদুনা মহাক্কী খোংচৎতা মপুন্সিগী অহানবা ওইনা মাইথিবগী মহাও তংখি। মরম অদুনা মহাক, রাজনিতীগী ওইবা নোংদমগীদমক পূকচেল হোংবদা ঙকনিঙাই ওইখিদে।

মাংখ্রবা মীংচৎ অমদি শক্তিবু অমুক হন্না ফংনবা তান্নবদা মাইথিবা নংখিবা অদুনা, হেন্না থৌনবা ময়া থাংবা ওইদুনা, মহাক মশাগী রাজনিতীগী মওং মতৌবু অমুক হন্না থিজন্নবা মশাবু থৌজিঞ্জখি। মহাক্না দিল্লী অমসুং কর্নাতক্তা মরূপ-মপাং শেমগৎলম্মি, রাজনিতীগী য়েক্নবাশিংগা মতম শাংনা উংখৎনরম্বা অদু নাথৈদুনা থমখি। শ্রী গৌরা অসি য়াম্না চম্বা পুন্সি মহিং অমদা হিংবা, মীনা শকখঙবা ৱাৎপা অদুবু ফিরেপ চেৎপা অমদি থবক খূদিংমক ঙম্বা মীওই অমনি।

রাজনিতীদা খোংদাদ্রিঙৈ মমাংদা, শ্রী গৌরা অসি থবক মচা শুবা থিকাদার অমা ওইরম্মি। ডল অমত্তদা য়াউদনা ইন্দিপেন্দেট ওইনা মহাক্না লেনখিবা চহি তরেৎ অদুনা পার্তী নাইবা রাজনিতীবু মপানদগী থিজিনবদা মতেং ওইরম্মি। থবক্তা লাইচুরবা অমা ওইনা, মতম অয়াম্বদা মহাক লাইরিক্কা শগোন্নদুনা লৈবা উই অমদি বিধান সভাগী লাইব্রেরী চাং নাইনা চৎলম্মি। ১৯৬৭দা মহাকপু অমুক হন্না থাগৎলকপনা মঙোন্দা হেন্না থাজবা পীরম্মি অমদি ১৯৬৯দা কংগ্রেসনা কাঙলুপ কাঙলুপ খায়দোরকপা মতমদুদা, শ্রী নিজালিঙগপ্পানা লুচিংবা কংগ্রেস(ও)দা মহাক য়াওরম্মি, মদুনা মতম অদুদা কর্নাতক্তা শক্তি পাইরম্মি। অদুবু ১৯৭১গী লোক সভাগী মীখলদা কংগ্রেস(ও)না মাইথিদুনা চেনবা মতম অদুদা শ্রী গৌরাগী অচৌবা খুদোংচাবা অমা লাকলম্মি। ইন্দিরা গান্ধীগী ইপোম্না য়ৈবদা মতোল ককখ্রবা বিরোধীগী লুচিংবা অমা ওইনা মহাক থোক্লকখি।

শ্রী দোদ্দে গৌরা অমদি শ্রীমতী দেবম্মা গৌরানা পোকখিবা শ্রী দেবী গৌরানা মহাক্কী ইচম চমনা লৌউ শিংউবনা য়ুমফম ওইদুনা হৌরকখিবা অদুগীদমক চাউথোকচৈ। শ্রীমতী চেন্নম্মাগা লুহোংখি, মখোয় অনিগী মচানুপা মরি অমদি মচানুপী অনি লৈ। মচানুপাশিং অদুগী মরক্তা অমদি কর্নাতক্কী এম এল এ ওইরি অদুগা অতোপ্পা অমনা লোক সভাদা খনখ্রে।

অহুমশুবা ফ্রন্ত (রিজনেল পার্তী অমসুং নন-বী.জে.পি. অমসুং নন-কংগ্রেসকী অপুনবা) লুচিংলদুনা প্রধান মন্ত্রী ওইরক্নবগী লম্বীদা- থিংবীনবা য়াওদনা শ্রী গৌরা চংশিল্লকখি।

১৯৯৬, মে ৩০দা ভারতকী ১১ শুবা প্রধান মন্ত্রী ওইনা ৱাশক লৌননবা শ্রী দেবে গৌরানা কর্নাতক্কী মুখ্যমন্ত্রীগী ফম থাদোকখি।