ভারতকী প্রধানমন্ত্রী

প্রধানমন্ত্রী শ্রী নরেন্দ্র মোদী ঙসি উত্তরাখন্দগী মুশোরীদা লৈবা লাল বহাদুর শাস্ত্রী নেস্নেল একাদমী ওফ এদমিনিস্ত্রেসন (এলবিএসএনএএ)দা ৯২শুবা ফাউন্দেসন কোর্সকী ওফিসর ত্রেনী ৩৬০গা উনখ্রে অমসুং ৱারি শানখ্রে। মহাক নুমিৎ নিনিগী খোংচৎতা এলবিএসএনএএদা লৈরি।

মহাক্না ওফিসর ত্রেনীশিং অদু কাংলুপ মরি থোক্না হকথেংননা ইনফোর্মেল ওইনা উনখি। চাওরাক্না পুং মরি রোম চৎথখিবা পাক-চাওরবা ৱারি-ৱাতাই অদুদা প্রধানমন্ত্রীনা ওফিসর ত্রেনীশিং অদুদা মখোয়গী ৱাখল্লোনশিং অদু ময়েক শেংনা অমসুং অকিবা লৈতনা ফোংদোক্নবা খঙহনখি। ৱারি শান্নবা অদু এদমিনিস্ত্রেসন, গবর্নেন্স, তেক্নোলোজী অমসুং পোলিসী মেকিংনচিংবগী মরমদা চৎথখি। প্রধানমন্ত্রীনা ওফিসর ত্রেনীশিং অদুদা মখোয়না ময়েক শেংনা ৱাখল তাবা ঙম্ননবা গবর্নেন্সকী ইসুশিংবু মমুৎ তানা নৈননবা অমসুং থিজিন্নবা পুক্নীং থৌগৎখি। মহাক্না জাতিগী মিয়েং অমা শাগৎনবা মখোয়গী মথৌ তাবশিং অদুদসু শাফু পীখি। ৱারি-ৱাতাই অদু অখঙ-অহৈশিং শরুক য়ামিন্নবগী চাওরবা থাক অমদা পাংথোকখি।

মহাক্না একাদেমীগী ফেকল্তী মেম্বরশিংগসু ৱারি শানখি, মখোয়না মঙোন্দা ভারতকী সিবিল সর্বেন্তশিংবু ত্রেনীং পীনবগীদমক পাইখৎলিবা থবকশিং অদু য়েংহনখি।

প্রধানমন্ত্রীনা এলবিএসএনএএদা খ্বাইদগী নৌবা গান্ধী স্মৃতি লাইব্রেরীদা চৎখি। মহাক্না ওফিসর ত্রেনীশিংনা পাংথোকপা অতেনবা নাৎকী থৌরম অমদা শরুক য়াখি।

মসিগী মমাংদা, একাদমীদা থুংলবগা প্রধানমন্ত্রীনা সরদার ভল্লভভাই পতেল অমসুং হান্নগী প্রধানমন্ত্রী লাল বহাদুর শাস্ত্রীগী শক্তমদা লৈ কৎখি।

ৱারি শান্নগী থৌরম অদুদা কেবিনেৎ সেক্রেতরী শ্রী পি.কে. সিনহা অমসুং এলবিএসএনএএগী দাইরেক্তর শ্রীমতী উপমা চৌধরী শরুক য়াখি।

******