ಪಿಎಂಇಂಡಿಯಾ

ನನ್ನ ಪ್ರೀತಿಯ ದೇಶವಾಸಿಗಳೇ,

ಇನ್ನು ಕೆಲವೇ ಗಂಟೆಗಳಲ್ಲಿ ನಾವು ಹೊಸ ವರ್ಷ 2017ನ್ನು ಸ್ವಾಗತಿಸಲಿದ್ದೇವೆ. 125 ಕೋಟಿ ಭಾರತೀಯರು ಹೊಸ ವಿಶ್ವಾಸ, ನವ ಶಕ್ತಿ ಮತ್ತು ಹೊಸ ಕನಸುಗಳನ್ನು ಸ್ವಾಗತಿಸಲು ವಿಶ್ವದ ಇತರರೊಂದಿಗೆ ಸೇರಲಿದ್ದಾರೆ.

ದೀಪಾವಳಿಯ ಬಳಿಕ ನಮ್ಮ ರಾಷ್ಟ್ರ ಐತಿಹಾಸಿಕ ಶುದ್ಧೀಕರಣ ಯಜ್ಞಕ್ಕೆ ಸಾಕ್ಷಿಯಾಗಿದೆ. 125 ಕೋಟಿ ಭಾರತೀಯರ ಧೈರ್ಯ ಹಾಗೂ ಸಂಕಲ್ಪ ಶಕ್ತಿಯಿಂದ ಈ ಶುದ್ಧಿ ಯಜ್ಞ ನಡೆಯುತ್ತಿದ್ದು, ಇದು ಮುಂಬರುವ ಅನೇಕ ವರ್ಷಗಳವರೆಗೆ ಈ ದೇಶದ ದಿಕ್ಕನ್ನು ನಿರ್ಧರಿಸುವಲ್ಲಿ ಮಹತ್ವದ ಪಾತ್ರವನ್ನು ವಹಿಸಲಿದೆ.

ಈಶ್ವರನ ಈ ಸೃಷ್ಟಿಯಲ್ಲಿ, ಮಾನವರ ಸ್ವಭಾವ ಒಳ್ಳೆಯದರಿಂದಲೇ ಕೂಡಿರುತ್ತದೆ.

ಆದರೆ ಸಮಯದೊಂದಿಗಿನ ವಿಕೃತಿ ಮತ್ತು ಕೆಟ್ಟ ಸ್ವಭಾವದಿಂದಾಗಿ ಜನರು ಕೆಟ್ಟ ವಾತಾವರಣದಲ್ಲಿ ನರಳುತ್ತಿರುವ ಅನುಭವ ಪಡುತ್ತಾರೆ ಮತ್ತು ಅದರಿಂದ ಹೊರಬರಲು ಚಡಪಡಿಸುತ್ತಿರುತ್ತಾರೆ. ಭಾರತದ ರಾಷ್ಟ್ರ ಜೀವನ ಮತ್ತು ಸಾಮಾಜಿಕ ಬದುಕಿನಲ್ಲಿ ಭ್ರಷ್ಟಾಚಾರ, ಕಪ್ಪುಹಣ ಮತ್ತು ಖೋಟಾ ನೋಟುಗಳ ಜಾಲದಲ್ಲಿ ಪ್ರಾಮಾಣಿಕರಿಗೂ ಬದುಕುವುದು ಕಷ್ಟವಾಗುತ್ತಿದೆ. ಮನಸ್ಸು ಒಪ್ಪದಿದ್ದರೂ ಜನರು ಪರಿಸ್ಥಿತಿಯ ಒತ್ತಡಕ್ಕೆ ಸಿಲುಕಿ ತಮ್ಮಲ್ಲಿ ಅಂತರ್ಗತವಾದ ಒಳ್ಳೆತನದೊಂದಿಗೆ ಸಂಘರ್ಷ ನಡೆಸುತ್ತಿದ್ದಾರೆ. ಭಷ್ಟಾಚಾರ ಮತ್ತು ಸಾಮಾಜಿಕ ಪಿಡುಗುಗಳು ಗೊತ್ತಿದ್ದೋ ಗೊತ್ತಿಲ್ಲದೆಯೋ ಅಥವಾ ಉದ್ದೇಶಪೂರ್ವಕವಲ್ಲದೆಯೂ ನಮ್ಮ ದೈನಂದಿನ ಬದುಕಿನ ಭಾಗವಾಗಿ ಹೋಗಿದೆ. ಆದರೆ ದೀಪಾವಳಿ ನಂತರದ ಬೆಳವಣಿಗೆಗಳು, ಕೋಟ್ಯಂತರ ಭಾರತೀಯರು ಇಂಥ ಪರಿಸ್ಥಿತಿಯಿಂದ ಹೊರಬರಲು ಎದಿರು ನೋಡುತ್ತಿದ್ದಾರೆ ಎಂಬುದನ್ನು ತೋರಿಸಿದೆ.

1962, 1965, 1971 ಮತ್ತು ಕಾರ್ಗಿಲ್ ಯುದ್ಧದ ಸಂದರ್ಭದಲ್ಲಿ, ನಾವು ನಮ್ಮ ಕೋಟಿ ಕೋಟಿ ಜನರ ಸಂಘಟಿತ ಬಲವನ್ನು ನೋಡಿದ್ದೇವೆ. ಬಾಹ್ಯ ದಾಳಿಯ ಸಂದರ್ಭದಲ್ಲಿ ಜನರ ಸಂಘಟಿತ ಶಕ್ತಿ ಮತ್ತು ಅಪ್ರತಿಮ ದೇಶಭಕ್ತಿಯನ್ನು ಕಂಡಿದ್ದೇವೆ. ಇದು ಸಹಜ. ಆದಾಗ್ಯೂ, ಆಂತರಿಕ ಪಿಡುಗುಗಳ, ಕೆಡುಕಿನ ವಿರುದ್ಧ ಕೋಟ್ಯಂತರ ಭಾರತೀಯರು ಒಗ್ಗೂಡಿ, ಅಪ್ರತಿಮ ಶೌರ್ಯದಿಂದ ಹೋರಾಡಿದ್ದು ನಿಜಕ್ಕೂ ಅನುಪಮವಾದ್ದು.

ಭಾರತೀಯರು ದೃಢ ಸಂಕಲ್ಪದೊಂದಿದೆ ಮತ್ತು ಅಸಾಧಾರಣವಾದ ಧೈರ್ಯ, ತಾಳ್ಮೆಯೊಂದಿಗೆ, ನಗುಮುಖದಿಂದಲೇ ತೊಂದರೆಗಳನ್ನು ಅನುಭವಿಸಿದ್ದಾರೆ, ಕೆಟ್ಟದ್ದನ್ನು ಸೋಲಿಸಲು ಹೋರಾಡುತ್ತಲೇ ಬಂದಿದ್ದಾರೆ. ತ್ಯಾಗ ಮಹತ್ವ ಸಾರಿದ್ದಾರೆ. ನಾವು ಈ ಆದರ್ಶದೊಂದಿಗೆ ಬಾಳುತ್ತಿದ್ದೇವೆ. 125 ಕೋಟಿ ಭಾರತೀಯರು ಒಳಿತಿಗಾಗಿ ತಮ್ಮ ಆತ್ಮಸ್ಥೈರ್ಯವನ್ನು ತೋರಿದ್ದಾರೆ. ಇದು ಕಾಲದ ನೆಲೆಯಲ್ಲಿ ಅಚ್ಚು ಒತ್ತಿದೆ.

ಅಪ್ರಾಮಾಣಿಕತೆಯನ್ನು ಸೋಲಿಸಲು ಪ್ರಾಮಾಣಿಕತೆಗೆ ಪುನರ್ ನಮಿಸಲು ಅವರು ತಮ್ಮ ಸಂಕಲ್ಪ ಪ್ರದರ್ಶಿಸಿದ್ದಾರೆ. ನಮ್ಮ ಜನರ ಬಲ, ಅಸಾಧಾರಣ ಶಿಸ್ತು ಮತ್ತು ಶೌರ್ಯದಿಂದ ಸತ್ಯಕ್ಕಾಗಿ ಹೋರಾಡಿದ್ದಾರೆ.

ಜನರು ಬಡತನದಲ್ಲಿ ಸಿಲುಕಿದ್ದರೂ, ಅವರು ಭವ್ಯ ಭಾರತ ಕಟ್ಟಲು ತಾವು ಏನೆಲ್ಲಾ ಮಾಡಲು ಸಾಧ್ಯ ಎಂಬುದನ್ನು ವ್ಯಕ್ತಪಡಿಸಿದ್ದಾರೆ. ದೇಶದ ಉಜ್ವಲ ಭವಿಷ್ಯಕ್ಕಾಗಿ ಜನರ ತ್ಯಾಗ ಅಸಾಧಾರಣವಾದ್ದು, ಅವರುಸ್ವಪ್ರಯತ್ನ, ತಮ್ಮಬೆವರು ಮತ್ತು ಸ್ವಶ್ರಮದ ಮೂಲಕ, ವಿಶ್ವಕ್ಕೆ ತಮ್ಮ ತ್ಯಾಗ ಸಾಟಿಯಿಲ್ಲದ್ದು ಎಂದು ತೋರಿದ್ದಾರೆ.

ಸಾಮಾನ್ಯವಾಗಿ ಜನರ ಚಳುವಳಿಗಳು ನಡೆದಾಗ ಸರ್ಕಾರ ಮತ್ತು ಜನರು ಸಂಘರ್ಷದಲ್ಲಿರುತ್ತಾರೆ. ಆದರೆ ಜನರು ಮತ್ತು ಸರ್ಕಾರ ಈ ಪಿಡುಗಿನ ವಿರುದ್ಧದ ಹೋರಾಟದಲ್ಲಿ ಒಂದೇ ಪಕ್ಷದಲ್ಲಿದ್ದದ್ದು ಇತಿಹಾಸವೇ ಸರಿ.

ಈ ಅವಧಿಯಲ್ಲಿ, ನೀವು ಸರತಿಯ ಸಾಲಿನಲ್ಲಿ ನಿಂತಿರಿ ಮತ್ತು ನಿಮ್ಮದೇ ಹಣವನ್ನು ಹಿಂದಕ್ಕೆ ಪಡೆಯಲು ಕಷ್ಟಪಟ್ಟಿರಿ ಎಂಬುದು ಸರ್ಕಾರಕ್ಕೆ ತಿಳಿದಿದೆ. ನನಗೆ ಹಲವಾರು ಜನರಿಂದ ಈ ಬಗ್ಗೆ ಪತ್ರಗಳು ಬಂದಿವೆ. ಅವರು ನನ್ನೊಂದಿಗೆ ಅವರ ನೋವು ಮತ್ತು ದುಃಖವನ್ನು ತೋಡಿಕೊಂಡಿದ್ದಾರೆ, ಆದರೂ ತಮ್ಮ ಬೆಂಬಲವನ್ನು ವ್ಯಕ್ತಪಡಿಸಿದ್ದಾರೆ. ನೀವು ನನ್ನೊಂದಿಗೆ ನಿಮ್ಮವನೇ ಎಂಬಂತೆ ಮಾತನಾಡಿದ್ದೀರಿ. ಭ್ರಷ್ಟಾಚಾರ ಮತ್ತು ಕಪ್ಪುಹಣದ ವಿರುದ್ಧದ ಈ ಹೋರಾಟದಲ್ಲಿ ನೀವು ನಮ್ಮೊಂದಿಗೆ ಹೆಗಲಿಗೆ ಹೆಗಲುಕೊಟ್ಟು ನಡೆದಿದ್ದೀರಿ. ಸರ್ಕಾರದಲ್ಲಿರುವ ನಮಗೆ ಇದು ನಿಜಕ್ಕೂ ಆಶೀರ್ವಾದವೇ ಸರಿ.

ಹೊಸ ವರ್ಷದಲ್ಲ ಎಷ್ಟು ಸಾಧ್ಯವೋ ಅಷ್ಟು ಬೇಗ ಬ್ಯಾಂಕಿಂಗ್ ವ್ಯವಸ್ಥೆಯನ್ನು ಮಾಮೂಲಿನ ಸ್ಥಿತಿಗೆ ತರುವುದು ನನ್ನ ಪ್ರಯತ್ನವಾಗಿದೆ. ನಾನು ಸರ್ಕಾರದಲ್ಲಿರುವ ಸಂಬಂಧಿತ ಅಧಿಕಾರಿಗಳಿಗೆ ಈ ನಿಟ್ಟಿನಲ್ಲಿ ಗಮನ ಹರಿಸುವಂತೆ ಸೂಚಿಸಿದ್ದೇನೆ. ಅದರಲ್ಲೂ ದೂರದ ಮತ್ತು ಗ್ರಾಮೀಣ ಪ್ರದೇಶಗಳಲ್ಲಿ ಸಮಸ್ಯೆಯನ್ನು ಪರಿಹರಿಸಲು ಸಕಾರಾತ್ಮಕವಾಗಿ ಶ್ರಮಿಸುವಂತೆ ತಿಳಿಸಿದ್ದೇನೆ.

ಸ್ನೇಹಿತರೇ,

ಭಾರತ ಏನು ಮಾಡಿದೆಯೋ, ಅದಕ್ಕೆ ಜಾಗತಿಕವಾಗಿ ಯಾವುದೇ ಉದಾಹರಣೆ ಇಲ್ಲ. ನಮ್ಮಂತೆಯೇ ಇರುವ ದೇಶಗಳು ನಾವು ಹೊಂದಿರುವಷ್ಟು ಕರೆನ್ಸಿಯನ್ನು ಹೊಂದಿಲ್ಲ. ಕಳೆದ 10ರಿಂದ 12 ವರ್ಷಗಳಲ್ಲಿ 500 ಮತ್ತು 1000 ರೂಪಾಯಿ ನೋಟುಗಳನ್ನು ಕಾನೂನುಬದ್ಧ ವಹಿವಾಟಿಗೆ ಬಳಸಿದ್ದು ಕಡಿಮೆ, ಮತ್ತು ಇದನ್ನು ಪರ್ಯಾಯ ಆರ್ಥಿಕತೆಗೆ ಹೆಚ್ಚು ಬಳಸಲಾಗಿತ್ತು. ಹೆಚ್ಚುವರಿ ನಗದು ಹಣದುಬ್ಬರ ಮತ್ತು ಕಾಳಸಂತೆಗೆ ಇಂಬು ನೀಡಿತ್ತು. ಇದು ಬಡವರ ಹಕ್ಕನ್ನು ಕಸಿದುಕೊಳ್ಳುತ್ತಿತ್ತು. ನಗದಿನ ಕೊರತೆ ಕಷ್ಟ ಉಂಟು ಮಾಡುತ್ತದೆ, ಆದರೆ, ಹೆಚ್ಚು ನಗದು ಇರುವುದು ಇನ್ನೂ ಸಮಸ್ಯೆ ತರುತ್ತದೆ. ನಮ್ಮ ಗುರಿ ಸಮತೋಲನ ಸಾಧಿಸುವುದಾಗಿದೆ. ಯಾವಾಗ ನಗದು ಔಪಚಾರಿಕ ಆರ್ಥಿಕತೆಯಿಂದ ಹೊರಗೆ ಇರುತ್ತದೋ, ಅದು ಚಿಂತೆಯ ವಿಷಯ ಎಂದು ಆರ್ಥಿಕ ತಜ್ಞರು ಅಭಿಪ್ರಾಯಪಡುತ್ತಾರೆ. ಅದು ಮುಖ್ಯವಾಹಿನಿ ಸೇರಿದರೆ, ಅದು ಅಭಿವೃದ್ಧಿಯ ಅವಕಾಶ ಆಗುತ್ತದೆ.

ಭಾರತದ ಶ್ರೇಷ್ಠ ಪುತ್ರರಾದ ಜಯಪ್ರಕಾಶ್ ನಾರಾಯಣ್, ಲಾಲ್ ಬಹಾದ್ದೂರ್ ಶಾಸ್ತ್ರೀ, ರಾಮ್ ಮನೋಹರ್ ಲೋಹಿಯಾ ಮತ್ತು ಕಾಮರಾಜ್ ಅವರು ಇಂದು ಇದ್ದಿದ್ದರೆ, ಅವರು ದೇಶದ ಜನತೆಯ ಸಂಕಲ್ಪ, ಶಿಸ್ತು ಮತ್ತು ತಾಳ್ಮೆಯನ್ನು ಪ್ರಶಂಸಿಸುತ್ತಿದ್ದರು.

ಕಳೆದ ಕೆಲವು ವಾರಗಳಲ್ಲಿ, ಹಲವು ತೃಪ್ತಿದಾಯಕ ನಿದರ್ಶನಗಳು ನಡೆದಿವೆ. – ಅವುಗಳನ್ನು ಪಟ್ಟಿ ಮಾಡಲು ವಾರಗಳೇ ಆಗುತ್ತದೆ.

ಜನರು ಯಾವಾಗ ಕಾನೂನು ಬದ್ಧವಾಗಿ ಮುಖ್ಯವಾಹಿನಿ ಸೇರಲು ಬಯಸುತ್ತಾರೋ, ಮತ್ತು ಬಡವರ ಸೇವೆ ಮಾಡಲು ಸರ್ಕಾರಕ್ಕೆ ನೆರವಾಗುತ್ತಾರೋ ಅದು ಯಾವುದೇ ರಾಷ್ಟ್ರಕ್ಕೆ ಆರೋಗ್ಯಪೂರ್ಣ ಪ್ರವೃತ್ತಿ ಆಗುತ್ತದೆ,

ಸ್ನೇಹಿತರೆ,

ನಾವು ಎಲ್ಲಿಯವರೆಗೆ ಸತ್ಯವನ್ನು ಮುಚ್ಚಿ ಇಡಲು ಸಾಧ್ಯ? ನಾನು ಕೆಲವೊಂದು ಮಾಹಿತಿಯನ್ನು ನಿಮ್ಮೊಂದಿಗೆ ಹಂಚಿಕೊಳ್ಳಲು ಇಚ್ಛಿಸುತ್ತೇನೆ. ಅದು ನಿಮಗೆ ನಗು ತರಬಹುದು ಅಥವಾ ನಿಮಗೆ ಕೋಪವನ್ನೂ ತರಬಹುದು. ಸರ್ಕಾರದ ಬಳಿ ಇರುವ ಮಾಹಿತಿಯ ರೀತ್ಯ, ಭಾರತದಲ್ಲಿ ಕೇವಲ 24 ಲಕ್ಷ ಜನರು ಮಾತ್ರವೇ ತಮ್ಮ ವಾರ್ಷಿಕ ಆದಾಯ 10 ಲಕ್ಷ ರೂಪಾಯಿಗಿಂತ ಹೆಚ್ಚು ಎಂದು ಒಪ್ಪಿಕೊಂಡಿದ್ದಾರೆ. ಇದನ್ನು ನೀವು ಅರಗಿಸಿಕೊಳ್ಳುತ್ತೀರಾ? ನಿಮ್ಮ ಸುತ್ತ ಮುತ್ತ ಇರುವ ದೊಡ್ಡ ಬಂಗಲೆಗಳು ಮತ್ತು ಕಾರುಗಳನ್ನು ನೋಡಿ.

ನಾವು ಯಾವುದೇ ದೊಡ್ಡ ನಗರ ನೋಡಿದರೂ, ಅಲ್ಲಿ ಲಕ್ಷಾಂತರ ಜನರ ವಾರ್ಷಿಕ ಆದಾಯ 10 ಲಕ್ಷ ಮೀರಿರುತ್ತದೆ. ದೇಶದ ಒಳಿತಿಗಾಗಿ ಪ್ರಾಮಾಣಿಕತೆಯ ಈ ಆಂದೋಲನ ಇನ್ನೂ ಹೆಚ್ಚು ಬಲಗೊಳ್ಳಬೇಕು ಎಂದು ನಿಮಗೆ ಅನಿಸುವುದಿಲ್ಲವೇ.?

ಭ್ರಷ್ಟಾಚಾರ ಮತ್ತು ಕಪ್ಪು ಹಣದ ವಿರುದ್ಧದ ಈ ಸಮರದಲ್ಲಿ, ಅಪ್ರಾಮಾಣಿಕತೆಯ ಹಣೆ ಬರಹದ ಬಗ್ಗೆಯೂ ಚರ್ಚೆ ಸ್ವಾಭಾವಿಕ. ಅವರಿಗೆ ಯಾವ ಶಿಕ್ಷೆ ಆಗುತ್ತದೆ.? ಕಾನೂನು ಪೂರ್ಣ ಶಕ್ತಿಯೊಂದಿಗೆ ತನ್ನದೆ ಕ್ರಮ ಕೈಗೊಳ್ಳುತ್ತದೆ, ಆದರೆ ಸರ್ಕಾರದ ಈಗಿನ ಆದ್ಯತೆ ಪ್ರಾಮಾಣಿಕರಿಗೆ ಹೇಗೆ ಸಹಾಯ ಮಾಡಬೇಕು, ಅವರನ್ನು ಹೇಗೆ ರಕ್ಷಿಸಬೇಕು ಮತ್ತು ಅವರ ಸಂಕಷ್ಟ ಹೇಗೆ ಪರಿಹರಿಸುವುದು ಎಂಬುದಾಗಿದೆ. ಪ್ರಾಮಾಣಿಕತೆ ಹೇಗೆ ಹೆಚ್ಚು ಗೌರವ ಪಡೆಯುತ್ತದೆ?

ಈ ಸರ್ಕಾರ ಒಳ್ಳೆಯ ಜನರ ಮಿತ್ರ. ಮತ್ತು ಅಪ್ರಾಮಾಣಿಕರೂ ಒಳಿತಿನ ಮಾರ್ಗಕ್ಕೆ ಮರಳಲು ಇದು ಅಂಥ ವಾತಾವರಣ ನಿರ್ಮಾಣ ಮಾಡುತ್ತಿದೆ.

ಇದು ಕಹಿ ಸತ್ಯ. ಸರ್ಕಾರದ ಆಡಳಿತದಲ್ಲಿ ಮತ್ತು ಕೆಲವು ಸರ್ಕಾರಿ ಅಧಿಕಾರಿಗಳಿಂದ ಜನರಿಗೆ ಕೆಟ್ಟ ಅನುಭವ ಆಗಿರುವ ದೂರುಗಳು ಜನರಿಂದ ಬರುತ್ತದೆ.

ಇದು ವಾಸ್ತವ, ಇದನ್ನು ಅಲ್ಲಗಳೆಯಲು ಸಾಧ್ಯವಿಲ್ಲ. ಶ್ರೀಸಾಮಾನ್ಯನಿಗಿಂತ ಹೆಚ್ಚಿನ ಜವಾಬ್ದಾರಿ ಸರ್ಕಾರಿ ಅಧಿಕಾರಿಗಳಿಗಿದೆ ಎಂಬುದನ್ನು ಯಾರೂ ಅಲ್ಲಗಳೆಯಲು ಸಾಧ್ಯವಿಲ್ಲ.

ಹೀಗಾಗಿ, ಅದು ಕೇಂದ್ರ, ರಾಜ್ಯ ಮತ್ತು ಸ್ಥಳೀಯ ಮಟ್ಟದಲ್ಲಿರಬಹುದು, ಪ್ರಾಮಾಣಿಕರಿಗೆ ನೆರವಾಗಲು, ಬಡವರನ್ನು ರಕ್ಷಿಸಲು ಮತ್ತು ಅಪ್ರಮಾಣಿಕತೆಯನ್ನು ಹೊರಗಿಡಲು ಇದು ಸರ್ಕಾರದಲ್ಲಿರುವ ನಮ್ಮೆಲ್ಲರ ಜವಾಬ್ದಾರಿ ಆಗುತ್ತದೆ.

ಸ್ನೇಹಿತರೆ, ಭಯೋತ್ಪಾದನೆ, ನಕ್ಸಲ್ ವಾದ, ಮಾವೋವಾದ, ಖೋಟಾ ನೋಟು ಜಾಲ, ಮಾದಕ ವಸ್ತು ಮಾರಾಟ, ಮಾನವ ಕಳ್ಳಸಾಗಣೆ – ಈ ಎಲ್ಲವೂ ಕಪ್ಪು ಹಣದ ಮೇಲೆ ಅವಲಂಬಿತವಾಗಿದೆ ಎಂಬುದನ್ನು ಇಡೀ ವಿಶ್ವವೇ ಒಪ್ಪುತ್ತದೆ.

ಈ ಪಿಡುಗುಗಳು ಸಮಾಜಕ್ಕೆ ಮತ್ತು ಸರ್ಕಾರಕ್ಕೆ ಉಲ್ಬಣಿಸುತ್ತಿರುವ ವೇದನೆಯಾಗಿದೆ.

ನೋಟುಗಳ ರದ್ದತಿ ಈ ವ್ಯಾಪಾರದ ಮೇಲೆ ದೊಡ್ಡ ಪ್ರಹಾರ ಮಾಡಿದೆ.

ಇಂದು, ತಪ್ಪು ಹಾದಿ ತುಳಿದಿದ್ದ ಯುವಕರು, ದೊಡ್ಡ ಸಂಖ್ಯೆಯಲ್ಲಿ ಮುಖ್ಯ ವಾಹಿನಿಗೆ ಮರಳುತ್ತಿದ್ದಾರೆ. ನಾವು, ಎಚ್ಚರದಿಂದ ಇದ್ದರೆ, ನಮ್ಮ ಮಕ್ಕಳನ್ನು ಇಂಥ ತಪ್ಪು ಹಾದಿ, ಹಿಂಸಾಚಾರ ಮತ್ತು ಕ್ರೌರ್ಯದತ್ತ ಹೋಗದಂತೆ ಕಾಪಾಡಬಹುದಾಗಿದೆ. ಚಲಾವಣೆಯಲ್ಲಿದ್ದ ದೊಡ್ಡ ಮೊತ್ತದ ಹಣ ಬ್ಯಾಂಕ್ ಗಳಲ್ಲಿ ಜಮೆ ಆಗಿರುವುದು ಈ ಅಭಿಯಾನದ ಯಶಸ್ಸಿನ ಸಂಕೇತವಾಗಿದೆ.

ಕಳೆದ ಕೆಲವು ದಿನಗಳ ಘಟನೆಗಳು ಅಪ್ರಾಮಾಣಿಕರು ತಪ್ಪಿಸಿಕೊಳ್ಳುವ ಮಾರ್ಗಗಳನ್ನು ಬಂದ್ ಮಾಡಲಾಗಿದೆ ಎಂಬುದನ್ನು ತೋರಿಸುತ್ತವೆ. ತಂತ್ರಜ್ಞಾನ ದೊಡ್ಡ ಪಾತ್ರ ನಿರ್ವಹಿಸಿದೆ. ಪದೇ ಪದೇ ಅಪರಾಧ ಮಾಡುವವರು ತಮ್ಮ ತಪ್ಪು ನಡೆಯಿಡದಂತೆ ಆಗಿದೆ ಮತ್ತು ಅವರು ಮುಖ್ಯ ವಾಹಿನಿ ಸೇರುತ್ತಿದ್ದಾರೆ.

ಸ್ನೇಹಿತರೆ, ಇದು ದೇಶದ ಬ್ಯಾಂಕಿಂಗ್ ವ್ಯವಸ್ಥೆಗೆ ಒಂದು ಸುವರ್ಣಾವಕಾಶವನ್ನು ಒದಗಿಸಿದೆ. ಈ ಅವಧಿಯಲ್ಲಿ ಬ್ಯಾಂಕ್ ಸಿಬ್ಬಂದಿ ಹಗಲು ರಾತ್ರಿ ಶ್ರಮಿಸಿದ್ದಾರೆ.

ಮಹಿಳಾ ಸಿಬ್ಬಂದಿ ಕೂಡ, ಈ ಅಭಿಯಾನದ ಭಾಗವಾಗಿ ತಡರಾತ್ರಿವರೆಗೂ ದುಡಿದಿದ್ದಾರೆ.

ಅಂಚೆ ಕಚೇರಿಯ ಸಿಬ್ಬಂದಿ, ಬ್ಯಾಂಕಿನ ಪ್ರತಿನಿಧಿಗಳು, ಎಲ್ಲರೂ ಅಭೂತಪೂರ್ವ ಕಾರ್ಯ ಮಾಡಿದ್ದಾರೆ.

ಈ ಕಷ್ಟಸಾಧ್ಯವಾದ ಪ್ರಯತ್ನದ ನಡುವೆಯೂ ಕೆಲವು ಬ್ಯಾಂಕ್ ಅಧಿಕಾರಿಗಳು ಘೋರ ಅಪರಾಧ ಎಸೆಗಿರುವುದು ಬೆಳಕಿಗೆ ಬಂದಿದೆ. ಕೆಲವು ಸರ್ಕಾರಿ ಅಧಿಕಾರಿಗಳು ಕೂಡ ಗಂಭೀರ ಸ್ವರೂಪದ ಅಪರಾಧ ಎಸಗಿದ್ದಾರೆ. ಮತ್ತು ಪರಿಸ್ಥಿತಿಯ ಲಾಭ ಪಡೆಯಲು ಪ್ರಯತ್ನಿಸಿದ್ದಾರೆ. ಅವರನ್ನು ಹಾಗೇ ಬಿಡುವುದಿಲ್ಲ.

ಈ ಐತಿಹಾಸಿಕ ಸಂದರ್ಭದಲ್ಲಿ, ನಾನು ಬ್ಯಾಂಕ್ ಗಳಿಗೆ ಮನವಿ ಮಾಡಲು ಬಯಸುತ್ತೇನೆ.

ಇತಿಹಾಸದಲ್ಲೇ ಇಷ್ಟು ಅಲ್ಪ ಅವಧಿಯಲ್ಲಿ ಒಂದೇ ಬಾರಿ ಬ್ಯಾಂಕಿಂಗ್ ವ್ಯವಸ್ಥೆಯಲ್ಲಿ ಇಷ್ಟು ದೊಡ್ಡ ಪ್ರಮಾಣದ ಹಣ ಬಂದಿರಲಿಲ್ಲ.

ಬ್ಯಾಂಕ್ ಗಳ ಸ್ವಾಯತ್ತತೆಯನ್ನು ಗೌರವಿಸುತ್ತಲೇ, ತಮ್ಮ ಸಾಂಪ್ರದಾಯಿಕ ಆದ್ಯತೆಗಳಿಂದ ಹೊರಗೆ ನೋಡುವಂತೆ ಮನವಿ ಮಾಡುತ್ತೇನೆ ಮತ್ತು ತಮ್ಮ ಚಟುವಟಿಕೆಯಲ್ಲಿ ಬಡವರು, ಕೆಳ ಮಧ್ಯಮವರ್ಗದವರು ಮತ್ತು ಮಧ್ಯಮವರ್ಗದವರತ್ತ ಗಮನ ಹರಿಸುವಂತೆ ಕೋರುತ್ತೇನ.

ಭಾರತ ಪಂಡಿತ್ ದೀನ ದಯಾಳ್ ಉಪಾಧ್ಯಾಯರ ಶತಮಾನೋತ್ಸವವನ್ನು ಬಡವರ ಕಲ್ಯಾಣ ವರ್ಷವಾಗಿ ಆಚರಿಸುತ್ತಿದೆ. ಬ್ಯಾಂಕ್ ಗಳು ಕೂಡ ಈ ಅವಕಾಶ ಕೈತಪ್ಪದಂತೆ ನೋಡಿಕೊಳ್ಳಬೇಕು. ಅವರು ಸಾರ್ವಜನಿಕರ ಹಿತದೃಷ್ಟಿಯಿಂದ ಪ್ರಾಮಾಣಿಕವಾಗಿ ಸೂಕ್ತ ನಿರ್ಧಾರಗಳನ್ನು ಕೈಗೊಳ್ಳಬೇಕು.

ಯಾವಾಗ ನೀತಿಗಳು ಮತ್ತು ಕಾರ್ಯಕ್ರಮಗಳು ಮನಸ್ಸಿನಲ್ಲಿ ಶುದ್ಧ ಉದ್ದೇಶ ಇಟ್ಟುಕೊಂಡು ರೂಪಿತವಾಗುತ್ತವೆ, ಆಗ ಫಲಾನುಭವಿಗಳು ಮಾತ್ರ ಸಬಲೀಕರಣವಾಗುವುದಿಲ್ಲ, ಜೊತೆಗೆ ದೀರ್ಘಾವಧಿ ಮತ್ತು ಅಲ್ಪಾವಧಿ ಲಾಭವೂ ಆಗುತ್ತದೆ. ವೆಚ್ಚವನ್ನು ಎಚ್ಚರಿಕೆಯಿಂದ ಪರಿಶೀಲಿಸಿ ಮತ್ತು ಒಳ್ಳೆಯ ಫಲಿತಾಂಶದ ಅವಕಾಶಗಳನ್ನು ಹೆಚ್ಚಿಸಿ.

ಹೆಚ್ಚು ಹಳ್ಳಿಗಳು, ಬಡವರು, ರೈತರು, ದಲಿತರು, ಗುಡ್ಡಗಾಡು ಜನರು, ಶೋಷಿತರು, ದುರ್ಬಲರು ಮತ್ತು ಮಹಿಳೆಯರು ಸಬಲರಾಗಬೇಕು ಮತ್ತು ತಮ್ಮ ಕಾಲಮೇಲೆ ತಾವು ನಿಲ್ಲುವಂತೆ ಆಗಬೇಕು. ದೇಶ ಬಲಿಷ್ಠವಾಗಬೇಕು ಮತ್ತು ಅಭಿವೃದ್ಧಿಯ ವೇಗ ತ್ವರಿತಗೊಳ್ಳಬೇಕು.

ಸ್ನೇಹಿತರೇ, ಎಲ್ಲರೊಂದಿಗೆ ಎಲ್ಲರ ವಿಕಾಸ ನೀತಿಯೊಂದಿಗೆ, ಹೊಸ ವರ್ಷದ ಈ ಸಂದರ್ಭದಲ್ಲಿ, ಸರ್ಕಾರ ಜನರಿಗಾಗಿ ಕೆಲವು ಹೊಸ ಕಾರ್ಯಕ್ರಮಗಳನ್ನು ತಂದಿದೆ.

ಸ್ವಾತಂತ್ರ್ಯ ಬಂದು ಹಲವಾರು ವರ್ಷಗಳ ಬಳಿಕವೂ, ಲಕ್ಷಾಂತರ ಜನ ಬಡವರಿಗೆ ಸ್ವಂತ ಮನೆ ಇಲ್ಲ. ನಮ್ಮ ಆರ್ಥಿಕತೆಯಲ್ಲಿ ಯಾವಾಗ ಕಪ್ಪು ಹಣ ಹೆಚ್ಚಾಯಿತೋ, ಮನೆ ಎಂಬುದು ಮಧ್ಯಮವರ್ಗದವರಿಗೂ ಕೈಗೆಟುಕದಂತಾಗಿತ್ತು. ಸರ್ಕಾರ ಬಡವರಿಗೆ, ಕೆಳ ಮಧ್ಯಮವರ್ಗ ಮತ್ತು ಮಧ್ಯಮ ವರ್ಗದವರಿಗೆ ಸ್ವಂತ ಸೂರು ಒದಗಿಸಲು ಪ್ರಮುಖ ನಿರ್ಧಾರಗಳನ್ನು ಕೈಗೊಂಡಿದೆ.

ನಗರ ಪ್ರದೇಶದಲ್ಲಿ ಪ್ರಧಾನಮಂತ್ರಿ ವಸತಿ ಯೋಜನೆ ಅಡಿ ಎರಡು ಹೊಸ ಮಧ್ಯಮ ಆದಾಯ ವರ್ಗಗಳನ್ನು ಮಾಡಲಾಗಿದೆ. 2017ರಲ್ಲಿ ತೆಗೆದುಕೊಳ್ಳುವ 9 ಲಕ್ಷ ರೂಪಾಯಿಗಳ ವರೆಗಿನ ಗೃಹ ಸಾಲಕ್ಕೆ ಶೇಕಡ 4ರಷ್ಟು ಬಡ್ಡಿಯ ಸಹಾಯಧನ ಹಾಗೂ 12 ಲಕ್ಷ ರೂಪಾಯಿಗಳ ವರೆಗೆ 2017ರಲ್ಲಿ ಪಡೆಯುವ ಸಾಲಕ್ಕೆ ಶೇಕಡ 3ರಷ್ಟು ಬಡ್ಡಿಯ ಸಹಾಯಧನ ದೊರಕಲಿದೆ.

ಪ್ರಧಾನಮಂತ್ರಿ ಆವಾಸ್ ಯೋಜನೆಯಡಿ ಗ್ರಾಮೀಣ ಪ್ರದೇಶದಲ್ಲಿ ಬಡವರಿಗೆ ಕಟ್ಟಲಾಗುವ ಮನೆಗಳ ಸಂಖ್ಯೆಯನ್ನು ಶೇಕಡ 33ರಷ್ಟು ಹೆಚ್ಚಿಸಲಾಗಿದೆ.

ಇದರ ಜೊತೆಗೆ, ಗ್ರಾಮೀಣ ಪ್ರದೇಶದ ನಿಯೋ ಮಿಡಲ್ ಕ್ಲಾಸ್ ಮತ್ತು ಮಧ್ಯಮ ವರ್ಗದವರಿಗಾಗಿ ಮತ್ತೊಂದು ಯೋಜನೆಯನ್ನು ತರುತ್ತಿದ್ದೇವೆ. 2017ರಲ್ಲಿ ಗ್ರಾಮೀಣ ಪ್ರದೇಶದಲ್ಲಿ ನೂತನ ಮನೆ ನಿರ್ಮಾಣ ಅಥವಾ ವಿಸ್ತರಣೆಗೆ ತೆಗೆದುಕೊಳ್ಳುವ ಸಾಲಕ್ಕೆ ಶೇಕಡ 3ರಷ್ಟು ಬಡ್ಡಿಯ ಸಹಾಯಧನ ಲಭಿಸಲಿದೆ.

ಸ್ನೇಹಿತರೆ, ಕಳೆದ ಕೆಲವು ವಾರಗಳಲ್ಲಿ, ಕೃಷಿ ವಲಯವೇ ನಾಶವಾಗಿ ಹೋಗುತ್ತದೆ ಎಂಬ ಭಾವನೆ ಮೂಡಿಸಲಾಗಿತ್ತು. ಆದರೆ ರೈತರೇ ಅದಕ್ಕೆ ತಕ್ಕ ಉತ್ತರ ನೀಡಿದ್ದಾರೆ. ಹಿಂಗಾರು ಬಿತ್ತನೆ ಕಳೆದ ವರ್ಷಕ್ಕೆ ಹೋಲಿಸಿದರೆ ಶೇಕಡ 6ರಷ್ಟು ಹೆಚ್ಚಳವಾಗಿದೆ. ಈ ಅವಧಿಯಲ್ಲಿ ರಸಗೊಬ್ಬರ ಖರೀದಿ ಶೇಕಡ 9ರಷ್ಟು ಹೆಚ್ಚಳವಾಗಿದೆ. ರೈತರು, ಬಿತ್ತನೆ ಬೀಜ, ರಸಗೊಬ್ಬರ ಮತ್ತು ಸಾಲಕ್ಕಾಗಿ ಒದ್ದಾಡದಂತೆ ಸರ್ಕಾರ ಕ್ರಮ ಕೈಗೊಂಡಿದೆ. ನಾವು ಈಗ ರೈತರ ಹಿತದೃಷ್ಟಿಯಿಂದ ಇನ್ನೂ ಕೆಲವು ನಿರ್ಧಾರ ಕೈಗೊಂಡಿದ್ದೇವೆ.

ಯಾವ ರೈತರು ಹಿಂಗಾರು ಬೆಳೆಗಾಗಿ ಜಿಲ್ಲಾ ಸಹಕಾರಿ ಕೇಂದ್ರ ಬ್ಯಾಂಕ್ ಮತ್ತು ಪ್ರಾಥಮಿಕ ಸೊಸೈಟಿಗಳಿಂದ ಸಾಲವನ್ನು ಪಡೆದಿದ್ದಾರೋ, ಅವರು 60 ದಿನಗಳ ಅವಧಿಗೆ ಯಾವುದೇ ಬಡ್ಡಿಯನ್ನು ಪಾವತಿಸಬೇಕಾಗಿಲ್ಲ. ಕಳೆದ ಎರಡು ತಿಂಗಳುಗಳ ಅವಧಿಯಲ್ಲಿ ಯಾವ ರೈತರು ಬಡ್ಡಿ ಪಾವತಿಸಿದ್ದಾರೋ ಆ ಬಡ್ಡಿ ಹಣ ಅವರ ಬ್ಯಾಂಕ್ ಖಾತೆಗೆ ನೇರವಾಗಿ ವರ್ಗಾವಣೆ ಆಗುತ್ತದೆ.

ಸಹಕಾರಿ ಬ್ಯಾಂಕ್ ಗಳು ಮತ್ತು ಸೊಸೈಟಿಗಳಿಂದ ರೈತರಿಗೆ ಸಾಲ ಇನ್ನೂ ಉತ್ತಮವಾಗಿ ಸಿಗುವಂತೆ ವ್ಯವಸ್ಥೆಗಳನ್ನು ಮಾಡಲಾಗಿದೆ. ನಬಾರ್ಡ್ 21 ಸಾವಿರ ಕೋಟಿ ರೂಪಾಯಿಗಳ ನಿಧಿಯನ್ನು ಕಳೆದ ತಿಂಗಳು ರೂಪಿಸಿದೆ. ಈಗ ಸರ್ಕಾರ ಅದಕ್ಕೆ 20 ಸಾವಿರ ಕೋಟಿ ರೂಪಾಯಿಗಳನ್ನು ಹೆಚ್ಚುವರಿಯಾಗಿ ಸೇರಿಸಿದೆ. ಸಹಕಾರಿ ಸಂಸ್ಥೆಗಳಿಗೆ ಮತ್ತು ಸೊಸೈಟಿಗಳಿಗೆ ಕಡಿಮೆ ಬಡ್ಡಿ ದರಕ್ಕೆ ಸಾಲ ಒದಗಿಸಿ ನಬಾರ್ಡ್ ಅನುಭವಿಸುತ್ತಿದ್ದ ನಷ್ಟವನ್ನು ಭಾರತ ಸರ್ಕಾರ ಭರಿಸಲಿದೆ.

ಕಿಸಾನ್ ಕ್ರೆಡಿಟ್ ಕಾರ್ಡ್ ಹೊಂದಿರುವ 3 ಕೋಟಿ ರೈತರಿಗೆ ರುಪೇ ಡೆಬಿಟ್ ಕಾರ್ಡ್ ಗಳನ್ನು ಮೂರು ತಿಂಗಳೊಳಗೆ ನೀಡಲು ಸರ್ಕಾರ ನಿರ್ಧರಿಸಿದೆ. 1998ರಲ್ಲಿ ಕಿಸಾನ್ ಕ್ರೆಡಿಟ್ ಕಾರ್ಡ್ ಆರಂಭಿಸಲಾಗಿತ್ತು. ಆದರೆ, ಈವರೆಗೆ ಅದನ್ನು ಬಳಸಲು ಬ್ಯಾಂಕ್ ಗಳಿಗೆ ಹೋಗುವುದು ಅನಿವಾರ್ಯವಾಗಿತ್ತು. ಈಗ ರುಪೇ ಡೆಬಿಟ್ ಕಾರ್ಡ್ ಗಳನ್ನು ರೈತರು ಪಡೆಯಲಿದ್ದು, ಅದನ್ನು ಎಲ್ಲಿ ಬೇಕಾದರೂ ಬಳಸಬಹುದಾಗಿದೆ.

ಆರ್ಥಿಕತೆಗೆ ಹೇಗೆ ಕೃಷಿ ಪ್ರಮುಖವೋ, ಎಂ.ಎಸ್.ಎಂ.ಇ. ಎಂದು ಕರೆಯಲಾಗುವ ಮಧ್ಯಮ ಮತ್ತು ಸಣ್ಣ ಉದ್ದಿಮೆಗಳೂ ಅಷ್ಟೇ ಮುಖ್ಯ.ಈ ನಿಟ್ಟಿನಲ್ಲಿ ಸರ್ಕಾರ, ಉದ್ಯೋಗಾವಕಾಶ ಹೆಚ್ಚಿಸುವ ಸಣ್ಣ ಮತ್ತು ಮಧ್ಯಮ ಉದ್ದಿಮೆಗಳ ಹಿತದೃಷ್ಟಿಯಿಂದ ನಿರ್ಧಾರ ಕೈಗೊಂಡಿದೆ.

ಸಣ್ಣ ಉದ್ದಿಮೆಗಳಿಗೆ ಟ್ರಸ್ಟ್ ಮೂಲಕ ನೀಡಲಾಗಿರುವ ಬ್ಯಾಂಕ್ ಸಾಲದ ಹೊಣೆಯನ್ನು ಸರ್ಕಾರ ವಹಿಸಿಕೊಂಡಿದೆ. ಈವರೆಗೆ ಈ ಸಾಲ 1 ಕೋಟಿ ರೂಪಾಯಿ ಮಾತ್ರ ಇತ್ತು. ಈ ಮಿತಿಯನ್ನು 2 ಕೋಟಿ ರೂಪಾಯಿಗಳಿಗೆ ಹೆಚ್ಚಿಸಲಾಗಿದೆ. ಈ ಮುನ್ನ ಬ್ಯಾಂಕ್ ಸಾಲಕ್ಕೆ ಮಾತ್ರ ಯೋಜನೆ ವ್ಯಾಪಿಸಿತ್ತು. ಇನ್ನು ಮುಂದೆ, ಎನ್.ಬಿ.ಎಫ್.ಸಿ.ಗಳು ನೀಡುವ ಸಾಲಕ್ಕೂ ಇದು ಅನ್ವಯಿಸುತ್ತದೆ. ಈ ನಿರ್ಧಾರ ಸಣ್ಣ ಅಂಗಡಿಗಳ ಮಾಲೀಕರಿಗೆ ಮತ್ತು ಸಣ್ಣ ಉದ್ದಿಮೆದಾರರಿಗೆ ಸಾಲ ಸೌಲಭ್ಯದ ಅವಕಾಶ ಹೆಚ್ಚಿಸುತ್ತದೆ. ಭಾರತ ಸರ್ಕಾರ ಅವುಗಳ ಭಾರದ ಹೊಣೆ ಹೊರುವ ಕಾರಣ, ಬ್ಯಾಂಕ್ ಗಳು ಮತ್ತು ಎನ್.ಬಿ.ಎಫ್.ಸಿ.ಗಳು ಈ ಸಾಲಗಳ ಮೇಲೆ ಹೆಚ್ಚಿನ ಬಡ್ಡಿ ದರ ಹಾಕುವುದಿಲ್ಲ.

ಅಲ್ಲದೆ ಸರ್ಕಾರ ಸಣ್ಮ ಕೈಗಾರಿಕೆಗಳಿಗೆ ನೀಡುವ ಸಾಲದ ಮಿತಿಯನ್ನು ವಹಿವಾಟಿನ ಶೇಕಡ 20ರ ಬದಲಿಗೆ 25ಕ್ಕೆ ಹೆಚ್ಚಿಸುವಂತೆಯೂ ಸೂಚಿಸಿದೆ.

ಅಲ್ಲದೆ ಡಿಜಿಟಲ್ ವಹಿವಾಟು ನಡೆಸುವ ಉದ್ದಿಮೆಗಳಿಗೆ ಕಾರ್ಯ ಬಂಡವಾಳದ ಸಾಲವನ್ನು ವಹಿವಾಟಿನ ಶೇಕಡ 20ರಿಂದ 30ಕ್ಕೆ ಹೆಚ್ಚಿಸುವಂತೆ ಬ್ಯಾಂಕ್ ಗಳಿಗೆ ತಿಳಿಸಲಾಗಿದೆ. ಈ ವಲಯದೊಂದಿಗೆ ಸಂಪರ್ಕ ಹೊಂದಿರುವ ಬಹಳಷ್ಟು ಜನರು, ಕಳೆದ ಕೆಲವು ವಾರಗಳಲ್ಲಿ ನಗದು ಜಮಾ ಮಾಡಿದ್ದಾರೆ. ಬ್ಯಾಂಕ್ ಗಳು ಕಾರ್ಯ ಬಂಡವಾಳ ನಿರ್ಧರಿಸುವಾಗ ಇದನ್ನೂ ಪರಿಗಣಿಸಬೇಕು ಎಂದು ತಿಳಿಸಲಾಗಿದೆ.

ಕೆಲವು ದಿನಗಳ ಹಿಂದೆ, ಸರ್ಕಾರ ಸಣ್ಣ ವ್ಯಾಪಾರಕ್ಕೆ ಪ್ರಮುಖ ತೆರಿಗೆ ವಿನಾಯಿತಿ ಘೋಷಿಸಿದೆ. 2 ಕೋಟಿ ರೂಪಾಯಿಗಳವರೆಗಿನ ವಹಿವಾಟಿನ ಉದ್ದಿಮೆಯ ಆದಾಯವನ್ನು ಶೇಕಡ 8ರ ವಹಿವಾಟಿನಂತೆ ಲೆಕ್ಕ ಹಾಕಲಾಗುತ್ತದೆ. ಈಗ ಡಿಜಿಟಲ್ ವಹಿವಾಟು ನಡೆಸುವ ಅಂಥ ಉದ್ದಿಮೆಗಳಿಗೆ ಶೇ.6ರ ದರದಲ್ಲಿ ಲೆಕ್ಕ ಹಾಕಲಾಗುವುದು. ಇದು ಅವರ ತೆರಿಗೆಯ ಋಣವನ್ನು ಶೇ.25ರಷ್ಟು ತಗ್ಗಿಸಲಿದೆ.

ಸ್ನೇಹಿತರೇ,

ಮುದ್ರಾ ಯೋಜನೆಯ ಪ್ರಗತಿಯು ಬಹಳ ಉತ್ತೇಜನಕಾರಿಯಾಗಿದೆ. ಕಳೆದ ವರ್ಷ ಸುಮಾರು ಮೂರೂವರೆ ಕೋಟಿ ಜನರು ಇದರ ಲಾಭ ಪಡೆದಿದ್ದಾರೆ. ಸರ್ಕಾರ ಈಗ, ದಲಿತರು, ಬುಡಕಟ್ಟು ಜನರು, ಹಿಂದುಳಿದ ವರ್ಗದವರು ಮತ್ತು ಮಹಿಳೆಯರನ್ನು ದೃಷ್ಟಿಯಲ್ಲಿಟ್ಟುಕೊಂಡು ಇದನ್ನು ದುಪ್ಪಟ್ಟು ಮಾಡುವ ಗುರಿ ಹೊಂದಿದೆ. ಗರ್ಭಿಣಿಯರಿಗಾಗಿ ಹೊಸ ಯೋಜನೆಯನ್ನೂ ಆರಂಭಿಸಲಾಗುತ್ತಿದೆ.

ನಾವು ದೇಶದಾದ್ಯಂತ ಗರ್ಭಿಣಿಯರಿಗೆ ಆರ್ಥಿಕ ನೆರವು ನೀಡುವ ಯೋಜನೆ ಪರಿಚಯಿಸುತ್ತಿದ್ದೇವೆ. ಸಾಂಸ್ಥಿಕ ಹೆರಿಗೆಗೆ ಒಳಗಾಗುವ ಮತ್ತು ತಮ್ಮ ಮಗುವಿಗೆ ಲಸಿಕೆ ಹಾಕಿಸುವ ಗರ್ಭಿಣಿಯರ ಬ್ಯಾಂಕ್ ಖಾತೆಗಳಿಗೆ ನೇರವಾಗಿ 6 ಸಾವಿರ ರೂಪಾಯಿಗಳು ವರ್ಗಾವಣೆ ಆಗುತ್ತದೆ. ಈ ಯೋಜನೆಯು ತಾಯಂದಿರ ಮರಣದ ಪ್ರಮಾಣವನ್ನು ದೊಡ್ಡ ಪ್ರಮಾಣದಲ್ಲಿ ತಗ್ಗಿಸಲು ನೆರವಾಗುತ್ತದೆ. ಇದು ಹೆರಿಗೆಗೆ ಮುನ್ನ ಮತ್ತು ನಂತರ ಪೌಷ್ಟಿಕತೆಗೆ ನೆರವಾಗುತ್ತದೆ ಮತ್ತು ತಾಯಿ ಮತ್ತು ಮಗುವಿನ ಆರೋಗ್ಯವನ್ನು ಉತ್ತಮಪಡಿಸುತ್ತದೆ. ಈವರೆಗೆ 53 ಜಿಲ್ಲೆಗಳಲ್ಲಿ ಗರ್ಭಿಣಿಯರಿಗೆ 4 ಸಾವಿರ ರೂಪಾಯಿಗಳ ಆರ್ಥಿಕ ನೆರವನ್ನು ಪ್ರಾಯೋಗಿಕವಾಗಿ ನೀಡಲಾಗುತ್ತಿತ್ತು.

ನಾವು ಹಿರಿಯ ನಾಗರಿಕರಿಗೆ ಕೂಡ ಯೋಜನೆಯನ್ನು ನೀಡುತ್ತಿದ್ದೇವೆ. ಬ್ಯಾಂಕ್ ಗಳು ದೊಡ್ಡ ಮೊತ್ತವನ್ನು ಸ್ವೀಕರಿಸಿದಾಗ, ಆಗಾಗ್ಗೆ ಬಡ್ಡಿ ದರವನ್ನು ಕಡಿಮೆ ಮಾಡುತ್ತಿರುತ್ತವೆ. ಇದು ಹಿರಿಯ ನಾಗರಿಕರ ಮೇಲೆ ಪ್ರತೀಕೂಲ ಪರಿಣಾಮ ಬೀರುತ್ತದೆ. ಹೊಸ ಯೋಜನೆ ಅಡಿಯಲ್ಲಿ ಹಿರಿಯ ನಾಗರಿಕರು, 7.5 ಲಕ್ಷ ರೂಪಾಯಿಗಳವರೆಗಿನ ಠೇವಣಿಗೆ 10 ವರ್ಷಗಳ ಕಾಲ ಶೇ.8ರ ಬಡ್ಡಿದರವನ್ನು ನಿಶ್ಚಿತವಾಗಿ ಪಡೆಯಲಿದ್ದಾರೆ. ಈ ಬಡ್ಡಿಯನ್ನು ಮಾಸಿಕ ನೀಡಲಾಗುತ್ತದೆ.

ಸ್ನೇಹಿತರೇ,

ರಾಜಕೀಯ ಪಕ್ಷಗಳು, ರಾಜಕೀಯ ನಾಯಕರು ಮತ್ತು ಚುನಾವಣೆಯ ಆರ್ಥಿಕ ನೆರವು, ಭಯೋತ್ಪಾದನೆ ಮತ್ತು ಕಪ್ಪು ಹಣದ ಚರ್ಚೆಯಲ್ಲಿ ಪ್ರಮುಖವಾಗಿ ಕೇಳಿ ಬರುತ್ತದೆ.

ಜನರ ಆಕ್ರೋಶವನ್ನು ಮತ್ತು ಪ್ರಾಮಾಣಿಕ ಜನರ ಭಾವನೆಗಳನ್ನು ರಾಜಕೀಯ ಪಕ್ಷಗಳು ಮತ್ತು ರಾಜಕೀಯ ನಾಯಕರು ಅರ್ಥ ಮಾಡಿಕೊಳ್ಳಬೇಕಾದ ಕಾಲ ಈಗ ಬಂದಿದೆ.

ಕಾಲ ಕಾಲಕ್ಕೆ ರಾಜಕೀಯ ಪಕ್ಷಗಳು ವ್ಯವಸ್ಥೆಯನ್ನು ಸುಧಾರಿಸಲು ರಚನಾತ್ಮಕ ಕ್ರಮಗಳನ್ನು ಕೈಗೊಂಡಿವೆ ಎಂಬುದು ಸತ್ಯ.

ರಾಜಕೀಯವನ್ನು ಭ್ರಷ್ಟಾಚಾರ ಮತ್ತು ಕಪ್ಪುಹಣ ಮುಕ್ತಗೊಳಿಸಲು, ಪಾರದರ್ಶಕತೆಗೆ ಆದ್ಯತೆ ನೀಡಲು ಕ್ರಮ ಕೈಗೊಳ್ಳಲು ಒಗ್ಗೂಡುವಂತೆ ಪವಿತ್ರವಾಗಿ ಹೊರಬರುವಂತೆ ನಾನು ಎಲ್ಲ ರಾಜಕೀಯ ಪಕ್ಷಗಳಿಗೆ ಮತ್ತು ನಾಯಕರಿಗೆ ಕರೆ ನೀಡುತ್ತೇನೆ.

ನಮ್ಮ ದೇಶದಲ್ಲಿ, ಶ್ರೀಸಾಮಾನ್ಯಿಂದ ಹಿಡಿದು ರಾಷ್ಟ್ರಪತಿಯವರೆಗೆ ಎಲ್ಲರೂ ಯಾವುದಾದರೂ ಸಂದರ್ಭದಲ್ಲಿ, ರಾಜ್ಯ ಮತ್ತು ದೇಶಕ್ಕೆ ಏಕ ಕಾಲದಲ್ಲಿ ಚುನಾವಣೆ ನಡೆಸಬೇಕು ಎಂದು ವಾದಿಸಿದ್ದಾರೆ.

ಇದು ಕೊನೆ ಇಲ್ಲದ ಚುನಾವಣೆಗಳ ಚಕ್ರವನ್ನು ತೊಡೆದು ಹಾಕುತ್ತದೆ., ಚುನಾವಣಾ ವೆಚ್ಚವನ್ನು ಕಡಿಮೆ ಮಾಡುತ್ತದೆ. ಮತ್ತು ಆಡಳಿತ ಯಂತ್ರದ ಮೇಲಿನ ಒತ್ತಡ ಇಳಿಸುತ್ತದೆ.

ಈ ವಿಚಾರದ ಬಗ್ಗೆ ಗಂಭೀರವಾಗಿ ಚರ್ಚಿಸಲು ಮತ್ತು ಪರಿಗಣಿಸಲು ಕಾಲ ಕೂಡಿಬಂದಿದೆ.

ನಮ್ಮ ದೇಶದಲ್ಲಿ ಧನಾತ್ಮಕವಾದ ಬದಲಾವಣೆಗೆ ಯಾವುಗಲೂ ಜಾಗ ಇದ್ದೆ ಇದೆ.

ನಾವೀಗ, ಧನಾತ್ಮಕವಾದ ಡಿಜಿಟಲ್ ವಹಿವಾಟನ್ನು ಭಾರತದಲ್ಲಿ ಕಾಣುತ್ತಿದ್ದೇವೆ.

ಹೆಚ್ಚು ಹೆಚ್ಚು ಜನರು ಡಿಜಿಟಲ್ ವಹಿವಾಟು ನಡೆಸುತ್ತಿದ್ದಾರೆ.

ನಿನ್ನೆ, ಸರ್ಕಾರ ಡಿಜಿಟಲ್ ವಹಿವಾಟಿಗೆ ಹೊಸ ಸ್ವದೇಶೀ ವೇದಿಕೆಯನ್ನು ಆರಂಭಿಸಿದೆ. ಅದಕ್ಕೆ ಬಾಬಾ ಸಾಹೇಬ್ ಅಂಬೇಡ್ಕರ್ ಅವರ ಹೆಸರು ಭೀಮ್ ಎಂದು ಇಡಲಾಗಿದೆ.

ಬಿ.ಎಚ್.ಐ.ಎಂ. (ಬೀಮ್) ಎಂದರೆ ಭಾರತ್ ಇಂಟರ್ ಫೇಸ್ ಫಾರ್ ಮನಿ. ನಾನು ದೇಶದ ಯುವಕರು, ಮಾರಾಟಗಾರರ ಸಮುದಾಯ ಮತ್ತು ರೈತರಿಗೆ ಎಷ್ಟು ಸಾಧ್ಯವೋ ಅಷ್ಟು ಬೀಮ್ ಜೊತೆ ಸಂಪರ್ಕ ಹೊಂದುವಂತೆ ಮನವಿ ಮಾಡುತ್ತೇನೆ. ಸ್ನೇಹಿತರೆ, ಅಭಿವೃದ್ಧಿ, ನಿರ್ದಾರಗಳು ಮತ್ತು ದೀಪಾವಳಿಯ ನಂತರ ಜಾರಿಗೆ ಬಂದ ನೀತಿಗಳು, ಆರ್ಥಿಕ ತಜ್ಞರಿಂದ ಮೌಲ್ಯಮಾಪನಕ್ಕೆ ಒಳಗಾಗಿವೆ.

ಸಾಮಾಜಿಕ ವಿಜ್ಞಾನಿಗಳೂ ಈ ಕಾರ್ಯ ಮಾಡಿದರೆ ಉತ್ತಮ.

ಒಂದು ದೇಸವಾಗಿ, ಭಾರತದ ಹಳ್ಳಿಗಳು, ಬಡವರು, ರೈತರು, ಯುವಕರು, ಶಿಕ್ಷಿತರು ಮತ್ತು ಅಶಿಕ್ಷಿತ ಪುರುಷರು ಮತ್ತು ಮಹಿಳೆಯರು, ಅಸಾಧಾರಣ ತಾಳ್ಮೆ ಮತ್ತು ಜನ ಶಕ್ತಿಯನ್ನು ತೋರಿಸಿದ್ದಾರೆ. ಇನ್ನು ಕೆಲವೇ ಹೊತ್ತಿನಲ್ಲಿ 2017ರ ಹೊಸ ವರ್ಷ ಆರಂಭವಾಗುತ್ತದೆ. ಸರಿಯಾಗಿ 100 ವರ್ಷಗಳ ಹಿಂದೆ, ಅಂದರೆ 1917ರಲ್ಲಿ, ಮಹಾತ್ಮಾ ಗಾಂಧಿ ಚಂಪಾರಣ್ ನಲ್ಲಿ ಸತ್ಯಾಗ್ರಹ ಆರಂಭಿಸಿದ್ದರು. ಈಗ ದೇಶವು ಮತ್ತು ಭಾರತದ ಜನರು ಸತ್ಯ ಮತ್ತು ಒಳಿತನ್ನು ಕಾಣುತ್ತಿದ್ದಾರೆ ಮತ್ತು ಹಂಚಿಕೊಳ್ಳುತ್ತಿದ್ದಾರೆ.

ಇಂದು ಮಹಾತ್ಮಾ ಗಾಂಧಿ ನಮ್ಮೊಂದಿಗೆ ಇಲ್ಲ. ಆದರೆ, ಅವರು ತೋರಿದ ಸತ್ಯದ ದಾರಿ, ಇನ್ನೂ ಮೆಚ್ಚುಗೆಗೆ ಪಾತ್ರವಾಗುತ್ತಿದೆ. ನಾವು ಸತ್ಯಾಗ್ರಹ ಶತಮಾನೋತ್ಸವ ಆರಂಭಿಸಿದ್ದೇವೆ, ನಾವು ಮಹಾತ್ಮ ಗಾಂಧಿಯನ್ನು ಸ್ಮರಿಸಿ, ಅವರ ಸತ್ಯ ಮತ್ತು ಒಳಿತಿನ ಸಂದೇಶವನ್ನು ಪಾಲಿಸುವ ಸಂಕಲ್ಪ ಮಾಡೋಣ.

ನಾವು ಭ್ರಷ್ಟಾಚಾರ ಮತ್ತು ಕಪ್ಪು ಹಣದ ವಿರುದ್ಧದ ಈ ಹೋರಾಟವನ್ನು ನಿಲ್ಲಿಸುವುದಿಲ್ಲ ಅಥವಾ ಹಿಂಜರಿಯಲೂ ಬಿಡುವುದಿಲ್ಲ. ದೃಢತೆಯಲ್ಲಿನ ಸತ್ಯವೇ ಯಶಸ್ಸಿನ ಖಾತ್ರಿ. 125 ಕೋಟಿ ಜನಸಂಖ್ಯೆಯ ದೇಶದಲ್ಲಿ, ಶೇಕಡ 65ರಷ್ಟು ಮಂದಿ 35 ವರ್ಷ ಒಳಗಿನ ಪ್ರಾಯದವರು. ಅವರ ಸಾಮರ್ಥ್ಯ, ಸಂಪನ್ಮೂಲ ಎಂದಿಗೂ ಹಿಂದೆ ಬೀಳಲು ಬಿಡುವುದಿಲ್ಲ.

ಹೊಸ ವರ್ಷದ ಹೊಸ ಸೂರ್ಯೋದಯ, ಹೊಸ ಯಶಸ್ಸಿನ ಸಂಕಲ್ಪದೊಂದಿಗೆ ಬಂದಿದೆ.

ನಾವೆಲ್ಲರೂ ಒಟ್ಟಿಗೆ ಸೇರಿ, ಅಡೆ ತಡೆಗಳನ್ನು ದಾಟಿ ಮುಂದೆ ಸಾಗೋಣ.

ಎಲ್ಲರಿಗೂ ಹೊಸ ವರ್ಷದ ಶುಭಾಶಯಗಳು

ಜೈ ಹಿಂದ್ !!!