ভারতকী প্রধানমন্ত্রী
মশাগী চহি ৪০ শুরকপদা প্রধান মন্ত্রী ওইখিবা শ্রী রাজীব গান্ধী ভারতকী খ্বাইদগী নহা ওইবা প্রধান মন্ত্রীনি অমসুং মালেমগী নহা ওইনা সরকার লুচিংখিবশিংগী মনুংদা অমনি। মহাক্কী মমা শ্রীমতী ইন্দিরা গান্ধীনা ১৯৬৬তা অহানবা ওইনা প্রধান মন্ত্রী ওইখিবা মতম অদু মঙোন্দগী চহি ৮ হনখি। মহাক্কী অফাওবা মমা পোকপা মপুবোক পন্দিৎ জৱাহরলাল নেহরুনা নীংতম্বা ভারতকী অহানবা প্রধান মন্ত্রী ওইদুনা চহি ১৭কী শাংলবা ইন্নীংস হৌখিবদু মশাগী চহি ৫৮ শুবদনি ।
লৈবাক অসিগী জেনরেস্নেল চেঞ্জগী লুচিংবা শ্রী রাজীব গান্ধীনা লৈবাক অসিগী পুৱারিদা খ্বাইদগী য়াম্না মীয়ামগী সপ্পোর্ত ফংখি। মমা হাৎখিবগী অৱাবদগী হন্থরক্লবা তুংদা মহাক্না লোক সভাগী মীখল তৌননবা য়াথং পীখি। মীখল অদুদা কোংগ্রেসনা মমাংগী মীখল ৭কা য়েংনরুবদা মশিং য়াম্না ফংখি অমসুং পার্তীনা সিৎ ৫০৮গী মনুংদা ৪০১ ফংদুনা রেকোর্দ থমখি।
ভারত মচা কোতি ৭০০গী লুচীংবা ওইনা অসিগুম্বা মখলগী পুক্নীং হুনীংঙাই ওইরবা অহৌবা অসি ফিভম অমা হেক্তদা শিংথানীংঙাই ওইনা লৌনখি। মসি মরম অসিগীদমকসু অমত্তা ঙাইরবা অমা ওইখি মদুদি মহাক অদুগুম্বা মীরোল মরিনা নীংতম লালহৌগী মতমদা অমসুং মসিগী মতুংদা ভারতকী সেবা তৌখিবা পোলিতিকেল ফেমিলী অমদগী হৌরকপনি, মসিদা নত্তনা শ্রী গান্ধীনা মাগী রাজনীতিদা খোং থাংজিনবা অসি পামখিদে অমসুং মহাক্না রাজনীতিদা য়াম্না থেংনা য়াওরকখি।
শ্রী রাজীব গান্ধী ১৯৪৪গী ওগস্ত ২০দা বোম্বেদা পোকখি। শুপ্নগী চহি ৩দা ঙাইরিঙৈদনি ভারতনা নীং খা তম্বা ফংখিবা অমসুং মহাক্কী মমা পোকপা মপুবোক্না নীংতম্বা ভারতকী অহানবা প্রধান মন্ত্রী ওইখি। মহাক্কী মমা – মপা লখনৌদগী নই দিল্লীদা লাক্তুনা লৈরখি। মহাক্কী মপা ফিরোজ গান্ধী এম পি ওইখি অমসুং মহাক অকিবা লৈতবা অমসুং থবক কনবা পার্লিয়ামেন্তরিয়ান অমা ওইনা শিংথানখি।
রাজীব গান্ধীনা অঙাং ওইরিঙৈগী মতম মহাক্কী মপা পোকপা মপুবোক্কা লোইননা তীন মুর্তী হাউসতা লেনখি মফম অদুদা ইন্দীরা গান্ধীনা প্রধান মন্ত্রীগী হোস্তেজ অমা ওইনা থবক তৌখি। মহাক মতম খরা দেহরাদুনগী বেল্হম স্কুলদা তমখি অদুবু য়াম্না থুনা মহাকপু হিমালয়গী চীংখোংদা লৈবা রেসিদেন্সিয়েল দুন স্কুলদা থাখি। মফম অদুদা মহাক্কী মরূপ – মপাং কয়ামরুম খঙনখি মখোয়শিং অদু পুন্সি চুপ্পা তিন্নখি। মতুংদা মহাক্কী মনাওনুপা সঞ্জয় গান্ধীসু স্কুল অদুদা থাখি মফম অদুদা মখোয় অনি লৈমিন্নখি।
স্কুলদগী থোরক্লবা মতুংদা শ্রী গান্ধী কেম্ব্রীজগী ত্রিনিতী কোলেজদা তমখি, অদুবু য়াম্না থুনা মহাক মফম অদুদগী থোরক্তুনা লন্দনগী ইম্পরিয়েল কোলেজদা তমখি। মহাক্না মফম অদুদা মেকানিকেল ইঞ্জিনীয়রগী কোর্স অমা তমখি।
মসিমদি তশেংলে মদুদি পোলিতিক্সতা মহাক্কী কেরীয়র শেম্বদা মহাক্কী অপাম্বা লৈখিদে। মহাক্কী ক্লাসমেৎসশিংগী মতুং ইন্না মহাক্কী মনাক্তা ফিলোসোফী, পোলিতিক্স, অমসুং হিস্তরীগা মরি লৈনবা লাইরিক্কী মহুত্তা সাইন্স অমসুং ইঞ্জীনিয়ীরিংগী লাইরিক ওইনা লৈখি। অদুম ওইনমক ঈশৈ নোংমাইদা মহাক্কী হৈনবী য়াম্না লৈরম্মি। মহাক ৱেস্তর্ন অমসুং হিন্দুস্তানী ক্লাসিকেল অমসুং মোদর্ন ম্যুজিক য়াম্না পামখি। মহাক ফোতোগ্রাফী অমসুং রেদিও তাবগী হৈনবীসু লৈখি।
মহাক্না খ্বাইদগী থবাই য়াওজবা অসি পাইবনি। পামজবা মতুং ইন্না ইংলেন্দগী ময়ুমদা হল্লক্লবা মতুংদা মহাক্না দিল্লী ফ্লাইং ক্লবকী ইন্ত্রান্স তেস্ত পাস তৌখি অমসুং কমর্সিয়েল পাইলোৎকী লাইসেন্স ফংখি। য়াম্না থুনা মহাক দোমেস্তিক নেস্নেল কেরিয়র কম্পেনী ইন্দিয়ন এয়র্লাইন্সকী পাইলোৎ ওইখি।
কেম্ব্রিজদা মহাক্না মতম অদুদা ইংলিশ তম্বা লাকখিবী ইতালিয়ন মচা সোনিয়া মাইনোগা থেংনখি। মখোয় ১৯৬৮দা নই দিল্লীদা লুহোংখি। মখোয়না মখোয়গী মচা অনী, রাহুল অমসুং প্রিয়াংকাগা লোইননা দিল্লীদা শ্রীমতী ইন্দিরা গান্ধীগী লৈফমদা লৈখি। নাক য়েৎকী অদুগুম্বা পোলিতিকেলগী থবক থৌরম কয়াগী নীল খোংবা মরক্তুদা মখোয়না মখোয়গী মরন্নাইগী পুন্সি মহিংদুদা লেনখি।
অদুবু ১৯৮০দা এরোপ্লেন কাইবগী থৌদোক অমদা মহাক্কী মনাও সঞ্জয় গান্ধীনা লৈখিদবদগী ফিভম পুম্নমকপু হোংহনখি। মঙোন্দা রাজনীতিদা চংনবা অমসুং মমাগী রাজনীতিগী থবক থৌরমশিংদা মতেং পাংননবা প্রেসর পীবা হৌরকখি। মতুংদা মনুংগী অমসুং মপানগী শিংনবা কয়া মায়োক্নরকখি। অহানবদা মহাক্না প্রেসরশিং অদুগী মায়োক্তা লৈখি, অদুবু মমৈথংদা মখোয়না তকশিল্লকখিবা কয়া অদুনা মহাক য়াবা তাখি। মহাক্না মনাউ নুপানা লৈখিদবদগী হাংহৌরবা উত্তর প্রদেশকী অমেথীদগী বাই-ইলেক্সন্দা মাই পাকখি।
১৯৮২গী নবেম্বরদা ভারতনা এশিয়ান গেমসকী য়ুমবু ওইখি, স্তেদিয়ম শেম্বা অমসুং অতৈ ইনফ্রাস্ত্রকচরগী খুদোংচাবশিং ফংহনবগা মরি লৈননা মমাংদা থমখিবা ৱাফম মপুং ফাহনখি। শ্রী গান্ধীদা থবক খুদিংমক মতম চানা লোইশিন্নবা অমসুং অপনবা অমসুং অৱাৎপা অমত্তা য়াওদনা গেম অদু পাংথোকপা ঙম্নবা থৌদাং শিন্নখি। মহাক্না মতিক চাবা অমসুং অচেৎপা কোওর্দিনেসন অদুবু ফোংদোক্লদুনা শিংনবতনা থল্লবা থবকশিং অদু মপুং ফাহনখি। মসিগা লোইননা কোংগ্রেসকী জেনরেল সেক্রেতরী অমা ওইনা মহাক্না অখাং কনবগা লোইননা পার্তী ওর্গনাইজেসনবু তাশিন খোমজিনখি অমসুং মপাঙ্গং কলহনখি। তুংদা মহাক্কী মাংদা মসিদগী হেনবা লুবা ফিভম কয়া লাকখি মদুনা মহাক্কী মগুনগী চাংয়েং কয়া পাংথোকখি।
১৯৮৪গী ওক্তোবর ৩১দা মহাক্কী মমাবু তমথিনা হাৎতোকপীখ্রবা মতুংদা মহাক্না কংগ্রেস প্রসিদেন্ত অমসুং প্রধান মন্ত্রী ওইখিবদা শ্রী গান্ধীদগী হেন্না অৱাবা অমসুং চৈনা ফংখিবা ফিভমশিং অদুদা সরকার পাইবা কনানা ঙমগনি। অদুবু মরন্নাই পুন্সিদা অসুক য়াম্না ৱাজরবসু মহাক্না খল কাইদনা, চৎনবী অমসুং মশাবু লাকশিঞ্জবগা লোইননা মথৌদাং অদুবু নীংথিজনা পাংথোকখি।
থা অমা চুপ্পা শাংলবা মীখলগী কেম্পেনগী মনুংদা শ্রী গান্ধীনা মালেম পৃথিবী অসিগী অকোইবগী শরুক অনি মখাইগা মান্ননা শাংবা খোংচৎ কয়া চৎতুনা লৈবাক অসিগী মফম খুদিংমক্তা মীফম ২৫০দগী হেন্না পাংথোকখি অমসুং মীওই লাক্ষ কয়াগা উন্নখি।
ইং তপ্পা, অনৌবা ৱাখল্লোন চেনবা অমসুং ৱারেপ লৌবগী অঙকপা থৌনা লৈবা শ্রী গান্ধীনা লৈবাক অসিবু অৱাংবা তেক্নিক্তনা মপুং ফাহনবা পামখি অমসুং হন্না হন্না হায়খিবগুম ভারতকী অপুনবা অসিবু কাইহন্দনা থম্নবগী পান্দমদা নত্তনা মহাক্কী অতৈ অতোপ্পা মরু ওইবা পান্দমশিংগী মনুংদা – ২১ শুবা ভারত শেমগৎপা অসিসু অমনি।
