ভারতকী প্রধানমন্ত্রী
শ্রী লাল বহাদুর শাস্ত্রী উত্তর প্রদেশকী বারানসীদগী মাইল মঙা লাপ্পা অপীকপা রেলৱে তাউন, মুগলসরায়দা ১৯০১গী ওক্তোবর ২দা পোকখি। মহাক্কী মপা স্কুলগী ওজা ওইরম্মি। লাল বহাদুর শাস্ত্রীনা চহি অমা মখাইতমক ঙাইরিঙৈদা মহাক্কী মপা লৈখিদে। মহাক্কী মমানা মহাক্কী মচা অহুমগা লোইননা অপোকপা মপাগী ময়ুমদা চৎতুনা লৈখি।
অপীকপা শহর মচাদুদা লাল বহাদুরগী স্কুলগী মহৈ মশিংদা করিসু থোইদোকপা ওইরমদে অদুবু লাইরবগী চৈথেং ফংজরবসু মহাক্কী অঙাং ওইরিঙৈগী পুন্সিদি মপুং ফানা নুংঙাইনা লেনখি।
মহাকপু অৱাংবা থাক্কী মহৈ তমফমদা তম্বা ফংননবা বানারসীদা লৈবা মখুরাগী মনাক্তা থমখি। য়ুমদা মহাকপু পুম্নমক্না ‘ননহে (ইবুংঙো মচা)’ হায়না কৌনখি। মহাক্না মাইল কয়া লাপ্না খোংউপ তোংদনা মহৈ তমফমদা চৎলম্মি, কালেন থাগী মৈশানা অদুক্কী মতিক শারবা লম্বী অদু ফাওবা অসুম্না অসুম্মক চৎলম্মি।
চাওখৎলকপগা লোইননা লাল বহাদুর শাস্ত্রী মীরমগী লোইলমদগী নীং খা তম্বা ফংনবা হৌবা লৈবাক্কী খোংজংদা হেন্না পুক্নীং চংবা হেল্লকখি। মহাক্না ভারত্তা ব্রিতিশ লৈঙাকপু শৌগৎলিবা ভারতকী নিংথৌশিংদা মহাত্মা গান্ধীনা ফোংদোকখিবা য়ানীংদবা অদুদা শাথিনা অপেনবা পোকখি। লাল বহাদুর শাস্ত্রীনা চহি ১১ খক্তা ঙাইরিঙৈদগী হৌনা জাতিগী থাক্তা করিগুম্বা খরা তৌননবা মপুক্নীংদা লেপখি।
গান্ধীজীনা নন-কোওপরেসন মুবমেন্তা য়াওননবা মহাক্কী মরৈবাক মচাশিংদা পাউজেল পীখিবা মতম অদুদা লাল বহাদুর শাস্ত্রী শুপ্নগী চহি ১৬ খক্তমক শুরি। মহাক্না মহাত্মা গান্ধীগী পাউজেল অসিদা মহাক্কী মহৈ মশিং তম্বা তোক্ননবা ৱারেপ লৌখি। মহাক্কী ৱারেপ অসিনা মমাগী অনীংবা কয়া কাইহনখি। মহাক্কী ইমুংনা মহাক্কী ৱারেপ অদুবু অরানবনি হায়রদুনা মহাকপু খাম্ননবা কন্না হোৎনখি অদুবু মাই পাকপা ঙমখিদে। লাল বহাদুরনা চপ য়ুংনা লেপখি। মহাক্কী অনকপা মরিমতা পুম্নমক্না মসি খঙই মদুদি অমুক্তংবু নীংখ্রবা তুংদা মহাক মহাক্কী ৱারেপ অদু কৈদৌনুংদসু হোংলরোই মরমদি মপান্দগী অসুক্কী মতিক থোৎনা উরিবা লাল বহাদুর অসি মনুংদদি নুংজাওগুম্না কল্লি।
লাল বহাদুর শাস্ত্রী ব্রিতিশ লৈঙাক য়াওদনা লিংখৎখিবা সংস্থান কয়ামরুমগী মনুংদা অমা ওইরিবা বারানসীগী কাশী বিদ্যা পীথতা য়াওখি। মফম অদুদগী মঙোন্দা অফাওবা অখঙ অহৈশিং অমসুং লৈবাক্কী জাতিগী ৱাখল্লোনগী ইথিল চংলকখি। বিদ্যা পীথনা মঙোন্দা পীবা গ্রেজুএসনগী দিগ্রীগী মমিং ‘শাস্ত্রী’ কৌখি অদুবু মীয়ামগী ৱাখলদা মসি মাগী মিংগী শরুক অমা ওইনা লৌনখি।
১৯২৭তা মহাক লুহোংখি। মহাক্কী লোইনবী ললিতা দেবী মহাক্কী শহরগী মনাক্তা লৈবা মির্জাপুরদগীনি। মখোয়গী লুহোংবা অদু মপুং ফানা নাৎকী চৎনবীদা পাংথোকখি। অউনপোৎ ওইনা তরেং অমা অমসুং খুৎনা শাবা ফি মিতর খরখক্তমক লৌখি। মহাক্না অউনপোৎ ওইনা মসিদগী হেন্না করিসু পামখিদে।
১৯৩০দা মহাত্মা গান্ধীনা থুমগী আইনবু থুগাইরদুনা দান্দীগী খোংচৎ চৎখি। মসিগুম্বা সিম্বোলিক ওইরবা পাউজেল অসিনা লৈবা অপুনবা অসিদা মখল অমগী ইহৌ অমা শাগৎখি। লাল বহাদুর শাস্ত্রীনা মতিং লৈনা নীং খা তম্বগী ইহৌ অসিদা য়াওখি। মহাক্না য়ানীংদবগী খোংজং কয়া লুচিংখি অমসুং পুন্না চহি ৭ চুপ্না কী কৈশুমশঙদা লৈখি। নীং খা তম্বগী ইহৌ অসিনা মহাকপু মপুং ফানা মথৌ শংখি।
নীং খা তম্লবা মতুংদা কংগ্রেসনা সরকার পাইখি, মসিগী মমাংদা জাতিগী ইহৌগী লুচিংবা হায়বা ইল্লবা অমসুং নোল্লুক্লবা লাল বহাদুর শাস্ত্রীগী মগুন অসি খঙনখ্রে। ১৯৪৬তা কোংগ্রেস সরকার শেম্লকপদা মসিগী ‘মীগী দাইনেমো মচা’ অসিবু লৈবাক্কী লৈঙাক্লোন্দা থৌদাং য়ানবা হায়খি। মহাকপু ময়ুম রাজ্য উত্তর প্রদেশকী পার্লিয়ামেন্তরী সেক্রেতরী হাপখি অমসুং অথুবা মতমদা মহাক য়ুম্লৈ কৈরৈ মন্ত্রীগী ফমসু পুরম্মি। থবক কন্না শুবগী মহাক্কী পাঙ্গল অমসুং মহাক্কী মতিক চাবা অদু উত্তর প্রদেশতা পাউরৌ ওইনখি। মহাক ১৯৫১দা নই দিল্লীদা লাকখি অমসুং কেন্দ্রগী মন্ত্রী মন্দলগী বিভাগ কয়া পুরম্মি – রেল মন্ত্রী, ত্রান্সপোর্ত অমসুং কম্যুনিকেসন মন্ত্রী, কমর্স অমসুং ইন্দস্ত্রী মন্ত্রী, য়ুম্লৈ কৈরৈ মন্ত্রী অমসুং নেহরুজীনা নাদুনা লৈবা মতমদা বিভাগ য়াওদবা মন্ত্রী ওইখি। মহাক্কী মিংচৎ অসুম অসুম হেনগৎলকখি। মী য়াম্না শিখিবা রেলগী খুদোংথিবা অমগী দায়িত্ব মশামক্নি হায়না খঞ্জদুনা মহাক্না রেল মন্ত্রীগী ফম থাদোকপগী চে পীশিনখি। মহাক্কী অসিগুম্বা মমাংদা অমুক্তা ওইখিদ্রিবা থৌওং অসিদা লৈবাক্না অমসুং সংসদনা অদুক্কী মতিক থাগৎনখি। মতম অদুগী প্রধান মন্ত্রী পন্দিৎ নেহরুনা থৌদোক অসিগী মতাংদা সংসদতা ঙাংলদুনা লাল বহাদুর শাস্ত্রীগী পুকচেল শেংবা অমসুং অৱাংবা ফিদম অদুগীদমক হায়নীংঙাই লৈতনা থাগৎপা ফোংদোকখি। মহাক্না হায়খি মদুদি মহাক্না লাল বহাদুরগী ফম থাদোকপা অসি ওইখ্রিবা পুম্নমক অসিগী দায়িত্ব মহাক্কীনি হায়বদগী য়াবা নত্তে অদুবু মসিনা কন্সতিত্যুস্নেল প্রোপ্রাইতীগী খুদম অমা ওইহৌনবগীদমক য়ারিবনি। রেল খুদোং থিবা থোকখিবগী মতাংদা কুইনা মরৈ য়েৎনবগী পাউখুম পীরদুনা লাল বহাদুর শাস্ত্রীনা হায়খি, “ঐনা থিক নেম্বনা অমসুং ৱা তপ্না ঙাংগনবা অসিনা মরম ওইদুনা মীয়াম্না ঐবু পুক্নীং চেৎপা ঙমদবা ওইনা খল্লমাল্লে। অদুম ওইনমক হকশেলগী ওইনদি ঐ থোইদোকনা অকনবা হায়বদু ওইদ্রবসু নুংগী ওইবা পাঙ্গল অসিদি অদুক শোন্দবরা হায়না ঐনা খঞ্জৈ।”
মহাক্কী মন্ত্রালয়গী থবক থৌরম মনুংদসু মহাক্না কংগ্রেস পার্তীগা মরি লৈনবা থবকসু য়েংশিল্লম্মি অমসুং মদুদা মহাক্না মপুং ফানা শরুক য়ারম্মি। ১৯৫২, ১৯৫৭ অমসুং ১৯৬২গী মীখলশিংদা পার্তীগী মপুং ফানা মাই পাকপা অদুদা ওর্গনাইজেসনেল জেনিয়স অমসুং পোৎশকশিংবু নক্না চাং য়েংবগী মাগী অঙকপা পাঙ্গল অদুগী মতেং য়াম্না য়াওখি।
চহি ৩০দগী হেন্না মাগী কৎথোক্লবা সেবাগী মতমদা লাল বহাদুর শাস্ত্রী মহাক্কী পুকচেল শেংবা অমসুং থৌনা অদুগীদমক মমিং চৎখি। নোল্লুকপা, পুকচেল চেৎপা, অখাং কনবা অমসুং নুংদা অদুক্কী মতমক কনবা শ্রাস্ত্রীজীনা মীয়ামগী মরক্তা মীয়ামগী ৱাখল্লোন অদুবু খঙবীবা মীশক অমা ওইনা চোংথোরকখি। মহাক লৈবাক অসিবু চাওখৎপগী লম্বীদা পুশিল্লকখিবা শান্না উবা ঙম্বা মীশক ওইখি। লাল বহাদুর শাস্ত্রীনা মহাত্মা গান্ধীগী রাজনীতিগী পারাশিং অদুদা নীংথিজনা পুক্নীং লুপচখি। মহাক্কী গুরু মহাত্মা গান্ধীগী মতাংদা অসুম্না হায়, “থবক কন্না শুবা অসি লাই খুরুম্বগা চপ মান্নৈ”। মহাত্মা গান্ধীগা ৱাখল্লোন মান্নবা লাল বহাদুর শাস্ত্রী ভারত সংস্কৃতিগী অথোইবা খুদম অমনি।
