ভারতকী প্রধানমন্ত্রী

প্রধানমন্ত্রী শ্রী নরেন্দ্র মোদী হয়েং লক্ষদ্বীপ, তমিলনাদু অমসুং কেরলদা চৎকনি। প্রধানমন্ত্রীনা সাইক্লোন ‘ওখী’না অমাং-অতা থোকহল্লবা মতুং মফম অদুদা ওইরিবা ফিভম অদু য়েংশিনগনি অমসুং মদুগা লোইননা মহাক্না কাবারত্তী, কন্যকুমারী অমসুং তিরুঅন্তপুরমদা পাইখৎলিবা তেংবাং পীবগী থবক-থৌরমগী ওইরিবা ফিভম অদু য়েংশিনগনি। চৈরক অসিদা প্রধানমন্ত্রীনা ওফিসিএল অমসুং মীয়ামগী মীহুৎশিংগা লোইননা মীফম পাংথোক্কনি। মহাক্না ঙা ফাবশিং অমসুং লৌমীশিং য়াওনা সাইক্লোন্না অৱাবা নংহল্লবা মীওইশিংগসু উন্নগনি।

নবেম্বরগী অরোইবা অমসুং দিসেম্বর, ২০১৭কী হৌরকপা শরুক্তা সাইক্লোন ‘ওখী’না কেরল , তমিলনাদু অমসুং লক্ষদ্বীপকী মফম কয়া শাথিনা অমাং অতা থোকহনখিবনি।

চৈরক অসিদা প্রধানমন্ত্রীনা সাইক্লোন্না ওইহল্লিবা ফিভম অদু লেপ্তনা য়েংশিন্দুনা লাকখি। মসিগী মতাংদা মহাক্না মরি লৈনবা ওথোরিতী অমসুং ওফিসিএলগা ৱারি শান্নখি।

ঙাক-শেল মন্ত্রী শ্রীমতী নির্মলা সীতারমণনা দিসেম্বর ৩ অমসুং ৪দা তমিলনাদুগী কন্যাকুমারী জিলা অমসুং তিরুঅন্তপুরমদা সাইক্লোন্না শোকহল্লবা মফমশিংদা চৎখি। কেবিনেৎ সেক্রেতরী শ্রী পী.কে. সিনহাগী লুচীং মখাদা নেস্নেল ক্রাইসিস মেনেজমেন্ত কমিতী (এনসিএমসি)গী মীফম দিসেম্বর ৪দা ফমখি অমসুং সাইক্লোন্না শোকহল্লবা রাজ্য অমসুং য়ুনিয়ন তেরিতোরীশিংদা চৎথরিবা তেংবাং পীবা অমসুং মী কনবগী থবক-থৌরমশিং য়েংশিনখি।

কেন্দ্র অমসুং শোকহল্লবা রাজ্যশিংগী সরকারগী এজেন্সীশিংনা কোস্ত গার্দ, এয়র ফোর্স, নেভী, অমসুং এনদিআরএফকা লোইননা তেংবাং পীবা অমসুং মী কনবগী থবক পাইখৎতুনা লাক্লি। সাইক্লোন ‘ওখী’না শোকহল্লবা মফমশিংদা রিলিফ কেম্পশিং হাংদোক্লে। কেন্দ্র সরকারনা মহৌশানা থোকহনবা অমাং-অতা অসি থেংননবা রাজ্য সরকারনা পাইখৎলিবা থৌরাং অসিদা অৱাৎপা মেনশিনবা ওইনা চৎলিবা শেনবা চহি ২০১৭-১৮দা কেরল অমসুং তমিলনাদু সরকারশিংদা স্তেৎ দিজাস্তর রিলিফ ফন্দ (এসদিআরএফ)গী অনিশুবা ইন্সতোলমেন্ত থাদোকখ্রে। শেনবা চহি ২০১৭-১৮গী কেরল অমসুং তমিলনাদুগী রাজ্য সরকারশিংগী এসদিআরএফকী কেন্দ্রগী শরুক অসি মথংশিৎনা লুপা কোতি ১৫৩ অমসুং লুপা কোতি ৫৬১নি।

সাইক্লোন ‘ওখী’না দিসেম্বর ৫গী মতুংদা তপ্না তপ্না হন্থরকপগা লোইননা প্রধানমন্ত্রীনা ত্বিতরদা ত্বীৎ তৌদুনা মসিগী ফিভম অসিবু মায়োক্ননবা মতিক চানা শেম-শাখিবা অমসুং মীয়ামদা মপুং ফানা মতেং পাংবীবগীদমক্তা কেন্দ্র সরকারগী এজেন্সীশিং, তোঙান তোঙানবা রাজ্য সরকারশিং, মফম অদুগী এদমিনিস্ত্রেসনশিং অমসুং শরুক য়াখিবা মীয়ামদা থাগৎপা ফোংদোকখি।

মসিগী মমাংদা প্রধানমন্ত্রীনা মতম মতমগী ওইনা ত্বীৎ তৌদুনা সাইক্লোন্না শোকহল্লবা মীয়ামদা অঙম্বা মতেং ফংহন্নবগী মতাংদা লৈবাক অসিগী মীচম মীয়ামদা পাউ পীদুনা লাকখি। মসিদা নত্তনা প্রধানমন্ত্রীনা সাইক্লোন অসিনা শোকহল্লবা মীয়ামগী মতেং পাংনবগীদমক লৈবাক মীয়ামদা পুক্নীংসু থৌগৎখি।