ভারতকী প্রধানমন্ত্রী
উত্তর প্রদেশতা গঙ্গাগী মপান্দা খুন্দাবা বরানসীদগী সংসদকীদমক্তা মে ২০১৪দা খল্লক্লবা মতুংদা প্রধান মন্ত্রী মোদীনা হায়খি, ‘ইমা গঙ্গাগী সেবা তৌবা অসি ঐগী লাইবক্তা তম্লম্লবনি।’
গঙ্গা তুরেল শুপ্নগী নাৎকী অমদি লাইনীং-লাইশোনগী ওইনা মরু ওইবতা নত্তনা লৈবাক অসিগী মী মশিং ৪০% রোম গঙ্গা তুরেলদা তাংলি। ২০১৪দা ন্যুয়োর্ক্কী মেদিসন স্ক্বার গার্দেন্দা ভারতকী মীয়ামদা ৱা ঙাংলদুনা প্রধান মন্ত্রীনা হায়খি, “করিগুম্বা ঐখোয়না মসিবু শেংদোকপা ঙম্লবদি লৈবাক অসিগী মী মশিং চাদা ৪০গীদমক্তা মতেং ওইগনি।” মরম অদুনা গঙ্গা তুরেল শেংদোকপা হায়বসি শেল-থুমগী ৱারেপ অমসু ওই।”
মঙলান অসি মঙফাওননবা, গঙ্গা তুরেলগী অমোৎপা থিংনবা অমসুং হিঙ্গৎহন্নবা সরকারনা গঙ্গা তুরেল কন্নবা “নমামী গঙ্গে’’ কৌবা মিসন অমা হৌদোক্লে। ২০১৯-২০২০ ফাওবদা গঙ্গা তুরেল শেংদোক্নবা কেন্দ্রনা লুপা কোটি ২০,০০০ চাদিং তৌবদা মন্ত্রী মন্দলনা অয়াবা পীখ্রে। কেন্দ্রগী স্কীম অমদা বজেৎ শরুক মরী হেনগৎপা অমসুং কেন্দ্রগী চাকথুং চাদা ১০০ পুথোকপা স্কীম অসিনা ওইরি।
গঙ্গা শেমগৎপদা হিরম কয়াদা শিংনবা লৈবনা এক্সন প্লান শেম্বদা মন্ত্রালয়শিংগী মরক্তা অমসুং কেন্দ্র-রাজ্যগী মরক্ত পুন্ন থবক তৌমিন্নবগী তঙাইফদবা লৈরি।
পায়খৎকদৌরিবা থবক অসি অহানবগী থবক (খুদক্তা উগদবা), ময়াই ওইবা মতমগী থবক (চহি ৫গী মনুংদা পাংথোক্কদবা) অমসুং অশাংবা মতমগী থবক (চহি ১০গী মনুংদা পাংথোক্কদবা) হায়না খাইদোক্লে।
অহানবগী থবকশিংগী মনুংদা তুরেলগী ঈমায়দা তাওবা অমোৎপশিং শেংদোকপা, খোংবালদগী পুরকপা অমোৎপা থিংনবা খুঙ্গং লূ-নান্না থম্বা অমসুং তোইলেত শাবা, মপুংফানা মৈ চাক্ত্রিবা হকচাং তুরেলদা থাদরকপা থিংনবা মঙ শাবা, শেমজিনবা অমসুং মতমগা চুনবা মওংদা শাবা, মতমগা চুনবা মওংদা ঘাৎ শাবা অমসুং শেমজিনবা য়াওরি।
ময়াই ওইবা মতমগী থবকশিংগী মরক্তা তুরেলদা তারবা ম্যুনিসিপাল অমসুং উদ্যোগকী অমোৎপশিং থিংবদা অকনবা মীৎয়েং চংগনি। ম্যুনিসিপালগী অমোৎপা থিংনবা লাক্কদৌরিবা চহি ৫দা অহেনবা অমোৎপা এম এল দি ২৫০০ শেংদোক্কনি। পায়খৎকদৌরিবা থবকশিং মতম শাংনা চৎনবা, মায়পাক্না চৎথনবা শেল-থুমগী কাংলোনশিং শেমদোক্লি। হয়ব্রিদ এনুইতিদা য়ুমফম ওইবা পব্লিক প্রাইভেৎ পার্তনরশিপ মোদেলগী প্রোজেক্ত পায়খৎনবা কেন্দ্রগীনা খন্নরি। করিগুম্বা য়ারবদি, স্পিসিয়েল পর্পোজ ভেহিকলনা অচৌবা সহরশিং য়েংশিনগনি, ঈশিং শেংদোক্নবা কৈথেল শেমগৎকনি অমসুং মতম শাংনা চৎনগদবা লন-থুম শেমগৎকনি।
উদ্যোগকী অমোৎপশিং থিংনবা আইন নিংথিনা চৎনহন্নবা থবক লৌখৎলে। গঙ্গা মপান্দা লৈবা উদ্যোগশিং অমোৎপা থাদোকপা হন্থননবা নৎত্রগা অমোৎপা মহি থাদোক্তনবা খঙহনখ্রে।
পোলুসন কন্ত্রোল বোর্দশিংগী য়াথং ইনহন্নবা এক্সন প্লানশিং শেম-শারে অমসুং তোঙান-তোঙানবা মখলগী উদ্যোগশিংনা ইনগদবা মতম পীখ্রে। উদ্যোগশিংনা অমোৎপশিং য়েংশিনগদবা স্তেসনশিং থম্লগনি।
থবকশিং অসিগী মথক্তা অকোয়বগী ফিভম ঙাক-শেনবা, উ থাবা অমসুং ঈশিং মোৎলি-মোৎতে হায়না য়েংশিনবা য়াওরি। মরুওইবা শা-ঙাশিং হায়বদি গোল্দন মহাসির, দোলফিন, গরিয়াল, থেঙ্গু অমসুং শনমবা ঙাক-শেনবগী থবক মাংজৌননা হৌখ্রে।
নমামী গঙ্গেগী মখাদা লৈবাক-লৈহাও মাঙবা থিংনবা, তুরেলগী অকোয়বগী ফিভম ফগৎনবা অমসুং ঈশিং হেন্ন থোক্নবা লম হেক্তর ৩০,০০০দা উ থাগনি। উ থাবগী থবক অসি ২০১৬তগী হৌগনি। ঈশিংগী ফিভম য়েংশিনগদবা স্তেসন ১১৩ থমদুনা ঈশিংগী ফিভম য়েংশিনগনি।
অশাংবা মতমগী থবকশিংগী মনুংদা ঈশিং ফজনা শীজিন্নবা হেনগৎহন্নবা অমসুং তুরেলগী ঈশিং ঈথৈ-লৌখোংদা শীজিন্নবা হেনগৎহন্নবা য়াওরি।
খুন্নাইগী-শেনমীৎলোনগী অমসুং কলচরগী ওইনা য়াম্না মরুওইবা মরম্না গঙ্গা শেংদোকপা অসি অরুবা অমনি। মালেমগী ওইনা অশুক য়াম্না লুবা থবক অমত্তা পায়খৎত্রি অমসুং লৈবাক অসিগী নাগরিক খুদিংমক শরুক য়াবা মথৌ তাই। গঙ্গা তুরেল শেংদোকপদা ঐখোয় খুদিংমক্না পাংবা য়াবা লম্বী কয়া লৈরি:
• শেলগী মতেং পাংবা: য়াম্না শাংবা অমসুং মপান্দা মীশিং য়াম্না তাবা গঙ্গাগুম্বা তুরেল অমা শেংদোকপদা শেল য়াম্ন মথৌ তাই। সরকারনা বজেত শরুক মরী হেনগৎলবশু হৌজিক ফাওবা দরকার ওইবা শেল ফংবা ঙমদ্রি। গঙ্গা তুরেল শেংদোকপদা মীয়াম্না মতেং পাংনবা ক্লিন গঙ্গা ফন্দ লিংখৎলে।
• হন্থবা, হন্না শীজিন্নবা: ঐখোয়গী য়ুমগী অমোৎপা ঈশিং অমসুং অমোৎপশিং ফজনা লোইশিন্দ্রবদি তুরেলদা তাই হায়বসি ঐখোয় অয়াম্বনা খঙদে। অমোৎ-অকায় লোইশিন্নবা সরকারনা থবক কয়া লৌখৎলে অমসুং মীয়াম্না ঈশিং শীজিন্নবা অমসুং অমোৎপা পুথোকপা হন্থহনগদবনি। অমোৎপা ঈশিং অমসুং অমোৎপশিং ফজনা অমুক হন্না শীজিন্নরবদি ঐখোয়গী থবকশিংদা কান্নগনি।
ঐখোয়গী কলচর অমসুং সিভিলাইজেসনগী য়ুম্ফম ওইরিবা ঐখোয়গী লৈবাক্কী তুরেল গঙ্গা কন্নবা ঐখোয় পুন্না চৎমিন্নরসি।
[ 
