ভারতকী প্রধানমন্ত্রী

ভারতকী তরামরি শুবা প্রধান মন্ত্রী, দা. মনমোহন সিংহবু অচুম্বা মওংদা ৱাখল-খনবা মীওই অমদি পন্দিৎ অমগুম থৱাই-য়াওনা থাগৎনৈ । মহাক্কী অচেৎপা পুক্নীং অমদি মহাক্কী একাদেমিক ওইবা মওংদা থবক পায়খৎপা লোইননা মহাক্কী য়ৌশিনবা ঙম্বা অমদি মহাক্কী নোল্লুকপা শাজৎ অদুগীদমক মহাকপু তরাম্না ইকাই-খুমনৈ।

হান্নগী প্রধান মন্ত্রী মনমোহন সিংহ, ভারতনা খাইদোক্ত্রিঙৈগী মতমদা পঞ্জাব প্রদেশকী মনুং চন্না লৈবা খুঙ্গং অমদা, ১৯৩২, সেপ্তেম্বর ২৬তা পোকখি । দা. সিংহনা ১৯৪৮দা পঞ্জাব য়ুনিভর্সিতীদগী মেত্রিকুলেসনগী পরিখা মপুং ফানা লোয়শিনখি। মহাক্কী মহৈ-মশিংগী থৌশিলনা মহাকপু পঞ্জাবতগী কেম্ব্রীজ য়ুনিভর্সিতী, ইয়ু.কে,দা পুদুনা চৎখি, ১৯৫৭দা মফম অদুদা মহাক্না ইকোনোমিক্সতা ফর্স্ত ক্লাস ওনর্স দিগ্রী ফংখি । দা. সিংহনা ১৯৬২দা ওক্সফোর্দ য়ুনিভর্সিতীগী ন্যুফিল্দ কোলেজদগী ইকোনোমিক্সতা দি.ফিল ফংদুনা মখা চৎথখি । মহাক্কী, “ইন্দিয়াজ এক্সপোর্ত ত্রেন্দস এন্দ প্রোসপেক্তস ফোর সেল্ফ-সস্তেন্দ গ্রোথ” [ক্লারেন্দোন প্রেস, ওক্সফোর্দ, ১৯৬৪] অসি ভারতকী লল্লোল-ইতিক্কী লৈবাক ঙাক্লোলগী মনুংচন্না-মফম খঙনা পুশিনবা অফ-ফত্তা নৈনরগা ইথোকপা অঙনবা মতমগী লাইরিকনি ।

দা. সিংহনা পঞ্জাব য়ুনিভর্সিতী অমসুং মমিং লৈরবা দিল্লী স্কুল ওফ ইকোনোমিক্সতা ওজা ওইদুনা লৈরিঙৈ মতমদা মহাক্কী মহৈ-মশিংগী থোইদোক-হেন্দোকপা অদু উৎথোকখি। চৈরক অদুদা, মহাক অতেনবা মতম খরগীদমক ইয়ু.এন.সি.তি.এ.দি.গী সেক্রিতরীয়েত্তসু থবক তৌরম্মি । মদুনা মরম ওইদুনা মহাক ১৯৮৭ অমদি ১৯৯০দা সাউথ কমিশন জেনেভাদা সেক্রেতরী জেনরেল ওইনা ফম হাপখি ।

১৯৭১দা, দা. সিংহ ভারত সরকারদা লল্লোন-ইতিক মন্ত্রালয়গী ইকোনোমিক এদভাইজর ওইনা য়াওরম্মি । মসিগী মতুং থুনমক ১৯৭২দা মহাকপু শেল-থুম মন্ত্রালয়গী চীফ ইকোনোমিক এদভাইজরগী ফম হাপখি । দা. সিংহনা পায়রম্বশিংগী মরক্তা সরকারগী ওইবা মশিং য়াম্লবা ফমশিং অদুদি শেল-থুমগী মন্ত্রালয়দা সেক্রেতরী; প্লানিং কমিসনগী দিপুতী চেয়রমেন; রিজার্ব বেঙ্ক ওফ ইন্দিয়াগী গভর্ণর; প্রধান মন্ত্রীগী এদভাইজর; অমসুং য়ুনিভর্সিতী গ্রান্থ কমিসনগী চেয়র্মেন্নি ।

দা. সিংহনা ১৯৯১দগী ১৯৯৬ ফাওবা চহি মঙাগী ভারতকী শেল-থুমগী মন্ত্রী ওইনা লৈরম্মি, মদুনা নীং তম্লবা ভারতকী ইকোনোমিক্কী পুৱারীদা অনৌবা মাইয়োন অমা পুরকখি । ইকোনোমিক রিফোর্মগী পাক্ন-চাউনা খোল্লিবা লৈবাক-ঙাক্লোলবু পুশিল্লকতুনা উৎপদা, মহাক্কী থৌদাং অদুবু মালেম শিন-থুংনা শকখঙবীখি। ভারত্তা মদুগী চহিশিং অদু মীয়াম পুম্বগী মীৎয়েংদা, দা. সিংহগী তৎন-থানা য়াদ্রবা শরুক অমগুম লৌনৈ ।
দা. সিংহনা পাংথোকখিবা লৈবাক মীয়ামগী ওইবা থৌদাংশিং অদুগীদমক ফংখিবা ইকাই খুম্নবা অমদি য়াম্লবা মনাশিংগী মরক্তা, খ্বাইদগী মচীন-তুম্বশিং অদুদি ভারতকী অচম্বা মীয়ামদা পীবা অনিশুবা খ্বাইদগী ৱাংবা মনা, পদ্মা বিভুশন (১৯৮৭); ইন্দিয়ন সাইন্স কংগ্রেশকী জৱাহরলাল নেহরু বর্থ সেন্তিনরী এৱার্দ (১৯৯৫); ফাইনান্স মিনিস্তর ওফ দ ইয়রগীদমক্তা এসিয়া মনী এৱার্দ (১৯৯৩ অমসুং ১৯৯৪); ফাইন্যান্স মিনিস্তর ওফ দ ইয়রগীদমক্তা য়ুরো মনী এৱার্দ (১৯৯৩); কেম্ব্রিজ য়ুনিভর্সিতীগী অদাম স্মিথ প্রাইজ (১৯৫৬); অমসুং কেম্ব্রিজকী এস.তি. জোন কলেজদা থোইদোক-হেন্দোকপা থবক পাংথোকপগীদমক রাইৎস প্রাইজ (১৯৯৫) য়াওরি। দা. সিংহবু জাপানগী নিহোণ কৈঝাই শিমবন য়াওনা মশিং য়াম্লবা সংস্থান কয়ানা ইকাই খুম্নবীখ্রে । কেম্ব্রিজ অমসুং ওক্সফোর্দ য়ুনিভর্সিতীশিং য়াওনা মশিং যাম্লবা য়ুনিভর্সিতী কয়াদগী ইকাই খুম্নবা ওইনা হাপ্পা দিগ্রী কয়া অমা দা. সিংহনা ফংখ্রে ।

মশিং য়াম্লবা মালেমগী ওইবা লুপশিং অমদি মালেমগী ওইবা মীফম কয়াদা দা. সিংহনা ভারতকী মীহুৎ ওইনা শরুক য়ারুরে । সাইপ্রসতা পাংথোকখিবা কমনৱেলথ হেদস ওফ গোভর্মেন্ত মিতীং (১৯৯৩) অমসুং ১৯৯৩দা ভিয়েনাদা পাংথোকখিবা ৱার্ল্দ কনফরেন্স ওন হ্যুমেন রাইৎস মীফমদা ভারতকী মহুৎ শিনবা মীওই কাংলুপ্পু লুচিংখি ।

মহাক্কী রাজনিতীগী খোংথাংদা, ১৯৯১দগী দা. সিংহ ভারতকী পর্লিয়ামেন্তা অপর হাউস (রাজ্যা সভা)গী মীহুৎ ওইরকখি, মফমদুদা মহাক ১৯৯৮ অমদি ২০০৪গী মরক্তা ওপোজিসনগী লুচিংবা ওইখি । দা. মনমোহন সিংহ ২০০৪গী জেনরেল ইলেকসনগী মতুং মে ২২দা প্রধান মন্ত্রী ওইনা ৱাশক লৌখি অমদি ২০০৯গী মে ২২দা অনিশুবা তর্মগী ওফিস পাইবগী ৱাশকখি ।

দা. সিংহ অমসুং মহাক্কী লোইনবী গুরশরন কোরগী মচানুপী অহুম লৈ ।