ভারতকী প্রধানমন্ত্রী
লুচিংবা অনিনা ভারত অমসুং থাইলেন্দগী মরক্ত হিরম কয়াদা মতেং পাংনরিবা অসি হন্না য়েংশিনখ্রে। রাজনিতিগী থবকশিং, দিফেন্স অমসুং সেকুরিতিগী মরী, মরুওইবা থবকশিং, ললোন-ইতিক অমসুং শেন থাদবা অমসুং মীগা মীগা লৈনবা মরীশিং মখা তানা মপাঙ্গল কনখৎহন্নবা লম্বীশিং খন্নখি। মসিগা লোয়ননা, চৎথোক-চৎশিন, হকশেল, সাইন্স অমসুং তেক্নোলোজি, স্তার্দ-অপ, ইন্নোবেসন, দিজিতেল, লাইরিক-লাইশু, নাৎ অমসুং তুরিজমগী লমদা মতেং পাংনবা হেনগৎহনবগী দরকার ওইবা অদু মখোয়না খন্নখি। হুমেন ত্রাফিক্কিং, দ্রগ ললোনবা অমসুং সাইবর স্কামশিং য়াওনা ঙমখৈ লান্না পাংথোকপা ফত্তবা থবকশিং থিংনবা মপুংফানা মতেং পাংন্নবা লম্বীশিংশু মখোয়না খন্নখি। বিমস্তেক, অসিয়ান অমসুং মেকোং গঙ্গা কোওপরেসন য়াওনা লৈবাকশিং অমসুং মালেমগী থাক্ত হেন্না চেৎনবা মতেং পাংন্নবা লম্বীশিং অমসুং মালেমগী ওইবা ৱাফমশিংগী মতাংদা প্রধান মন্ত্রী অনিনা মখোয়গী ওইবা ৱাফমশিং ফোঙদোক্নখি।
ইন্দিয়া-থাইলেন্দ স্ত্রাতেজিক পার্তনরশিপ লিংখৎনবা অপুনবা লাউথোক ৱারোল খুৎশীন্নবদা লুচিংবা অনি শরুক য়াখি। হেন্দলুমস অমসুং হেন্দিক্রাফ; দিজিতেল তেক্নোলোজিশিং; মাইক্রো, স্মোল অমসুং মেদিয়ম ইন্তরপ্রাইজেস; অমসুং মেরিতাইম হেরিতেজগী হিরমশিংদা এম.ও.য়ুশিং খুৎশীন্নবদা লুচিংবশিংশু শরুক য়াখি। লৈবাক অনিগী মরক্ত মীগা মীগা লৈনবা মরীশিং মখা তানা ফগৎনবা ইন্দিয়া-থাইলেন্দ কন্সুলার দাইলোগ অমা লিংখৎপদশু লুচিংবা অনিমক্না তরাম্না ওকখ্রে। খোঙচৎ অসিদা য়ানখিবা ৱাফমশিংগী মমিং মফম অসিদা লৈরে।
মরুপ-মপাং ওইবগী খুদম অমা ওইনা, প্রধান মন্ত্রীগী খোঙচৎ অসি ইকায়খুম্নবা উৎপা ওইনা থাইলেন্দ সরকারনা ১৮শুবা চহিচাগী রামায়ান মুরেল পেন্তিংশিং য়াওবা অখন্নবা পোস্তেচ স্তাম্প অমা ফোঙখি। প্রধান মন্ত্রী সিনৱাত্রানা প্রধান মন্ত্রী মোদীদা পালি লোলদা ইবা বুদ্ধিস্তগী অশেংবা লাইরিক তি-পিতাকাগী অখন্নবা ইদিসন অমা খুদোল তমখি। ভারত অমসুং থাইলেন্দগী সভেত্যগী মরীশিং মখা তানা ফগৎনবা খোঙথাং অমা ওইনা, মীয়াম্না ইকায়খুম্নবা উৎনবা, গুজরাত্তগী ফংখিবা ভগবান বুদ্ধগী শেংলবা হকচাংগী শরুক থাইলেন্দা থারক্নবা প্রধান মন্ত্রীনা লাউথোকখি। হৌখিবা চহিদা, ভগবান বুদ্ধ অমসুং মহাক্কী সেবক অনিগী শেংলবা হকচাংগী শরুকশিং ভারত্তগী থাইলেন্দা থাখি অমসুং মীওই মিল্লিয়ন ৪ হেনবনা ইকায়খুম্নবা উৎখি।
